Kerala

തിരുവനന്തപുരം:കെഎസ്ഇബിയുടെ വെബ്സൈറ്റ് ഹാക്ക് ചെയ്ത് മൂന്നുലക്ഷം പേരുടെ വിവരങ്ങൾ ചോർത്തിയതായി കെ-ഹാക്കേഴ്‌സ് എന്ന ഹാക്കർമാരുടെ സംഘം. വെബ്സൈറ്റിന്റെ സുരക്ഷിതത്വമില്ലായ്മ ചൂണ്ടിക്കാട്ടാനാണ് ഹാക്കിങ്ങെന്ന് കെ-ഹാക്കേഴ്‌സ് ഫേസ്ബുക് പേജിലൂടെ അവകാശപ്പെട്ടു.അഞ്ചുകോടി രൂപ വിലവരുന്ന വിവരങ്ങളാണ് ചോർത്തിയതെന്നും മൂന്നു മാസത്തിനുള്ളിൽ സോഫ്റ്റ്‌വെയർ ആർകിടെക്ച്ചർ പുനർരൂപകല്പന ചെയ്തില്ലെങ്കിൽ വിവര നഷ്ട്ടമുണ്ടാകുമെന്നും ഹാക്കേഴ്‌സ് മുന്നറിയിപ്പ് നൽകിയിട്ടുണ്ട്.ഒരു  സൗജന്യ ആപ്പ്ളിക്കേഷനും ഹാക്കർമാർ ഇതിനോടൊപ്പം അറ്റാച്ച് ചെയ്തിട്ടുണ്ട്.അത് ഉപയോഗിച്ചുകൊള്ളാനാണ് നിർദേശം.ഉപഭോക്താവിന്റെ എല്ലാ വിവരങ്ങളും വെബ്സൈറ്റിൽ നിന്നും ലഭ്യമാകുന്നുവെന്നാണ് കെ-ഹാക്കേഴ്‌സ് അവകാശപ്പെടുന്നത്.ചോർത്തിയ വിവരങ്ങൾ വീഡിയോ രൂപത്തിൽ ഫേസ്ബുക് പേജിൽ ഉൾപ്പെടുത്തിയിട്ടുണ്ട്.അതോടൊപ്പം 1249 പേരുടെ വിവരങ്ങളും നൽകിയിട്ടുണ്ട്.മൂന്നുമണിക്കൂർ കൊണ്ടാണ് ഇത്രയും വിവരങ്ങൾ ചോർത്തിയതെന്നും സംഘം അവകാശപ്പെട്ടു.

അതേസമയം വെബ്സൈറ്റ് ഹാക്ക് ചെയ്യപ്പെട്ടിട്ടില്ലെന്നും കെഎസ്ഇബി ചെയ്യുന്ന ഒരു സൗകര്യം ദുരുപയോഗം ചെയ്യുകമാത്രമാണ് ഉണ്ടായതെന്നും കെഎസ്ഇബി അധികൃതർ വ്യക്തമാക്കി. ഉപഭോക്താവിന്റെ പേര്,വിലാസം,വൈദ്യുതി ഉപഭോഗം,ബിൽ തുക,കണക്ട് ലോഡ് തുടങ്ങിയ വിവരങ്ങൾ കൺസ്യൂമർ നമ്പർ നൽകി കയറുന്ന ആൾക്ക് ലഭിക്കും. നിക്ഷേപത്തിന് അയ്യായിരം രൂപയിൽ അധികം പലിശയുള്ള ഉപഭോക്താക്കളുടെ പാൻ നമ്പറും ഇതോടൊപ്പം ഉണ്ടാകും. ബിൽതുകയുമായി ബന്ധപ്പെടുത്തിക്കൊണ്ടുള്ള താരതമ്യങ്ങൾ, വൈദ്യുതി ഉപഭോഗം സംബന്ധിച്ച വിവരങ്ങൾ തുടങ്ങി വിവിധമേഖലയിൽ ഈ ഡാറ്റകൾ ഉപയോഗിക്കാൻ സാധിക്കും.സെക്ഷൻ ഓഫീസിന്റെ പേരും കൺസ്യുമർ നമ്പറും നൽകിയാൽ ഉപഭോക്താവിന്റെ മുൻകാല ബില്ലുകൾ കാണാൻ സൗകര്യമുണ്ട്.ഈ സൗകര്യം ദുരുപയോഗം  ചെയ്യുകമാത്രമാണ് ഉണ്ടായതെന്ന് വൈദ്യുതി ബോർഡ് ചെയർമാൻ എസ്.എൻ പിള്ള പറഞ്ഞു.ഓൺലൈനായി ബില്ലടയ്ക്കാനുള്ള സൗകര്യം നിർത്തിവച്ചിട്ടില്ലെന്നും അദ്ദേഹം പറഞ്ഞു.ഉപഭോക്താക്കൾക്ക് മുൻകാല ബില്ലുകൾ നോക്കാനുള്ള സൗകര്യം തൽക്കാലത്തേക്ക് നിർത്തിവെച്ചിരിക്കുകയാണെന്നും അദ്ദേഹം പറഞ്ഞു.

കണ്ണൂർ : കണ്ണൂർ ഗവ.മെഡിക്കൽ കോളേജ്‌ ആശുപത്രിയിൽ ചികിത്സ തേടിയ   കോവിഡ് 19 പോസിറ്റീവായ കണ്ണൂർ സ്വദേശിനിയായ 32 കാരി ഇരട്ടക്കുട്ടികൾക്ക്‌ ജന്മം നൽകി. കണ്ണൂർ ഗവ. മെഡിക്കൽ കോളേജ്‌ ആശുപത്രിയിൽ നടന്ന സിസേറിയനിലൂടെ ഉച്ചയ്ക്ക്‌ 12.29, 12.30 മണിയോടെയാണ്‌ 2 ആൺകുട്ടികൾക്ക്‌ ജന്മം നൽകിയത്‌. ഇതാദ്യമായാണ്‌ കോവിഡ്‌ പോസിറ്റീവായ യുവതി ഇരട്ടക്കുട്ടികൾക്ക്‌ ജന്മം നൽകിയത്‌. ഐ.വി.എഫ്‌ ചികിത്സ വഴി ഗർഭം ധരിച്ച കോവിഡ്‌ പോസിറ്റീവായ ഒരു യുവതി രണ്ട്‌ കുട്ടികൾക്ക്‌ ജന്മം നൽകിയതും ഇന്ത്യയിൽ ഇതാദ്യമായാണ്‌ റിപ്പോർട്ട്‌ ചെയ്യപ്പെടുന്നത്‌.

കണ്ണൂർ ഗവ.മെഡിക്കൽ കോളേജ്‌ ആശുപത്രിയിൽ ചികിത്സ തേടുന്ന അൻപതാമത്തെ കോവിഡ്‌ പോസിറ്റീവ്‌ ഗർഭിണിയാണ്‌ ഇന്ന് ഇരട്ടക്കുട്ടികൾക്ക്‌ ജന്മം നൽകിയത്‌. ഒൻപതാമത്തെ സിസേറിയൻ വഴിയുള്ള പ്രസവമാണിത്‌. ഗൈനക്കോളജി വിഭാഗം മേധാവി ഡോ എസ്‌ അജിത്ത്‌, അസോസിയേറ്റ്‌ പ്രൊഫസർ ഡോ. മാലിനി എന്നിവരടങ്ങിയ മെഡിക്കൽ സംഘമാണ്‌ പൂർണ്ണ കോവിഡ്‌ സുരക്ഷാ സംവിധാനങ്ങളോടെ സർജ്ജറി നടത്തിയത്‌. ഉയർന്ന രക്തസമ്മർദ്ദവും പ്രമേഹവും കോവിഡ്‌ രോഗത്തെ തുടർന്നുള്ള പ്രതിസന്ധികളും ഇരട്ടക്കുട്ടികളാണെന്നതും സർജ്ജറി സങ്കീർണ്ണമാക്കിയിരുന്നെന്ന് ഡോക്ടർമ്മാർ അറിയിച്ചു. അമ്മയുടേയും 2 കുട്ടികളുടേയും ആരോഗ്യനില നിലവിൽ ആശങ്കാജനകമല്ല.

സംസ്ഥാനത്താദ്യമായി ഒരു കോവിഡ്‌ പോസിറ്റീവ്‌ രോഗി പ്രസവിച്ചതും കണ്ണൂർ ഗവ.മെഡിക്കൽ കോളേജ്‌ ആശുപത്രിയിലായിരുന്നു.ഇക്കാര്യം മുഖ്യമന്ത്രിയുടെ വാർത്താസമ്മേളനത്തിൽ മുമ്പ്‌ പ്രഖ്യാപിക്കപ്പെട്ടതാണ്‌. ഇത്, കോവിഡ് പോസിറ്റീവായ രോഗികളിൽ കണ്ണൂർ ഗവ. മെഡിക്കൽ കോളജ്‌ ആശുപത്രിയിൽ നടത്തിയ ഒമ്പതാമത്തെ സിസേറിയൻ ശസ്ത്രക്രിയയാണ്.

സംസ്ഥാനത്ത്‌ കോവിഡ്‌ പോസിറ്റീവായ കൂടുതൽ ഗർഭിണികൾ ചികിത്സ തേടിയതും പരിയാരത്താണ്‌. മാത്രമല്ല, കോവിഡ്‌ പോസിറ്റീവായ ഗർഭിണിയായ യുവതി ഉൾപ്പടെ കുടുംബാംഗങ്ങളാകെ ചികിത്സ തേടി, പ്രസവിച്ച യുവതിയും കുഞ്ഞും ഉൾപ്പടെ കുടുംബാംഗങ്ങളാകെ കോവിഡ്‌ രോഗമുക്തി നേടിയതും, ഇത്തരത്തിൽ രോഗമുക്തി നേടി നാല്‌ കുടുംബങ്ങൾ ആശുപത്രി വിട്ടതും പരിയാരത്ത്‌ നിന്നുള്ള മുൻകാഴ്ചകളായിരുന്നു. നിലവിൽ സർജ്ജറി കഴിഞ്ഞ കണ്ണൂർ സ്വദേശിനി ഉൾപ്പടെ 8 പേർ ചികിത്സയിലുണ്ടെന്ന് മെഡിക്കൽ സൂപ്രണ്ട്‌ ഡോ കെ സുദീപും പ്രിൻസിപ്പാൾ ഡോ കെ എം കുര്യാക്കോസും അറിയിച്ചു. കോവിഡ്‌ അതിവ്യാപനത്തിന്റെ പ്രതിസന്ധി ഘട്ടത്തിലും വിജയകരമായി ചികിത്സയ്ക്ക്‌ നേതൃത്വം നൽകിയ ഡോക്ടർമാർ, നേഴ്സുമാർ ഉൾപ്പടെയുള്ള സംഘത്തെ മെഡിക്കൽ സൂപ്രണ്ടും പ്രിൻസിപ്പാളും അഭിനന്ദിച്ചു. 24 ന്‌ നടത്തിയ ആർ.ടി.പി.സി.ആർ ടെസ്റ്റിൽ പോസിറ്റീവായതിനെത്തുടർന്ന് പ്രത്യേക കോവിഡ്‌ ഐസൊലേഷൻ വാർഡിൽ ചികിത്സ തുടരുന്ന യുവതിയുടെ ഒടുവിൽ നടത്തിയ ആന്റിജെൻ ടെസ്റ്റ്‌ റിസൾട്ട്‌ വന്നപ്പോൾ ഫലം നെഗറ്റീവായിട്ടുണ്ട്‌.