ഇരിട്ടി:ഇരിട്ടി പാലത്തിന്റെ മുകൾ വശത്തെ ഇരുമ്പ് ഗർഡർ ബസ്സിന്‌ മുകളിലേക്ക് തകർന്നു വീണു.പാലത്തെ താങ്ങി നിർത്തുന്ന ഇരുമ്പ് ദണ്ഡാണ് ബസിനു മുകളിലേക്ക് പൊട്ടി വീണത്. ഇരിട്ടിയിൽ നിന്നും മണിക്കടവിലേക്ക് പോവുകയായിരുന്ന നിർമാല്യം ബസിനുമുകളിലാണ് ഗർഡർ പൊട്ടിവീണത്.1933 ഇൽ ബ്രിട്ടീഷുകാർ നിർമിച്ച പാലമാണിത്.കരിങ്കൽ തൂണുകളിൽ ഉരുക്ക് ബീമുകൾ കൊണ്ട് നിർമിച്ച പാലത്തിന്റെ ഭാരം മുഴുവൻ ലഘൂകരിച്ച് താങ്ങി നിർത്തുന്നത് ബീമുകളെ പരസ്പ്പരം ബന്ധിപ്പിച്ച് മുകൾത്തട്ടിൽ നിൽക്കുന്ന ഗാർഡറുകളാണ്. ഇവയുടെ ബലക്ഷയം പാലത്തിനെ മുഴുവനായും ബാധിക്കും.ഇരിട്ടി പഴയപാലത്തിനു സമാന്തരമായി പുതിയ പാലത്തിന്റെ പൈലിങ് ജോലികൾ ആരംഭിച്ചിട്ടുണ്ട്.പുതിയ പാലം വരുന്നതിനാൽ കുറെ വർഷങ്ങളായി പഴയപാലത്തിനു വർഷാവർഷം നടത്തുന്ന അറ്റകുറ്റപ്പണികൾ നടത്താറില്ല.അന്യസംസ്ഥാനങ്ങളിൽ നിന്നും മറ്റും ചരക്കുകയറ്റി വരുന്ന വാഹങ്ങൾ തട്ടി പാലത്തിന്റെ ഇരുമ്പു ദണ്ഡുകൾ പലതും അപകടാവസ്ഥയിലായിരിക്കുകയാണ്. അപകടത്തെ തുടർന്ന് പാലത്തിലൂടെയുള്ള ഗതാഗതം മണിക്കൂറുകളോളം തടസ്സപ്പെട്ടു.ഇരിട്ടി അഗ്നിരക്ഷാസേന ഓഫീസർ ജോൺസൺ പീറ്ററുടെ നേതൃത്വത്തിലെത്തിയ അഗ്നിരക്ഷാപ്രവർത്തകർ ഗ്യാസ് വെൽഡർമാരെ വരുത്തി ഇരുമ്പു ഗർഡർ മുറിച്ചുമാറ്റിയ ശേഷമാണ് ഗതാഗതം പുനഃസ്ഥാപിച്ചത്.
