Kerala

ഇരിട്ടി:അയ്യങ്കുന്നിലെ സൂചിമുഖി വെള്ളച്ചാട്ടത്തിൽ നിന്നും വൈദ്യുതി ഉല്പാദിപ്പിക്കുന്നതിനുള്ള സാധ്യത തേടി കെഎസ്ഇബി.ഇതിനായി കെഎസ്ഇബിയുടെ ഉന്നതതല സംഘം വെള്ളച്ചാട്ട മേഖലയിൽ സാധ്യത പഠനം നടത്തി.വാളത്തോട്ടിലെ സൂചിമുഖി വെള്ളച്ചാട്ടം നിരവധി സഞ്ചാരികളുടെ ആകർഷണ കേന്ദ്രമാണ്. മലമടക്കുകളിൽ നിന്നും ഉത്ഭവിക്കുന്ന വെള്ളച്ചാട്ടം നിരവധി പാറക്കെട്ടുകളിലൂടെ വൻ താഴ്ചയിലേക്കാണ് പതിക്കുന്നത്.ജൂൺ മുതൽ ഡിസംബർ വരെ ശക്തമായ നീരൊഴുക്കുള്ള ഇവിടെ വൈദ്യുതി ഉൽപ്പാദനത്തിനുള്ള സാധ്യതയുണ്ടെന്ന റിപ്പോർട്ടിനെ തുടർന്നാണ് കെഎസ്ഇബി സംഘം പരിശോധന നടത്തിയത്. പ്രദേശത്തു നിന്നും മൂന്നു മെഗാവാട്ട് വരെയുള്ള വൈദ്യുതി ഉല്പാദിപ്പിക്കാമെന്ന് പ്രാരംഭ പരിശോധനയിൽ കണ്ടെത്തിയിട്ടുണ്ട്.നീരൊഴുക്കിന്റെ തോതും മറ്റും മനസ്സിലാക്കുന്നതിന് വിശദമായ പരിശോധന പിന്നീട് നടക്കും.പദ്ധതി യാഥാർഥ്യമായാൽ ജില്ലയിലെ മൂന്നാമത്തെ ജലവൈദ്യുത പദ്ധതിയായിരിക്കും ഇത്. അയ്യങ്കുന്നിൽ നിന്നും തന്നെയുള്ള 18 മെഗാവാട്ടിന്റെ ബാരാപോൾ മിനി ജലവൈദ്യുത പദ്ധതി,നിർമാണം പുരോഗമിക്കുന്ന ഒൻപതു മെഗാവാട്ടിന്റെ പഴശ്ശി സാഗർ പദ്ധതി എന്നിവയാണ് മറ്റു രണ്ടെണ്ണം.സൂചിമുഖിയിലെ ഉയർന്ന വെള്ളച്ചാട്ടം കൂടുതൽ ഭൂമി ഏറ്റെടുക്കാതെ പദ്ധതി പൂർത്തിയാക്കാൻ സാധിക്കുമെന്ന അഭിപ്രായമാണ് കെഎസ്ഇബിക്ക് ഉള്ളത്.കെഎസ്ഇബി എനർജി ഇൻവെസ്റ്റിഗേഷൻ അസി.എൻജിനീയർ എം.കെ അജിത്, എഞ്ചിനീയർമാരായ രാജൻ,രാമചന്ദ്രൻ എന്നിവരാണ് സാധ്യത പഠന സംഘത്തിൽ ഉണ്ടായിരുന്നത്.

ഇരിട്ടി:കർണാടകയിൽ നിന്നും കേരളത്തിലേക്ക് ലോറിയിൽ കടത്തുകയായിരുന്ന വൻ സ്‌ഫോടക വസ്തു ശേഖരം പിടികൂടി.ഇരിട്ടി എക്‌സൈസ് സംഘമാണ് ഇവ പിടികൂടിയത്. സംഭവവുമായി ബന്ധപ്പെട്ട് ലോറി ഡ്രൈവർ തൃശൂർ സ്വദേശി കെ.ജെ. അഗസ്റ്റിന്‍ (32)നെ എക്‌സൈസ് കസ്റ്റഡിയിലെടുത്തു.പിന്നീട് ലോറിയും സ്‌ഫോടക വസ്തുക്കളും ഇരിട്ടി പൊലീസിന് കൈമാറി.ഇരിട്ടി എസ്‌ഐ പി.സി സഞ്ജയ് കുമാറിന്റെ നേതൃത്വത്തിലുള്ള പോലീസ് സംഘം പ്രതിയെ അറസ്റ്റ് ചെയ്തു.ഇന്നലെ പുലര്‍ച്ചെ ഒരു മണിയോടെ കിളിയന്തറ ചെക്‌പോസ്റ്റില്‍ വാഹന പരിശോധനക്കിടെയാണ് സ്ഫോടകശേഖരം പിടികൂടിയത്. ബെംഗളൂരുവിൽ നിന്നും പൂന്തോട്ട നിര്‍മ്മാണത്തിനായി ഉപയോഗിക്കുന്ന അലങ്കാര പച്ചപ്പുല്‍ എന്ന വ്യാജേന ലോറിയിൽ കടത്തുകയായിരുന്ന 25 കിലോഗ്രാം വീതമുള്ള 90 പെട്ടി ജലാറ്റിന്‍ സ്റ്റിക്ക്, 7 കിലോഗ്രാം വീതമുള്ള 9 പായ്ക്കറ്റ് ഫ്യൂസ് വയര്‍ എന്നിവയാണ് കിളിയന്തറ എക്‌സൈസ് ചെക്ക് പോസ്റ്റ് എക്‌സൈസ് ഇന്‍സ്‌പെക്ടര്‍ വി.വി പ്രഭാകരന്‍, പ്രിവന്റീവ് ഓഫീസര്‍ കെ.പി ഹംസക്കുട്ടി, സിവില്‍ എക്‌സൈസ് ഓഫീസര്‍മാരായ കെ. ബൈജേഷ്, പി.കെ മനീഷ്, കെ.രാജീവന്‍ എന്നിവരുടെ നേതൃത്വത്തില്‍ പിടികൂടിയത്.ബെംഗളൂരുവിൽ നിന്നും കോഴിക്കോട്ടേക്ക് ഏജന്റുമാര്‍ മുഖേനയാണ് സ്‌ഫോടകവസ്തു കടത്തിയതെന്നും കരിങ്കല്‍ ക്വാറികളില്‍ പാറ പൊട്ടിക്കുന്നതിനായി ക്വാറി ഉടമകള്‍ക്ക് വില്‍പ്പന നടത്താനാണ് സ്‌ഫോടകവസ്തു ഉപയോഗിക്കുന്നതെന്നുമാണ് പിടിയിലായ അഗസ്റ്റിന്‍ നല്‍കിയ മൊഴി.മട്ടന്നൂർ കോടതിയിൽ ഹാജരാക്കിയ പ്രതിയെ പതിനാലു ദിവസത്തേക്ക് റിമാൻഡ് ചെയ്തു. ബെംഗളൂരുവിൽ നിന്നും ലോറിയിൽ നിരവധി ചെക്ക് പോസ്റ്റുകൾ കടന്ന് ഇത്രയും സ്ഫോടകവസ്തുക്കൾ യാതൊരു പരിശോധനയുമില്ലാതെ കേരളത്തിലെത്തിച്ചതിനു പിന്നിൽ വൻ മാഫിയ തന്നെ പ്രവർത്തിക്കുന്നുണ്ടെന്ന് പോലീസ് സംശയിക്കുന്നു.അഗസ്റ്റിനെ ചോദ്യം ചെയ്യുന്നതിലൂടെ ഇതിനു പിന്നിലെ കണ്ണികളെ കണ്ടെത്താനുള്ള ശ്രമത്തിലാണ് പോലീസ്.

കൊച്ചി:നടി ആക്രമിക്കപ്പെട്ട കേസിൽ ദൃശ്യങ്ങൾ ആവശ്യപ്പെട്ട് ഹൈക്കോടതിയെ സമീപിച്ച ദിലീപിനോട് ദൃശ്യങ്ങൾ എന്തിനെന്ന ചോദ്യവുമായി ഹൈക്കോടതി. അങ്കമാലി കോടതിയിൽ വച്ച് നിങ്ങൾ ഈ ദൃശ്യങ്ങൾ കണ്ടതല്ലേ എന്നും പിന്നെ എന്തിനാണ് പകർപ്പ് ആവശ്യപ്പെടുന്നതെന്നും കോടതി ചോദിച്ചു. ദൃശ്യങ്ങൾ ദിലീപിന് കൈമാറിയാൽ അത് പുറത്ത് പ്രചരിക്കാൻ സാധ്യതയുണ്ടെന്നും ദുരുപയോഗം ചെയ്യപ്പെടാമെന്നും പ്രോസിക്യൂഷൻ വാദിച്ചിരുന്നു.ഇതിനു പിന്നാലെയാണ് കോടതിയുടെ സുപ്രധാന ചോദ്യം.കേസിലെ പ്രധാന തെളിവായ നടിയെ ആക്രമിച്ച ദൃശ്യങ്ങളിൽ കൂട്ടിച്ചേർക്കലുകൾ നടന്നിട്ടുണ്ടോ എന്ന് സംശയമുണ്ട്. വിചാരണ വേളയിൽ തന്‍റെ വാദങ്ങൾ നിരത്താൻ പ്രതിക്ക് പ്രധാന തെളിവ് ലഭിക്കേണ്ടത് അത്യാവശ്യമാണ്. അതിനാലാണ് ദൃശ്യങ്ങളുടെ പകർപ്പ് വേണമെന്ന് പറയുന്നതെന്നും പ്രതിഭാഗം വാദിച്ചു.ദൃശ്യങ്ങൾ  യാഥാർത്ഥമല്ലെന്നും എഡിറ്റിങ് നടന്നിട്ടുള്ളതായും സംശയിക്കുന്നു.ദൃശ്യത്തിൽ നടിയുടെ ശബ്ദത്തിന്റെ തീവ്രത  കുറച്ചതായും സംശയമുണ്ട്.ഇതറിയുന്നതിന് വേണ്ടിയാണ് ദൃശ്യങ്ങള്‍ ആവശ്യപ്പെടുന്നതെന്നും പൊലീസ് വിവരങ്ങള്‍ മറച്ചുവയ്ക്കുകയാണെന്നും ദിലീപിന്റെ അഭിഭാഷകന്‍ ആരോപിച്ചു.എന്നാൽ ദിലീപിന് ദൃശ്യങ്ങളുടെ പകർപ്പ് നൽകുന്നതിനെ പ്രോസിക്യൂഷൻ ഇന്നും ശക്തമായി എതിർത്തു. ദൃശ്യങ്ങൾ ദിലീപിന്‍റെ കൈവശം എത്തുന്നത് ഇരയ്ക്ക് അപകീർത്തിയുണ്ടാകാൻ കാരണമാകുമെന്നും ദൃശ്യങ്ങളുടെ സ്വകാര്യത നഷ്ടപ്പെടുമെന്നുമായിരുന്നു പ്രോസിക്യൂഷൻ വാദിച്ചത്.