Kerala

കണ്ണൂർ:പശുവിനെ മോഷ്ടിച്ച് അറുത്തു വിറ്റയാൾ പോലീസ് പിടിയിലായി.മടക്കര സ്വദേശിയായ കൊവ്വമ്മൽ ആഷിക്കിനെയാണ് പോലീസ് അറസ്റ്റ് ചെയ്തത്.കഴിഞ്ഞ വ്യാഴാഴ്ചയാണ് ഇടക്കേപ്പുറം പടിഞ്ഞാറേ മുണ്ടവളപ്പിൽ വത്സലന്റെ നാലുവയസ്സുള്ള കറുത്ത  പശുവിനെ കാണാതായത്. പശുവിനെ കെട്ടിയിരുന്ന കയറിന്റെ ഒരുകഷ്ണം സ്ഥലത്തു ഉപേക്ഷിക്കപ്പെട്ട നിലയിൽ കണ്ടെത്തി.തുടർന്നാണ് പശുവിനെ ആരോ മോഷ്ടിച്ചതാണെന്ന് മനസ്സിലായത്.തുടർന്ന് വത്സലൻ പോലീസിൽ പരാതി നൽകി.പരാതി ലഭിച്ചതിനെ തുടർന്ന് സ്ഥലത്തെത്തിയ പോലീസ് പശുവിന്റെ കാൽപ്പാടുകൾ പിന്തുടർന്നു.വത്സലന്റെ വീട് മുതൽ മാട്ടൂൽ വയൽക്കരവരെ കാലടിയുണ്ടായിരുന്നു.പിന്നീട് ഒന്നും കണ്ടില്ല.ഇതോടെ പശുവിനെ അറുത്തിട്ടുണ്ടാകുമെന്ന് സംശയമായി.വളപട്ടണത്തെ ഒരു തുകൽ ഫാക്റ്ററിയിൽ നിന്നും പശുവിന്റെ കറുത്ത തുകലും ലഭിച്ചു.തുകൽ എവിടെ നിന്നും കൊണ്ടുവന്നതാണെന്നറിയാൻ സമീപത്തുള്ള അറവുശാലകളിൽ അന്വേഷിച്ചു.അവിടെയൊന്നും പശുവിനെ അറുത്തിട്ടില്ലെന്നു ബോധ്യമാവുകയും പശുവിനെ വേണമെന്ന് അന്വേഷിച്ചിറങ്ങിയ ഒരു സംഘത്തെ കുറിച്ച് അവിടെ നിന്നും സൂചന ലഭിക്കുകയും ചെയ്തു.തുടർന്ന് നടത്തിയ അന്വേഷണത്തിൽ പുഴയുടെ കരയിൽ കൂട്ടിയിട്ടിരുന്ന മണൽ വാരാൻ ഉപയോഗിക്കുന്ന ചീനകളുടെ മറവിൽ പശുവിനെ അറുത്തതിന്റെ ലക്ഷണങ്ങൾ കണ്ടെത്തി.അവിടെ നിന്നും ലഭിച്ച കയറിന്റെ കഷ്ണങ്ങൾ വത്സലനെ കാണിച്ചപ്പോൾ അത് തന്റെ പശുവിനെ കെട്ടിയതായിരുന്നെന്നു ബോധ്യമായി.തുടർന്ന് ഇവിടെ അറവ് നടത്തുന്നവരെ ചോദ്യം ചെയ്തപ്പോൾ പശുവിനെ വിറ്റയാളെയും മനസിലായി.പിന്നീട് പോലീസ് ആഷിക്കിനെ കസ്റ്റഡിയിലെടുക്കുകയായിരുന്നു.ചോദ്യം ചെയ്യലിൽ കുറ്റം സമ്മതിച്ച ഇയാളെ പോലീസ് അറസ്റ്റ് ചെയ്തു.

അടിമാലി:അടിമാലിയിൽ സാമൂഹിക പ്രവർത്തകയെ വെട്ടേറ്റ് മരിച്ച നിലയിൽ കണ്ടെത്തി.പതിനാലാം മൈൽ അബ്ദുൽ സിയാദിന്റെ ഭാര്യ സലീനയാണ്(41) കൊല്ലപ്പെട്ടത്. ഇന്നലെ രാത്രി എട്ടരയോടെയാണ് വീടിന്റെ പിൻഭാഗത്ത് മൃതദേഹം കണ്ടെത്തിയത്. മത്സ്യവ്യാപാരിയായ ഭർത്താവ് രാത്രി വീട്ടിലെത്തിയപ്പോൾ വീട് പൂട്ടിയിരിക്കുന്നതും ലൈറ്റുകൾ തെളിക്കാത്തതും കണ്ട് അന്വേഷിച്ചപ്പോഴാണ് വീടിന്റെ പിൻഭാഗത്ത് സലീനയുടെ മൃതദേഹം വെട്ടേറ്റ നിലയിൽ കണ്ടെത്തിയത്.ഇയാളുടെ നിലവിളി കേട്ട് സമീപത്തുള്ള സ്ഥാപനത്തിൽ നിന്നുള്ളർ അടക്കം ഓടിയെത്തുകയായിരുന്നു.ഇടതു നെഞ്ചിനു സമീപം വെട്ടേറ്റു മാരകമായി മുറിഞ്ഞ നിലയിലാണ് മൃതദേഹം കണ്ടത്.അടിമാലി സി.ഐ പി.കെ സാബുവിന്റെ നേതൃത്വത്തിലുള്ള പോലീസ് സംഘം സ്ഥലത്തെത്തി അന്വേഷണം ആരംഭിച്ചു.എൽ എൽ ബി ബിരുദധാരിയായ സെലീന ചൈൽഡ് ലൈൻ പ്രവർത്തകയായിരുന്നു.പബ്ലിക് സോഷ്യൽ ജസ്റ്റിസ്,സൈക്കോളജിസ്റ്റ് എന്നീ നിലകളിലും പ്രവർത്തിച്ചിരുന്നു.സംഭവവുമായി ബന്ധപ്പെട്ട് തൊടുപുഴ വണ്ടമറ്റം പടിക്കുഴി റിജോഷിനെ പോലീസ് പിടികൂടിയിട്ടുണ്ട്.ഇന്ന് പുലർച്ചെ തൊടുപുഴയിലെ വീട്ടിൽ നിന്നാണ് റിജോഷിനെ പോലീസ് അറസ്റ്റ് ചെയ്തത്.

കോഴിക്കോട്:പി വി അന്‍വര്‍ എംഎല്‍യുടെ പാര്‍ക്കിന് പ്രവര്‍ത്തനം തുടരാമെന്ന് ഹൈക്കോടതി. പാര്‍ക്ക് പരിസ്ഥിതി മലിനീകരണ നിയന്ത്രണ ചട്ടങ്ങള്‍ പാലിക്കുന്നുണ്ടെന്ന് മലിനീകരണ നിയന്ത്രണ ബോര്‍ഡ് കഴിഞ്ഞദിവസം കോടതിയില്‍ റിപ്പോര്‍ട്ട് നല്‍കിയിരുന്നു. ഇതിന്റെ അടിസ്ഥാനത്തിലാണ് കോടതി പ്രവര്‍ത്താനാനുമതി നല്‍കിയത്.

കണ്ണൂർ:നാറാത്ത് ആയുധ പരിശീലന കേസിലെ മുഖ്യപ്രതി അസ്ഹറുദ്ധീൻ അറസ്റ്റിൽ. കാൺപൂരിൽ ഒളിവിൽ കഴിയുകയായിരുന്ന അസ്ഹറുദീനെ എൻ.ഐ.എ സംഘം അറസ്റ്റ് ചെയ്യുകയായിരുന്നു.ഇതോടെ കേസിൽ എല്ലാ പ്രതികളും പിടിയിലായി.കേസിൽ നേരത്തെ ഇരുപതുപേർ അറസ്റ്റിലായിരുന്നു.2013 ഏപ്രിലിലാണ് നാറാത്തെ അടച്ചിട്ട വീട്ടിൽ ആയുധ പരിശീലന കേന്ദ്രം പോലീസ് കണ്ടെത്തിയത്.തീവ്രവാദ പ്രവർത്തനങ്ങൾക്കായി യുവാക്കളെ റിക്രൂട്ട് ചെയ്യുക,ആയുധ പരിശീലനം നൽകുക തുടങ്ങിയ കുറ്റമാണ് ഇവർക്കെതിരെ ചുമത്തിയിരിക്കുന്നത്.അസ്ഹറുദീന്റെ മയ്യിൽ ടൗണിനടുത്തുള്ള ബാങ്ക് വഴിയാണ് ആയുധ പരിശീലനത്തിനും തീവ്രവാദ പ്രവർത്തനങ്ങൾക്കുമുള്ള പണം എത്തുന്നതെന്ന് എൻഐഎ നേരത്തെ കണ്ടെത്തിയിരുന്നു.അതേസമയം കേസിൽ കഴിഞ്ഞ ജനുവരിയിൽ വിചാരണ പൂർത്തിയാക്കി കോടതി വിധി പറഞ്ഞിരുന്നു.ഒന്നാം പ്രതിക്ക് ഏഴു വർഷം തടവും 5000 രൂപ പിഴയുമാണ് കോടതി വിധിച്ചത്.മറ്റു പ്രതികൾക്ക് അഞ്ചു വർഷം തടവും 5000 രൂപ പിഴയും കോടതി വിധിച്ചിരുന്നു.പിഴ അടച്ചില്ലെങ്കിൽ ആറുമാസം അധിക തടവ് അനുഭവിക്കേണ്ടിവരുമെന്നും കോടതി വ്യക്തമാക്കിയിരുന്നു. കേരളാ പോലീസ് അന്വേഷിച്ച കേസ് പിന്നീട് എൻഐഎ ഏറ്റെടുക്കുകയായിരുന്നു.