Kerala

തിരുവനന്തപുരം:കേരള പോലീസ് ആസ്ഥാനത്തിന് മുകളിലൂടെ വീണ്ടും ഡ്രോൺ പരാതിയതായി റിപ്പോർട്ട്.ഇന്നലെ രാത്രി പത്തരയോടെയാണ് ഡ്രോണ്‍ ക്യാമറ കണ്ടത്.ഇക്കാര്യം പൊലീസ് ഇതുവരെ സ്ഥിരീകരിച്ചിട്ടില്ല. ഇവിടെ സെക്യൂരിറ്റി ചുമതല ഉണ്ടായിരുന്ന ഉദ്യോഗസ്ഥരാണ് ഡ്രോണ്‍ ക്യാമറ കണ്ടെത്തിയതായി റിപ്പോര്‍ട്ട് നല്‍കിയത്. കെട്ടിടത്തിന്റെ അഞ്ചാം നിലക്ക് സമീപത്ത് കൂടിയാണ് ഡ്രോണ്‍ ക്യാമറ പറന്നുവെന്നാണ് പറയുന്നത്. വിവരമറിയിച്ചതിനെ തുടർന്ന് പൊലീസ് വിശദമായി പരിശോധിച്ചെങ്കിലും ഡ്രോണ്‍ കണ്ടെത്താനായില്ല.സംഭവത്തിൽ പോലീസ് അന്വേഷണം ആരംഭിച്ചു.രണ്ടു മാസം മുൻപും പോലീസ് ആസ്ഥാനത്തിന് മുകളിലൂടെ ഡ്രോൺ പരന്നിരുന്നു.അന്ന് പോലീസ് ആസ്ഥാനത്തിന് സമീപത്തുള്ള കല്യാണമണ്ഡപത്തിൽ ചിത്രീകരണത്തിനായി എത്തിച്ച ഡ്രോൺ നിയന്ത്രണം വിട്ട് ആസ്ഥാനത്തിനു മുകളിലൂടെ പറക്കുകയായിരുന്നു.ഇതിനിടെ കിഴക്കേക്കോട്ടയിലും ഡ്രോൺ പറന്നതായി റിപ്പോർട്ടുകളുണ്ട്.ഇതിന്റെ ദൃശ്യം പദ്മനാഭ സ്വാമി ക്ഷേത്രത്തിലെ ക്യാമറയില്‍ പതിഞ്ഞതായും സ്ഥിരീകരിക്കാത്ത വാര്‍ത്തകള്‍ ഉണ്ട്. കഴിഞ്ഞ ആഴ്ച കോവളത്തും തുമ്പ വിഎസ്‌എസ്‌സി ഉള്‍പ്പെട്ട തീരപ്രദേശങ്ങളിലും ഡ്രോണ്‍ പറന്നതായി അഭ്യൂഹമുണ്ടായിരുന്നു. ഇതുസംബന്ധിച്ച്‌ കൂടുതല്‍ വിവരങ്ങളൊന്നും കിട്ടാതെ പൊലീസും അന്വേഷണ ഏജന്‍സിയും കുഴയുന്നതിനിടയിലാണ് വീണ്ടും ഡ്രോണ്‍ സാന്നിധ്യം കണ്ടതായി സംശയിക്കുന്നത്.

തിരുവനന്തപുരം:ചൂട് കൂടിവരുന്ന സാഹചര്യത്തിൽ സംസ്ഥാനത്ത് സൂര്യാഘാത മുന്നറിയിപ്പ് നാലുദിവസത്തേക്ക് കൂടി നീട്ടി. അടുത്ത ദിവസങ്ങളില്‍ താപനില നിലവിലെ ഊഷ്മാവില്‍ നിന്നും നാല് ഡിഗ്രി വരെ ഉയരാന്‍ സാധ്യതയുണ്ടെന്നും കാലാവസ്ഥ നിരീക്ഷണ കേന്ദ്രം മുന്നറിയിപ്പ് നല്‍കി.വയനാട്, ഇടുക്കി ഒഴികെയുള്ള എല്ലാ ജില്ലകളിലും താപനില ഉയരും. ആലപ്പുഴ, കോട്ടയം, കോഴിക്കോട്, പാലക്കാട് എന്നീ ജില്ലകളിലാണ് അതീവ ജാഗ്രതാ നിര്‍ദേശം പുറപ്പെടുവിച്ചത്. മൂന്ന് മുതല്‍ നാല് ഡിഗ്രി സെല്‍ഷ്യസ് വരെ താപനില ഈ ജില്ലകളില്‍ ഉയരുമെന്നാണ് കാലാവസ്ഥ നിരീക്ഷണ കേന്ദ്രം മുന്നറിയിപ്പ് നൽകിയിരിക്കുന്നത്.കടുത്ത ചൂട് ഇത്തരത്തില്‍ കൂടുകയാണെങ്കില്‍ ഉഷ്ണതരംഗത്തിലേക്ക് നയിക്കാനുള്ള സാധ്യത വളരെ കൂടുതലാണ്.

തിരുവനന്തപുരം:സംസ്ഥാനത്ത് ഓരോ ദിവസവും ചൂട് കുതിച്ചുയരുന്നു.ഞായറാഴ്ച മാത്രം സൂര്യതാപമേറ്റ് സംസ്ഥാനത്ത് മൂന്നുപേർ മരിച്ചു.പത്തുപേർക്ക് സൂര്യതാപമേറ്റു. തിരുവനന്തപുരം,കണ്ണൂർ,പത്തനംതിട്ട എന്നിവിടങ്ങളിലാണ് മൂന്നുപേർ മരിച്ചത്.ഞായറാഴ്ച കൊല്ലത്ത് നാലുപേർക്കും പത്തനംതിട്ടയിൽ മൂന്നുപേർക്കും ആലപ്പുഴ,മലപ്പുറം,കാസർകോഡ് എന്നിവിടങ്ങളിൽ ഓരോരുത്തർക്കും സൂര്യതാപമേറ്റു.പത്തുദിവസത്തിനിടെ 111 പേർക്ക് സംസ്ഥാനത്ത് സൂര്യതാപമേറ്റു എന്നാണ് ആരോഗ്യവകുപ്പിന്റെ കണക്ക്.വരും ദിവസങ്ങളിലും ചൂട് കൂടും എന്നതിനാൽ ജാഗ്രത പാലിക്കണമെന്ന് ആരോഗ്യവകുപ്പ് മുന്നറിയിപ്പ് നൽകിയിട്ടുണ്ട്. തിരുവനന്തപുരം നെയ്യാറ്റിൻകര പെരിക്കാവിള ആവണിയിൽ കരുണാകരൻ(43),കണ്ണൂർ വെള്ളോറ ചെക്കിക്കുണ്ടിലെ കാടൻവീട്ടിൽ നാരായണൻ(67),കോഴഞ്ചേരി ഹൗസിങ് ബോർഡ് കോളനിയിലെ ഷാജഹാൻ(55) എന്നിവരാണ് മരിച്ചത്.

പാടത്ത് പണിയെടുക്കുന്നതിനിടെ കുഴഞ്ഞു വീഴുകയായിരുന്നു കരുണാകരൻ.അദ്ദേഹത്തിന്റെ ശരീരത്തിൽ പൊള്ളലേറ്റ പാടുകൾ ഉണ്ടായിരുന്നു. ആശുപത്രിയിൽ എത്തിച്ചെങ്കിലും ജീവൻരക്ഷിക്കാനായില്ല.കാടൻവീട്ടിൽ നാരായണനെ വീടിനു സമീപത്തെ പാറപ്രദേശത്ത് മരിച്ച നിലയിൽ കണ്ടെത്തുകയായിരുന്നു.അദ്ദേഹത്തിന്റെ കാലിലുൾപ്പെടെ പലഭാഗത്തും പൊള്ളിയനിലയിലായിരുന്നു.മാരാമൺ കൺവെൻഷൻ നഗറിലേക്കുള്ള റോഡിൽ മരച്ചുവട്ടിൽ കിടന്നുറങ്ങുകയായിരുന്നു ഷാജഹാൻ.അവശനിലയിലായ ഇദ്ദേഹത്തെ പോലീസെത്തി കോഴഞ്ചേരി ജില്ലാ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

വയനാട്:വയനാട്ടിൽ വനപാലകരെ ആക്രമിക്കുകയും ജനങ്ങൾക്ക് ഭീഷണിയാവുകയും ചെയ്ത കടുവയെ പിടികൂടി.വനംവകുപ്പ് വെച്ച കെണിയിലാണ് കടുവ കുടുങ്ങിയത്.ഞായറാഴ്ചയാണ് വനപാലകർക്ക് നേരെ കടുവയുടെ ആക്രമണമുണ്ടായത്.മൂന്ന് വാച്ചര്‍മാര്‍ക്കാണ് ആക്രമണത്തില്‍ പരിക്കേറ്റത്.ഇതില്‍ ഒരാളുടെ നില അതീവ ഗുരുതരമാണ്.ചീയമ്പം സ്വദേശി ഷാജനാണ് ഗുരുതരമായി പരിക്കേറ്റത്.ഇയാളെ കോഴിക്കോട് മെഡിക്കല്‍ കോളേജില്‍ പ്രവേശിപ്പിച്ചിരിക്കുകയാണ്. ഇയാളുടെ തലയ്ക്ക് കടുവ അടിച്ചുവെന്നാണ് റിപ്പോർട്ട്. ദിവസ വേതനാടിസ്ഥാനത്തില്‍ കുറച്ചു ദിവസം മുൻപാണ് ഈ വാച്ചർമാരെ നിയമിച്ചത്.പരിക്കേറ്റ മറ്റു രണ്ടു പേരുടെ നില തൃപ്തികരമാണ്. ഇവരെ ബത്തേരി ആശുപത്രിയില്‍ പ്രവേശിപ്പിച്ചുവെന്ന് വനപാലകര്‍ പറഞ്ഞു. കുറച്ചു ദിവസങ്ങളായി പ്രദേശത്ത് കടുവയുടെ ശല്യം രൂക്ഷമായിരുന്നു. വളര്‍ത്തു മൃഗങ്ങളെ കടുവ ആക്രമിച്ചതിനെ തുടര്‍ന്ന് നാട്ടുകാര്‍ വനപാലകരെ വിവരം അറിയിക്കുകയായിരുന്നു.