തിരുവനന്തപുരം: അതിഥി തൊഴിലാളികള്‍ക്ക് സ്വന്തം മടങ്ങിപ്പോകാന്‍ ശനിയാഴ്ച കേരളത്തിൽ നിന്നും അഞ്ച് പ്രത്യേക ട്രെയിന്‍ സർവീസുകൾ. തിരുവനന്തപുരം, കോഴിക്കോട്, ആലുവ, തിരൂര്‍, എറണാകുളം സൗത്ത് എന്നിവിടങ്ങളില്‍നിന്നാണ് ട്രെയിനുകള്‍ പുറപ്പെടുന്നത്. ഓരോ ട്രെയിനിലും 1200 തൊഴിലാളികളെ നാട്ടിലെത്തിക്കാനാണ് പദ്ധതി. ശാരീരിക അകലം പാലിച്ച്‌ കര്‍ശന സുരക്ഷയോടെയാണ് യാത്ര.തിരുവനന്തപുരത്തുനിന്നും ജാര്‍ഖണ്ഡിലെ ഫാതിയിലേക്കാണ് ട്രെയിന്‍. ഉച്ചക്ക് രണ്ടോടെ ട്രെയിന്‍ പുറപ്പെടുമെന്നാണ് അറിയുന്നത്. കോഴിക്കോട് നിന്നും ജാര്‍‌ഖണ്ഡിലേക്ക് അതിഥി തൊഴിലാളികളുമായി ട്രെയിന്‍ ഓടും. വൈകിട്ടാണ് ഇവിടെനിന്നും ട്രെയിന്‍ പുറപ്പെടുന്നത്. ആലുവയില്‍നിന്നും തിരൂരില്‍നിന്നും ബിഹാറിലെ പാറ്റ്നയിലേക്കാണ് ട്രെയിന്‍. എറണാകുളം സൗത്തില്‍നിന്ന് ഒഡീഷയിലെ ഭുവനേശ്വറിലേക്കാണ് ട്രെയിന്‍ പുറപ്പെടുന്നത്.വെള്ളിയാഴ്ചയാണ് അതിഥി തൊഴിലാളികളുമായുള്ള ആദ്യത്തെ ട്രെയിന്‍ കേരളത്തില്‍നിന്നും പുറപ്പെട്ടത്. വെള്ളിയാഴ്ച രാത്രി ഒൻപതുമണിയോടെ ആലുവയില്‍ നിന്നും പുറപ്പെട്ട ട്രെയിനിൽ സ്ത്രീകളും കുട്ടികളും ഉള്‍പ്പെടെ 1152 പേരാണ് യാത്രചെയ്യുന്നത്.കോവിഡ് മാനദണ്ഡങ്ങള്‍ പാലിച്ചാണ് യാത്ര.ടിക്കറ്റ് ചാര്‍ജ് മാത്രമാണ് തൊഴിലാളികളില്‍നിന്ന് ഈടാക്കിയത്. ട്രെയിനില്‍ ഇവര്‍ക്കുള്ള ഭക്ഷണം ഒരുക്കിയിട്ടുണ്ട്.സംസ്ഥാനത്ത് ഏകദേശം 3,60,000 അതിഥി തൊഴിലാളികളാണുള്ളത്. 20,826 ക്യാമ്പുകളിലായാണ് ഇവര്‍ കഴിയുന്നത്. ഇവര്‍ക്ക് സ്വന്തം നാടുകളിലേക്ക് മട ക്കയാത്ര അനുവദിക്കാന്‍ കേന്ദ്ര ആഭ്യന്തര മന്ത്രാലയം തീരുമാനിച്ച സാഹചര്യത്തിലാണ് ട്രെയിന്‍ സര്‍വീസ് നടത്തുന്നത്.
