Kerala

മുംബൈ: കനത്ത മഴയെ തുടര്‍ന്ന് മുംബൈ ഛത്രപതി ശിവജി അന്താരാഷ്ട്ര വിമാനത്താവളത്തിന്റെ പ്രവര്‍ത്തനം നിര്‍ത്തി വെച്ചു. മഴയും ഇടിമിന്നലും കാരണം കാലാവസ്ഥ മോശമായതിനെ തുടര്‍ന്നാണ് സര്‍വീസ് നിര്‍ത്തി വെച്ചത്.കാലാവസ്ഥ അനുകൂലമായാല്‍ ഉടന്‍ തന്നെ സര്‍വീസുകള്‍ പുനരാരംഭിക്കുമെന്ന് അധികൃതർ അറിയിച്ചിട്ടുണ്ട്.ഡല്‍ഹി- മുംബൈ ഗോ എയര്‍വിമാനവും നെവാര്‍ക്ക്- മുബൈ യുണൈറ്റഡ് എയര്‍ലൈന്‍സ് വിമാനവും അഹമ്മദാബാദിലേക്ക് തിരിച്ചു വിട്ടു. മുംബൈയിലേക്കുള്ള മറ്റ് വിമാനങ്ങളും തിരിച്ചുവിടുമെന്നാണ് അറിയിച്ചിരിക്കുന്നത്.

എറണാകുളം:സംസ്ഥാനത്ത് കാലവർഷം ശക്തി പ്രാപിക്കുന്നു.ഇന്നലെയോടെയാണ് സംസ്ഥാനത്ത് കാലവര്‍ഷം ശക്തിപ്രാപിച്ചത്.ഇതിനിടെ എറണാകുളം കാക്കനാട് കലക്‌ട്രറേറ്റിന് മുന്‍പില്‍ മരം മറിഞ്ഞുവീണ് ലോട്ടറി വിൽപ്പനക്കാരൻ മരിച്ചു.സ്‌കൂട്ടറില്‍ പോകുമ്ബോഴാണ് അപകടമുണ്ടായത്.അപകടത്തിൽ രണ്ട് കാര്‍ യാത്രക്കാര്‍ക്കും പരിക്കേറ്റിട്ടുണ്ട്.എറണാകുളത്ത് ഇന്നലെ ഉച്ചമുതല്‍ ശക്തമായ മഴയാണ് ലഭിച്ചത്.അതേസമയം അറബിക്കടലില്‍ രൂപപ്പെട്ട ന്യൂനമര്‍ദം ആറ് മണിക്കൂറിനുള്ളില്‍ അതിതീവ്രമാകുമെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്‍കി.അടുത്ത 24 മണിക്കൂറിനകം ചുഴലിക്കാറ്റായി മാറുമെന്നും കാലാവസ്ഥ വകുപ്പ് അറിയിച്ചു. ഈ സാഹചര്യത്തില്‍ മല്‍സ്യ തൊഴിലാളികള്‍ കടലില്‍ പോകരുതെന്ന് കാലാവസ്ഥ വകുപ്പ് മുന്നറിയിപ്പ് നല്‍കി.

ആലപ്പുഴ:നിപ ലക്ഷണങ്ങളോടെ ഏട്ട് വയസുകാരനെ ആലപ്പുഴ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.മാവേലിക്കര സ്വദേശിയായ ആണ്‍കുട്ടിയാണ് ശനി വൈകിട്ട് 4 മണിയോടെ മെഡിക്കല്‍ കോളേജാശുപത്രിയില്‍ ചികില്‍സ തേടിയത്.കുടുംബസമേതം സൗദി അറേബ്യയിലായിരുന്ന കുട്ടി അമ്മയോടൊപ്പം കഴിഞ്ഞ മാസം 22 -നാണ് നാട്ടിലെത്തുന്നത്. ഇതിന് ശേഷം പനി ബാധിച്ച കുട്ടിക്ക് മാവേലിക്കര, ഹരിപ്പാട് എന്നിവിടങ്ങളിലെ സ്വകാര്യ ആശുപത്രികളില്‍ ചികില്‍സ നടത്തി വരികയായിരുന്നു.ഇതിനിടയില്‍ ഓര്‍മക്കുറവുണ്ടായി. ഇതേതുടര്‍ന്നാണ് ആലപ്പുഴ മെഡിക്കല്‍ കോളജ് ആശുപത്രിയില്‍ ചികില്‍സ തേടിയത്.നിപ ലക്ഷണങ്ങള്‍ ഉള്ളതിനാല്‍ കുട്ടിയെ ആശുപത്രിയിലെ പ്രത്യേക വാര്‍ഡില്‍ പ്രവേശിപ്പിച്ചിരിക്കുകയാണ്. രോഗിയുടെ സ്രവങ്ങളും മറ്റും വൈറോളജി ലാബില്‍ പരിശോധനയ്ക്ക് നല്‍കി. ഇതിന്‍റെ റിപ്പോര്‍ട്ട് ലഭിച്ചാലെ രോഗം സ്ഥിതീകരിക്കാനാകൂവെന്ന് സൂപ്രണ്ട് ആര്‍ എം രാംലാല്‍ പറഞ്ഞു.

ചാലക്കുടി:ചാലക്കുടിയില്‍ പ്രവര്‍ത്തിക്കുന്ന അനാഥാലയത്തില്‍ കുട്ടികള്‍ക്ക് ക്രൂര മര്‍ദ്ദനം. മേലൂര്‍ പൂലാനി മരിയപാലന സൊസൈറ്റിയുടെ കീഴില്‍ പ്രവര്‍ത്തിക്കുന്ന അനാഥാലയത്തിലാണ് സംഭവം. മുതിര്‍ന്ന കുട്ടികള്‍ മര്‍ദ്ദിച്ച് അവശരാക്കിയതിനെ തുടര്‍ന്ന് ഇന്ന് വെളുപ്പിന് 5 മണിയോടുകൂടി  അനാഥാലയത്തില്‍ നിന്നും ആറ് കുട്ടികളാണ് ഇറങ്ങിയോടിയത്.അനാഥാലയത്തില്‍ നിന്നും ഏകദേശം 500 മീറ്റര്‍ ദൂരമുള്ള ബസ് സ്റ്റോപ്പില്‍ കുട്ടികളെ കണ്ട ഹെല്‍ത്ത് ഇന്‍സ്പെക്ടര്‍ ഇവരോട് കാര്യം അന്വേഷിച്ചപ്പോഴാണ് മുതിര്‍ന്ന കുട്ടികള്‍ മര്‍ദ്ദിച്ച വിവരം പുറത്തു വരുന്നത്. ഉടന്‍ തന്നെ അദ്ദേഹം കുട്ടികളെ ചാലക്കുടി ആശുപത്രിയിലെത്തിച്ച് പ്രാഥമിക ശുശ്രൂഷ നല്‍കി.ഹെല്‍ത്ത് ഇന്‍സ്‌പെക്ടര്‍ വിവരമറിയച്ചതിനേ തുടര്‍ന്ന് അനാഥാലയവുമായി ബന്ധപ്പെട്ടപ്പോള്‍ കുട്ടികള്‍ ഇറങ്ങി പോയത് ഇവര്‍ അറിഞ്ഞിരുന്നില്ലെന്ന് പോലീസ് അറിയിച്ചു.65ഓളം കുട്ടികളാണ് അനാഥാലയത്തില്‍ ഉള്ളത്. ഇവരെ ശ്രദ്ധിക്കുന്നതിന് വേണ്ട യാതൊരു സൗകര്യങ്ങളും ഇവിടെ ഇല്ല. 2 വര്‍ഷം മുന്‍പും സമാനമായ സംഭവം ഉണ്ടായിരുന്നു. അംഗികാരമില്ലാതെയാണ് അനാഥാലയം പ്രവര്‍ത്തിക്കുന്നതെന്നും എത്രയും വേഗം നടപടി സ്വീകരിക്കണമെന്നും ആവശ്യപ്പെട്ട് നാട്ടുകാര്‍ രംഗത്തെത്തിയിരുന്നു. പോലീസ് അന്വേഷണം ആരംഭിച്ചു.