Kerala

തലശ്ശേരി:തലശ്ശേരി നഗരസഭാ ഉപാധ്യക്ഷ നജ്മ ഹാഷിമിന്റെ വീടിനു നേരെ അക്രമം. അക്രമത്തിൽ നജ്മ ഹാഷിമിനും ഭർത്താവ് വി.സി ഹാഷിമിനും പരിക്കേറ്റിട്ടുണ്ട്. സംഭവത്തിൽ കണ്ടാലറിയാവുന്ന അഞ്ചുപേർക്കെതിരെ പോലീസ് കേസെടുത്തു.ശനിയാഴ്ച രാത്രിയാണ് അക്രമം നടന്നത്.അക്രമത്തിൽ വീടിന്റെ ജാനാലകൾ തകരുകയും അടുക്കളഭാഗത്തു നിർത്തിയിട്ടിരുന്ന സ്കൂട്ടർ വെട്ടിക്കീറി  നശിപ്പിക്കുകയും ചെയ്തു. ജനാലചില്ല് തെറിച്ചാണ് നജ്മയ്ക്കും ഭർത്താവിനും പരിക്കേറ്റത്.അക്രമികളെ കണ്ടെത്താൻ സമീപ വീടുകളിലെ സിസിടിവി ദൃശ്യങ്ങളും പോലീസ് പരിശോധിക്കും.അതേസമയം വീടിനു നേരെയുണ്ടായ അക്രമത്തിനു ശേഷം നജ്മയുടെ മകളുടെ പത്തുമാസം പ്രായമുള്ള കുഞ്ഞിനെ ശ്വാസതടസ്സമുണ്ടായതിനെ തുടർന്ന് ആശുപത്രിയിൽ പ്രവേശിപ്പിച്ചു.വീടിന്റെ ചില്ലുകളും മറ്റും എറിഞ്ഞു തകർക്കുന്ന ശബ്ദം കേട്ട് ഭയന്ന് നിലവിളിച്ചതുകൊണ്ടാണ് കുഞ്ഞിന് ശ്വാസതടസ്സം അനുഭവപ്പെട്ടത്.ആക്രമണത്തിന് പിന്നിൽ ആർഎസ്എസ് ആണെന്ന് നജ്മയുടെ വീട് സന്ദർശിച്ചതിനു ശേഷം സിപിഎം ജില്ലാ സെക്രെട്ടറി പി.ജയരാജൻ പറഞ്ഞു.എന്നാൽ അക്രമത്തിൽ തങ്ങൾക്ക് പങ്കില്ലെന്ന് ആർഎസ്എസ് മണ്ഡലം കമ്മിറ്റി പ്രസ്താവനയിൽ അറിയിച്ചു.

തിരുവനന്തപുരം:ഭൂമി കയ്യേറ്റ പ്രശ്നത്തിൽ ആരോപണം നേരിടുന്ന മന്ത്രി തോമസ് ചാണ്ടിയുടെ രാജി ആവശ്യപ്പെട്ട് ബിജെപി പ്രവർത്തകർ സെക്രെട്ടറിയേറ്റ് വളയുന്നു.മൂന്നു ഗെയ്റ്റുകൾ അടച്ചാണ് സംസ്ഥാന വ്യാപകമായി പ്രവർത്തകരെ അണിനിരത്തി ഉപരോധ സമരം. ജീവനക്കാർക്ക് സെക്രെട്ടറിയേറ്റിനു ഉള്ളിൽ കടക്കുന്നതിനായി ഒരു ഗേറ്റ് മാത്രമാണ് ഒഴിച്ചിട്ടിരിക്കുന്നത്.പത്തുമണിക്ക് സമരം ബിജെപി സംസ്ഥാന പ്രസിഡന്റ് കുമ്മനം രാജശേഖരൻ ഉൽഘാടനം ചെയ്യും.ഉപരോധത്തിൽ പങ്കെടുക്കുന്നതിനായി  സംസ്ഥാനത്തിന്റെ വിവിധ ഭാഗങ്ങളിൽ നിന്നായി നിരവധി പ്രവർത്തകർ സെക്രെട്ടറിയേറ്റിലേക്ക് എത്തിക്കൊണ്ടിരിക്കുകയാണ്.തോമസ് ചാണ്ടിയുടെ കയ്യേറ്റത്തിന് സർക്കാരിന്റെ ഒത്താശയുണ്ട്.മുഖ്യമന്തി തോമസ് ചാണ്ടിയെ ഭയപ്പെടുന്നു.അഴിമതിയും അവിഹിത ബന്ധങ്ങളും ചേർന്ന രണ്ടു മൂലകങ്ങളാണ് സർക്കാരിനെ വേട്ടയാടുന്നതെന്നും തോമസ് ചാണ്ടിയെ പുറത്താക്കിയാൽ അദ്ദേഹം ഇത് പുറത്തു വിടുമെന്ന് മുഖ്യമന്ത്രി ഭയപ്പെടുന്നതായും ബിജെപി നേതാവ് കൃഷ്ണദാസ് ആരോപിച്ചു.

തൃശൂർ:പായ്ക്കറ്റ് ചപ്പാത്തി കഴിച്ച മൂന്നു വയസ്സുകാരന് ഭക്ഷ്യ വിഷബാധയേറ്റു.ഛർദിയും വയറിളക്കവും അനുഭവപ്പെട്ടതിനെ തുടർന്ന് കുട്ടിയെ ചാവക്കാട് സ്വകാര്യ ആശുപത്രിയിൽ പ്രവേശിപ്പിച്ചു.അടുത്ത ബുധനാഴ്ച വരെ ഉപയോഗിക്കാം എന്ന കാലാവധി രേഖപ്പെടുത്തിയ പായ്‌ക്കറ്റിലെ എല്ലാ ചപ്പാത്തിയിലും പൂപ്പൽ ബാധിച്ചിരുന്നതായി കുട്ടിയുടെ പിതാവ് പറഞ്ഞു. ചപ്പാത്തിയിൽ വെളുത്ത പൊടി കണ്ടിരുന്നെങ്കിലും ഗോതമ്പ് പൊടി ആകുമെന്ന് കരുതി വീട്ടുകാർ ആദ്യം ശ്രദ്ധിച്ചില്ല.എന്നാൽ കുട്ടിക്ക് അസ്വസ്ഥത അനുഭവപ്പെട്ടതിനെ തുടർന്ന് മറ്റു ചപ്പാത്തികൾ ശ്രദ്ധിച്ചപ്പോഴാണ് പൂപ്പൽ ബാധ കണ്ടെത്തിയത്.സംഭവത്തിൽ ഭക്ഷ്യ വകുപ്പിന് പരാതി നൽകുമെന്ന് വീട്ടുകാർ അറിയിച്ചു.

തളിപ്പറമ്പ്:കടലിലകപ്പെട്ട എട്ട് മത്സ്യത്തൊഴിലാളികളെ രക്ഷപ്പെടുത്തി.കോഴിക്കോട് പുതിയാപ്പയിലെ മൽസ്യത്തൊഴിലാളികളായ ഇവരെ അഴീക്കൽ കോസ്റ്റൽ പോലീസും മറൈൻ എൻഫോഴ്‌സ്‌മെന്റും ചേർന്നാണ്  രക്ഷപ്പെടുത്തിയത്.വെള്ളിയാഴ്ച രാത്രിയോടെ ഇവർ മത്സ്യബന്ധനത്തിന് പോയ അനുഗ്രഹ എന്ന ബോട്ട് നിന്ന് പോവുകയും ബോട്ടിൽ വെള്ളം കയറുകയും ചെയ്തതോടെയാണ് ഇവർ കടലിൽ കുടുങ്ങിയത്.ചെറുവത്തൂരിനും നീലേശ്വരത്തിനും ഇടയിൽ പതിനെട്ട് നോട്ടിക്കൽ മൈൽ അകലെയാണ് അപകടം നടന്നത്.വിവരം ലഭിച്ചതിനെ തുടർന്ന് അഴീക്കൽ കോസ്റ്റൽ പോലീസും മറൈൻ എൻഫോഴ്‌സ്‌മെന്റും ചേർന്നാണ് രക്ഷ പ്രവർത്തനം നടത്തിയത്.അപകടത്തിൽപ്പെട്ട ബോട്ടും കെട്ടിവലിച്ചു കരയ്‌ക്കെത്തിച്ചു. Read more