Kerala

കോഴിക്കോട്:സംസ്ഥാനത്തെ സ്വകാര്യ ബസുകൾ നടത്തിവരുന്ന അനിശ്ചിതകാല സമരവുമായി ബന്ധപ്പെട്ട് ബസ് ഉടമകളുമായി ഗതാഗതമന്ത്രി ഇന്ന് ചർച്ച നടത്തും.വൈകുന്നേരം നാല് മണിക്ക് കോഴിക്കോട് ഗസ്റ്റ് ഹൗസിൽ വെച്ചാണ് ചർച്ച നടക്കുക.എന്നാൽ ഔദ്യോഗിക ചർച്ചയല്ല മറിച്ച് ബസ് ഉടമകൾക്ക് കൂടിക്കാഴ്ചയ്ക്കുള്ള സമയം അനുവദിച്ചതാണെന്ന് മന്ത്രി ഇന്നലെ വ്യക്തമാക്കിയിരുന്നു.മിനിമം ചാർജ് പത്തുരൂപയാക്കുക,വിദ്യാർത്ഥികളുടെ കൺസെഷൻ നിരക്ക് വർധിപ്പിക്കുക തുടങ്ങിയവയായിരുന്നു ബസ് ഉടമകളുടെ പ്രധാന ആവശ്യം.ഇതിനെ തുടർന്ന് മിനിമം ചാർജ് എട്ടു രൂപയാക്കി വർധിപ്പിച്ചിരുന്നു.എന്നാൽ വിദ്യാർത്ഥികളുടെ കൺസെഷൻ നിരക്ക് വർധിപ്പിച്ചിരുന്നില്ല.ഇത് വർധിപ്പിക്കുക,വർധിപ്പിച്ച റോഡ് ടാക്സ് പിൻവലിക്കുക,ഇന്ധന വില ജിഎസ്ടിയുടെ പരിധിയിൽ കൊണ്ടുവരിക എന്നീ ആവശ്യങ്ങൾ ഉന്നയിച്ച് വെള്ളിയാഴ്ചമുതൽ സ്വകാര്യ ബസുകൾ അനിശ്ചിതകാല സമരം തുടങ്ങുകയായിരുന്നു.അതേസമയം മിനിമം നിരക്കിലെ വർദ്ധന സ്വീകാര്യമാണെന്ന് ബസ്സുടമകൾ അറിയിച്ചിട്ടുണ്ട്.

തിരുവനന്തപുരം:സംസ്ഥാനത്ത് സമരത്തിലേർപ്പെട്ടിരിക്കുന്ന സ്വകാര്യ ബസ് ഉടമകളുമായി ഗതാഗതമന്ത്രി നാളെ ചർച്ച നടത്തും.നാളെ വൈകിട്ട് നാലുമണിക്ക് കോഴിക്കോട് ഗസ്റ്റ്ഹൗസിൽ വെച്ചാണ് ചർച്ച നടത്തുക.നേരത്തെ ഇന്ന് ചർച്ച നടക്കുമെന്ന് സൂചനയുണ്ടായിരുന്നെങ്കിലും നാളത്തേക്ക് മാറ്റുകയായിരുന്നു. അനിശ്ചിതകാല സമരം ആരംഭിക്കുന്നതിനു മുൻപ് മിനിമം ചാർജ് എട്ടുരൂപയാക്കിയിരുന്നു.ഈ നിരക്കുവർധന മാർച്ച് ഒന്ന് മുതൽ നിലവിൽ വരുമെന്നായിരുന്നു സർക്കാർ അറിയിച്ചത്.എന്നാൽ മിനിമം ചാർജ് 10 രൂപയാക്കുക, വിദ്യാർഥികളുടെ കണ്‍സഷൻ നിരക്ക് ഉയർത്തുക,വർധിപ്പിച്ച റോഡ് ടാക്സ് പിൻവലിക്കുക, ഇന്ധന വില ജിഎസ്ടിയുടെ പരിധിയിൽ കൊണ്ടുവരിക, സ്വകാര്യ ബസ് മേഖലയെക്കുറിച്ച് പഠിച്ച ജസ്റ്റീസ് രാമചന്ദ്രൻ കമ്മീഷൻ റിപ്പോർട്ട് പൂർണമായും നടപ്പാക്കുക എന്നീ ആവശ്യങ്ങൾ ഉന്നയിച്ച് സ്വകാര്യ ബസ്സുടമകൾ വെള്ളിയാഴ്ച മുതൽ അനിശ്ചിതകാല സമരം ആരംഭിക്കുകയായിരുന്നു.

തിരുവനന്തപുരം:സംസ്ഥാനത്ത് സ്വകാര്യ ബസ് സമരം രണ്ടാം ദിവസത്തിലേക്ക് കടന്നു.യാത്രയ്ക്കായി കൂടുതലായും സ്വകാര്യ ബസ്സുകളെ ആശ്രയിക്കുന്ന വടക്കൻ,മധ്യ കേരളത്തിൽ സമരം വലിയ പ്രതിസന്ധിയാണ് സൃഷ്ടിക്കുന്നത്.യാത്രാക്ലേശം ലഘൂകരിക്കാൻ കെഎസ്ആർടിസി അധിക സർവീസ് നടത്തുന്നുണ്ടെങ്കിലും യാത്ര ദുരിതത്തിന് പരിഹാരമാകുന്നില്ല.സർക്കാർ ചർച്ചയ്ക്ക് തയ്യാറാകാതെ സമരത്തിൽ നിന്നും പിന്മാറില്ലെന്ന നിലപാടിലാണ് ബസ് ഉടമകൾ.നേരത്തെ, അനിശ്ചിതകാലസമരം ആരംഭിക്കുന്നതിന് മുൻപ് മിനിമം ചാർജ് എട്ട് രൂപയാക്കിയിരുന്നു.മാർച്ച് മുതൽ ഇത് പ്രബാല്യത്തിൽ വരുമെന്നായിരുന്നു സർക്കാർ അറിയിച്ചിരുന്നത്.എന്നാൽ ഇത് പര്യാപ്തമല്ലെന്ന് ചൂണ്ടിക്കാട്ടിയാണ് ഉടമകൾ സമരത്തിലേക്ക് നീങ്ങിയത്. എന്നാൽ,ചാർജ് വർധന ആവശ്യപ്പെട്ടല്ല സമരമെന്ന് കഴിഞ്ഞ ദിവസം ബസുടമകൾ വ്യക്തമാക്കിയിരുന്നു.മിനിമം ചാർജ് പത്തുരൂപയാക്കണമെന്ന നിലപാടിൽ നിന്നും ബസുടമകൾ പിന്നോക്കം പോയെങ്കിലും വിദ്യാർത്ഥികളുടെ യാത്ര സൗജന്യമടക്കമുള്ളവയിൽ മാറ്റം വേണമെന്നാണ് ആവശ്യം.അതേസമയം സംസ്ഥാനത്ത് സമരം നടത്തുന്ന സ്വകാര്യ ബസുടമകളുമായി സർക്കാർ ഇന്ന് ചർച്ച നടത്തും. ഗതാഗതമന്ത്രി എ.കെ.ശശീന്ദ്രനുമായി ബസുടമകൾ നടത്തുന്ന ചർച്ചയെത്തുടർന്ന് സമരം പിൻവലിക്കുമെന്നാണ് സൂചന.

കണ്ണൂർ:മട്ടന്നൂരിൽ യൂത്ത് കോൺഗ്രസ് പ്രവർത്തകൻ ശുഹൈബിന്റെ കൊലപാതകത്തിൽ നാല് ദിവസം കഴിഞ്ഞിട്ടും പ്രതികളെ പിടികൂടാത്തതിൽ പ്രതിഷേധിച്ച് സമരം ശക്തമാക്കാൻ കോൺഗ്രസ് തീരുമാനിച്ചു.ഇതിന്റെ ഭാഗമായി കോൺഗ്രസ് നേതാവ് കെ.സുധാകരൻ ഈ മാസം 19 ന് രാവിലെ പത്തുമണിമുതൽ 48 മണിക്കൂർ കണ്ണൂരിൽ നിരാഹാര സമരം നടത്തും.48 മണിക്കൂറിനുള്ളില്‍ പരിഹാരമില്ലെങ്കില്‍ സമരം തുടരുമെന്നും ജനാധിപത്യം സംരക്ഷിക്കപ്പെടണമെന്ന് ആഗ്രഹിക്കുന്ന എല്ലാവരുടെയും സഹകരണം അഭ്യര്ഥിക്കുന്നതായും സുധാകരൻ പറഞ്ഞു.ഇന്ന് ചേർന്ന ഡിസിസി യോഗമാണ് ഇത് സംബന്ധിച്ചുള്ള തീരുമാനമെടുത്തത്. കണ്ണൂർ കളക്റ്ററേറ്റിന് മുൻപിലായിരിക്കും സമരം നടത്തുന്നത്.സിപിഎം നല്‍കുന്ന പ്രതികളെയല്ല കൊലപാതകത്തില്‍ പങ്കെടുത്ത യഥാര്‍ഥ പ്രതികളെയാണ്  അറസ്റ്റ് ചെയ്യേണ്ടതെന്നും സുധാകരൻ ആവശ്യപ്പെട്ടു.കണ്ണൂർ എസ്പിയെ കെട്ടിയിട്ടിരിക്കുകയാണെന്നും എം.വി. ജയരാജന്‍ കണ്ണൂരിലെ ഡിവൈഎസ്പിമാരെ നേരിട്ട് വിളിച്ച് നിയന്ത്രിക്കുകയാണെന്നും അദ്ദേഹം ആരോപിച്ചു.ടി.പി കൊലക്കേസിലെ പ്രതി കൊടി സുനി പരോളില്ലാതെ രാത്രികാലങ്ങളിൽ പുറത്തിറങ്ങാറുണ്ടെന്നും സുധാകരൻ ആരോപിച്ചു.സംഭവത്തിൽ എഴുത്തുകാരുടെയും സാംസ്‌കാരിക നായകരുടെയും മൗനത്തെ അദ്ദേഹം വിമർശിച്ചു.അവരെല്ലാം സ്ഥാനമാനങ്ങൾ മോഹിച്ച് സിപിഎമ്മിന്റെ ചൊൽപ്പടിക്ക് നിൽക്കുകയാണെന്നും എല്ലാവർക്കും മുഖ്യമന്ത്രിയെ പേടിയാണെന്നും സിപിഎമ്മിനോടുള്ള ഈ പേടി മാറണമെന്നും  സുധാകരൻ ആവശ്യപ്പെട്ടു.