Kerala

തിരുവനന്തപുരം:സംസ്ഥാനത്തെ സ്വകാര്യ ബസ്സുകളുടെ നിറം ഏകീകരിക്കാൻ സ്റ്റേറ്റ് ട്രാൻസ്‌പോർട് അതോറിറ്റി തീരുമാനിച്ചു.സിറ്റി ബസ്സുകൾക്ക് പച്ചയും നഗരപ്രാന്തപ്രദേശങ്ങളിലേക്കുള്ള ഓർഡിനറി  ബസുകൾക്ക് നീല നിറവും ലിമിറ്റഡ് സ്റ്റോപ്പ് ബസുകൾക്ക് മെറൂൺ കളറുമാണ് നിശ്ചയിച്ചിരിക്കുന്നത്.എല്ലാ ബസുകൾക്കും അടിവശത്ത് ഓഫ് വൈറ്റ് നിറത്തിലുള്ള മൂന്നു വരകളുമുണ്ടാകും.ഏകീകൃത നിറം നടപ്പിലാക്കിയാൽ ഈ രംഗത്തെ മത്സരം ഒഴിവാക്കുന്നതിനോടൊപ്പം വിദേശികൾക്കും അന്യസംസ്ഥാനക്കാർക്കും ബസുകൾ പെട്ടെന്ന് തിരിച്ചറിയാൻ കഴിയുമെന്നും അധികൃതർ പറഞ്ഞു. ഫെബ്രുവരിയിൽ നിറംമാറ്റം പ്രാബല്യത്തിൽ വരും.പുതുതായി രെജിസ്ട്രേഷൻ നടത്തുന്ന ബസ്സുകളും ഫിറ്റ്നസ് പരിശോധനയ്ക്ക് ഹാജരാക്കുന്ന ബസ്സുകളും പുതിയ നിറത്തിലേക്ക് മാറ്റണം.

കണ്ണൂർ:ഒറ്റനമ്പർ ലോട്ടറി ചൂതാട്ടവുമായി ബന്ധപ്പെട്ട് കണ്ണൂരിൽ ഒരാൾ കൂടി പിടിയിലായി. മാങ്ങാട് എടക്കാടൻ ഹൗസിൽ രജീഷാണ് അറസ്റ്റിലായത്.സംസ്ഥാന സർക്കാരിന് ലക്ഷക്കണക്കിന് രൂപയുടെ നഷ്ട്ടമുണ്ടാക്കുന്ന ഒറ്റനമ്പർ ലോട്ടറി വില്പനക്കാർക്കെതിരെ പോലീസ് കുറെ ദിവസങ്ങളായി അന്വേഷണത്തിലായിരുന്നു.കഴിഞ്ഞ മാസം തളിപ്പറമ്പിലെ ലോട്ടറി ഏജന്റായ തറമ്മൽ ലക്ഷ്മണനെ അറസ്റ്റ് ചെയ്തതോടെയാണ് ചൂതാട്ട സംഘത്തെ കുറിച്ച് കൂടുതൽ വിവരങ്ങൾ പൊലീസിന് ലഭിച്ചത്.പത്തു രൂപയുടെ ഒരു നറുക്കിനു 5000 രൂപയാണ് സമ്മാനമായി ലഭിക്കുക.ചേർക്കുന്ന ഏജന്റിന് ഒരു രൂപ കമ്മീഷനും ലഭിക്കും.നേരത്തെ അറസ്റ്റിലായ സുനിൽ കുമാർ,രജീഷ് എന്നിവരാണ് ഏജന്റുമാരിൽ നിന്നും പണം ശേഖരിച്ചു കൊണ്ടുപോകുന്നത്.വർഷങ്ങളായി ചൂതാട്ടം നടത്തിവരുന്നവരാണ് ഇവരെന്ന് പോലീസ് പറഞ്ഞു.

തൃശൂർ:അൻപത്തിയെട്ടാമത്‌ സംസ്ഥാന സ്കൂൾ കലോത്സവത്തിന് ഇന്ന് തൃശ്ശൂരിൽ കൊടിയേറി. തേക്കിൻകാട് മൈതാനത്തെ പ്രധാന വേദിക്ക് സമീപം വിദ്യാഭ്യാസ ഡയറക്റ്റർ കെ.വി മോഹൻ കുമാറാണ് കൊടിയുയർത്തിയത്.പിന്നാലെ തൊട്ടരികിലുള്ള മോഡൽ ഗേൾസ് ഹൈസ്കൂളിലെ കൗണ്ടറുകളിൽ രജിസ്ട്രേഷൻ ആരംഭിച്ചു.മത്സരങ്ങൾ നാളെ തുടങ്ങും.രാവിലെ പത്തുമണിയോടെ ഓരോ ജില്ലകളിൽ നിന്നുമുള്ള മത്സരാർഥികൾ കലോത്സവ നഗരിയിലെത്തും.കഴിഞ്ഞ തവണത്തെ ജേതാക്കളായ കോഴിക്കോട് ടീമാണ് ആദ്യം എത്തുക.തുടർന്ന് പാചകപ്പുരയിൽ പാലുകാച്ചൽ ചടങ്ങ് നടക്കും.തുടർന്ന് കലവറ നിറയ്ക്കലും നടക്കും.തൃശൂർ ജില്ലയിലെ വിവിധ സ്കൂളുകളിലെ വിദ്യാർഥികൾ തയ്യാറാക്കിയ പച്ചക്കറികളാണ് പാചകത്തിന് ഉപയോഗിക്കുക.ഏറെ മാറ്റങ്ങളോടെയാണ് ഇത്തവണ സംസ്ഥാന സ്കൂൾ കലോത്സവം അരങ്ങേറുക. 2008 നുശേഷം ആദ്യമായി പരിഷ്കരിച്ച പുതിയ ചട്ടങ്ങളനുസരിച്ച് മത്സര ഇനങ്ങൾക്ക് ഒന്നാം സ്ഥാനവും രണ്ടാം സ്ഥാനവുമില്ല. 80 ശതമാനം മാർക്കു നേടുന്നവർക്ക് എ ഗ്രേഡ് നൽകും. ഇവർക്കെല്ലാം ട്രോഫികൾ സമ്മാനിക്കും. നേരത്തെ 70 ശതമാനം ലഭിക്കുന്നവർക്കായിരുന്നു എ ഗ്രേഡ്.അഞ്ചു ദിവസങ്ങളിലായി 24 വേദികളിലാണ് കലോത്സവം അരങ്ങേറുക.നാളെ രാവിലെ പത്തുമണിക്ക് മുഖ്യമന്ത്രി പിണറായി വിജയൻ കലോത്സവത്തിന്റെ ഔദ്യോഗിക ഉൽഘാടനം നിർവഹിക്കും.മന്ത്രി സി.രവീന്ദ്രനാഥ് ചടങ്ങിൽ അധ്യക്ഷത വഹിക്കും.