തിരുവനന്തപുരം:പ്രണയനൈരാശ്യത്തെ തുടർന്ന് യുവതിയെ കഴുത്തറുത്തു കൊന്ന്‌ യുവാവ്‌ ജീവനൊടുക്കി.കാരക്കോണം പുല്ലന്‍തേരി അപ്പു നിവാസില്‍ അജിത്‌ കുമാറിന്റെയും സീമയുടെയും മകള്‍ അക്ഷിക(19), കാരക്കോണം രാമവര്‍മ്മന്‍ചിറ ചെറുപുരയിന്‍കാലയില്‍ മണിയന്റെയും രമണിയുടെയും മകന്‍ അനു (22) എന്നിവരാണ് മരിച്ചത്. സംഭവത്തെക്കുറിച്ചു പോലീസ് പറയുന്നതിങ്ങനെ: ബ്യൂട്ടീഷന്‍ വിദ്യാര്‍ഥിയായ അക്ഷികയും അനുവും തമ്മില്‍ നേരത്തെ പ്രണയത്തിലായിരുന്നു.പിന്നീട്‌ ഇവർ തമ്മിൽ അകന്നെങ്കിലും അനു അക്ഷികയെ ശല്യം ചെയ്‌തിരുന്നതായി പരാതിയുണ്ട്‌. ആറുമാസം മുൻപ് അക്ഷികയുടെ ബന്ധുക്കള്‍ അനുനെതിരേ വെള്ളറട സ്‌റ്റേഷനില്‍ പരാതി നല്‍കിയിരുന്നു.ഇന്നലെ രാവിലെ സുഹൃത്തിന്റെ ബൈക്കില്‍ അക്ഷികയുടെ വീട്ടിലെത്തിയ അനു വാതില്‍ തള്ളിത്തുറന്ന് വീട്ടിനുള്ളില്‍ പ്രവേശിച്ചു.സോഡാക്കുപ്പി പൊട്ടിച്ച്‌ കൈയില്‍ കരുതിയാണ് ഇയാളെത്തിയത്. മുറിക്കുള്ളിലേക്ക് ഓടിയ അക്ഷികയെ പിന്തുടര്‍ന്ന അനു മുറിയുടെ വാതിലടയ്ക്കുകയായിരുന്നു. സോഡാക്കുപ്പി ഉപയോഗിച്ച്‌ അക്ഷികയുടെ കഴുത്തറുത്ത ശേഷം അനു സ്വയം കഴുത്തിലേക്ക് കുത്തുകയായിരുന്നെന്ന് പൊലീസ് പറയുന്നു.നിലവിളി കേട്ട്‌ ഓടിയെത്തിയ പരിസരവാസികള്‍ വാതില്‍ തള്ളി തുറന്നപ്പോള്‍ ഇരുവരും രക്‌തത്തില്‍ കുളിച്ചു കിടക്കുന്നതാണു കണ്ടത്‌. രണ്ടുപേരെയും കാരക്കോണം മെഡിക്കല്‍ കോളേജില്‍ എത്തിച്ചെങ്കിലും അക്ഷിക മരിച്ചിരുന്നു. തിരുവനന്തപുരം മെഡിക്കല്‍ കോളജ് ആശുപത്രിയില്‍വച്ചാണ്‌ അനു മരിച്ചത്.ഫോറന്സിക് സംഘം, വിരലടയാള വിദഗ്‌ധര്‍, തുടങ്ങിയവര്‍ വീട്ടില്‍ പരിശോധന നടത്തി. അക്ഷികയുടെ വീട്ടില്‍നിന്നു കൊലപാതകത്തിന്‌ ഉപയോഗിച്ച കറിക്കത്തി പോലീസ് കണ്ടെത്തി. വഴുതക്കാടിലെ ഒരു കോളേജില്‍ ബ്യൂട്ടീഷന്‍ കോഴ്‌സ്‌ വിദ്യാര്‍ഥിയായിരുന്നു അക്ഷിക. വിദ്യാര്‍ഥിയായ അഭിഷേക്‌ സഹോദരനാണ്‌. മനുവാണ്‌ അനുവിന്റെ സഹോദരന്‍.
