Kerala

കണ്ണൂർ:കണ്ണൂർ വിമാനത്താവളത്തിൽ നിന്നും ആരംഭിക്കാനിരിക്കുന്ന എയർ ഇന്ത്യ എക്സ്പ്രസ് യാത്രാനിരക്കിൽ തീരുമാനമായില്ല.ടിക്കറ്റ് ബുക്കിങ് ഉടൻതന്നെ തുടങ്ങുമെന്ന് എയർ ഇന്ത്യ പ്രഖ്യാപിച്ചിരുന്നെങ്കിലും ഇതുവരെ അക്കാര്യം ഉറപ്പിക്കാത്തതിനാൽ കന്നിയാത്രയ്‌ക്കൊരുങ്ങിയ പ്രവാസികൾ ആശയക്കുഴപ്പത്തിലാണ്.ദിവസേന നിരവധിപേർ എയർ ഇന്ത്യ എക്സ്പ്രസ്സിന്റെ വെബ്സൈറ്റിലും വിവിധ ട്രാവൽ ഏജന്സികളിലും അന്വേഷണങ്ങളുമായി എത്തുന്നുണ്ട്. എന്നാൽ ടിക്കറ്റ് നിരക്കിൽ വ്യക്തത വരാത്തതിനാൽ ഇതുവരെ ടിക്കറ്റ് വിൽപ്പന ആരംഭിച്ചിട്ടില്ല.നിലവിൽ അബുദാബി,റിയാദ്,ദോഹ എന്നിവിടങ്ങളിലേക്കാണ് എയർ ഇന്ത്യ എക്സ്പ്രസ് കണ്ണൂരിൽ നിന്നും സർവീസ് നിശ്ചയിച്ചിരിക്കുന്നത്.ഇത് സംബന്ധിച്ചുള്ള സമയപട്ടികയും പുറത്തിറക്കിയിട്ടുണ്ട്. അതേസമയം സർവീസ് തുടങ്ങുന്ന ദിവസം തന്നെ സംഘമായി യാത്ര ചെയ്യാൻ വിവിധ പ്രവാസി സംഘടനകൾ താല്പര്യമറിയിച്ച് എയർ ഇന്ത്യ എക്സ്പ്രസ് അധികൃതരെ സമീപിച്ചിട്ടുണ്ട്.എന്നാൽ ഇത്തരം സംഘങ്ങൾക്ക് പ്രത്യേകം പാക്കേജ് അനുവദിക്കാനാകില്ലെന്ന നിലപാടിലാണ് വിമാനക്കമ്പനി.ഇത് പുനഃപരിശോധിക്കണമെന്നും യാത്രാസംഘങ്ങൾക്ക് പ്രത്യേക പാക്കേജ് അനുവദിക്കണമെന്നും ആവശ്യമുയരുന്നുണ്ട്.നിരക്ക് കൂട്ടാനാണ് പ്രഖ്യാപനം വൈകിപ്പിക്കുന്നതെന്നുമുള്ള ആരോപണങ്ങളൂം ഉയരുന്നുണ്ട്.

തിരുവനന്തപുരം:നീല കലര്‍ന്ന പച്ചയും കടും പച്ചയും നിറമുള്ള ചിറകുകളുള്ള ബുദ്ധമയൂരി സംസ്ഥാന ശലഭ പദവിയിലേക്ക്. മുഖ്യമന്ത്രി പിണറായി വിജയന്റെ അധ്യക്ഷതയില്‍ ചേര്‍ന്ന വൈല്‍ഡ് ലൈഫ് ബോര്‍ഡ് യോഗത്തിലാണ് ഇത് സംബന്ധിച്ച തീരുമാനമായത്.സര്‍ക്കാരിന്റെ ഔദ്യോഗിക അംഗീകാരമാണ് ഇനി ലഭിക്കേണ്ടത്. വംശനാശ ഭീഷണി നേരിടുന്ന വിഭാഗമാണ് ബുദ്ധമയൂരി. സംസ്ഥാന പദവി ലഭിക്കുന്നതോടെ ഇവയുടെ സംരക്ഷണത്തിനുള്ള വഴി തെളിയും. അലങ്കാരങ്ങള്‍ക്കും പേപ്പര്‍ വെയ്റ്റുകള്‍ക്ക് ഭംഗി പകരുന്നതിനും വേണ്ടി ഇവയെ ലക്ഷ്യം വയ്ക്കുന്നതാണ് ബുദ്ധമയൂരികള്‍ക്ക് ഭീഷണിയാവുന്നത്.പാപ്പിലോ ബുദ്ധയെന്ന ചിത്രശലഭങ്ങളാണ് രാജ്യത്തെ ശലഭങ്ങളില്‍ ഏറ്റവും ഭംഗിയേറിയവ. ബുദ്ധമയൂരിയുടെ ചിറകിന് 90 മുതല്‍ 100 മില്ലിമീറ്റര്‍ വരെ വീതിയുണ്ട്. മഹാരാഷ്ട്രയുടെ തെക്കുള്ള പശ്ചിമഘട്ടത്തിലാണ് ഇവ കൂടുതലായും കാണപ്പെടുന്നത്.മഹാരാഷ്ട്രയ്ക്ക് പുറമെ, കേരളം, കര്‍ണാടക, ഗോവ സംസ്ഥാനങ്ങളിലും ഇവ കാണപ്പെടുന്നു. സംസ്ഥാനത്ത് മലബാര്‍ പ്രദേശങ്ങളിലാണ് ഇവയെ കൂടുതലായും കാണുന്നത്. ജൂലൈ മുതല്‍ ഡിസംബര്‍ വരെയുള്ള മാസങ്ങളിലാണ് ഇവ പ്രത്യക്ഷപ്പെടാറ്.മുള്ളുമുരിക്കിൽ നിന്നാണ് ഇവ ആഹാരം ശേഖരിക്കുന്നത്.നാലിനം ചിത്രശലഭങ്ങളെയാണ് സംസ്ഥാന പദവിക്കായി പരിഗണിച്ചത്.വനദേവത(മലബാർ ട്രീ നിംഫ്),പുള്ളിവാലൻ(മലബാർ ബാന്ഡേഡ് സ്വാലോടെയിൽ),മലബാർ റോസ്(പാച്ചിലൊപ്റ്റ പാണ്ടിയാനാ),എന്നിവയാണ് പട്ടികയിലുണ്ടായിരുന്ന മറ്റ് മൂന്നിനം.വനദേവതയാണ് അവസാന റൗണ്ടിൽ ബുദ്ധമയൂരിയുമായി മത്സരിച്ചത്.

കോഴിക്കോട്:ഡിവൈഎഫ്‌ഐ പതിനാലാം സംസ്ഥാന സമ്മേളനത്തിന് കോഴിക്കോട് തുടക്കമായി.മുതിര്‍ന്ന മാധ്യമപ്രവര്‍ത്തകന്‍ പി സായ്‌നാഥ്‌ പ്രതിനിധി സമ്മേളനം ഉദ്ഘാടനം ചെയ്തു. സംഘാടക സമിതി ചെയര്‍മാന്‍ പി മോഹനൻ സമ്മേളത്തിന് പതാക ഉയർത്തി. സമ്മേളനത്തിന് സമാപനം കുറിച്ച്‌ ബുധനാഴ്ച വൈകിട്ട് നാലിന് ഫിദല്‍കാസ്‌ട്രോ നഗറില്‍ ലക്ഷം യുവജനങ്ങളുടെ റാലി നടക്കും. റാലി മുഖ്യമന്ത്രി പിണറായി വിജയന്‍ ഉദ്ഘാടനംചെയ്യും. ഡിവൈഎഫ്‌ഐ അഖിലേന്ത്യ പ്രസിഡന്റ് പി എ മുഹമ്മദ് റിയാസ്, ജനറല്‍ സെക്രട്ടറി അഭോയ് മുഖര്‍ജി, സിഐടിയു സംസ്ഥാന ജനറല്‍ സെക്രട്ടറി എളമരം കരീം എംപി, മന്ത്രി ടി പി രാമകൃഷ്ണന്‍ എന്നിവര്‍ സംസാരിക്കും.