Kerala

ന്യൂഡല്‍ഹി: കൊച്ചുവേളി – മംഗളൂരുഅന്ത്യോദയ എക്സ്പ്രസിന് കാസര്‍കോട് ഉള്‍പ്പെടെ സ്റ്റോപ്പ് അനുവദിക്കണമെന്നാവശ്യപ്പെട്ട് പി കരുണാകരന്‍ എം പി ഉൾപ്പെടെയുള്ളവർ നടത്തിയ ഇടപെടല്‍ ഫലം കണ്ടു.അന്ത്യോദയ എക്‌സപ്രസിന് കേരളത്തില്‍ രണ്ടു സ്റ്റോപ്പുകള്‍ കൂടി അനുവദിച്ച്‌ റെയില്‍വെ മന്ത്രാലയത്തിന്റെ ഉത്തരവ്. കാസര്‍കോടും ആലപ്പുഴയുമാണ് പുതുതായി അനുവദിച്ച സ്‌റ്റോപ്പുകള്‍. പുതിയ സ്റ്റോപ്പുകള്‍ അനുവദിച്ച വിവരം കേന്ദ്ര റെയില്‍വെ മന്ത്രി പീയുഷ് ഗോയല്‍ രാജ്യസഭാ എംപി വി മുരളീധരനെയാണ് അറിയിച്ചത്. ഉത്തരവിന്റെ കോപ്പി ബിജെപി കാസര്‍കോട് ജില്ലാ പ്രസിഡണ്ട് അഡ്വ. കെ ശ്രീകാന്ത് വാര്‍ത്താ സമ്മേളനത്തില്‍ പുറത്തുവിട്ടു.കൊച്ചുവേളി – മംഗളൂരു അന്ത്യോദയ എക്‌സ്പ്രസിന് കാസര്‍കോട് സ്റ്റോപ്പ് നിഷേധിച്ചത് ശ്രദ്ധയില്‍പ്പെട്ട ഉടന്‍ റെയില്‍വെ മന്ത്രിക്കും ചെയര്‍മാനും ജനറല്‍ മാനേജര്‍ക്കും പി കരുണാകരന്‍ എം പി നിവേദനം നല്‍കിയിരുന്നു. സ്റ്റോപ്പ് അനുവദിക്കാത്തതില്‍ പ്രതിഷേധിച്ച്‌ മുസ്ലിം ലീഗിന്റെ നേതൃത്വത്തില്‍ ട്രെയിന്‍ ചെയിന്‍ വലിച്ച്‌ നിര്‍ത്തി പ്രതിഷേധിച്ചിരുന്നു. ഡിവൈഎഫ്‌ഐ റെയില്‍വെ സ്റ്റേഷനിലേക്ക് പ്രതിഷേധ മാര്‍ച്ച്‌ ആണ് സംഘടിപ്പിച്ചത്. രാജ്യസഭ എംപി വി മുരളീധരന്‍ വഴി ബിജെപിയും റയില്‍വെ മന്ത്രിക്ക് കത്ത് നല്‍കിയിരുന്നു.ട്രെയിനിന്റെ ടൈം ഷെഡ്യൂളില്‍ മാറ്റം വരുത്തിയ ശേഷം ഒരാഴ്ചക്കുള്ളില്‍ തന്നെ ട്രെയിനിന് കാസര്‍കോട്ടും ആലപ്പുഴയിലും സ്റ്റോപ്പ് അനുവദിക്കുമെന്നാണ് റെയില്‍വേ വൃത്തങ്ങള്‍ അറിയിക്കുന്നത്.

കാസർകോഡ്:ഡോ.ജയപ്രസാദിനെ കേന്ദ്രസർവ്വകലാശാലയുടെ ആദ്യ പ്രൊ വൈസ് ചാൻസിലറായി നിയമിച്ചു.ബുധനാഴ്ച തിരുവനന്തപുരത്ത് നടന്ന കേന്ദ്ര സർവകലാശാല എക്സിക്യൂട്ടീവ് കൗൺസിൽ യോഗത്തിലാണ് തീരുമാനം.കേന്ദ്ര സർവകലാശാലയിലെ സ്കൂൾ ഓഫ് കൾച്ചറൽ സ്റ്റഡീസിൽ ഡീൻ ആയിരുന്നു ജയപ്രസാദ്.കേന്ദ്ര സർവകലാശാല തുടങ്ങിയിട്ട് ഇത്രയും കാലം ഈ തസ്തികയിലേക്ക് ആരെയും നിയമിച്ചിരുന്നില്ല.കേന്ദ്ര സർവകലാശാല എക്സിക്യൂട്ടീവ് കൗൺസിൽ അംഗം,കേന്ദ്രസർവ്വകലാശാലയിലെ കോർട്ട് മെമ്പർ,മഹാത്മാ അയ്യൻ‌കാളി സെന്റർ ഫോർ കേരള സ്റ്റഡീസ് ഡയറക്റ്റർ,ഇന്ത്യൻ കൗൺസിൽ ഓഫ് സോഷ്യൽ റിസേർച്ചിന്റെ സതേൺ റീജിയൻ ഉപദേശക സമിതി അംഗം,ഇന്ത്യൻ പൊളിറ്റിക്കൽ സയൻസ് അസോസിയേഷൻ അഖിലേന്ത്യ വൈസ് പ്രസിഡന്റ്,ഭാരതീയ വിചാരകേന്ദ്രം സംസ്ഥാന വൈസ് പ്രസിഡന്റ് എന്നീ നിലകളിലും ഡോ.ജയപ്രസാദ് പ്രവർത്തിച്ചുവരുന്നു.നാക്,യുജിസി തുടങ്ങിയ സമിതികളിലെ നോമിനിയായും സേവനമനുഷ്ഠിക്കുന്നു.അതേസമയം ജയപ്രസാദിനെ പ്രൊ വൈസ് ചാൻസിലറായി നിയമിക്കാനുള്ള എക്സിക്യൂട്ടീവ് കൗൺസിൽ തീരുമാനം വിവാദമായിരിക്കുകയാണ്.ഭാരതീയ വിചാരകേന്ദ്രം സംസ്ഥാന വൈസ് പ്രസിഡന്റ് കൂടിയായ ഇദ്ദേഹത്തെ സ്ഥാപനത്തിൽ അധ്യാപകനായി നിയമിച്ചത് ചട്ടങ്ങൾ മറികടന്നാണെന്നും നിയമനം റദ്ദാക്കണമെന്നും ആവശ്യപ്പെട്ട് ചെറുപുഴ പ്രാപ്പൊയിൽ സ്വദേശി പടിഞ്ഞാറ്റയിൽ ഗോകുൽ നൽകിയ ഹർജിയിൽ ഹൈക്കോടതിയിൽ നടപടികൾ നടന്നുവരികയാണ്.അതിന്റെ തീരുമാനം വരും മുമ്പേയാണ് സ്ഥാനക്കയറ്റം കൂടി നൽകിയിരിക്കുന്നത്.എന്നാൽ തീരുമാനത്തിൽ അപാകതയില്ലെന്നും ഇത്തരം നിയമനങ്ങൾക് വൈസ് ചാൻസിലർക്ക് തന്റെ വിവേചനാധികാരം ഉപയോഗിക്കാമെന്നും മാത്രമല്ല മതിയായ യോഗ്യതയും അക്കാദമിക്ക് മികവും ഉള്ളയാളാണ് ജയപ്രസാദെന്നും രജിസ്ട്രാർ ഡോ.എ.രാധാകൃഷ്‌ണൻ നായർ വ്യക്തമാക്കി.

കൊച്ചി:നടിയെ ആക്രമിച്ച കേസിൽ പ്രതികൾക്കെതിരെ രൂക്ഷ വിമർശനവുമായി കോടതി.കേസ് വൈകിപ്പിക്കുവാന്‍ പ്രതികള്‍ മനപൂര്‍വം ശ്രമിക്കുന്നതായി കോടതി പറഞ്ഞു. കേസ് പരിഗണിക്കുന്ന എറണാകുളം സെഷന്‍സ് കോടതിയാണ് ഇക്കാര്യം വ്യക്തമാക്കിയത്. കേസിലെ പ്രധാന രേഖകളെല്ലാം നല്‍കാന്‍ കോടതി ഉത്തരവിട്ടിരുന്നു. എന്നാല്‍ കൂടുതല്‍ രേഖകള്‍ ആവശ്യപ്പെട്ട് പ്രതികള്‍ വീണ്ടും വീണ്ടും കോടതിയെ സമീപിച്ചുകൊണ്ടിരിക്കുകയാണ്. ഇത് പ്രതികളുടെ വിചാരണ നിശ്ചയിക്കാന്‍ തടസമാവുകയാണെന്നും കോടതി പറഞ്ഞു.കേസില്‍ തെളിവു നശിപ്പിച്ചതിന് വിചാരണ നേരിടുന്ന പള്‍സര്‍ സുനിയുടെ അഭിഭാഷകരായിരുന്ന പ്രതീഷ് ചാക്കോ, രാജു ജോസഫ് എന്നിവരുടെ വിടുതല്‍ ഹര്‍ജി തള്ളിക്കൊണ്ടായിരുന്നു കോടതി ഇക്കാര്യം വ്യക്തമാക്കിയത്.

കണ്ണൂർ:യുവമോർച്ച നേതാവ് ലസിത പാലയ്ക്കൽ പാനൂർ പോലീസ് സ്റ്റേഷന് മുൻപിൽ കുത്തിയിരിപ്പ് സമരം ആരംഭിച്ചു.യുവമോര്‍ച്ച സംസ്ഥാന അധ്യക്ഷന്‍ അഡ്വ. സുരേഷ് ബാബുവിന്റെ നേതൃത്വത്തിലാണ് സമരം നടക്കുന്നത്.സോഷ്യൽ മീഡിയ വഴി തന്നെ അപമാനിച്ച തരിക്കിടെ സാബുവിനെ അറസ്റ്റ് ചെയ്യുക എന്ന ആവശ്യവുമായാണ് ലസിതയുടെ സമരം.സാബുവിനെതിരെ എഫ് ഐ ആര്‍ ഇട്ട പോലീസ് പിന്നീട് യാതൊരു നടപടിയുമെടുക്കാത്തതിലാണ് പ്രതിഷേധം. ഇതിനിടെ സാബു ഏഷ്യാനെറ്റിലെ ബിഗ്‌ബോസ് പരിപാടിയില്‍ മത്സരാർത്ഥിയായ എത്തുകയും ചെയ്തു. ഷാനി പ്രഭാകര്‍, വീണാ ജോര്‍ജ്ജ്, ദീപ നിഷാന്ത് എന്നിവരുടെ പരാതികളില്‍ സത്വരനടപടി സ്വീകരിച്ച കേരളാ പോലീസ് ലസിതാ പാലക്കലിന്‍റെ കാര്യത്തില്‍ പക്ഷപാതപരമായ നിലപാടാണ് സ്വീകരിച്ചിരിക്കുന്നതെന്ന് അഡ്വക്കറ്റ് സുരേഷ് ബാബു പറഞ്ഞു.