Kerala

കണ്ണൂർ:വിദേശ ജോലിക്ക് വ്യാജ നഴ്സിംഗ് സർട്ടിഫിക്കറ്റ് നൽകിയ കേസിൽ കണ്ണൂർ ചെട്ടിപ്പീടികയിലെ മെഡ്‌സിറ്റി ഇന്റർനാഷണൽ അക്കാദമി എംഡി രാഹുൽ ചക്രപാണിക്കെതിരെ സാമ്പത്തിക കുറ്റാന്വേഷണ വിഭാഗം അന്വേഷണം തുടങ്ങി.കോഴിക്കോട്ടു നിന്നുമുള്ള അന്വേഷണ ഉദ്യോഗസ്ഥർ കണ്ണൂരിലെത്തി കേസ് സംബന്ധിച്ച രേഖകൾ പോലീസിൽ നിന്നും ശേഖരിച്ചു.കേസിൽ രാഹുൽ ചക്രപാണി സമർപ്പിച്ച ജാമ്യാപേക്ഷ ചൊവ്വാഴ്ച കണ്ണൂർ ഒന്നാം ക്ലാസ് ജുഡീഷ്യൽ മജിസ്‌ട്രേറ്റ് കോടതി തള്ളി.രാഹുൽ ചക്രപാണിയുടെ സഹോദരൻ അനിൽ ചക്രപാണി ഒളിവിലാണ്.കണ്ണൂരിൽ മെഡിക്കൽ കോളേജും സൂപ്പർ സ്പെഷ്യലിറ്റി ആശുപത്രിയും സ്ഥാപിക്കാൻ രാഹുൽ ചക്രപാണി വൻ തുക ഓഹരിയായി സ്വരൂപിച്ചതായും അന്വേഷണത്തിൽ വ്യക്തമായി.300 കോടി രൂപ ചിലവിൽ അത്യാധുനിക ആശുപത്രിയും മെഡിക്കൽ കോളേജും സ്ഥാപിക്കുമെന്ന് ധരിപ്പിച്ച് രാഹുൽ ചക്രപാണി വൻ തുക പിരിച്ചെടുത്തിട്ടുള്ളതായി സംശയമുണ്ട്. പദ്ധതിയുടെ മതിപ്പുചിലവ് കണക്കും വിശദമായ പദ്ധതി രേഖയും എറണാകുളം നോർത്ത് മലബാർ ചേംബർ ഓഫ് കൊമേഴ്സിൽ നടത്തിയ നിക്ഷേപക സംഗമത്തിൽ അവതരിപ്പിച്ചിരുന്നു.മുഖ്യമന്ത്രി ഉൽഘാടനം ചെയ്ത സംഗമത്തിൽ വിദേശത്തുനിന്നുള്ള നിക്ഷേപകരും പങ്കെടുത്തിരുന്നു.2,54,325 ചതുരശ്ര അടിയിൽ ഏഴുനില കെട്ടിടത്തിൽ 150 പേർക്ക് എംബിബിഎസ്‌ പ്രവേശനം നൽകുന്ന മെഡിക്കൽ കോളേജ്, ഡെന്റൽ നഴ്സിംഗ് കോളേജുകൾ,550 കിടക്കകളുള്ള ആശുപത്രി എന്നിവ നിർമിക്കുമെന്നാണ് പദ്ധതിരേഖയിൽ ഉള്ളത്. മെഡ്‌സിറ്റി ഇന്റർനാഷണൽ ഹോസ്പിറ്റൽ ആൻഡ് റിസർച്ച് സെന്ററിന്റെ ഓഹരി-നിക്ഷേപ സമാഹരണത്തിനായി ജനപ്രതിനിധികളുടെ പേരുകൾ ദുരുപയോഗം ചെയ്തതായും പരാതിയുണ്ട്.

ചെറുപുഴ:കർണാടക വനത്തിൽ ഉരുൾപൊട്ടി.ഇതേതുടർന്ന് ചെറുപുഴ കാര്യങ്കോട്‌ പുഴയിൽ വെള്ളമുയർന്നു.അൻപതോളം കുടുംബങ്ങൾ താമസിക്കുന്ന കാനംവയൽ കോളനിയിൽ വെള്ളം കയറി.ഇന്നലെ രാവിലെ പതിനൊന്നു മണിയോട് കൂടിയാണ് കർണാടക വനത്തിൽ ഉരുൾപൊട്ടൽ ഉണ്ടായത്. ഉരുൾപൊട്ടലിനെ തുടർന്ന് ഉണ്ടായ മലവെള്ളപ്പാച്ചിലിൽ മരങ്ങളും തടികളും ഒഴുകിയെത്തി കാനംവയൽ കോളനിയിലേക്കുള്ള മുളപാലത്തിൽ തട്ടിയതിനെ തുടർന്ന് പാലത്തിനു കേടുപാടുകൾ സംഭവിച്ചു.ഈ വർഷം കർണാടക വനത്തിൽ നിന്നും മുള ലഭിക്കാത്തതിനെ തുടർന്ന് പാലം മാറ്റി പണിതിരുന്നില്ല. കോളനിയിൽ താമസിക്കുന്ന കുട്ടികൾ സ്കൂളിലേക്ക് പോകുന്നത് ഈ പാലത്തിൽ കൂടിയാണ്.കഴിഞ്ഞ സർക്കാരിന്റെ കാലത്ത് ഇവിടെ സ്ഥിരം പാലത്തിനായി ഒന്നരക്കോടി രൂപ അനുവദിച്ചിരുന്നുവെങ്കിലും ചുവപ്പുനാടയിൽ കുടുങ്ങിക്കിടക്കുകയാണ്.

കൊച്ചി:നെടുമ്പാശ്ശേരിയിൽ വൻ വിദേശകറൻസി വേട്ട.പത്തുകോടി രൂപ മൂല്യമുള്ള വിദേശ കറന്സിയാണ് പിടികൂടിയത്.ഇന്ന് പുലർച്ചെ ഡൽഹിയിൽനിന്നും ദുബായിലേക്കു പോകാനായി കൊച്ചിയിലെത്തിയ അഫ്ഗാൻ സ്വദേശിയിൽനിന്നുമാണ് കറൻസിശേഖരം പിടിച്ചത്.പിടിയിലായ യൂസഫ് മുഹമ്മദ് സിദ്ദിഖി(33)ന്റെ കൈവശമുണ്ടായിരുന്നവയില്‍ ഭൂരിഭാഗവും അമേരിക്കന്‍ ഡോളറുകളായിരുന്നു.ഇന്നലെ രാത്രി പുറപ്പെടേണ്ട എയര്‍ ഇന്ത്യയുടെ ഡല്‍ഹി- കൊച്ചി- ദുബായ് വിമാനത്തിലാണിയാള്‍ എത്തിയത്. എന്നാല്‍ കൊച്ചിയില്‍ വെച്ച്‌ വിമാനം സാങ്കേതിക തകരാറിനേത്തുടര്‍ന്ന് കുടുങ്ങിയതോടെ യാത്രക്കാരെ ഹോട്ടലുകളിലേക്ക് മാറ്റുക ഉണ്ടായി, അതിന് ശേഷം ഇന്ന് ഇവരെ വിവിധ വിമാനങ്ങളിലായി ദുബായിലേക്ക് അയക്കുന്നതിനുള്ള സുരക്ഷാ പരിശോധനകള്‍ക്കിടെയാണ് കറന്‍സിയുമായി ഇയാളെ പിടികൂടിയത്.

കൊച്ചി:മരടിൽ അപകടത്തിൽപ്പെട്ട സ്കൂൾ വാനിന്റെ ഡ്രൈവറുടെ ലൈസൻസ് റദ്ദാക്കും. ലൈസൻസ് റദ്ദ് ചെയ്യാനുള്ള നടപടികൾ ആരംഭിച്ചിട്ടുണ്ടെന്നും വിശദീകരണം ആവശ്യപ്പെട്ട് നോട്ടീസ് നൽകിയിട്ടുണ്ടെന്നും മോട്ടോർ വാഹന വകുപ്പ് അധികൃതർ അറിയിച്ചു.അപകടത്തിൽപ്പെട്ട വാനിന് 2018 ഓഗസ്റ്റ് വരെ ഫിറ്റ്നസുണ്ട്. 2020 വരെ ഡ്രൈവറുടെ ലൈസൻസിനും ബാഡ്ജിനും കാലാവധിയുണ്ട്. പ്രാഥമിക നിഗമനത്തിൽ അശ്രദ്ധമായ ഡ്രൈവിംഗ് തന്നെയാണ് അപകടകാരണമെന്ന് ബോധ്യപ്പെട്ടിട്ടുണ്ടെന്ന് എറണാകുളം ആർടിഒ റെജി പി. വർഗീസ് പറഞ്ഞു.രണ്ടാം ഗിയറില്‍, 20 കിലോമീറ്റര്‍ വേഗതയില്‍ സാവധാനം തിരിയേണ്ട വളവ് ഡ്രൈവര്‍ അമിത വേഗത്തില്‍ തിരിക്കാന്‍ ശ്രമിച്ചതാണ് അപകട കാരണമെന്നാണ് മോട്ടോര്‍ വാഹന വകുപ്പിന്റെ കണ്ടെത്തല്‍. ഈ സാഹചര്യത്തിലാണ് അനില്‍കുമാറിന്റെ ലൈസന്‍സ് റദ്ദു ചെയ്യാനുള്ള നടപടികളുമായി മുന്നോട്ടുപോകുന്നതെന്നും ആര്‍ടിഒ പറഞ്ഞു.