Kerala

ശബരിമല:ചിത്തിരയാട്ട പൂജകൾക്ക് ശേഷം ശബരിമല നട അടച്ചു.തന്ത്രി കണ്‌ഠരര് രാജീവരുടെ കാര്‍മ്മികത്വത്തില്‍ പടിപൂജ നടത്തിയാണ് രാത്രി പത്തുമണിയോടെ നട അടച്ചത്. 26 മണിക്കൂര്‍ നീണ്ട തീര്‍ത്ഥാടത്തിനാണ് ഇതോടെ സമാപനമായത്. മണ്ഡല പൂജകള്‍ക്കായി ശബരിമല നട ഇനി വൃശ്ചികം ഒന്നിന് തുറക്കും.തിങ്കളാഴ്ച വൈകിട്ട് അഞ്ചിനാണ് ശബരിമല നട തുറന്നത്. സംഘര്‍ഷ സാദ്ധ്യത കണക്കിലെടുത്ത് കനത്ത സുരക്ഷാ സംവിധാനമാണ് പമ്ബയിലും നിലയ്ക്കലിലും സന്നിധാനത്തും ഏര്‍പ്പെടുത്തിയിരുന്നത്. ഇതിന്റെ ഭാഗമായി പ്രഖ്യാപിച്ച നിരോധനാജ്ഞ അര്‍ധരാത്രിയോടെ പിൻവലിച്ചു.

കണ്ണൂർ:ജില്ലാ ആശുപത്രിയിലെ ലേബർ റൂം ജനുവരിയോടെ ‘ലക്ഷ്യ’ പദ്ധതി പ്രകാരമുള്ള നിലവാരത്തിലേക്ക് ഉയർത്തും.ആരോഗ്യമന്ത്രി കെ.കെ ഷൈലജയുടെ നേതൃത്വത്തിൽ ചേർന്ന യോഗത്തിലാണ് തീരുമാനം.ലേബർ റൂം,പ്രസവ ശുശ്രൂഷ,പരിചരണം തുടങ്ങിയ സൗകര്യങ്ങൾ മെച്ചപ്പെടുത്തുന്നതിനുള്ള ദേശീയ ആരോഗ്യദൗത്യ പദ്ധതിയാണ് ‘ലക്ഷ്യ’.3.25 കോടിയുടെ പദ്ധതികളാണ് ലക്ഷ്യയുടെ ഭാഗമായി ആശുപത്രിയിൽ അനുവദിച്ചിട്ടുള്ളത്.ദേശീയ നിലവാരമനുസരിച്ചുള്ള എൺപതു ശതമാനം സൗകര്യങ്ങളും നിലവിൽ ആശുപത്രിയിൽ ഉണ്ട്.ബാക്കി സൗകര്യങ്ങൾ ഉടൻ സജ്ജീകരിക്കാൻ കഴിയുന്നതാണെന്നും ആശുപത്രി സൂപ്രണ്ട് ഡോ.വി.കെ രാജീവൻ പറഞ്ഞു.ഇതിന്റെ ഭാഗമായി തുടങ്ങേണ്ട പ്രവർത്തനങ്ങളെ കുറിച്ചും യോഗത്തിൽ ചർച്ച ചെയ്തു.ജില്ലാ ആശുപത്രി മാസ്റ്റർപ്ലാൻ അനുസരിച്ചുള്ള നവീകരണ പ്രവർത്തനങ്ങൾ ഡിസംബറോടെ തുടങ്ങുമെന്ന് ബന്ധപ്പെട്ടവർ യോഗത്തിൽ അറിയിച്ചു. നവീകരണത്തിന്റെ ഭാഗമായി ടി.ബി വാർഡ് മാറ്റുന്നതിനുള്ള  നടപടികൾ ഉടൻ പൂർത്തിയാക്കാൻ മന്ത്രി ബന്ധപ്പെട്ടവർക്ക് നിർദേശം നൽകി.രക്തബാങ്ക് മാറ്റുന്നതിനുള്ള പ്രവർത്തി നടന്നുകൊണ്ടിരിക്കുകയാണ്.ഇത് നവംബറിൽ പൂർത്തിയാകും.ജില്ലാ പഞ്ചായത്ത് പ്രസിഡന്റ് കെ.വി സുമേഷ്,കലക്റ്റർ മിർ മുഹമ്മദലി,മന്ത്രയുടെ പ്രൈവറ്റ് സെക്രെട്ടറി പി.സന്തോഷ്,ഡിഎംഒ കെ.നാരായണ നായിക്,ദേശീയ ആരോഗ്യദൗത്യം ജില്ലാ പ്രൊജക്റ്റ് മാനേജർ ഡോ.കെ.വി ലതീഷ് എന്നിവർ യോഗത്തിൽ പങ്കെടുത്തു.

മട്ടന്നൂർ:കണ്ണൂര്‍ രാജ്യാന്തര വിമാനത്താവളത്തില്‍ നിന്നുള്ള വിമാന സർവീസുകൾക്കുള്ള ടിക്കറ്റ് ബുക്കിങ് ഈ മാസം 9ന് ആരംഭിക്കുമെന്ന്‌ എയര്‍ ഇന്ത്യ എക്സ്പ്രസ് അധികൃതർ അറിയിച്ചു. കണ്ണൂരില്‍ നിന്നും അബുദാബിയിലേക്കാണ് ഡിസംബര്‍ 9ന് ആദ്യ സര്‍വീസ് നടത്തുകയെന്നും എയര്‍ ഇന്ത്യ വ്യക്തമാക്കി.ഡിസംബര്‍ ഒന്‍പതിന് രാവിലെ 11മണിക്ക് എയര്‍ഇന്ത്യ എക്സ്പ്രസിന്റെ ബോയിങ് 737-800 വിമാനം അബുദാബിയിലേക്ക് പറന്നുയരും. ഉച്ചക്ക് 1.30തോടെ വിമാനം അബുദാബിയില്‍ എത്തിച്ചേരും. അന്നു തന്നെ 2.30ന് പുറപ്പെട്ട് രാത്രി 8 മണിക്ക് കണ്ണുരിലേക്ക് തിരിച്ചും സര്‍വീസ് നടത്തും.വിമാനത്തിന്റെ സമയക്രമങ്ങള്‍ എയര്‍ ഇന്ത്യ നേരത്തെതന്നെ ഡി ജി സി എക്ക് സമര്‍പ്പിച്ചിരുന്നു.അബുദാബിയിലേക്ക് ആഴ്ചയില്‍ 4 സര്‍വീസുകളാണ് നടത്താന്‍ നിലവില്‍ എയര്‍ ഇന്ത്യ ഉദ്ദേശിക്കുന്നത്. മസ്കത്തിലേക്ക് ആഴ്ചയില്‍ 3 സര്‍വീസുകളും. ദോഹയിലേക്ക് ആഴ്ചയില്‍ 4 സര്‍വീസുകളും റിയാദിലേക്ക് 3 സര്‍വീസുകളുമാണ് കണ്ണൂരില്‍ നിന്നുണ്ടാവുക.

പത്തനംതിട്ട: ശബരിമല സന്നിധാനത്ത് മാധ്യമ പ്രവര്‍ത്തകര്‍ക്കു നേരെയും കൈയേറ്റ ശ്രമം. ചൊവ്വാഴ്ച രാവിലെ മൂന്നു സ്ത്രീകള്‍ ദര്‍ശനത്തിനായി എത്തിയതിനു പിന്നാലെയാണ് പ്രതിഷേധക്കാര്‍ മാധ്യമങ്ങളെയും ആക്രമിക്കാന്‍ ശ്രമിച്ചത്.പ്രതിഷേധത്തിന്‍റെ ദൃശ്യങ്ങള്‍ പകര്‍ത്താന്‍ ശ്രമിച്ച മാതൃഭൂമി ന്യൂസ് ക്യാമറാമാൻ വിഷ്ണുവിനെ മര്‍ദിക്കാന്‍ ശ്രമിച്ചു. പ്രതിഷേധക്കാരെ ഭയന്ന് സമീപത്തുള്ള കെട്ടിടത്തിന്റെ സണ്‍ഷേഡില്‍ കയറി നിന്നാണ് വിഷ്ണു രക്ഷപ്പെട്ടത്. ഇയാള്‍ക്കുനേരെ കസേരയും തേങ്ങയും പ്രതിഷേധക്കാര്‍ വലിച്ചെറിഞ്ഞു. ന്യൂസ് 18 വാര്‍ത്താ സംഘത്തിന്‍റെ ക്യാമറ തല്ലിത്തകര്‍ത്തതായും റിപ്പോര്‍ട്ടുകളുണ്ട്.