Kerala

തിരുവനന്തപുരം:സോഷ്യൽ മീഡിയ വഴി ഹർത്താലിന് ആഹ്വാനം  ചെയ്ത വാട്ട്സ് ആപ്പ് ഗ്രൂപ്പിന്റെ അഡ്‌മിനെ തിരിച്ചറിഞ്ഞു.ഹർത്താലിനും കലാപത്തിനും ആഹ്വാനം ചെയ്ത ഗ്രൂപ്പിന്റെ അഡ്മിൻ മലപ്പുറം കൂട്ടായി സ്വദേശിയായ പതിനാറുകാരനാണ്. പ്രായപൂർത്തിയാകാത്തതിനാൽ ഇയാളെ കസ്റ്റഡിയിലെടുത്തിട്ടില്ല. ഇയാളിൽ നിന്നും പിടിച്ചെടുത്ത ഫോൺ സൈബർ സെല്ലിന് കൈമാറി.വോയ്സ് ഓഫ് ട്രൂത്ത് എന്ന വാട്സ് ആപ് ഗ്രൂപ്പിലൂടെയാണ് ഹർത്താലിന് ആഹ്വാനം നൽകിയത്.പതിനാറുകാരനെ അഡ്മിനായി മാറ്റി യഥാർത്ഥ പ്രതികൾ രക്ഷപെടാൻ ശ്രമിക്കുകയാണോ എന്നും പോലീസ് അന്വേഷിക്കുന്നുണ്ട്. ജമ്മു കാഷ്മീരിൽ ബാലികയെ പീഡിപ്പിച്ചു കൊലപ്പെടുത്തിയതിൽ പ്രതിഷേധിച്ചാണു കഴിഞ്ഞ തിങ്കളാഴ്ച തീവ്രവാദ സ്വഭാവമുള്ള ചില സംഘടനകൾ രഹസ്യമായി ഹർത്താൽ ആഹ്വാനം ചെയ്തത്. സമൂഹമാധ്യമങ്ങളിലൂടെ വ്യാജസന്ദേശങ്ങൾ പ്രചരിപ്പിച്ചായിരുന്നു ഹർത്താൽ ആഹ്വാനം.അക്രമം നടത്തിയ കേസിൽ 950 പേർ ഇതുവരെ അറസ്റ്റിലായിട്ടുണ്ട്. ഇതിൽ പകുതിയിലേറെയും എസ്ഡിപിഐക്കാരാണ്. സിപിഎം, കോണ്‍ഗ്രസ്, മുസ്ലിംലീഗ് പ്രവർത്തകരും അറസ്റ്റിലായിട്ടുണ്ട്.

കണ്ണൂർ: ചെറുമത്സ്യങ്ങൾ അഴീക്കൽ ഹാർബറിലെത്തിച്ച് ലോറികളിൽ കയറ്റി കൊണ്ടുപോകാൻ ശ്രമിക്കുന്നതിനിടെ പിടിയിലായ ബോട്ടുകൾക്ക് ഫിഷറീസ് ഡപ്യൂട്ടി ഡയറക്ടർ ബീന സുകുമാർ ഓരോ ലക്ഷം രൂപ പിഴ വിധിച്ചു.മറൈൻ എൻഫോഴ്‌സ്‌മെന്റാണ് പരിശോധന നടത്തിയത്.കണ്ണൂർ ചാലാട് സ്വദേശി അബ്ദുൾ ജബ്ബാറിന്‍റെ ഉടമസ്ഥതയിലുള്ള സിനാൻ, എറണാകുളം സ്വദേശി ഫിലോമിന അഗസ്റ്റിന്‍റെ ഉടമസ്ഥതയിലുള്ള സെന്‍റ് ആൻറണി എന്നീ ബോട്ടുകളാണ് 17 ന് രാത്രി മറൈൻ എൻഫോഴ്സ്മെന്‍റ് നടത്തിയ മിന്നൽ പരിശോധനയിൽ പിടികൂടിയത്.നിയമ ലംഘനം ബോധ്യപ്പെട്ടതിനെ തുടർന്ന് ഫിഷറീസ് അസിസ്റ്റന്‍റ് ഡയറക്ടർ അജിത മറൈൻ ഫിഷിംഗ് റഗുലേഷൻ ആക്ട് പ്രകാരം ബോട്ടുകൾ കസ്റ്റഡിയിലെടുത്ത് ഫിഷറീസ് ഡപ്യൂട്ടി ഡയറക്ടർക്ക് സമർപ്പിച്ച റിപ്പോർട്ടിന്‍റെ അടിസ്ഥാനത്തിൽ ഇന്നു നടന്ന അഡ്ജൂഡിക്കേഷനിലാണ് പിഴ വിധിച്ചത്. പിഴ അടച്ചതിനെ തുടർന്ന് ബോട്ടുകൾ ഉടമസ്ഥർക്ക് വിട്ടു നൽകി.ചെറുമത്സ്യങ്ങൾ കൊണ്ടുവരുന്ന ബോട്ടുകളെ കണ്ടെത്തുന്നതിനായുള്ള പരിശോധന ശക്തമാക്കുമെന്നും ട്രോൾ ബാൻ ആരംഭിക്കുന്നതിന് മുമ്പ് തന്നെ മുഴുവൻ ഇതരസംസ്ഥാന ബോട്ടുകളും അഴീക്കൽ ഹാർബറിൽ നിന്നും സ്വദേശത്തേയ്ക്ക് കൊണ്ടുപോകണമെന്നും നിർദേശം ലംഘിക്കുന്നവർക്കെതിരേ കർശന നടപടികൾ സ്വീകരിക്കുമെന്നും ഫിഷറീസ് അസിസ്റ്റന്‍റ് ഡയറക്ടർ അറിയിച്ചു.പരിശോധനയിൽ മറൈൻ എൻഫോഴ്സ്മെൻറ് സീനിയർ സിവിൽ പോലീസ് ഓഫീസർ മുരളീധരൻ, സിവിൽ പോലീസ് ഓഫീസർമാരായ ഷിനിൽ വടക്കേക്കണ്ടി, രഞ്ജിത്, റസ്ക്യൂ ഗാർഡ് ഷൈജു, ഡ്രൈവർ ബിജോയ് എന്നിവർ പങ്കെടുത്തു.

കണ്ണൂർ:കണ്ണൂരിൽ 17 പേർക്ക് മലമ്പനി സ്ഥിതീകരിച്ചു.ഇതിൽ ഒൻപതുപേരും മറുനാടൻ തൊഴിലാളികളാണ്.പ്രതിരോധ പ്രവർത്തനങ്ങൾ ഊർജിതമായി നടത്തുമ്പോഴും പനി പടരുന്നത് പൂർണ്ണമായും തടയാനാകാത്തത് ആശങ്കയുളവാക്കുന്നുണ്ട്.രോഗം സ്ഥിതീകരിച്ച എട്ടുപേരിൽ അയൽ സംസ്ഥാനത്ത് പഠിക്കുന്നവരും ലോറി ഡ്രൈവർമാരുമാണ് കൂടുതൽ.പനി പകരുന്നത് കണ്ടെത്താനും പ്രതിരോധിക്കുന്നതിനും ചികിൽസിക്കുന്നതിനുമായി നടപടികൾ സ്വീകരിച്ചതായി ജില്ലാ മെഡിക്കൽ ഓഫീസർ അറിയിച്ചു.രക്തപരിശോധനയിലൂടെ മാത്രമേ മലമ്പനി സ്ഥിതീകരിക്കാനാകൂ.വീടിനു ചുറ്റും പരിസര പ്രദേശങ്ങളിലും മറ്റും വെള്ളം കെട്ടിക്കിടക്കുന്നത് തടയുക,കിണറുകൾ,ടാങ്കുകൾ,വെള്ളം ശേഖരിച്ചു വെയ്ക്കുന്ന പാത്രങ്ങൾ എന്നിവയെല്ലാം കൊതുക് കടക്കാത്ത വിധത്തിൽ മൂടിവെയ്ക്കുക,ഉറങ്ങുമ്പോൾ കൊതുകുവല ഉപയോഗിക്കുക തുടങ്ങിയവയാണ് പനി പടരാതിരിക്കാനുള്ള പ്രതിരോധ മാർഗങ്ങൾ. ഇടവിട്ടുള്ള പനി,വിറയൽ,പേശിവേദന,തലവേദന എന്നിവയാണ് മലമ്പനിയുടെ പ്രധാന ലക്ഷണങ്ങൾ. മനംപുരട്ടൽ,ഛർദി,വയറിളക്കം,ചുമ, തൊലിപ്പുറമെയും കണ്ണിനും ഉണ്ടാകുന്ന മഞ്ഞനിറം എന്നിവയും മലമ്പനിയുടെ പ്രധാന ലക്ഷണങ്ങളാണ്.