Kerala

കാസർകോഡ്:നാലുലക്ഷം രൂപ വിലമതിക്കുന്ന ചന്ദനമുട്ടിയുമായി രണ്ടുപേർ പിടിയിൽ.ബേഡഡുക്ക പന്നിയാടിയിലെ ഹംസ,കുണ്ടംകുഴി കാരക്കാട്ടെ കൃഷ്‌ണൻ എന്നിവരെയാണ്  20 കിലോഗ്രാം ചന്ദനമുട്ടിയുമായി പോലീസ് പിടികൂടിയത്. ഇവരോടൊപ്പമുണ്ടായിരുന്ന മുഹമ്മദ് എന്നയാൾ ഓടി രക്ഷപ്പെട്ടു.ഇന്നലെ ഉച്ചയോടെ ഹംസയുടെ വീട്ടിൽ നിന്നാണ് കാസർകോഡ് ഫോറസ്റ്റ് റേഞ്ച് ഓഫീസർ എൻ.അനിൽ കുമാറും സംഘവും ചന്ദനമുട്ടി പിടികൂടിയത്.സ്വകാര്യ ഭൂമിയിൽ നിന്നും മുറിച്ച ചന്ദനം വീട്ടിനുള്ളിൽ വെച്ച് വൃത്തിയാക്കുന്നതിനിടെയാണ് ഇവരെ ഫോറെസ്റ്റ് അധികൃതർ വളഞ്ഞത്.രണ്ടു കിലോഗ്രാം ചന്ദന ചീളുകളും പിടിച്ചെടുത്തിട്ടുണ്ട്.വനം വകുപ്പ് ഉദ്യോഗസ്ഥർക്ക് കിട്ടിയ രഹസ്യ വിവരത്തിന്റെ അടിസ്ഥാനത്തിലാണ് പരിശോധന നടത്തിയത്.രക്ഷപ്പെട്ടയാൾക്കായുള്ള തിരച്ചിൽ തുടരുകയാണ്.പ്രതികളെ ഇന്ന് രാവിലെ കാസർകോഡ് ചീഫ് ജുഡീഷ്യൽ മജിസ്‌ട്രേറ്റ് കോടതിയിൽ ഹാജരാക്കും.

പാനൂർ:ചമ്പാട് റോഡിൽ കുന്നോത്ത്‌പീടികയിൽ സിപിഎം ഓഫീസായി പ്രവർത്തിക്കുന്ന ഷെഡ്ഡ് തകർത്തു.കാരംസ് ബോർഡ്,കൊടികൾ,കസേരയടക്കമുള്ള ഫർണിച്ചറുകൾ എന്നിവയും തകർത്തു.ഷെഡിന്റെ മുകൾ ഭാഗത്തെ ഷീറ്റുകളും നശിപ്പിച്ചു.ആക്രമണത്തിന് പിന്നിൽ ആർ എസ് എസ് ആണെന്ന് സിപിഎം ആരോപിച്ചു.

കണ്ണൂർ:ബിജെപി സംസ്ഥാന അധ്യക്ഷൻ കുമ്മനം രാജശേഖരൻ നയിക്കുന്ന ജനരക്ഷാ യാത്രയ്ക്ക് ഇന്ന് പയ്യന്നൂരിൽ തുടക്കമാകും.ബിജെപി ദേശീയ അധ്യക്ഷൻ അമിത് ഷാ യാത്ര ഉൽഘാടനം ചെയ്യും.അഹമ്മദാബാദിൽ നിന്നും പ്രത്യേക വിമാനത്തിൽ ഇന്ന് പുലർച്ചെ മംഗളൂരുവിലെത്തിയ അദ്ദേഹം റോഡ് മാർഗം ബേക്കൽ താജ് ഹോട്ടലിലെത്തി.തളിപ്പറമ്പ് രാജരാജേശ്വരി ക്ഷേത്രത്തിൽ ദർശനം നടത്തിയ ശേഷം പയ്യന്നൂരിലെ ഉൽഘാടന വേദിയിലെത്തും.രാവിലെ പത്തുമണിയോടെയാണ് ഉൽഘാടന ചടങ്ങ് ആരംഭിക്കുക.ഇതിനു ശേഷം ഉച്ചയ്ക്ക് മൂന്നു മണിയോടെയാണ് അമിത ഷാ പങ്കെടുക്കുന്ന പദയാത്ര ആരംഭിക്കുന്നത്.പയ്യന്നൂർ മുതൽ പിലാത്തറ വരെയുള്ള യാത്രയിൽ അമിത് ഷായും പങ്കെടുക്കും.ജനരക്ഷാ യാത്രയുടെ പശ്ചാത്തലത്തിൽ കണ്ണൂരിൽ കനത്ത സുരക്ഷയാണ് ഒരുക്കിയിരിക്കുന്നത്.കണ്ണൂരിൽ നിന്നുള്ള മുഴുവൻ സേനയ്ക്കും പ്രത്യേക സുരക്ഷാ വിഭാഗങ്ങൾക്കും പുറമെ സമീപ ജില്ലകളിലെ ഡിവൈഎസ്പിമാരെയും സിഐമാരെയും സുരക്ഷയ്ക്കായി നിയോഗിച്ചിട്ടുണ്ട്.11 ജില്ലകളിലായി നടക്കുന്ന യാത്ര സെപ്റ്റംബർ 23 ന് തിരുവനന്തപുരത്ത് സമാപിക്കും

കണ്ണൂർ:ചൊവ്വ,ബുധൻ ദിവസങ്ങളിൽ റേഷൻ കടകൾ അടച്ചിട്ട് റേഷൻ വ്യാപാരികൾ പണിമുടക്കും.വേതന പാക്കേജ് ഉടൻ നടപ്പിലാക്കണമെന്നും റേഷൻ വിതരണത്തിലെ അഴിമതി അവസാനിപ്പിക്കാൻ റേഷൻ കടകളിൽ ഇ-പോസ് യന്ത്രം സ്ഥാപിച്ച് കംപ്യുട്ടർവൽക്കരണം നടപ്പിലാക്കണമെന്നും ആവശ്യപ്പെട്ടാണ് സമരം.ഓൾ കേരള റീറ്റെയ്ൽ റേഷൻ ഡീലേഴ്‌സ് അസോസിയേഷൻ,ഓൾ ഇന്ത്യ റേഷൻ ഡീലേഴ്‌സ് അസോസിയേഷൻ എന്നീ സംഘടനകളാണ് സമരത്തിന് ആഹ്വാനം നൽകിയിരിക്കുന്നത്.മുഖ്യമന്ത്രി വേതന പാക്കേജ് അംഗീകരിച്ചു എങ്കിലും ഭക്ഷ്യവകുപ്പ് നടപ്പിലാക്കാത്തതിൽ പ്രതിഷേധിച്ചാണ് സമരം.

കൊച്ചി:നടി ആക്രമിക്കപ്പെട്ട കേസിൽ നടൻ ദിലീപിനെതിരായ കുറ്റപത്രം വെള്ളിയാഴ്ച സമർപ്പിക്കും.ഈ മാസം എട്ടിന് ദിലീപ് അറസ്റ്റിലായി 90 ദിവസം പൂർത്തിയാകാനിരിക്കെ സ്വാഭാവിക ജാമ്യം കിട്ടുന്നത് തടയാനാണ് പോലീസ് വെള്ളിയാഴ്ച തന്നെ കുറ്റപത്രം സമർപ്പിക്കാൻ ഒരുങ്ങുന്നത്.ദിലീപിനെതിരെ നിർണായകമായ തെളിവുകൾ ഉണ്ടെന്നാണ് പോലീസ് നൽകുന്ന സൂചന.കേസിൽ ഇതുവരെ 21 പേരുടെ രഹസ്യമൊഴി പോലീസ് രേഖപ്പെടുത്തി കഴിഞ്ഞു.കുറ്റപത്രം സമർപ്പിക്കുന്നതിന് മുൻപായി നാലുപേരുടെ രഹസ്യമൊഴി കൂടി അന്വേഷണ സംഘം രേഖപ്പെടുത്തും.നടിയെ ആക്രമിക്കുന്ന ദൃശ്യങ്ങൾ അടങ്ങിയ രണ്ട് മെമ്മറി കാർഡ് പോലീസിന്റെ പക്കലുണ്ട്.ഇതിനോടൊപ്പം ചില നിർണായക മൊഴികളും കുറ്റപത്രത്തോടൊപ്പം ഉണ്ടാകുമെന്നു പോലീസ് പറയുന്നു.അതിനിടെ കേസിൽ ദിലീപ് സമർപ്പിച്ചിരിക്കുന്ന ജാമ്യാപേക്ഷയും ഹൈക്കോടതി ഈയാഴ്ച പരിഗണിക്കും.