Kerala

ആലപ്പുഴ:പൊട്ടിവീണ വൈദ്യുതി ലൈനില്‍ നിന്നും ഷോക്കേറ്റ് അമ്മായിയമ്മയും മരുമകളും മരിച്ചു.മാന്നാര്‍ ബുധനൂര്‍ സ്വദേശികളായ ഓമന (60)യും മരുമകള്‍ മഞ്ജുവു (32)മാണ് മരണമടഞ്ഞത്. രാവിലെ 11 മണിയോടെയാണ് സംഭവം.രാവിലെ ഇവരുടെ വീടിന് സമീപത്ത് വൈദ്യുതി ലൈനിലേക്ക് മരം മറിഞ്ഞു വീണ് ലൈന്‍ പൊട്ടിക്കിടന്നിരുന്നു. മഞ്ജുവിന്റെ ആറു വയസ്സുകാരനായ കുട്ടി വൈദ്യുതി ലൈനിലേക്ക് പിടിക്കാന്‍ ചെല്ലുന്നത് കണ്ട് രക്ഷപ്പെടുത്താന്‍ എത്തിയതായിരുന്നു രണ്ടുപേരും. ആദ്യം ഓമനയും പിന്നാലെ മഞ്ജുവും കുട്ടിയുടെ അരുകില്‍ എത്തുകയും പിടിച്ചു മാറ്റുകയും ചെയ്‌തെങ്കിലും ഇരുവര്‍ക്കും ഷോക്കേറ്റു. തല്‍ക്ഷണം തന്നെ മരണപ്പെടുകയായിരുന്നു. രണ്ടു പേരുടെയും മൃതദേഹം ആശുപത്രിയിലേക്ക് മാറ്റിയിട്ടുണ്ട്.

കണ്ണൂര്‍:ജില്ലയില്‍ രണ്ട് പേര്‍ക്ക് കൂടി കൊവിഡ് സ്ഥിരീകരിച്ചു.ദുബായില്‍ നിന്നെത്തിയ കടമ്പൂര്‍ സ്വദേശിക്കും ചെന്നൈയില്‍ നിന്നെത്തിയ മട്ടന്നൂർ സ്വദേശിക്കുമാണ് പുതിയതായി രോഗം സ്ഥിരീകരിച്ചത്.നിലവിൽ ജില്ലയില്‍ ആകെ അ‍ഞ്ച് പേരാണ് രോഗം ബാധിച്ച് ചികിത്സയിലുളളത്. കഴിഞ്ഞ 12 ആം തിയ്യതി ദുബായില്‍നിന്നും കണ്ണൂര്‍ എയര്‍പോര്‍ട്ടിലെത്തിയ കടമ്പൂര്‍സ്വദേശി ആശുപത്രിയില്‍ നിരീക്ഷണത്തില്‍ കഴിയുകയായിരുന്നു.മെയ് ആറിനാണ് മട്ടന്നൂര്‍സ്വദേശി ചെന്നൈയില്‍നിന്നും നാട്ടിലെത്തിയത്.ഇതോടെ ജില്ലയില്‍ ആകെ രോഗം സ്ഥിരീകരിച്ചവരുടെ എണ്ണം 121 ആയി. ഇതില്‍116 പേരും രോഗ വിമുക്തി നേടിയിട്ടുണ്ട്. 2847 പേരാണ് ജില്ലയില്‍ഇനി ആകെ നിരീക്ഷണത്തിലുളളത്.61 പേരുടെ പരിശോധന ഫലം കൂടി ലഭിക്കാനുണ്ട്. ഇതിനിടെ കതിരൂര്‍, പാട്യം,കേളകം എന്നീ മൂന്ന് ഹോട്ട് സ്പോട്ടുകള്‍ ഒഴികെയുളള പ്രദേശങ്ങളില്‍മെയ് 17 വരെ കലക്ടര്‍ നിയന്ത്രണങ്ങളില്‍ ഇളവ് വരുത്തിയിട്ടുണ്ട്.അഞ്ചില്‍കൂടുതല്‍ തൊഴിലാളികള്‍ പണിയെടുക്കുന്ന വ്യവസായ ശാലകള്‍ ജില്ല കലക്ടറുടെ പ്രത്യേക അനുവാദത്തോടെ തുറന്ന് പ്രവര്‍ത്തിക്കാനും അനുവാദം നല്‍കിയിട്ടുണ്ട്

തിരുവനന്തപുരം: സംസ്ഥാനത്ത് സ്‌കൂളുകളും കോളേജുകളും ഉടന്‍ തുറക്കരുത് കേരളത്തിന് ഐഎംഎ യുടെ മുന്നറിയിപ്പ്.നിലവിലെ സാഹചര്യത്തില്‍ വിദ്യാഭ്യാസ സ്ഥാപനങ്ങള്‍ ഉടന്‍ തുറക്കരുത്.ഒരു മാസമെങ്കിലും കുറഞ്ഞത് നീട്ടിവയ്ക്കണം. സ്‌കൂളുകളിലും കോളജുകളിലും വിദ്യാര്‍ത്ഥികള്‍ കൂട്ടം കൂടാനുള്ള സാഹചര്യമുണ്ട്. പ്രകടമായ ലക്ഷണങ്ങളില്ലാതെ തന്നെ രോഗ ബാധ ഉണ്ടാകാനും കുട്ടികള്‍ വൈറസ് വാഹകരാകാനുമുള്ള സാധ്യത ഉണ്ടെന്നും റിപ്പോര്‍ട്ടില്‍ പറയുന്നു.കുട്ടികളില്‍ നിന്ന് വീടുകളിലേക്ക് രോഗമെത്താം.കുഞ്ഞുങ്ങള്‍ , ഗര്‍ഭിണികള്‍, പ്രായമായവര്‍ ഇവരുള്ള വീടുകളാണെങ്കില്‍ സ്ഥിതി ഗുരുതരമാകും. റിവേഴ്‌സ് ക്വാറന്റൈനും പാളും.സമൂഹ വ്യാപന സാധ്യതയും തള്ളിക്കളയാനാകില്ലെന്നാണ് ഐ.എം.എ ചൂണ്ടിക്കാട്ടുന്നത്. വിദ്യാലയങ്ങളില്‍ രോഗ വ്യാപനമുണ്ടായാല്‍ നിയന്ത്രിക്കാനും ബുദ്ധിമുട്ടാകും.പരിശോധന കിറ്റുകളുടെ കുറവ് ഇപ്പോള്‍ തന്നെ ഉള്ളതിനാല്‍ കൂടുതല്‍ പേരില്‍ പരിശോധന നടത്തുന്നതും പ്രയാസകരമാകും. അദ്ധ്യയന വര്‍ഷം നഷ്ടമാകാതിരിക്കാന്‍ ഓണ്‍ലൈന്‍ പഠനം പരമാവധി പ്രോത്സാഹിപ്പിക്കണമെന്നും ഐ.എം.എ വിദഗ്ധ സമിതി നല്‍കിയ റിപ്പോര്‍ട്ടില്‍ പറയുന്നു.