കണ്ണൂര്‍: കണ്ണൂരില്‍ ആശങ്ക അകലുന്നു.ജില്ലയില്‍ കൊവിഡ് ബാധിച്ച്‌ ചികിത്സയില്‍ കഴിഞ്ഞിരുന്ന നാല് പേര്‍ കൂടി ഇന്നലെ രോഗമുക്തി നേടി.അഞ്ചരക്കണ്ടി കൊവിഡ് ആശുപത്രിയില്‍ ചികിത്സയിലുണ്ടായിരുന്ന നാല് പേരാണ് വ്യാഴാഴ്ച ആശുപത്രി വിട്ടത്.ജില്ലയിൽ നിരീക്ഷണത്തില്‍ കഴിയുന്നവരുടെ എണ്ണം നൂറില്‍ താഴെയായി.ഹോട്ട് സ്പോട്ടുകളുടെ എണ്ണത്തിലും കുറവുകള്‍ വന്നിട്ടുണ്ട്. കുന്നോത്തുപറമ്പ്, മൊകേരി, ചിറ്റാരിപറമ്പ്, ചെറുവാഞ്ചേരി സ്വദേശികളാണ് രോഗം ഭേദമായതിനെ തുടര്‍ന്ന് വീട്ടിലേക്ക് പോയത് . ഇതോടെ കണ്ണൂര്‍ ജില്ലയില്‍ കോവിഡ് സ്ഥിരീകരിച്ച 118 പേരില്‍ 103 പേരുടെ രോഗം ഭേദമായി.15 പേര്‍ വിവിധ ആശുപത്രികളില്‍ ചികിത്സയിലാണ്.നിലവില്‍ 96 പേരാണ് നിരീക്ഷണത്തിലുള്ളത്. ഇവരില്‍ 53 പേര്‍ ആശുപത്രികളിലും 43 പേര്‍ വീടുകളിലുമാണുള്ളത്. 120 സാംപിളുകളുടെ ഫലം കൂടി ഇനി ലഭിക്കാനുണ്ട്. ജില്ലയിലെ പതിമൂന്ന് തദ്ദേശ സ്ഥാപനങ്ങളെ ഹോട്ട് സ്പോട്ട് പട്ടികയില്‍ നിന്ന് ഒഴിവാക്കി.നിലവില്‍ ജില്ലയില്‍ പത്ത് ഹോട്ട് സ്പോട്ടുകളാണ് ഉള്ളത്. കുത്തുപറമ്പ്,പാനൂര്‍ മുനിസിപ്പാലിറ്റികളും കതിരൂര്‍, കോട്ടയം മലബാര്‍, പാട്യം, മൊകേരി, കുന്നോത്ത്പറമ്പ്, പെരളശ്ശേരി, ഏഴോം, പാപ്പിനിശ്ശേരി പഞ്ചായത്തുകളുമാണ് നിലവില്‍ ഹോട്ട് സ്പോട്ടുകള്.
