Kerala

കൊച്ചി:നടി ആക്രമിക്കപ്പെട്ട കേസിൽ വിചാരണ തുടങ്ങാനിരിക്കെ സർക്കാർ അഭിഭാഷകനെ മാറ്റണമെന്ന ആവശ്യവുമായി അമ്മ സംഘടനയിലെ രണ്ടു നടിമാർ.അമ്മ എക്‌സിക്യൂട്ടിവ് അംഗങ്ങളായ ഹണി റോസ്, രചനാ നാരായണന്‍ കുട്ടി ഹർജിയുമായി കോടതിയെ സമീപിച്ചത്.25 വര്‍ഷമെങ്കിലും അനുഭവ പരിചയുമള്ള ആളാകണം കേസില്‍ പ്രോസിക്യൂട്ടര്‍. സഹായിയായി യുവഅഭിഭാഷകയും വേണമെന്ന് അവര്‍ ആവശ്യപ്പെട്ടു.ഇക്കാര്യം ഉന്നയിച്ച ഇവർ കോടതിയിൽ കക്ഷി ചേരുകയായിരുന്നു.എന്നാൽ കേസില്‍ കക്ഷി ചേരാനുള്ള അമ്മ ഭാരവാഹികളുടെ അപേക്ഷയെ എതിര്‍ത്ത് ആക്രമിക്കപ്പെട്ട നടി രംഗത്തെത്തി.കേസ് നടത്തിപ്പിന് പുറമെ നിന്നുള്ള സഹായം ആവശ്യമില്ലെന്ന് നടിയുടെ അഭിഭാഷകന്‍ കോടതിയെ അറിയിച്ചു.നടിയോട് ആലോചിച്ചാണ് പ്രോസിക്യൂട്ടറെ നിയമിച്ചത്. പ്രോസിക്യൂട്ടര്‍ കേസ് നല്ല രീതിയില്‍ മുന്നോട്ടുകൊണ്ടുപോകുന്നുണ്ടെന്ന് അഭിഭാഷകൻ വ്യക്തമാക്കി.കേസ് നടത്തിപ്പിന്റെ കാര്യങ്ങള്‍ എങ്ങിനെ മുന്നോട്ട് കൊണ്ടുപോകുമെന്ന് തനിക്ക് അറിയാം.താന്‍ നിലവില്‍ അമ്മയില്‍ അംഗമല്ല. കേസ് നടത്തിപ്പിന് തനിക്ക് പുറത്ത് നിന്ന് സഹായം ആവശ്യമില്ലെന്ന് നടി അറിയിച്ചു.

കണ്ണൂർ:യൂത്ത് കോൺഗ്രസ് നേതാവ് മട്ടന്നൂർ എടയന്നൂരിലെ ശുഹൈബിന്റെ കൊലപാതകത്തിലെ മുഴുവൻ പ്രതികളെ യും പിടികൂടണമെന്നാവശ്യപ്പെട്ട് ജില്ലാ കോൺഗ്രസ് കമ്മിറ്റി രണ്ടാം ഘട്ട സമരത്തിലേക്ക് കടക്കുന്നു.ഇതിന്റെ ഭാഗമായി ഡിസിസി പ്രസിഡന്റ് സതീശൻ പാച്ചേനി ഓഗസ്റ്റ് എട്ടിന് രാവിലെ 10 മണിമുതൽ 48 മണിക്കൂർ നിരാഹാര സമരം നടത്തും.സമരം കോൺഗ്രസ് പ്രവർത്തക സമിതിയംഗം ഉമ്മൻ ചാണ്ടി ഉൽഘാടനം ചെയ്യും.കേസിലെ മുഴുവൻ പ്രതികളെയും അറസ്റ്റ് ചെയ്യുമെന്ന് ഉറപ്പ് ലഭിച്ചിരുന്നെങ്കിലും സിപിഎമ്മും പോലീസും ചേർന്ന് പ്രതികളെ അറസ്റ്റ് ചെയ്യാതെ ഒത്തുകളിക്കുകയാണെന്നാരോപിച്ചാണ് കോൺഗ്രസ് വീണ്ടും സമരത്തിനിറങ്ങുന്നത്.കേസിലെ പതിനാറാം പ്രതിയും സിപിഎം മുൻ ലോക്കൽ സെക്രെട്ടറിയുമായ പ്രശാന്തിനെ അറസ്റ്റ് ചെയ്ത് ചോദ്യം ചെയ്താൽ മാത്രമേ ഈ കേസിൽ സിപിഎം നേതൃത്വത്തിന്റെ പങ്ക് പുറത്തു വരികയുള്ളൂ.കുറ്റപത്രത്തിൽ പറഞ്ഞ 12 മുതൽ 17 വരെ പ്രതികളെ ഇതുവരെ അറസ്റ്റ് ചെയ്തിട്ടില്ല. കേസിലെ മുഴുവൻ പ്രതികളെയും അറസ്റ്റ് ചെയ്യണമെന്നാവശ്യപ്പെട്ട് മട്ടന്നൂർ പോലീസ് സ്റ്റേഷനിലേക്ക് മാർച്ച് നടത്തിയ യൂത്ത് കോൺഗ്രസ് പ്രവർത്തകർക്കെതിരെയുള്ള കേസ് പിൻവലിക്കണമെന്നും സതീശൻ പാച്ചേനി ആവശ്യപ്പെട്ടു.

:കൂത്തുപറമ്പ് കോട്ടയം അങ്ങാടിയിൽ പുലിയെ കണ്ടതായി അഭ്യൂഹം.ഇത് പ്രദേശവാസികളെ ആശങ്കയിലാക്കി.ബുധനാഴ്ച രാത്രി എട്ടുമണിയോടെ കയറ്റയം അങ്ങാടി ജുമാമസ്ജിദിന് സമീപത്തുള്ള വീടിന്റെ പരിസരത്ത് പുലിയെ കണ്ടെന്നാണ് പറയുന്നത്.വീട്ടുകാർ ബഹളംവെച്ചതിനെ തുടർന്ന് പുലി ഓടിമറഞ്ഞതായും പറയുന്നു.നാട്ടുകാർ വിവരമറിയിച്ചതിനെത്തുടർന്ന് രാത്രി തന്നെ സ്ഥലത്തെത്തിയ കതിരൂർ പോലീസ് പരിശോധന നടത്തിയെങ്കിലും പുലിയെ കണ്ടെത്താനായില്ല.തുടർന്ന് വ്യാഴാഴ്ച രാവിലെ കണ്ണവം ഫോറസ്റ്റ് ഡെപ്യുട്ടി റെയ്‌ഞ്ചർ കെ.വി ആനന്ദിന്റെ നേതൃത്വത്തിൽ വനം വകുപ്പ് ഉദ്യോഗസ്ഥരും ഫോറസ്റ്റ് റാപിഡ് ആക്ഷൻ ഫോഴ്സും സ്ഥലത്തെത്തി പരിശോധന നടത്തി.വീട്ടുമുറ്റത്ത് കണ്ട കാല്പാടുകൾ സംഘം പ്രത്യേക പരിശോധനയ്ക്ക് വിധേയമാക്കി.സമീപത്തെ കാടുകളിലും വിജനമായ പ്രദേശങ്ങളിലും പരിശോധന നടത്തി.പ്രദേശത്ത് നിരീക്ഷണം തുടരുമെന്നും ഭയപ്പെടേണ്ട ആവശ്യമില്ലെന്നും ഫോറെസ്റ്റ് ഉദ്യോഗസ്ഥർ പറഞ്ഞു.അതേസമയം കഴിഞ്ഞ ദിവസം ഈ പ്രദേശത്ത് പട്ടിയുടെ ജഡം കണ്ടതായി നാട്ടുകാർ പറഞ്ഞു.പുലി ഉണ്ടെന്ന അഭ്യൂഹം പരന്നതിനെ തുടർന്ന് ഇവിടെ നാട്ടുകാർ ഭീതിയിലായിരിക്കുകയാണ്.

പാലക്കാട്:നഗരമധ്യത്തിൽ മൂന്നുനില കെട്ടിടം തകർന്നു വീണ സംഭവത്തിൽ 11 പേരെ രക്ഷപ്പെടുത്തി.20 പേര്‍ കെട്ടിടാവശിഷ്ടങ്ങള്‍ക്കിടയില്‍ കുടുങ്ങി കിടക്കുന്നതായാണ് പ്രാഥമിക വിവരം.രക്ഷാപ്രവര്‍ത്തനം ഇപ്പോഴും പുരോഗമിച്ചുവരികയാണ്. രക്ഷാപ്രവര്‍ത്തനങ്ങള്‍ക്കായി ദേശീയ ദുരന്ത നിവാരണ സേനയും രംഗത്തെത്തിയിട്ടുണ്ട്. ഇന്ന് ഉച്ചയ്ക്ക് ഒരുമണിയോടുകൂടിയാണ് മൂന്നുനില കെട്ടിടം തകര്‍ന്നു വീണത്.പോലീസും അഗ്നിശമനസേനയും നാട്ടുകാരും ചേര്‍ന്നായിരുന്നു രക്ഷാപ്രവര്‍ത്തനം. ക്രെയിനും മണ്ണുമാന്തി യന്ത്രങ്ങളും ഉപയോഗിച്ചാണ് തെരച്ചില്‍ നടത്തുന്നത്.രക്ഷപ്പെടുത്തിയവരെ പാലക്കാട് ജനറല്‍ ആശുപത്രിയിലേക്ക് മാറ്റി. ഇതില്‍ അഞ്ച് പേരുടെ നില ഗുരുതരമാണെന്നാണ് വിവരം. മൊബൈല്‍ ഫോണ്‍ കടകളും ലോഡ്ജും ഹോട്ടലും ഉള്‍പ്പടെ പ്രവര്‍ത്തിക്കുന്ന മുന്‍സിപ്പല്‍ ബസ് സ്റ്റാന്‍ഡിന് സമീപത്തുള്ള കെട്ടിടമാണ് തകര്‍ന്നു വീണത്.താഴത്തെ നിലയില്‍ പ്രവര്‍ത്തിച്ചിരുന്ന ഹോട്ടലില്‍ അറ്റക്കുറ്റപ്പണികള്‍ നടക്കുന്നതിനിടെയാണ് അപകടം. തൂണ്‍ മാറ്റിയപ്പോഴാണ് അപകടമുണ്ടായതെന്നാണ് പ്രാഥമിക നിഗമനം. കളക്ടര്‍ ഉള്‍പ്പെടെയുള്ളവര്‍ രക്ഷാപ്രവര്‍ത്തനങ്ങള്‍ക്ക് നേതൃത്വം നല്‍കുന്നുണ്ട്.