Kerala

കണ്ണൂർ:യൂത്ത് കോൺഗ്രസ് നേതാവ് ശുഹൈബിന്റെ കൊലപാതകത്തെ തുടർന്നുണ്ടായ സംഘർഷത്തിന്റെ പശ്ചാത്തലത്തിൽ കണ്ണൂരിൽ ഈ മാസം 21 ന് സമാധാന യോഗം നടത്തുമെന്ന് മുഖ്യമന്ത്രി അറിയിച്ചതായി പ്രതിപക്ഷ നേതാവ് രമേശ് ചെന്നിത്തല.മന്ത്രി എ.കെ ബാലന്റെ നേതൃത്വത്തിൽ ചേരുന്ന യോഗത്തിൽ വിവിധ രാഷ്ട്രീയ കക്ഷികളും ജില്ലാ കളക്ടറും ഉന്നത ഉദ്യോഗസ്ഥരും പങ്കെടുക്കും.

കണ്ണൂർ:ആകാശചിറകിലേറി ഇനി കണ്ണൂരും.വിമാനത്താവളത്തിലെ ഡോപ്ലർ വെരിഹൈ ഫ്രീക്വൻസി ഓമ്നി റേഞ്ച്(ഡി.വി.ഓ.ആർ) സംവിധാനം പരിശോധിക്കുന്നതിനുള്ള പരീക്ഷണപ്പറക്കൽ വിജയകരമായി പൂർത്തിയാക്കി.ഇന്നലെ രാവിലെയാണ് ബെംഗളൂരുവിൽ നിന്നെത്തിയ എയർപോർട്ട് അതോറിറ്റിയുടെ ഡോണിയർ വിമാനം വിമാനത്താവളത്തിന് മുകളിലൂടെ ചുറ്റിപ്പറന്ന് സിഗ്നലുകൾ സ്വീകരിച്ചത്.എന്നാൽ ആകാശം മേഘാവൃതമായതിനാൽ 5000 മുതൽ 8000 അടി ഉയരത്തിൽ പറന്ന വിമാനം താഴെ നിന്നവർക്ക് കാണാനായില്ല.രാവിലെ 9.52 ന് ബെംഗളൂരുവിൽ നിന്നും പറന്നുയർന്ന വിമാനം 10.45 ഓടെ വ്യോമപരിധിയിൽ പ്രവേശിച്ചു.പല ഉയരങ്ങളിലും ദിശകളിലും പറന്ന് റഡാറിൽ നിന്നും സിഗ്നലുകൾ സ്വീകരിച്ചു. ഡി.വി.ഓ.ആർ കമ്മീഷൻ ചെയ്യുന്നതോടെ വിമാനത്താവളത്തിലേക്കുള്ള അന്താരാഷ്ട്ര വ്യോമമാർഗം നിലവിൽ വരും. വിമാനത്താവളത്തിന്റെ ലൈസൻസിനുള്ള നടപടിക്രമങ്ങളുടെ സുപ്രധാന ഘട്ടമാണ് നാവിഗേഷൻപരിശോധനയോടെ പിന്നിട്ടതെന്നു കിയാൽ എംഡി പി.ബാലകിരൺ പറഞ്ഞു. ബെംഗളൂരുവിൽ നിന്നും ഗോവയിൽ നിന്നും നേരിട്ട് കണ്ണൂർ വിമാനത്താവളത്തിലേക്ക് വ്യോമപാത സാധ്യമാകുമെന്നാണ് പരിശോധനയ്ക്ക് ശേഷം വിദഗ്ദ്ധർ അഭിപ്രായപ്പെട്ടത്. കണ്ണൂരിലേക്കുള്ള വ്യോമമാർഗം എയ്‌റോനോട്ടിക്കൽ ഇൻഫർമേഷൻ റെഗുലേഷൻ ആൻഡ് കൺട്രോൾ വിഭാഗം അന്താരാഷ്ട്ര തലത്തിൽ അടയാളപ്പെടുത്തും.ഇത് സംബന്ധിച്ചുള്ള വിശദാംശങ്ങൾ എയർപോർട്ട് അതോറിറ്റിക്ക് കൈമാറുന്നതോടെ വിമാനത്താവളത്തിന്റെ ലൈസൻസിനുള്ള നടപടിക്രമങ്ങൾക്ക് വേഗമേറും.

തിരുവനന്തപുരം:സമരം തുടരുന്ന ബസ്സുടമകൾക്ക് മുന്നറിയിപ്പുമായി ഗതാഗതമന്ത്രി.സ്വകാര്യ ബസുടമകൾ സമരം തുടരാനാണ് തീരുമാനമെങ്കിൽ കർശന നടപടികളുമായി സർക്കാരിന് മുന്നോട്ട് പോകേണ്ടി വരുമെന്ന് ഗതാഗതമന്ത്രി എ.കെ.ശശീന്ദ്രൻ വ്യക്തമാക്കി. ബസുകൾ പിടിച്ചെടുക്കുന്നതടക്കമുള്ള കടുത്ത തീരുമാനങ്ങളിലേക്ക് സർക്കാരിനെ നയിക്കരുതെന്നും അദ്ദേഹം മുന്നറിയിപ്പ് നൽകി.ജനങ്ങളുടെ ബുദ്ധിമുട്ട് മനസ്സിലാക്കി ബസ്സുടമകൾ സമരത്തിൽ നിന്നും പിന്മാറണം.വിദ്യാർത്ഥികളുടെ യാത്ര നിരക്ക് കൂട്ടില്ലെന്നും മന്ത്രി വ്യക്തമാക്കി. വിദ്യാർത്ഥികളുടെ യാത്ര നിരക്ക് വർധിപ്പിക്കണമെന്ന ബസ് ഉടമകളുടെ ആവശ്യം സർക്കാർ അംഗീകരിക്കാത്തതിനെ തുടർന്ന് ഇന്നലെ ബസ്സുടമകൾ ഗതാഗത മന്ത്രിയുമായി നടത്തിയ ചർച്ച പരാജയപ്പെടുകയായിരുന്നു.മിനിമം ചാർജ് എട്ടുരൂപയാക്കിയത് അംഗീകരിക്കുന്നതായും വിദ്യാർത്ഥികളുടെ മിനിമം ചാർജ് രണ്ടുരൂപയാക്കണമെന്നുമായിരുന്നു ബസ് ഉടമകളുടെ ആവശ്യം.എന്നാൽ സർക്കാർ ഇത് അംഗീകരിച്ചില്ല.ഇതോടെ ചർച്ച അലസിപ്പിരിയുകയായിരുന്നു.  അതേസമയം യാത്രാക്ലേശം പരിഹരിക്കാൻ സംസ്ഥാനത്തൊട്ടാകെ കെഎസ്ആർടിസി അധിക സർവീസ് നടത്തുന്നുണ്ട്.

കണ്ണൂർ:ജില്ലയിലെ മികച്ച ഗ്രാമപഞ്ചായത്തിനുള്ള  സംസ്ഥാന സര്‍ക്കാരിന്റെ സ്വരാജ് പുരസ്ക്കാരം പാപ്പിനിശ്ശേരി ഗ്രാമപഞ്ചായത്തിന്.സംസ്ഥാനതലത്തില്‍ മൂന്നാം സ്ഥാനവും പഞ്ചായത്ത് കരസ്ഥമാക്കി.ജില്ലയിലെ മികച്ച പഞ്ചായത്തിനുള്ള 10 ലക്ഷം രൂപയുടെ ക്യാഷ് അവാര്‍ഡും,സംസ്ഥാനത്തില്‍ മൂന്നാം സ്ഥാനത്തിനുള്ള 15 ലക്ഷം രൂപയുടെ ക്യാഷ് അവാര്‍ഡുമാണ് ലഭിച്ചത്.സാമുഹ്യക്ഷേമം,ആരോഗ്യം,എന്നീ മേഖലകളില്‍ മികച്ച പ്രവര്‍ത്തനം കാഴ്ചവെക്കാന്‍ പഞ്ചായത്തിന് സാധിച്ചതും വികസന പ്രവര്‍ത്തനങ്ങളില്‍ കൂട്ടായ്മ ഉണ്ടാക്കിയെടുക്കാനും സാധിച്ചു എന്നുള്ളതുമാണ് പാപ്പിനിശ്ശേരി ഗ്രാമപഞ്ചായത്തിന്‍റെ നേട്ടത്തിന് മുതല്‍കൂട്ടായത്.പഞ്ചായത്ത് കമ്മിറ്റി,സ്റ്റാന്റിംഗ് കമ്മിറ്റി,നിര്‍വഹണ ഉദ്യോഗസ്ഥര്‍ എന്നിവരുടെ പ്രവര്‍ത്തനങ്ങള്‍, പൊതുജന പിന്തുണയോടെയുള്ള വികസന പ്രവര്‍ത്തനങ്ങള്‍ എന്നിവയാണ് പഞ്ചായത്തിനെ പുരസ്ക്കാരത്തിന് അർഹമാക്കിയത്.