Kerala

കൊല്ലം:വില്ലൻ വേഷങ്ങളിലൂടെ മലയാളികൾക്ക് സുപരിചിതനായ നടൻ കൊല്ലം അജിത് അന്തരിച്ചു.ഇന്ന് പുലർച്ചെ കൊച്ചിയിലെ സ്വകാര്യ ആശുപത്രിയിലായിരുന്നു അന്ത്യം.ഉദര സംബന്ധമായ അസുഖത്തെ തുടർന്നു ചികിത്സയിലായിരുന്നു. തൊണ്ണൂറുകളിൽ വില്ലൻ വേഷങ്ങളിലൂടെയാണ് അജിത് അഭിനയരംഗത്തെത്തിയത്.1984ൽ പി. പദ്മരാജന്‍ സംവിധാനം ചെയ്ത “പറന്ന് പറന്ന് പറന്ന് ‘ എന്ന സിനിമയില്‍ ചെറിയ വേഷത്തിലാണു തുടക്കം. പിന്നീട് പദ്മരാജന്‍റെ സിനിമകളിലെ സ്ഥിര സാന്നിധ്യമായി മാറി അദ്ദേഹം.1989 ല്‍ പുറത്തിറങ്ങിയ അഗ്നിപ്രവേശം എന്ന ചിത്രത്തില്‍ നായകവേഷത്തിലെത്തി.പക്ഷേ പിന്നീ‌ട് അഭിനയിച്ചത് ഏറെയും വില്ലന്‍ വേഷങ്ങളാണ്.ദൂരദര്‍ശനിലെ ആദ്യകാല പരമ്പരകളിലൊന്നായ “കൈരളി വിലാസം ലോഡ്ജ്’ അടക്കം നിരവധി ടെലിവിഷൻ പരമ്പരകളിലും അഭിനയിച്ചിട്ടുണ്ട്. പാവക്കൂത്ത്, വജ്രം, കടമറ്റത്ത് കത്തനാർ, സ്വാമി അയ്യപ്പൻ, തുടങ്ങിയ സീരിയലുകളിലും വേഷമിട്ടു. 2012 ഇൽ ഇറങ്ങിയ ഇവൻ അർദ്ധനാരിയാണ് അവസാനമായി അഭിനയിച്ച ചിത്രം.മൂന്നുപതിറ്റാണ്ടിലേറെയായി അഭിനയരംഗത്ത് തിളങ്ങിയ അജിത്ത് “കോളിംഗ് ബെൽ’ എന്ന ചിത്രവും സംവിധാനം ചെയ്തിട്ടുണ്ട്. പ്രമീളയാണ് ഭാര്യ. മക്കൾ: ശ്രീക്കുട്ടി, ശ്രീഹരി.

ഇരിട്ടി:പാറ ഇളകിവീണ് ബാരാപോളിലെ സൗരോർജ പാനലുകൾ തകർന്നു.25ഓളം സൗരോര്‍ജ പാനലുകളാണ് ഇന്നലെ ഉച്ചയോടെ തകര്‍ന്നത്.റോഡ് പണിക്കിടെയാണ് കുന്നിന്‍ മുകളില്‍നിന്നു കൂറ്റന്‍ പാറകള്‍ താഴേക്ക് പതിക്കുകയായിരുന്നു. കേരളത്തിലെ ട്രഞ്ച് വിയര്‍ സംവിധനമുപയോഗിച്ചുള്ള ആദ്യത്തെ മിനി ജലവൈദ്യുത പദ്ധതിയാണ് ബാരാ പോള്‍ മിനി ജലവൈദ്യുത പദ്ധതി.15 മെഗാവാട്ട് സ്ഥാപിത ശേഷിയുള്ള പദ്ധതിക്കൊപ്പം തന്നെ സൗരോര്‍ജ പാനല്‍ ഉപയോഗിച്ചും ഇവിടെ നിന്നും വൈദ്യുതി ഉത്പാദിപ്പിക്കുന്നുണ്ട്. ഇതിനായി കനാലിനു മുകളിലായി നാലു കിലോമീറ്റര്‍ ദൂരത്തില്‍ ആയിരക്കണക്കിനു സൗരോർജ പാനലുകൾ സ്ഥാപിച്ചിട്ടുണ്ട്.ഈ സൗരോര്‍ജ പദ്ധതി കമ്മീഷന്‍ ചെയ്തില്ലെങ്കിലും നാല് മെഗാവാട്ട് വൈദ്യുതിയാണ് സൗരോര്‍ജത്തിലൂടെ ഇവിടെ നിന്നും ഉത്പാദിപ്പിക്കുന്നത്. ജലവൈദ്യുതി പദ്ധതിയുടെ പെന്‍സ്റ്റോക്കിന്‍റെയും ടാങ്കിന്‍റെയും സമീപത്ത് കനാലിനു മുകളില്‍ സ്ഥാപിച്ച സൗരോര്‍ജ പാനലുകള്‍ ആണ് കൂറ്റന്‍ പാറക്കല്ല് ഇളകി വീണ് തകര്‍ന്നത്. വലിയ പാറകളിലൊന്ന് പാനലിനു മുകളിൽ തങ്ങി നിൽക്കുകയാണ്. നേരത്തെയും ഇത്തരത്തിൽ പാറകൾ വീണ് ഇവിടെ പാനലുകൾ തകർന്നിരുന്നു.

കണ്ണൂർ:സന്തോഷ് ട്രോഫി നേടിയ കേരള ടീമംഗം മിഥുന് കണ്ണൂരിൽ ഉജ്വല സ്വീകരണം നൽകി. സന്തോഷ് ട്രോഫി മത്സരത്തിന് ശേഷം ചൊവ്വാഴ്ചയാണ് കേരളാ ടീം ഗോൾ കീപ്പർ മിഥുൻ സ്വന്തം നാടായ കണ്ണൂരിൽ തിരിച്ചെത്തിയത്.രാവിലെ എട്ടുമണിയോട് കൂടി മംഗളൂരു  എക്സ്പ്രെസ്സിൽ കണ്ണൂരിലെത്തിയ മിഥുനെ കാത്ത് സ്റ്റേഷൻ പ്ലാറ്റ്‌ഫോം നിറയെ ആളുകൾ തടിച്ചുകൂടിയിരുന്നു. തീവണ്ടിയിൽ നിന്നും പുറത്തിറങ്ങിയ മിഥുനെ മാലയും പൂച്ചെണ്ടും നൽകി അധികൃതർ സ്വീകരിച്ചു. കൂടെ ചെണ്ടമേളത്തിന്റെ അകമ്പടിയും ഉണ്ടായിരുന്നു.മകനെ സ്വീകരിക്കുന്നതിനായി മിഥുന്റെ അച്ഛനും കേരള പൊലീസിലെ മികച്ച ഗോൾ കീപ്പറുമായ വി.മുരളിയും സ്റ്റേഷനിലെത്തിയിരുന്നു. മേയർ ഇ.പി ലത,ജില്ലാ സ്പോർട്സ് കൗൺസിൽ പ്രസിഡന്റ് ഓ.കെ വിനീഷ്,സെക്രെട്ടറി രാജേന്ദ്രൻ നായർ,ജില്ലാ ഫുട്ബാൾ  അസോസിയേഷൻ  പ്രസിഡന്റ് സി.വി സുനിൽ,ജില്ലാ പഞ്ചായത്ത് സ്ഥിരം സമിതി അധ്യക്ഷ ശോഭ,ജില്ലാ പഞ്ചായത്ത് അംഗങ്ങളായ അജിത് മാട്ടൂൽ,പി.പി ഷാജർ എന്നിവരും മിഥുന്റെ നാട്ടുകാരും സുഹൃത്തുക്കളും സ്വീകരണ ചടങ്ങിൽ പങ്കെടുത്തു.റെയിൽവേ സ്റ്റേഷനിലെ സ്വീകരണത്തിന് ശേഷം മിഥുൻ നേരെ പോയത് കണ്ണൂർ പോലീസ് പരേഡ് ഗ്രൗണ്ടിലെ മിഥുൻ കളിപഠിച്ചു തുടങ്ങിയ സ്പോർട്ടിങ് ബഡ്‌സ് കോച്ചിങ് സെന്ററിന്റെ ഫുട്ബോൾ പരിശീല ക്യാമ്പിലേക്കായിരുന്നു. ഇവിടെ അവധിക്കാല പരിശീലന ക്യാമ്പിൽ പങ്കെടുക്കുന്ന കുട്ടികൾക്കൊപ്പം നിന്ന് ഫോട്ടോയെടുത്തും കുശലാന്വേഷണം നടത്തിയും കുട്ടികൾക്ക് ആത്മവിശ്വാസവും ആവേശവും നൽകിയാണ് മിഥുൻ മടങ്ങിയത്.

കണ്ണൂര്‍: കീഴാറ്റൂരിൽ വയൽ നികത്തിയുള്ള ബൈപാസ് നിർമിക്കാനുള്ള സർക്കാർ തീരുമാനം ഉപേക്ഷിക്കണമെന്നാവശ്യപ്പെട്ട്  കീഴാറ്റൂരില്‍ നിന്നും കണ്ണൂരിലേക്ക് ഇന്ന് ബിജെപി മാർച്ച് നടത്തും.മാർച്ചിൽ ആയിരക്കണക്കിന് ബിജെപി പ്രവര്‍ത്തകര്‍ പങ്കെടുക്കുമെന്ന് പാർട്ടി നേതൃത്വം അറിയിച്ചു. കീഴാറ്റൂര്‍ വയലില്‍ റോഡ് നിര്‍മിക്കുന്നതുമായി ബന്ധപ്പെട്ടുള്ള എല്ലാ പ്രവര്‍ത്തനങ്ങളും സര്‍ക്കാര്‍ അവസാനിപ്പിക്കുക, മണ്ണിന് വേണ്ടി പോരാടുന്ന സമരക്കാരുമായി സര്‍ക്കാര്‍ ചര്‍ച്ച നടത്തുക, ജനപ്രതിനിധികളുമായി ചര്‍ച്ച നടത്താന്‍ തയാറാവുക, ബദല്‍ റോഡ് നിർമിക്കുന്നതിനുള്ള സാദ്ധ്യതകൾ പരിശോധിക്കുക  തുടങ്ങിയ ആവശ്യങ്ങള്‍ ഉന്നയിച്ചാണ് ബിജെപി കീഴാറ്റൂരിൽ മാർച്ച് നടത്തുന്നത്.