ന്യൂഡൽഹി:ഐ.എന്.എക്സ് മീഡിയ കേസില് പി.ചിദംബരത്തിന് കുരുക്ക് മുറുകുന്നു. അറസ്റ്റിനായി മൂന്ന് തവണ സി.ബി.ഐ ചിദംബരത്തിന്റെ വസതിയിലെത്തി. എന്നാല് ചിദംബരം വീട്ടില് ഇല്ലാതിരുന്നതിനാല് സംഘം മടങ്ങി.ഇതേ തുടർന്നാണ് പി ചിദംബരത്തിനെതിരേ സിബിഐ ലുക്കൗട്ട് നോട്ടീസ് പുറപ്പെടുവിച്ചത്.സിബിഐ സംഘം നാലു തവണ അദ്ദേഹത്തിന്റെ വീട്ടില് എത്തിയിട്ടും കണ്ടെത്താന് കഴിയാത്ത സാഹചര്യത്തിലാണ് നടപടി. ഇന്നലെ ഡല്ഹി ഹൈക്കോടതി ജാമ്യം നിഷേധിച്ചതിനെ തുടര്ന്നാണ് ചിദംബരത്തെ അറസ്റ്റ് ചെയ്യാന് സിബിഐ സംഘം അദ്ദേഹത്തിന്റെ വസതിയില് എത്തിയത്. ചിദംബരത്തിനും കോണ്ഗ്രസിനും വലിയ തിരിച്ചടിയാണ് മുന്കൂര് ജാമ്യം റദ്ദാക്കിയുള്ള ഹൈക്കോടതി വിധി. അറസ്റ്റ് അടക്കമുള്ള നടപടികള് ഉടനുണ്ടാകുമെന്നിരിക്കെയാണ് ചിദംബരം ഇന്നലെ തന്നെ തിരക്കിട്ട് സുപ്രിം കോടതിയെ സമീപിച്ചത്.കേസ് അടിയന്തരമായി വാദം കേൾക്കണമെന്ന ചിദംബരത്തിന്റെ ആവശ്യം ജസ്റ്റിസ് രമണ കേസ് ചീഫ് ജസ്റ്റിസിന് വിട്ടു. ഉച്ചകഴിഞ്ഞ് കേസ് പരിഗണനയ്ക്ക് എടുക്കുമെന്നാണ് റിപ്പോര്ട്ട്. സുപ്രിംകോടതിയിലെ മുതിര്ന്ന ജഡ്ജി ജസ്റ്റിസ് എന് വി രമണയുടെ മുന്നിലാണ് ചിദംബരത്തിന്റെ അഭിഭാഷകന് ഹര്ജി മെന്ഷന് ചെയ്തത്. എന്നാല് കേസ് പരിഗണിക്കുന്നതും ലിസ്റ്റ് ചെയ്യുന്നതും ചീഫ് ജസ്റ്റിസാണെന്നും, അദ്ദേഹത്തിന്റെ കോടതിയെ സമീപിക്കാനും ജസ്റ്റിസ് രമണയുടെ ബെഞ്ച് നിര്ദേശിച്ചു. ചിദംബരത്തിന്റെ ഹര്ജിയില് അടിയന്തരമായി ഇടപെടാനാവില്ല. അറസ്റ്റ് തടഞ്ഞ് ഉത്തരവിടാനാകില്ലെന്നും ജസ്റ്റിസ് രമണ വ്യക്തമാക്കി. ഈ സാഹചര്യത്തില് അറസ്റ്റ് ചെയ്യുന്നതിന് സിബിഐക്ക് തടസ്സമില്ല.
ഇന്നലെ നാലു തവണ ചിദംബരത്തിന്റെ വസതിയില് എത്തിയ സിബിഐ സംഘം അര്ദ്ധരാത്രിയില് എത്തിയപ്പോള് രണ്ടു മണിക്കൂറിനുള്ളില് ഹാജരാകണമെന്ന് കാണിച്ച് വീട്ടില് നോട്ടീസ് പതിച്ചിരുന്നു. എന്നാല് സിബിഐ യുടെ അന്വേഷണത്തോട് ഒരു തരത്തിലും സഹകരിക്കാത്ത ചിദംബരം സിബിഐ യുടെ തിടുക്ക നടപടിയെ ചോദ്യം ചെയ്യുകയാണ് ഉണ്ടായത്. എന്നാല് സിബിഐക്ക് മുന്നില് ഹാജരാകാതിരുന്ന ചിദംബരം, അഭിഭാഷകന് മുഖേന രാവിലെ 10.30 വരെ സമയം അനുവദിക്കണമെന്ന് ആവശ്യപ്പെടുകയായിരുന്നു.തുടര്ന്ന് ചിദംബരം ഒളിവില് പോയെന്ന് കണക്കാക്കിയാണ് സിബിഐ ഇപ്പോള് മുന് കേന്ദ്രമന്ത്രിക്കെതിരേ ലുക്കൗട്ട് നോട്ടീസ് പുറപ്പെടുവിച്ചിരിക്കുന്നത്.ധനമന്ത്രിയായിരിക്കെ, ഐ.എന്.എക്സ്. മീഡിയ എന്ന മാധ്യമസ്ഥാപനത്തിനു വഴിവിട്ട് വിദേശനിക്ഷേപം നേടാന് അവസരമൊരുക്കിയെന്നാണു സി.ബി.ഐ. കേസ്. 4.62 കോടി രൂപ സ്വീകരിക്കാന് ലഭിച്ച അനുമതിയുടെ മറവില് 305 കോടി രൂപയാണ് ഐ.എന്.എക്സിലേക്ക് ഒഴുകിയെത്തിയത്. പിന്നീട്, ഐ.എന്.എക്സില്നിന്ന് ചിദംബരത്തിന്റെ മകന് കാര്ത്തിക്കു പണം ലഭിച്ചെന്ന ആദായനികുതി വകുപ്പിന്റെ കണ്ടെത്തലാണ് കേസിലേക്കു നയിച്ചത്. ഇടപാടിലെ അഴിമതിയെക്കുറിച്ചാണ് സിബിഐ അന്വേഷിക്കുന്നത്.
