Kerala

കണ്ണൂര്‍: പരിസ്ഥിതി പ്രവര്‍ത്തകരുടെ കടുത്ത എതിര്‍പ്പിനെ മറികടന്ന് ധര്‍മ്മടം തുരുത്തിനടുത്ത് കടലില്‍ നിന്നും കപ്പല്‍ പൊളിക്കല്‍ തുടങ്ങി.കടലിലേക്ക് ടണ്‍ കണക്കിന് രാസമാലിന്യങ്ങള്‍ ഒഴുക്കിയാണ് ഇപ്പോള്‍ കപ്പല്‍ പൊളി നടക്കുന്നതെന്ന് കപ്പല്‍ പൊളി വിരുദ്ധ സമര സമിതി പ്രവര്‍ത്തകര്‍ ആരോപിച്ചു. ക്രെയിന്‍ ഉപയോഗിച്ച്‌ കപ്പലിനെ കരയ്ക്കടിപ്പിച്ച്‌ പൊളിക്കാന്‍ ശ്രമിച്ചെങ്കിലും പരാജയപ്പെട്ടതിനെ തുടർന്നാണ് കടലിൽ നിന്നും കപ്പൽ പൊളിക്കാൻ ആരംഭിച്ചത്. കരയില്‍ നിന്ന് കപ്പല്‍ പൂണ്ടുനില്‍ക്കുന്ന സ്ഥലത്തേക്ക് താല്‍ക്കാലികമായി റോപ് വേ നിര്‍മ്മിച്ചാണ് പൊളിക്കല്‍ പ്രവൃത്തി നടക്കുന്നത്. കരാര്‍ ജോലിക്കാരാണ് പൊളിക്കുന്നത്. കപ്പലിന്റെ ഭാഗങ്ങള്‍ പൊളിച്ച്‌ കരയ്‌ക്കെത്തിച്ചു തുടങ്ങി. കടലില്‍ നിന്നു തന്നെ പൊളിച്ചു നീക്കുന്ന അവശിഷ്ടങ്ങള്‍ ലോറികളില്‍ കപ്പല്‍ പൊളിശാലയായ അഴീക്കല്‍ സില്‍ക്കിലേക്ക് അതത് സമയം തന്നെ കൊണ്ടുപോകുന്നുണ്ട്. 2019 ഓഗസ്റ്റ് എട്ടിനായിരുന്നു അഴീക്കല്‍ സില്‍ക്കില്‍ പൊളിക്കാന്‍ കൊണ്ടുവന്ന മാലി ദ്വീപില്‍ നിന്നുള്ള ചരക്കു കപ്പല്‍ കനത്ത മഴയില്‍ ബന്ധിച്ച കയറു പൊട്ടി കടലിലൂടെ ഒഴുകി ധര്‍മടത്തെത്തിയത്. പൊളിച്ചാല്‍ ഉണ്ടാകുന്ന പാരിസ്ഥിതിക പ്രശ്‌നങ്ങള്‍ ചൂണ്ടിക്കാട്ടി പ്രദേശവാസികള്‍ പ്രതിഷേധിച്ചിരുന്നു.തുടര്‍ന്ന് പൊളിക്കല്‍ പ്രവൃത്തി നീളുകയായിരുന്നു.മണല്‍ത്തിട്ടയില്‍ ഇടിച്ചു നിന്ന കപ്പല്‍ അഴീക്കലിലേക്ക് കൊണ്ടുപോകാന്‍ ശ്രമങ്ങള്‍ നടത്തിയെങ്കിലും വിജയിച്ചിരുന്നില്ല. തുടര്‍ന്നായിരുന്നു കടലില്‍ വച്ചുതന്നെ പൊളിക്കാന്‍ തീരുമാനിച്ചത്. ഏകദേശം എണ്‍പതു ശതമാനം ഭാഗങ്ങള്‍ ഇപ്പോള്‍ പൊളിച്ചു നീക്കിയിട്ടുണ്ട്.ധര്‍മ്മടം തുരുത്തില്‍ കപ്പല്‍ കുടുങ്ങിക്കിടക്കുന്നത് മത്സ്യ തൊഴിലാളികള്‍ ഏറെ തടസം സൃഷ്ടിച്ചിരുന്നു. കടലില്‍ നങ്കുരമിട്ടു കിടക്കുന്ന കപ്പലില്‍ മത്സ്യബന്ധനബോട്ടുകൾ വന്നിടിച്ചു തകരുന്ന സംഭവങ്ങളുണ്ടായിട്ടുണ്ട്.

മരട്: രാത്രി ഭക്ഷണം വാങ്ങി ഹോസ്റ്റലിലേക്കു മടങ്ങുകയായിരുന്ന രണ്ട് യുവതികളെ അമിത വേഗതയിലെത്തിയ കാര്‍ ഇടിച്ചു വീഴ്ത്തി.ഒരാള്‍ മരിച്ചു. ഗുരുതരമായി പരിക്കേറ്റ യുവതിയെ ആശുപത്രിയില്‍ പ്രവേശിപ്പിച്ചു.തൈക്കൂടം പവര്‍ഹൗസിന് സമീപമായി ബുധനാഴ്ച രാത്രിയാണ് സംഭവം.കാഞ്ഞിരപ്പിള്ളി പാറത്തോട് പൊടിമറ്റം അംബേദ്കര്‍ കോളനി മറ്റത്തില്‍ ബാബുവിന്റെ മകള്‍ സാന്ദ്രയാണ് (23) മരിച്ചത്. ആശുപത്രിയില്‍ പ്രവേശിപ്പിച്ചിരിക്കുന്ന പാലക്കാട് കെന്നംച്ചേരി ആയക്കാട് ചുങ്കത്തോടില്‍ എം. അജിത്ര (24)ന് കൈകാലുകള്‍ക്ക് ഒടിവും തലയ്ക്കു പരിക്കുമുണ്ട്. വൈറ്റിലയിലെ പിസാഹട്ട് ജീവനക്കാരിയാണ് സാന്ദ്ര. തൈക്കൂടം മെജോ മോട്ടോഴ്‌സിലെ ജീവനക്കാരിയാണ് അജിത്ര. സമീപത്തെ ഹോസ്റ്റലില്‍ ഒരുമിച്ച് താമസിക്കുകയായിരുന്ന ഇവർ രാത്രി ഏഴരയോടെ ഹോസ്റ്റലില്‍ എത്തിയ ശേഷം രാത്രി ഭക്ഷണം വാങ്ങാന്‍ ഇറങ്ങിയതായിരുന്നു. ഭക്ഷണം വാങ്ങിയശേഷം റോഡ് മുറിച്ചു കടക്കവേ കുണ്ടന്നൂര്‍ ഭാഗത്തു നിന്ന് അമിത വേഗത്തില്‍ വന്ന ഇന്നോവ കാർ ഇവരെ ഇടിച്ച്‌ തെറിപ്പിക്കുകയായിരുന്നു. പരിക്കേറ്റ് ഏറെനേരം വഴിയില്‍ കിടന്ന ശേഷമാണ് ഇരുവരെയും ആശുപത്രിയിലെത്തിച്ചത്. രാത്രി പത്തോടെ സാന്ദ്ര മരിച്ചു.

കണ്ണൂര്‍: പയ്യാമ്പലം ബീച്ചിന് സമീപം വാടകയ്‌ക്കെടുത്ത വീട്ടില്‍ അനാശാസ്യ പ്രവ‌ര്‍ത്തനങ്ങള്‍ നടത്താന്‍ സൗകര്യം ചെയ്‌തുകൊടുത്ത രണ്ടുപേര്‍ അറസ്‌റ്റില്‍.തോട്ടട സ്വദേശി പ്രശാന്ത് കുമാര്‍(48) ഇയാളുടെ സഹായിയായ ബംഗാള്‍ സ്വദേശി ദേവനാഥ് ബോസ്(29) എന്നിവരാണ് കണ്ണൂ‌ര്‍ ടൗണ്‍ പൊലീസിന്റെ പിടിയിലായത്.’ലവ്‌ഷോ‌ര്‍’ എന്ന് പേരുള‌ള വീടിന്റെ എട്ട് മുറികളില്‍ അഞ്ചിലും പൊലീസ് എത്തുമ്പോൾ ഇടപാടുകാര്‍ ഉണ്ടായിരുന്നു. ടൗണ്‍ ഇന്‍സ്‌പെക്‌ടര്‍ ശ്രീജിത്ത് കൊടേരിയുടെ നേതൃത്വത്തില്‍ വനിതാ പൊലീസ് അടക്കം എത്തി ഇവരെയെല്ലാം കസ്‌റ്റഡിയിലെടുത്തു. ഇവര്‍ പ്രായപൂ‌ര്‍ത്തിയായവരും പരസ്‌പര സമ്മതത്തോടെയും എത്തിയതാണെന്ന് വ്യക്തമായതോടെ ഇവരെ വിട്ടയച്ചു.പിടിയിലായ ഇരുവരില്‍ നിന്നും പണം കണ്ടെത്തിയിട്ടുണ്ട്. മൂന്ന് കോളേജ് വിദ്യാര്‍ത്ഥിനികളും ഒരു ഫിസിയോ തെറാപ്പിസ്‌റ്റുമാണ് സ്ത്രീകളായി ഉണ്ടായിരുന്നത്. പാനൂര്‍, മയ്യില്‍, തളിപ്പറമ്പ, കൂത്തുപറമ്പ് സ്വദേശിനികളാണ് ഇവര്‍. ബംഗളൂരുവില്‍ മകളോടൊപ്പം താമസിക്കുന്ന വയോധികയുടെ ഉടമസ്ഥതയിലുള‌ളതാണ് വീട്.