Kerala

പരിയാരം:പരിയാരം മെഡിക്കൽ കോളേജിൽ ചികിത്സ ഇളവുകൾ നിലവിൽ വന്നു. സ്പെഷ്യലിറ്റി ഒ.പി ചാർജുകൾ ഉൾപ്പെടെ ജനറൽ വാർഡുകളിൽ അഡ്‌മിറ്റാകുന്ന രോഗികളുടെ ബെഡ് ചാർജും സൗജന്യമാക്കി.മരുന്നുകൾക്ക് പരമാവധി അമ്പതു ശതമാനം വരെ ഇളവ് ഏർപ്പെടുത്തി.പ്രൊസീജിയർ ചാർജുകൾ പകുതിയാക്കുകയും ലാബ് ചാർജുകളിൽ  20 ശതമാനം കുറവുവരുത്തുകയും ചെയ്തിട്ടുണ്ട്.സ്വാതന്ത്ര സമരസേനാനികൾക്കും  ആശ്രിതർക്കും ഇപ്പോൾ നൽകിവരുന്ന ഇളവ് തുടരും.എന്നാൽ വിവിധ ചികിത്സാപദ്ധതികൾ പ്രകാരം പ്രവേശിപ്പിക്കപ്പെടുന്ന രോഗികൾക്ക് ഈ ഇളവുകൾ ബാധകമല്ല.തീരുമാനം വ്യാഴാഴ്ച മുതൽ പ്രാബല്യത്തിൽ വന്നതായി മെഡിക്കൽ കോളേജ് പ്രിൻസിപ്പൽ ഡോ.കെ.സുധാകരൻ പറഞ്ഞു.

കണ്ണൂർ:കണ്ണൂർ കെഎസ്ആർടിസി ഡിപ്പോയിൽ ഏറെക്കാലമായി നിർത്തിവെച്ചിച്ചിരുന്ന ജന്റം വർക് ഷോപ്പിന്റെ നിർമാണ പ്രവർത്തികൾ പുനരാരംഭിച്ചു. രണ്ടുവർഷം മുൻപ് പണി തുടങ്ങിയിരുന്നെങ്കിലും കരാറുകാരന് പണം നൽകുന്നതിലെ കാലതാമസം മൂലം പണി ഇടയ്ക്കുവെച്ചു നിർത്തേണ്ടി വന്നിരുന്നു. കേന്ദ്രസർക്കാരിന്റെ ജന്റം പദ്ധതിയിൽ ഉൾപ്പെടുത്തി ഒന്നരക്കോടി രൂപ ചെലവിലാണ് വർക്ക് ഷോപ് നിർമിക്കുന്നത്.പഴയ ജില്ലാ ട്രാൻസ്‌പോർട് ഓഫീസിന്റെ കെട്ടിടം പൊളിച്ചുമാറ്റി അവിടെയാണ് വർക്ക് ഷോപ്പ് നിർമിക്കുന്നത്.പണികൾ പെട്ടെന്ന് പുരോഗമിച്ചിരുന്നെങ്കിലും ബിൽതുക നൽകാത്തതിനെ തുടർന്ന് കരാറുകാർ പണി അവസാനിപ്പിക്കുകയായിരുന്നു.ഗതാഗത മന്ത്രി എ.കെ ശശീന്ദ്രനും കെഎസ്ആർടിസി എം.ഡി ടോമിൻ തച്ചങ്കരിയും ഡിപ്പോ സന്ദർശിച്ചപ്പോൾ അധികൃതർ ഇക്കാര്യത്തെ കുറിച്ച് പരാതിപ്പെട്ടിരുന്നു.ഇതിനെ തുടർന്നാണ് പ്രശ്‌നപരിഹാരം ഉണ്ടായത്.ബസ്സുകളുടെ അറ്റകുറ്റപ്പണി നടത്താനുള്ള ഇൻസ്‌പെക്ഷൻ പിറ്റ് നിർമാണമാണ് ഇപ്പോൾ നടക്കുന്നത്.നാല് ഇൻസ്‌പെക്ഷൻ പിറ്റുകളാണ് നിർമിക്കുക.വർക്‌ഷോപ്പിന്റെ മേൽക്കൂര നിർമാണം നേരത്തെ പൂർത്തിയായിരുന്നു. വർക്ഷോപ്പിനോട് അനുബന്ധമായി മെക്കാനിക്കൽ ജീവനക്കാർക്കായുള്ള വിശ്രമമുറി,ഡിപ്പോ എൻജിനീയറുടെ കാര്യാലയം,സ്റ്റോർ എന്നിവയും നിർമിക്കും. നിർമാണം പൂർത്തിയാകുന്നതോടെ എട്ടു ബസ്സുകളുടെ അറ്റകുറ്റപ്പണി ഒരേ സമയം നടത്താൻ സാധ്യമാകും. ജില്ലാ ട്രാൻസ്‌പോർട് ഓഫീസ്,ജീവനക്കാരുടെ വിശ്രമമുറി തുടങ്ങിയവ ഉൾപ്പെടുന്ന പുതിയ കെട്ടിടത്തിന്റെ നിർമാണവും ഡിപ്പോയിൽ പുരോഗമിക്കുകയാണ്.2016 ഡിസംബറിൽ പണിതീരേണ്ടിയിരുന്ന കെട്ടിടമാണിത്.മുൻ എംഎൽഎ എ.പി അബ്ദുല്ല കുട്ടിയുടെ ഫണ്ടിൽ നിന്നും അനുവദിച്ച ഒരു കോടി രൂപ ചെലവിലാണ് കെട്ടിടം നിർമിക്കുന്നത്.

തിരുവനന്തപുരം:സിനിമ-സീരിയൽ താരം മനോജ് പിള്ള(43) അന്തരിച്ചു.ഹൃദയ സംബന്ധമായ അസുഖത്തെ തുടര്‍ന്ന് ചികിത്സയിലായിരുന്നു.അമല, മഞ്ഞുരുകും കാലം തുടങ്ങിയ സീരിയലുകളിലും നിരവധി സിനിമകളിലും അഭിനയിച്ചിട്ടുണ്ട്. കൊല്ലം കുണ്ടറ സ്വദേശിയാണ്.സംസ്‌കാരം ഇന്ന് ഉച്ചയ്ക്ക് രണ്ട് മണിക്ക് തിരുവനന്തപുരം ശാന്തികവാടത്തില്‍.

തലശ്ശേരി:മാരക ലഹരിമരുന്നുമായി തലശ്ശേരി സൈദാർപള്ളിക്ക് സമീപം താമസിക്കുന്ന ബിലാന്റകത്ത് വീട്ടിൽ മിഹ്റാജ് കാത്താണ്ടിയെ(34)എക്‌സൈസ് സംഘം പിടികൂടി.ഇയാളുടെ പക്കൽ നിന്നും 1000 മില്ലിഗ്രാം മെത്തലിൻ ഡയോക്സി മെത്ത് ആംഫിറ്റമിനും(എം.ഡി.എം.എ) 7.5 ഗ്രാം നിരോധിത ഗുളികയായ സ്പാസ്മോ പ്രോക്സിവോണും പിടിച്ചെടുത്തു.രഹസ്യവിവരത്തെ തുടർന്ന് എക്‌സൈസ് സംഘം നടത്തിയ പരിശോധനയിലാണ് ഇയാൾ പിടിയിലാകുന്നത്. നിരവധി ആൽബങ്ങളിലും മൂന്നു സിനിമകളിലും ഇയാൾ അഭിനയിച്ചിട്ടുണ്ട്.ബെംഗളൂരുവിൽ ബിസിനസ് നടത്തിവരികയാണ് ഇയാൾ.തലശ്ശേരി കേന്ദ്രീകരിച്ചാണ് ഇയാൾ ലഹരി വിൽപ്പന നടത്തുന്നത്.കുട്ടികളാണ് ഇടപാടുകാർ.ആദ്യം പണം നൽകാതെ ഇയാൾ കുട്ടികൾക്ക് മയക്കുമരുന്ന് നൽകും.അവർ അതിനു അടിമപ്പെട്ടു കഴിഞ്ഞാൽ അവരെ ഇടനിലക്കാരായി ഉപയോഗിക്കും.സിനിമ സീരിയൽ മേഖലയിലും ഇവ വ്യാപകമായി ഉപയോഗിക്കുന്നതായി ഇയാൾ വെളിപ്പെടുത്തി. മോളി,എക്റ്റസി എന്നീ പേരുകളിൽ അറിയപ്പെടുന്ന എം ഡി എം എ ഗുളികകൾ 0.2 മില്ലിഗ്രാം കൈവശം വെച്ചാൽ ജാമ്യം ലഭിക്കാത്ത കുറ്റമാണ്.ഈ മരുന്ന് ഒന്നിലേറെ തവണ ഉപയോഗിച്ചാൽ വൃക്ക തകരാറിലാകും.