Kerala

ആലുവ:പിതാവിനൊപ്പം സ്കൂട്ടറിൽ സഞ്ചരിക്കുകയായിരുന്ന ഫെഡറൽ ബാങ്ക് ജീവനക്കാരി ബസ്സിടിച്ച് മരിച്ചു.ഫെഡറൽ ബാങ്ക് തിരൂർ ശാഖയിലെ ജീവനക്കാരി ആലുവ മുപ്പത്തടം സ്വദേശി ജെറോച്ചന്റെ മകൾ അനീസ ഡോളിയാണ്(20) മരിച്ചത്.അനീസ സംഭവ സ്ഥലത്തു വെച്ച് തന്നെ മരിച്ചു.പിതാവിനെ നിസാര പരിക്കുകളോടെ ആശുപത്രിയിൽ പ്രവേശിപ്പിച്ചു.ഇന്ന് രാവിലെ ആറരമണിയോടെയാണ് അപകടം നടന്നത്.ആലുവയിൽ നിന്നും എറണാകുളത്തേക്ക് പോവുകയായിരുന്ന സ്വകാര്യ ബസ്സ് ഇവർ സഞ്ചരിച്ചിരുന്ന സ്കൂട്ടറിന് പിന്നിൽ ഇടിക്കുകയായിരുന്നു. ഇടിയുടെ ആഘാതത്തിൽ സ്കൂട്ടറിൽ നിന്നും തെറിച്ചു വീണ അനീസയുടെ മുകളിൽ കൂടി ബസ് കയറിയിറങ്ങുകയായിരുന്നു.മൃതദേഹം ആലുവ ജില്ലാ ആശുപത്രിയിലേക്ക് മാറ്റി.സംഭവം നടന്നയുടനെ ബസ് ഡ്രൈവർ ഓടി രക്ഷപ്പെട്ടു.ഇയാൾ മദ്യലഹരിയിൽ ആയിരുന്നുവെന്നു സംശയമുള്ളതായി ബസ്സിലുള്ള ചില യാത്രക്കാർ പൊലീസിന് മൊഴി നൽകിയിട്ടുണ്ട്.മൂന്നാഴ്ച മുൻപാണ് അനീസയ്ക്ക് ബാങ്കിൽ ക്ലർക്കായി ജോലി ലഭിച്ചത്.

കണ്ണൂർ:സംസ്ഥാനത്തെ മുഴുവൻ റേഷൻ വ്യാപാരികളും നവംബർ ആറ് മുതൽ അനിശ്ചിതകാലത്തേക്ക് കടകൾ അടച്ചിടാൻ തീരുമാനം.മുഖ്യമന്ത്രി റേഷൻ വ്യാപാരികൾക്ക് അനുവദിച്ച പാക്കേജ് നടപ്പാക്കുക,വാതിൽപ്പടി വിതരണത്തിലെ അപാകതകൾ പരിഹരിക്കുക തുടങ്ങിയ ആവശ്യങ്ങൾ ഉന്നയിച്ചാണ് സമരം.സമരത്തിൽ ചക്കരക്കൽ ഫർക്ക കമ്മിറ്റിയുടെ കീഴിലുള്ള എൺപത്തഞ്ചോളം റേഷൻ വ്യാപാരികൾ നവംബർ നാലിന് റേഷൻ കടകൾ അടച്ചു താക്കോൽ കണ്ണൂർ ജില്ലാ സംയുക്ത സമര സമിതി ഓഫീസിൽ ഏൽപ്പിക്കാൻ ചക്കരക്കല്ലിൽ നടന്ന യോഗം തീരുമാനിച്ചു.

തളിപ്പറമ്പ്:കണ്ണൂർ ജില്ലാ സഹകരണ ബാങ്ക് തളിപ്പറമ്പ് ശാഖയിൽ നടന്ന മുക്കുപണ്ട തട്ടിപ്പിൽ കാണാതായ പണയാഭരണങ്ങൾ പോലീസ് കണ്ടെടുത്തു.മറ്റു സഹകരണ ബാങ്കുകളിൽ നിന്നാണ് ഇവ കണ്ടെടുത്തത്.കണ്ണപുരം സർവീസ് സഹകരണ ബാങ്കിന്റെ കതിരുവെയ്ക്കുംതറ ബ്രാഞ്ച്,പട്ടുവം സർവീസ് സഹകരണ ബാങ്കിന്റെ വെള്ളിക്കീൽ ബ്രാഞ്ച് എന്നിവിടങ്ങളിൽ നിന്നാണ് കൂടുതൽ ആഭരണങ്ങളും കണ്ടെടുത്തത്.മുഖ്യപ്രതി രമയുടെ പേരിലാണ് സ്വർണാഭരണങ്ങൾ.കോടതിയിൽ നിന്നും കസ്റ്റഡിയിൽ വാങ്ങിയ പ്രതിയെയും കൊണ്ട് പോലീസ് ഇന്നലെ തെളിവെടുപ്പ് ആരംഭിച്ചിരുന്നു.തളിപ്പറമ്പ് ശാഖയിൽ സ്വർണം പണയപ്പെടുത്തിയവരെയും കൂട്ടിയാണ് പോലീസ് മറ്റു ബാങ്കുകളിൽ തെളിവെടുപ്പിനായി പോയത്.14 പേരുടെ  ആഭരണങ്ങൾ കണ്ണപുരം,വെള്ളിക്കീൽ ബാങ്കുകളിൽ നിന്നും കണ്ടെടുത്തു.ഒന്നേമുക്കാൽ കിലോയോളം തൂക്കം വരുന്ന സ്വർണാഭരണങ്ങൾ വിവിധ ബാങ്കുകളിൽ നിന്നായി പോലീസ് കണ്ടെടുത്തു.കണ്ണപുരം,വെള്ളിക്കീൽ ബ്രാഞ്ചുകളിൽ നിന്നായി 14 ലക്ഷം രൂപ വീതം ആഭരണത്തിൽ വായ്‌പ്പാ വാങ്ങിയതായി കണ്ടെത്തിയിട്ടുണ്ട്. കൂടാതെ മുഖ്യപ്രതിയായ അസിസ്റ്റൻഡ് മാനേജർ രമ തളിപ്പറമ്പ് ബ്രാഞ്ചിൽ മറ്റുള്ളവരുടെ ആഭരണം സ്വന്തം പേരിൽ പണയപ്പെടുത്തിയതായും പോലീസ് പറഞ്ഞു.പ്രതികളെ തിങ്കളാഴ്ച്ച കോടതിയിൽ ഹാജരാക്കും.