Kerala

കൊച്ചി:കഴിഞ്ഞ ദിവസങ്ങളിൽ കൊച്ചിയിലും മുൻപ് തിരുവനന്തപുരത്തും വീടുകളിൽ നടന്ന മോഷണങ്ങൾക്ക് പിന്നിൽ മഹാരാഷ്ട്രയിലെ അഹമ്മദ് നഗറിൽ നിന്നുള്ള സംഘമാണെന്ന് പോലീസ് നിഗമനം.2009 ഇൽ തിരുവനന്തപുരത്ത് നടന്ന കവർച്ചയ്ക്ക് പിന്നിൽ അഹമ്മദ്‌നഗറിൽ നിന്നുള്ള സംഘമായിരുന്നു. അതുകൊണ്ടു തന്നെ ഇപ്പോള്‍ നടന്ന മോഷണങ്ങള്‍ക്കുപിന്നിലും ഇവരാകാമെന്ന് കൊച്ചി റേഞ്ച് ഐ.ജി. പി. വിജയന്‍ പോലീസ് ഉദ്യോഗസ്ഥര്‍ക്കയച്ച സന്ദേശത്തില്‍ പറയുന്നു. സന്ദേശത്തിന്റെ പകര്‍പ്പ് സംസ്ഥാന പോലീസ് മേധാവി ലോക്‌നാഥ് ബെഹ്‌റയ്ക്കും ഇന്റലിജന്‍സ് മേധാവി ടി.കെ. വിനോദ്കുമാറിനും ലഭിച്ചിട്ടുണ്ട്. ഇവരുടെ സംഘത്തിൽ എട്ടിലധികം പേരുണ്ടാകും.ഇവർ ഹിന്ദി,ഇംഗ്ലീഷ് ഭാഷകൾക്ക് പുറമെ മലയാളവും സംസാരിക്കും.വലിയ വീടുകളിലാണ് ഇവർ മോഷണം നടത്തുക.കണ്ണൂര്‍, കോഴിക്കോട്, മംഗലാപുരം എന്നിവിടങ്ങളില്‍ മുന്‍പ് ഈ സംഘം മോഷണം നടത്തിയിട്ടുണ്ട്. ആശയവിനിമയത്തിന് സംഘത്തിന്റെ കൈവശം ആകെയുള്ളത് ഒരു മൊബൈല്‍ ഫോണ്‍ മാത്രമായിരിക്കും. എല്ലാ മോഷണങ്ങള്‍ക്കും പ്ലാസ്റ്റിക് കയറും സെല്ലോടേപ്പും ഇവര്‍ ഉപയോഗിക്കുന്നതായി തിരിച്ചറിഞ്ഞിട്ടുണ്ട്.വീടുകളുടെ മുൻവശത്തെ ജനാലകൾ തകർത്ത് പുറത്തുകടക്കുന്ന ഇവർ വീട്ടിലുള്ളവരെ ഉപദ്രവിക്കുകയും കൈകാലുകൾ കെട്ടിയിടുകയും സെല്ലോടേപ്പ് വായിലൊട്ടിച്ച് ഇവരെ നിശ്ശബ്ദരാക്കുകയും ചെയ്യും.തീവണ്ടികളില്‍ സഞ്ചരിച്ച് വീടുകള്‍ കണ്ടെത്തി മോഷണം നടത്തുകയാണ് പതിവ്. റെയില്‍പ്പാളത്തിനരികിലുള്ള വീടുകളാണ് പ്രധാനമായും ലക്ഷ്യമിടുന്നത്.അതുകൊണ്ടുതന്നെ തീവണ്ടിപ്പാതയുടെ സമീപമുള്ള വീടുകളില്‍ കഴിയുന്നവര്‍ പ്രത്യേകം ശ്രദ്ധിക്കണമെന്ന് നിര്‍ദേശം നല്‍കാന്‍ ഐ.ജി.യുടെ സന്ദേശത്തില്‍ പറയുന്നു.

കണ്ണൂർ:കണ്ണൂരിൽ പിടിയിലായ അഞ്ച് ഐഎസ് പ്രവർത്തകരുടെ കേസ് ദേശീയ അന്വേഷണ ഏജൻസി (എൻഐഎ) ഏറ്റെടുത്തു.ഇവർക്കെതിരെ യു എ പി എ കുറ്റം ചുമത്തിയിട്ടുണ്ട്.കണ്ണൂർ ചക്കരക്കൽ സ്വദേശികളായ മിത്‍ലാജ്,അബ്ദുൽ റസാഖ്,എം.വി റാഷിദ്,മനാഫ് റഹ്‌മാൻ,യു.കെ ഹംസ എന്നിവരാണ് നേരത്തെ പിടിയിലായവർ.എൻഐഎ,വിവിധ സംസ്ഥാനങ്ങളിലെ തീവ്രവാദ വിരുദ്ധ സ്ക്വാർഡുകൾ,റോ,എന്നീ വിഭാഗങ്ങൾ കണ്ണൂരിലെത്തി ഇവരെ ചോദ്യം ചെയ്തിരുന്നു.ഇതിൽ നിന്നും ലഭിച്ച വിവരത്തിന്റെ അടിസ്ഥാനത്തിലാണ് എൻഐഎ ഈ കേസ് ഏറ്റെടുത്തിരിക്കുന്നത്.ഡൽഹിയിൽ എൻഐഎ സമാനമായ കേസുകൾ രെജിസ്റ്റർ ചെയ്തിട്ടുണ്ട്.അതിൽ പ്രതിയായ കൂടാളി സ്വദേശി ഷാജഹാനാണ് ഇവരുടെ ടീം ലീഡർ എന്നാണ് അന്വേഷണത്തിൽ ബോധ്യമായത്.ഇക്കഴിഞ്ഞ ഒക്ടോബറിലാണ് കണ്ണൂർ ഡിവൈഎസ്പി സദാനന്ദനും സംഘവും ഇവരെ അറസ്റ്റ് ചെയ്തത്.

കണ്ണൂർ :കണ്ണൂർ മുനിസിപ്പൽ ഹൈസ്കൂൾ അന്താരാഷ്ട്ര നിലവാരത്തിലേക്ക്.ഇതിനായുള്ള പ്രാരംഭ നടപടികൾ ആരംഭിച്ചു.ശനിയാഴ്ച സ്കൂളിൽ നാട്ടുകാരും ജനപ്രതിനിധികളും ഉൾപ്പെട്ട  യോഗത്തിൽ 21 കോടി രൂപയുടെ മാസ്റ്റർപ്ളാൻ അംഗീകരിച്ചു. കെട്ടിടങ്ങളുടെ നവീകണം,ഹൈടെക്ക് ക്ലാസ് മുറികൾ,സെമിനാർ ഹാൾ,വലിയ മൈതാനം,ആധുനിക ലൈബ്രറി എന്നിവയാണ് മാസ്റ്റർപ്ലാനിൽ ഉൾപ്പെടുത്തിയിട്ടുള്ളത്.മന്ത്രി രാമചന്ദ്രൻ കടന്നപ്പള്ളി രക്ഷാധികാരിയായി 51 അംഗ നിർവാഹക സമിതിയും രൂപീകരിച്ചു.എംഎൽഎ ഫണ്ടിൽ നിന്നും ഇതിനായി 50 ലക്ഷം രൂപ നൽകുമെന്നും മന്ത്രി പറഞ്ഞു.കോർപറേഷന്റെ വകയായി 25 ലക്ഷം രൂപയും വാഗ്ദാനം ചെയ്തു. സ്കൂളിൽ നിർമിച്ച ഹൈടെക് ക്ലാസ് മുറികളുടെ ഉൽഘാടനം മന്ത്രി നിർവഹിച്ചു.ചടങ്ങിൽ മേയർ ഇ.പി ലത അധ്യക്ഷത വഹിച്ചു.

കണ്ണൂർ:കുടുംബശ്രീ ജില്ലാ മിഷന്റെ കീഴിൽ ‘സ്നേഹിത’ ജൻഡർ ഹെല്പ് ഡെസ്ക് ഉൽഘാടനം ചെയ്തു.കണ്ണൂർ പള്ളിപ്രത്ത് മന്ത്രി ഡോ.കെ.ടി ജലീലാണ് ഉൽഘാടനം നിർവഹിച്ചത്.ഒറ്റപ്പെട്ടു പോകുന്ന സ്ത്രീകൾക്കും കുട്ടികൾക്കും അഭയം നൽകാൻ വേണ്ടി ആരംഭിച്ച പദ്ധതിയാണ് സ്നേഹിത.എന്തെങ്കിലും കാരണം കൊണ്ട് ബുദ്ധിമുട്ടുന്ന പെൺകുട്ടികൾക്കും സ്ത്രീകൾക്കും താമസ സൗകര്യം ഉൾപ്പെടെയാണ് സ്നേഹിത ആരംഭിച്ചിട്ടുള്ളത്.ജില്ലയുടെ ഏതു ഭാഗത്തു നിന്നും ഒരു സ്ത്രീ വിളിച്ചാൽ അവർക്ക് അഭയം നല്കാൻ സ്നേഹിത ബാധ്യതപ്പെട്ടിരിക്കുന്നു. ഒരു കുടുംബത്തിൽ നിന്നും ഒരു പെൺകുട്ടിക്ക് കൂടി കുടുംബശ്രീയിൽ അംഗത്വം നൽകുമെന്നും വിദ്യാസമ്പന്നരായ പെൺകുട്ടികൾ കുടുംബശ്രീയിൽ അംഗങ്ങളാകുന്നതോടു കൂടി പരമ്പരാഗത വഴിയിൽ നിന്നും വേറിട്ട് സഞ്ചരിക്കാൻ കുടുംബശ്രീക്ക് കഴിയുമെന്ന് പദ്ധതി ഉൽഘാടനം ചെയ്തു കൊണ്ട് മന്ത്രി കെ.ടി ജലീൽ പറഞ്ഞു.മന്ത്രി രാമചന്ദ്രൻ കടന്നപ്പള്ളി ചടങ്ങിൽ അധ്യക്ഷത വഹിച്ചു.പി.കെ ശ്രീമതി എം.പി ലൈബ്രറി ഉൽഘാടനം ചെയ്തു.മേയർ ഇ.പി ലത സ്നേഹിത ടോൾ ഫ്രീ നമ്പർ പ്രകാശനം ചെയ്തു.മുണ്ടയാട് ഇൻഡോർ സ്റ്റേഡിയത്തിൽ നിന്നും ഒരു കിലോമീറ്റർ ദൂരെ പള്ളിപ്രത്താണ് ‘സ്നേഹിത’ ജൻഡർ ഹെല്പ് ഡെസ്ക്.ഫോൺ:0497-2721817. ടോൾഫ്രീ നമ്പർ:18004250717.