Kerala

തിരുവനന്തപുരം:സുപ്രീം കോടതി വിധിയുടെ അടിസ്ഥാനത്തിൽ ശബരിമല ദർശനത്തിനെത്തുന്ന യുവതികളെ തടയുന്ന പ്രതിഷേധക്കാരെ ഉടൻ അറസ്റ്റ് ചെയ്ത് നീക്കണമെന്ന് ഡിജിപി ലോക്നാഥ് ബെഹ്‌റ നിർദേശം നൽകി.എല്ലാ ജില്ലാ എസ്പിമാര്‍ക്കും ഡിജിപി അടിയന്തര സന്ദേശം നല്‍കി. എല്ലാ ജില്ലകളിലും പ്രത്യേക പട്രോളിംഗ് നടത്തും. ശബരിമലയിലെത്തുന്ന സ്ത്രീകളെ തടയുകയോ കൈയേറ്റം ചെയ്യുകയോ ചെയ്താല്‍ കേസ് എടുക്കാനും ഡിജിപി നിര്‍ദ്ദേശം നല്‍കി. ശബരിമലയില്‍ ദര്‍ശനത്തിന് എത്തിയ ആന്ധ്രാ സ്വദേശിനിയെയും ചേര്‍ത്തല സ്വദേശിനിയെയും പ്രതിഷേധക്കാര്‍ തടഞ്ഞിരുന്നു. തടഞ്ഞ 50 പ്രതിഷേധക്കാര്‍ക്കെതിരെ പൊലീസ് കേസെടുക്കുകയും ചെയ്തിരുന്നു.

തിരുവനന്തപുരം:അപകടസമയത്ത് വാഹനമോടിച്ചിരുന്നത് ബാലഭാസ്‌ക്കർ ആയിരുന്നുവെന്ന് ഡ്രൈവറുടെ മൊഴി.തൃശൂര്‍ മുതൽ കൊല്ലം വരെ മാത്രമേ താൻ വാഹനം ഓടിച്ചിരുന്നുള്ളൂ. പിന്നീട് ബാലഭാസ്കറാണ് ഓടിച്ചത്. ലക്ഷ്മിയും മകൾ തേജസ്വിനിയും മുൻസീറ്റിലാണിരുന്നത്. പിന്നിലെ സീറ്റിൽ വിശ്രമിക്കുകയായിരുന്നു താനെന്നും അർജുൻ മൊഴി നൽകി. സെപ്റ്റംബർ ഇരുപത്തഞ്ചാം തീയതി പുലർച്ചെ പള്ളിപ്പുറം സിആർപിഎഫ് ക്യാമ്പിന് സമീപത്തുവെച്ചാണ് ബാലഭാസ്‌ക്കറും കുടുംബവും സഞ്ചരിച്ച കാർ അപകടത്തിൽപ്പെട്ടത്.അപകടത്തിൽ ബാലഭാസ്‌ക്കറും മകളും മരിച്ചിരുന്നു. ബാലഭാസ്‌ക്കറിന്റെ ഭാര്യ ലക്ഷ്മിയും ഡ്രൈവർ അർജുനും ഇപ്പോഴും തിരുവനന്തപുരം അനന്തപുരി ആശുപത്രിയിൽ ചികിത്സയിലാണ്.

വെള്ളൂര്‍: പയ്യന്നൂര്‍-വെള്ളൂര്‍ ദേശീയ പാതയില്‍ ടാങ്കര്‍ലോറി മറിഞ്ഞു. വെള്ളൂര്‍ പോസ്റ്റോഫീസ് ബസ്റ്റോപ്പിനടുത്താണ് അപകടം ഉണ്ടായത്. മംഗലാപുരത്ത് നിന്ന് ഇന്ധനം നിറച്ച്‌ വരുന്ന ടാങ്കര്‍ലോറിയാണ് മറിഞ്ഞത്.നിലവില്‍ ഗ്യാസ് ടാങ്കറിന് ലീക്കില്ലെന്ന് പോലീസ് വ്യക്തമാക്കി. എന്നാല്‍ പമ്പ് താഴെ ആയതുകൊണ്ട് തന്നെ ലീക്ക് ഉണ്ടാകാനുള്ള സാധ്യതയും തള്ളി കളയാനാകില്ല. ഇന്ധനം മറ്റൊരു ടാങ്കറിലേക്ക് മാറ്റി കയറ്റണമെങ്കില്‍ ഏഴ് മണിക്കൂര്‍ ആവശ്യമാണ്. പ്രദേശത്ത് വൈദ്യുതി ബന്ധം വിച്ഛേദിച്ചിരിക്കുകയാണ്.അപകടത്തെ തുടര്‍ന്ന് ദേശീയപാതയില്‍ ഗതാഗതം പൂർണ്ണമായും തടസപ്പെട്ടു. കാഞ്ഞങ്ങാട്, പയ്യന്നൂർ ഭാഗത്തു നിന്നും വരുന്ന വാഹനങ്ങൾ വഴിതിരിച്ചുവിടുകയാണ്.

കാസർകോഡ്:വിദ്യാർത്ഥികളിൽ നിന്നും ഭീഷണിയുണ്ടെന്ന് കാണിച്ച് പോലീസ് സംരക്ഷണം ആവശ്യപ്പെട്ട് കേന്ദ്ര സർവകലാശാല അധികൃതർ നൽകിയ പരാതിയിൽ ആറ് വിദ്യാർത്ഥികൾക്കും സംസ്ഥാനസർക്കാറിനും ഹൈക്കോടതി നോട്ടീസ് അയച്ചു.സമരത്തിനിടെ പുറത്തുനിന്നും വന്നവർ അക്രമം നടത്തിയെന്നും അതിനാൽ ക്ലാസ് നടത്താൻ കഴിയുന്നില്ലെന്നും കാണിച്ച് സർവകലാശാലയ്ക്ക് വേണ്ടി രജിസ്ട്രാർ ഡോ.എ.രാധാകൃഷ്ണനാണ് പരാതി നൽകിയിരിക്കുന്നത്. സർവ്വകലാശാലയ്‌ക്കെതിരെ ഫേസ്ബുക് പോസ്റ്റിട്ടതിന്റെ പേരിൽ പുറത്താക്കപ്പെട്ടതിനെ തുടർന്ന് ആത്മഹത്യയ്ക്ക് ശ്രമിച്ച അഖിൽ താഴത്ത്,എസ്എഫ്ഐ ജില്ലാ പ്രസിഡന്റ് എം.വി രതീഷ്,സെക്രെട്ടറി ശ്രീജിത്ത് രവീന്ദ്രൻ,സർവകലാശാല യൂണിറ്റ് സെക്രെട്ടറിയായിരുന്ന അനഘ്,അംബേദ്‌കർ സ്റ്റുഡന്റസ് അസോസിയേഷൻ പ്രവർത്തകൻ സുഹൈൽ,തുഫായിൽ,സോനു.എസ്.പാപ്പച്ചൻ എന്നിവർക്കാണ് ഹൈക്കോടതി നോട്ടീസ് അയച്ചിരിക്കുന്നത്.സമരം അവസാനിപ്പിക്കുന്നതിനായി കഴിഞ്ഞ ദിവസം കല്കട്ടറുടെ സാന്നിധ്യത്തിൽ നടത്തിയ ചർച്ചയിലെ തീരുമാനങ്ങൾ നടപ്പാക്കുന്നതിന് പകരം സർവകലാശാല അധികാരികൾ വിദ്യാർത്ഥിവിരുദ്ധ നിലപാടുകൾ സ്വീകരിക്കുകയാണെന്നും ക്ലാസുകൾ പുനരാരംഭിക്കാൻ തയ്യാറായിട്ടില്ലെന്നും വിദ്യാർഥികൾ ആരോപിച്ചു. ഇതിനെതിരെ വിദ്യാത്ഥികൾ കുടിൽകെട്ടി സമരം അടക്കമുള്ളവ നടത്താനുള്ള ഒരുക്കത്തിനിടെയാണ് ഹൈക്കോടതി നോട്ടീസ് അയച്ചിരിക്കുന്നത്.