Kerala

പത്തനംതിട്ട:കൊറോണ വൈറസ് രോഗലക്ഷണങ്ങളോടെ പത്തനംതിട്ട ജില്ലയില്‍ ഐസൊലേഷന്‍ വാര്‍ഡില്‍ കഴിയുന്ന 12 പേരുടെ പരിശോധനാഫലം ഇന്ന് ലഭിക്കും.25 പേരാണ് ഐസൊലേഷന്‍ വാര്‍‍‍ഡുകളിലുള്ളത്. ഇതില്‍ 5 പേര്‍ ഹൈ റിസ്ക് കോണ്‍ടാക്റ്റില്‍ പെട്ടവരാണ്.റൂട്ട് മാപ്പ് പ്രസിദ്ധീകരിച്ചതിലൂടെ 70 പേരെ കണ്ടെത്തിയിരുന്നു. പുതിയതായി ആര്‍ക്കെങ്കിലും രോഗം സ്ഥിരീകരിച്ചാല്‍ അവരുടെ റൂട്ട് മാപ്പ് പ്രസിദ്ധീകരിക്കാനുള്ള നടപടികളും തുടങ്ങിയിട്ടുണ്ട്.കോവിഡ് 19 സ്ഥിരീകരിച്ച കോട്ടയം ചെങ്ങളം സ്വദേശികളായ ദമ്പതികളുടെ റൂട്ട് മാപ്പ് ജില്ലാഭരണകൂടം ഇന്ന് പുറത്തുവിടും. ആശുപത്രിയില്‍ കഴിയുന്ന ഇവരുടെ കുട്ടിക്ക് രോഗബാധയില്ലെന്ന് സ്ഥിരീകരിച്ചു. ആശുപത്രിയില്‍ കഴിയുന്ന വൃദ്ധദമ്പതികളുടെ ആരോഗ്യസ്ഥിതിയും മെച്ചപ്പെട്ടു.

കൊച്ചി:കൊറോണ വൈറസ് ബാധയുടെ പശ്ചാത്തലത്തിൽ ഇറ്റലിയിൽ നിന്നും നെടുമ്പാശ്ശേയി വിമാനത്താവളത്തിലെത്തിയ 42 പേരെ ആലുവ താലൂക്ക്  നിരീക്ഷണത്തിലാക്കി.ദോഹ വഴിയെത്തിയ സംഘത്തെ മുന്‍കരുതലിന്റെ ഭാഗമായാണ് ആശുപത്രിയിലേക്ക് മാറ്റിയത്. സംഘത്തിലുള്ളവര്‍ക്ക് ഇതുവരെ രോഗലക്ഷണങ്ങള്‍ കണ്ടെത്തിയിട്ടില്ല. ഇവരുടെ രക്തസാമ്പിളുകൾ എടുത്തു പരിശോധനയ്ക്ക് അയച്ചിട്ടുണ്ട്.ഫലം നെഗറ്റീവ് ആകുന്നതുവരെ ഇവര്‍ ആശുപത്രിയില്‍ തുടരും. അതേസമയം കോവിഡ് 19 രോഗ ഭീഷണി വർദ്ധിച്ച സാഹചര്യത്തിൽ കൊച്ചി വിമാനത്താവളത്തിൽ പരിശോധന കര്‍ശനമാക്കി.വിദേശത്ത് നിന്ന് വരുന്ന യാത്രക്കാരെല്ലാം ആരോഗ്യസ്ഥിതിയും യാത്രാവിവരങ്ങളും വിശദമാക്കുന്ന ചോദ്യാവലി പൂരിപ്പിച്ച്‌ നല്‍കണം. വിമാനത്തില്‍ നിന്ന് പുറത്തേക്ക് വരുന്നവരെ യൂണിവേഴ്‌സല്‍ സ്‌ക്രീനിങ്ങിന് വിധേയമാക്കും. ഇവര്‍ സഞ്ചരിച്ച രാജ്യങ്ങളുടെ വിശദാംശങ്ങള്‍ ഉദ്യോഗസ്ഥര്‍ പ്രത്യേകം ചോദിച്ച്‌ മനസിലാക്കണമെന്നും നിര്‍ദേശമുണ്ട്. ആഭ്യന്തര ടെര്‍മിനല്‍ വഴി എത്തുന്ന യാത്രക്കാരെയും ഇന്നലെ മുതല്‍ പരിശോധനകള്‍ക്ക് വിധേയമാക്കുന്നുണ്ട്.

കൊച്ചി:കൊറോണ വൈറസ് ബാധയുടെ പശ്ചാത്തലത്തിൽ നെടുമ്പാശ്ശേരിയിൽ നിന്നുള്ള നിരവധി വിമാനസർവീസുകൾ താൽക്കാലികമായി നിർത്തലാക്കി.സൗദി എയർലൈൻസിന്റെ മുഴുവന്‍ വിമാനങ്ങളുമാണ് നിര്‍ത്തിയത്. കുവൈത്ത് എയര്‍വേയ്സ്, ഇന്‍ഡിഗോ, ജസീറ വിമാന കമ്പനികളും ഏതാനും സര്‍വീസുകള്‍ നിര്‍ത്തി.എയര്‍ ഏഷ്യ ക്വാലാലംപൂരിലേക്ക് രണ്ട് സര്‍വീസുകളുണ്ടായിരുന്നത് ഒന്നാക്കി.സില്‍ക്ക് എയറും സിംഗപ്പൂരിലേക്ക് രണ്ടെണ്ണമുണ്ടായിരുന്നത് ഒന്നാക്കി.മറ്റ് ചില വിമാന കമ്ബനികളും യാത്രക്കാര്‍ കുറയുമ്പോൾ ഇടയ്ക്കിടെ സര്‍വീസുകള്‍ റദ്ദാക്കുന്നുണ്ട്.സര്‍വീസുകള്‍ കുറഞ്ഞതോടെ സിയാലിനും പ്രതിദിനം കോടിക്കണക്കിന് രൂപയുടെ വരുമാനക്കുറവ് ഉണ്ടായിരിക്കുകയാണ്.

പത്തനംതിട്ട:സംസ്ഥാനത്ത് രണ്ടു പേര്‍ക്കു കൂടി കൊറോണ വൈറസ് ബാധ സ്ഥിതീകരിച്ചു. ഇറ്റലിയില്‍ നിന്നെത്തിയ കുടുംബവുമായി അടുത്ത് ഇടപഴകിയ രണ്ടുപേർക്കാണ് പുതുതായി രോഗബാധ സ്ഥിതീകരിച്ചിരിക്കുന്നത്.ഇതോടെ കേരളത്തില്‍ കോവിഡ് ബാധിച്ചു ചികിത്സയിലുള്ളവരുടെ എണ്ണം എട്ടായി.ഇറ്റലിയിൽ നിന്നും പത്തനംതിട്ടയിലെത്തിയ നേരത്തെ രോഗം സ്ഥിരീകരിച്ച കുടുംബവുമായി അടുത്ത് ഇടപഴകിയ രണ്ടു പേര്‍ക്കാണ് പരിശോധനയില്‍ പോസിറ്റിവ് ഫലം കണ്ടതെന്ന് കലക്ടര്‍ പിബി നൂഹ് പറഞ്ഞു. ഇവര്‍ നേരത്തെ തന്നെ കോഴഞ്ചേരി ആശുപത്രിയില്‍ ചികിത്സയിലാണ്. ഇതോടെ പത്തനംതിട്ട ജില്ലയില്‍ രോഗം ബാധിച്ച്‌ ചികിത്സയില്‍ കഴിയുന്നവര്‍ ഏഴായി.പത്തനംതിട്ടയിലെ ഏഴു പേര്‍ക്കു പുറമേ എറണാകുളത്ത് ഒരു കുട്ടിക്കാണ് രോഗം സ്ഥിരീകരിച്ചിട്ടുള്ളത്.ഇറ്റലിയില്‍നിന്നാണ് ഈ കുട്ടിയടങ്ങുന്ന കുടുംബം കേരളത്തില്‍ എത്തിയത്.സംസ്ഥാനത്ത് രോഗം ബാധിച്ചവരുടെ ആരോഗ്യനില തൃപ്തികരമാണെന്നാണ് റിപ്പോര്‍ട്ടുകള്‍. ഇവര്‍ക്ക് പുറമേ പതിമൂന്നു പേര്‍ക്ക് കൂടി രോഗലക്ഷണം കണ്ടെത്തിയിരുന്നു.പത്തനംതിട്ടയിലും കൊല്ലത്തും അഞ്ചുവീതവും കോട്ടയത്ത് മൂന്നുപേരുമാണ് ഐസലേഷനില്‍ കഴിയുന്നത്. എല്ലാവരുടെയും ആരോഗ്യനില തൃപ്തികരമാണെന്ന് ആരോഗ്യവകുപ്പ് അറിയിച്ചു. ഇറ്റലിയില്‍ നിന്ന് എത്തിയവരുമായി ഇടപഴകിയ തൃശൂര്‍ ജില്ലയിലെ 11പേര്‍ നിരീക്ഷണത്തിലാണ്.കോവിഡ് 19ന്റെ പശ്ചാത്തലത്തില്‍ സംസ്ഥാന ആരോഗ്യ വകുപ്പിന്റെ കീഴില്‍ 24 മണിക്കൂറും പ്രവര്‍ത്തിക്കുന്ന സ്‌റ്റേറ്റ് കോവിഡ് 19 കോള്‍ സെന്റര്‍ വീണ്ടും സജ്ജമാക്കി. പൊതുജനങ്ങള്‍ക്ക് രോഗത്തെ സംബന്ധിച്ച സംശയങ്ങള്‍ക്കും പ്രധാന വിവരങ്ങള്‍ കൈമാറുന്നതിനും 0471 2309250, 0471 2309251, 0471 2309252 കോള്‍ സെന്ററിലെ എന്നീ നമ്പറുകളിൽ വിളിക്കാവുന്നതാണ്.