Kerala

കണ്ണൂര്‍: കണ്ണൂരില്‍ റെയില്‍വേ ട്രാക്കില്‍ വിള്ളല്‍ കണ്ടെത്തിയതിനെ തുടര്‍ന്ന് ട്രെയിന്‍ ഗതാഗതം തടസ്സപ്പെട്ടു.ചൊവ്വാഴ്ച രാവിലെ 7.05 ഓടെയാണ് എടക്കാടിനും തലശേരിക്കും ഇടയില്‍ വിള്ളല്‍ കണ്ടെത്തിയത്.ട്രാക്കില്‍ വിള്ളല്‍ കണ്ടെത്തിയതിനെ തുടര്‍ന്ന് തിരുവനന്തപുരത്തേക്ക് പോകുന്ന നേത്രാവതി, പരശുറാം എന്നീ ട്രെയിനുകൾ കണ്ണൂരില്‍ പിടിച്ചിട്ടു. തുടര്‍ന്ന് രാവിലെ 7.50ഓടെയാണ് ട്രെയിന്‍ ഗതാഗതം പുനഃസ്ഥാപിച്ചത്.

മലപ്പുറം: ദേശീയ വിരവിമുക്ത ദിനാചരണത്തിെന്‍റ ഭാഗമായി സംസ്ഥാനത്തെ സ്കൂളുകളിലേക്കും അംഗന്‍വാടികളിലേക്കും വിതരണം ചെയ്ത ഗുളിക ഗുണനിലവാരമില്ലാത്തിനാല്‍ അവസാനനിമിഷം പിന്‍വലിച്ചു.19 വയസ്സിന് താഴെയുള്ള കുട്ടികളില്‍ വിരശല്യം ഇല്ലാതാക്കാനായി ആരോഗ്യവകുപ്പ് നല്‍കിയ ഗുളികകളുടെ വിതരണമാണ് അടിയന്തരമായി നിര്‍ത്തിവെക്കാന്‍ ജില്ല മെഡിക്കല്‍ ഓഫിസര്‍ തിങ്കളാഴ്ച ഉത്തരവിറക്കിയത്.ചൊവ്വാഴ്ചയാണ് ഗുളിക നല്‍കാന്‍ നിശ്ചയിച്ചിരുന്നത്.ഇതേ തുടര്‍ന്ന് തിങ്കളാഴ്ച വൈകീട്ട് ഗുളികകള്‍ തിരിച്ചെടുക്കുന്ന തിരക്കിലായിരുന്നു ഉദ്യോഗസ്ഥര്‍. ഏതെങ്കിലും അംഗന്‍വാടികളോ സ്കൂളുകളോ കുട്ടികള്‍ക്കിത് നല്‍കിയിട്ടുണ്ടോ എന്നകാര്യത്തില്‍ വ്യക്തതയില്ല. മലപ്പുറം ജില്ലയിലെ സാമൂഹികാരോഗ്യ കേന്ദ്രത്തിലെ മെഡിക്കല്‍ ഓഫിസര്‍മാരിലൊരാള്‍ ഗുളികയിലെ നിറവ്യത്യാസം ശ്രദ്ധയില്‍പെട്ടതിനെ തുടര്‍ന്ന് അധികൃതരെ വിവരമറിയിക്കുകയായിരുന്നു. ഇതോടെയാണ് ഗുണനിലവാരമില്ലാത്ത ഗുളികകളാണ് വിതരണത്തിനെത്തിയതെന്ന്  വ്യക്തമായത്.കേരള മെഡിക്കല്‍ സര്‍വിസസ് കോര്‍പറേഷെന്‍റ ഡി.കെ 0062 ബാച്ചുകളിലെ 400 എം.ജിയുടെ ആല്‍ബെന്‍ഡസോള്‍ ഗുളികകളാണ് തിരിച്ചെടുത്തത്. ഇതേ ഗുളികയുടെ 0058 മുതല്‍ 0063വരെയുള്ള ബാച്ചുകളും വിദ്യാലയങ്ങള്‍ക്കായി നല്‍കിയിട്ടുണ്ട്. കേരള സ്റ്റേറ്റ് ഡ്രഗ്സ് ആന്‍ഡ് ഫാര്‍മസ്യൂട്ടിക്കല്‍സാണ് ഗുളിക വിതരണം ചെയ്തിരിക്കുന്നത്. ഫാര്‍മസിസ്റ്റുകള്‍വഴി മാത്രം വിതരണം ചെയ്യാവുന്ന വിഭാഗത്തില്‍പെട്ട മരുന്നാണിത്. ഇതുസംബന്ധിച്ച സംശയം ജീവനക്കാരുടെ സംഘടനകളിലൊന്ന് ആരോഗ്യവകുപ്പിനെ അറിയിച്ചിരുന്നു. എന്നാല്‍, ഇതിന് മറുപടി നല്‍കാതെ ഗുളികവിതരണവുമായി അധികൃതര്‍ മുന്നോട്ടുപോവുകയായിരുന്നു.

കോഴിക്കോട്:സംസ്ഥാനത്ത് ചില ജില്ലകളില്‍ ഇന്നും ഉയര്‍ന്ന ചൂട് അനുഭവപ്പെടുമെന്ന് കാലാവസ്ഥാ നിരീക്ഷണ കേന്ദ്രം.ആലപ്പുഴ, കോഴിക്കോട്, കണ്ണൂര്‍, കോട്ടയം ജില്ലകളിലാണ് ഉയര്‍ന്ന താപനിലക്കുള്ള മുന്നറിയിപ്പ്. പൊതുജനങ്ങള്‍ ജാഗ്രത പാലിക്കണമെന്ന് ദുരന്ത നിവാരണ അതോറിറ്റി നിര്‍ദേശിച്ചു.സൂര്യാതാപം, സൂര്യാഘാതം തുടങ്ങിയവക്ക് സാധ്യതയുണ്ട്. പകല്‍ 11 മുതല്‍ മൂന്ന് മണി വരെ നേരിട്ട് സൂര്യപ്രകാശം ഏല്‍ക്കരുത്. കുട്ടികളും ഗര്‍ഭിണികളും പ്രായമായവരും പ്രത്യേകം ശ്രദ്ധിക്കണം. നിര്‍ജലീകരണം ഒഴിവാക്കാന്‍ ധാരാളം വെള്ളം കുടിക്കണം, അയഞ്ഞ കോട്ടണ്‍ വസ്ത്രങ്ങള്‍ ധരിക്കണം എന്നിവയും ദുരന്ത നിവാരണ അതോറിറ്റിയുടെ നിര്‍ദേശത്തിലുണ്ട്. ചൂട് മൂലം ആരോഗ്യ പ്രശ്നങ്ങള്‍ ഉണ്ടായാല്‍ പെട്ടെന്ന് തന്നെ വൈദ്യ സഹായം തേടണമെന്നും നിര്‍ദേശമുണ്ട്.മാര്‍ച്ചില്‍ അനുഭവപ്പെടേണ്ട ചൂടാണ് സംസ്ഥാനത്ത് പലയിടങ്ങളിലും ഇപ്പോള്‍ അനുഭവപ്പെടുന്നത്. 37 ഡിഗ്രിയില്‍ കൂടുതല്‍ പലയിടങ്ങളിലും രേഖപ്പെടുത്തിയിട്ടുണ്ട്. ജനുവരി 15 മുതൽ ഇന്നലെ വരെയുള്ള കണക്ക് നോക്കിയാൽ രാജ്യത്തെ ഉയർന്ന താപനില 22 തവണയാണ് കേരളത്തിൽ രേഖപ്പെടുത്തിയത്. ഇതിൽ പുനലൂരും കോട്ടയവുമാണ് മുന്നിൽ. പുനലൂരിൽ 6 തവണവും കോട്ടയത്ത് 5 തവണയും രാജ്യത്തെ ഉയർന്ന താപനില രേഖപ്പെടുത്തി.

തിരുവനന്തപുരം: പ്രമുഖ മാധ്യമ പ്രവര്‍ത്തകന്‍ കെ എം ബഷീറിനെ കാറിടിച്ച്‌ കൊലപ്പെടുത്തിയ കേസ് ഇന്ന് തിരുവനന്തപുരം ജുഡീഷ്യല്‍ ഒന്നാം ക്ലാസ്സ് മജിസ്‌ട്രേറ്റ് കോടതി പരിഗണിക്കും.കേസിലെ പ്രധാന പ്രതികളായ ശ്രീറാം വെങ്കിട്ടരാമന്‍ ഐ എ.എസ് , അപകടസമയത്ത് വാഹനത്തില്‍ ഉണ്ടായിരുന്ന ശ്രീറാമിന്റെ സുഹൃത്ത് വഫ ഫിറോസ് എന്നിവരും ഇന്ന് കോടതിയില്‍ ഹാജരാകും.പ്രതികളോട് കോടതിയില്‍ നേരിട്ട് ഹാജരാകണമെന്ന് നേരത്തെ തിരുവനന്തപുരം ഫസ്റ്റ്ക്ലാസ് ജുഡീഷ്യല്‍ മജിസ്ട്രേറ്റ് കോടതി ആവശ്യപ്പെട്ടിരുന്നു.2019 ആഗസ്റ്റ് മൂന്ന് വെളുപ്പിന് ഒരു മണിക്കായിരുന്നു കേസിനാസ്പദമായ സംഭവം. പ്രതികള്‍ സഞ്ചരിച്ചിരുന്ന കാര്‍ ഇടിച്ചു മാധ്യമ പ്രവര്‍ത്തകനായ ബഷീര്‍ മരിക്കുകയായിരുന്നു.കേസില്‍ ശ്രീറാം വെങ്കിട്ടരാമനെ ഒന്നാം പ്രതിയാക്കി അന്വേഷണ സംഘം കുറ്റപത്രം സമര്‍പ്പിച്ചിരുന്നു.അപകടം നടക്കുന്ന സമയത്ത് കാറില്‍ ഒപ്പമുണ്ടായിരുന്ന വഫ ഫിറോസാണ് രണ്ടാം പ്രതി.മദ്യപിച്ച്‌ അമിത വേഗത്തില്‍ വാഹനമോടിച്ചതാണ് അപകടത്തിനുള്ള കാരണമെന്നാണ് കുറ്റപത്രത്തില്‍ പറയുന്നത്.മനഃപൂര്‍വ്വമല്ലാത്ത നരഹത്യ, പൊതുമുതല്‍ നശിപ്പിക്കല്‍,തുടങ്ങി മോട്ടോര്‍ വാഹന വകുപ്പിലെ വിവിധ വകുപ്പുകള്‍ ചുമത്തിയാണ് പ്രതികള്‍ക്കെതിരെ കേസെടുത്തിരിക്കുന്നത്.