Kerala

ഇരിട്ടി:ആനപ്പന്തി സർവീസ് സഹകരണ ബാങ്ക് ഭരണം യുഡിഎഫ് നിലനിർത്തി.അങ്ങാടിക്കടവ് ഹയർ സെക്കണ്ടറി സ്കൂളിലാണ് തിരഞ്ഞെടുപ്പ് നടന്നത്. ഹൈക്കോടതി നിർദേശത്തെ തുടർന്ന് കനത്ത സുരക്ഷാവലയത്തിലാണ് തിരഞ്ഞെടുപ്പ് നടന്നത്.എങ്കിലും ഒറ്റപ്പെട്ട അക്രമസംഭവങ്ങളുണ്ടായി.രാവിലെ വോട്ടുചെയ്യാനെത്തിയവരെ തടഞ്ഞു നിർത്തി തിരിച്ചറിയൽ കാർഡ് കീറിക്കളഞ്ഞത് സംഘർഷത്തിനിടയാക്കി.എന്നാൽ പോലീസിന്റെ ഇടപെടലിനെ തുടർന്ന് അക്രമികൾ പിന്തിരിഞ്ഞു.വോട്ടുചെയ്യാനെത്തിയ കോൺഗ്രസ് പ്രവർത്തകരായ വിത്സൺ പ്ലാത്തോട്ടത്തിൽ,കച്ചേരിപ്പറമ്പിലെ കുറുപ്പൻപറമ്പിൽ വിത്സൺ എന്നിവരുടെ ജീപ്പിന്റെ ഗ്ലാസുകൾ എറിഞ്ഞു തകർത്തു.ബാങ്കിൽ നിന്നും കൈപ്പറ്റിയ തിരിച്ചറിയൽ കാർഡിലെ ഒപ്പും ബാങ്ക് രെജിസ്റ്ററിലെ ഒപ്പും തമ്മിൽ ഒത്തുനോക്കിയാണ് വോട്ട് ചെയ്യാൻ അനുവദിച്ചത്.എന്നാൽ ഒപ്പുകളിലുണ്ടായ വ്യത്യാസം കാരണം ഒട്ടേറെപ്പേർക്ക് വോട്ട്ചെയ്യാൻ കഴിഞ്ഞില്ല.ഇതിനെ ചൊല്ലിയും ഒരുമണിക്കൂറോളം പോളിംഗ് നിർത്തിവെച്ചു.നൂറുകണക്കിന് പോലീസുകാരെയാണ് സുരക്ഷയ്ക്കായി നിയോഗിച്ചിരുന്നത്.

കൊച്ചി:നടൻ ദിലീപ് ഇന്ന് ദുബായിയിലെ കരാമയിലേക്ക് തിരിക്കും.ജാമ്യവ്യവസ്ഥയിൽ ഇളവ് ലഭിച്ച ദിലീപ് ഇന്ന് അങ്കമാലി കോടതിയിലെത്തി പാസ്പോർട്ട് കൈപ്പറ്റും.തന്റെ ഉടമസ്ഥതയിലുള്ള ദേ പുട്ട് എന്ന വ്യാപാരസ്ഥാപനത്തിന്റെ ദുബായ് കരാമയിലുള്ള ശാഖയുടെ ഉൽഘാടത്തിനായാണ് ദിലീപ് ദുബായിലേക്ക് പോകുന്നത്.ഇതിനായി നാല് ദിവസത്തെ പ്രത്യേക അനുമതിയാണ് കോടതി ദിലീപിന് നൽകിയിരിക്കുന്നത്.ദിലീപിനൊപ്പം മകൾ മീനാക്ഷിയും ഭാര്യ കാവ്യാ മാധവനും വിദേശത്തേക്ക് പോകുന്നുണ്ട്.ദിലീപിന്റെ സുഹൃത്തും നടനുമായ നാദിർഷായുടെ ഉമ്മയാണ് സ്ഥാപനത്തിന്റെ ഉൽഘാടനം നിർവഹിക്കുക.എന്നാൽ ദിലീപിന്റെ വിദേശയാത്രയെ പോലീസ് സംശയദൃഷ്ടിയോടെയാണ് കാണുന്നത്.ആക്രമിക്കപ്പെട്ട നടിയുടെ ദൃശ്യങ്ങളടങ്ങിയ മൊബൈൽ ഫോൺ വിദേശത്തേക്ക് കടത്തിയതായി പൊലീസിന് സംശയമുണ്ട്.കേസിലെ ഗൂഢാലോചന ദുബായിൽവെച്ചും നടന്നതായി പൊലീസിന് വിവരം ലഭിച്ചിട്ടുണ്ട്.ഈ സാഹചര്യത്തിൽ ദിലീപ് വീണ്ടും വിദേശത്തേക്ക് പോകുന്നത് കേസിനെ ബാധിക്കുമെന്നാണ്‌ പോലീസിന്റെ കണക്കുകൂട്ടൽ.