Kerala

കണ്ണൂര്‍: കതിരൂരില്‍ ബോംബ് നിര്‍മ്മിക്കുന്നതിടെ പൊട്ടിത്തെറിച്ച്‌ പരിക്കേറ്റ ഒരാള്‍ ചികിത്സ തേടിയത് വ്യാജപേരിൽ.കണ്ണൂര്‍ എകെജി ആശുപത്രിയിലാണ് കള്ളപ്പേരില്‍ ചികിത്സ തേടിയത്. ഇയാള്‍ കൊലപാതശ്രമക്കേസ് പ്രതിയാണെന്ന് പൊലീസ് പറയുന്നു. അഞ്ച് സിപിഎം പ്രവര്‍ത്തകരാണ് ബോംബ് നിര്‍മ്മിച്ചതെന്നും അപകട സ്ഥലത്ത് നിന്ന് ഓടി രക്ഷപ്പെട്ട രണ്ട് പേര്‍ക്കായുള്ള തെരച്ചില്‍ തുടരുന്നുകയാണെന്ന് പൊലീസ് അറിയിച്ചു.അതേസമയം, കതിരൂര്‍ ബോംബ് സ്ഫോടനം അന്വേഷണം നടത്താന്‍ തലശ്ശേരി ഡിവൈഎസ്പിയുടെ നേതൃത്വത്തില്‍ പ്രത്യേക സംഘത്തെ നിയോഗിച്ചു. പ്രദേശത്തുണ്ടായിരുന്നവ‍ര്‍ തെളിവ് നശിപ്പിക്കാനുള്ള ശ്രമം തുടക്കത്തില്‍ നടത്തിയിരുന്നുവെന്നും ഇവര്‍ അന്വേഷണത്തോട് സഹകരിക്കുന്നില്ലെന്നും പൊലീസ് പറയുന്നു. കഴിഞ്ഞ വെള്ളിയാഴ്ച ഉച്ചയ്ക്ക് കതിരൂര്‍ പൊന്ന്യാത്താണ് സംഭവം. സ്റ്റീല്‍ ബോംബ് ആണ് പൊട്ടിയത്. സംഭവത്തില്‍ ടിപി കൊലക്കേസ് പ്രതി രമിഷിനും പരിക്കേറ്റിരുന്നു. ഇയാളുടെ ഇരുകൈപ്പത്തി കളും തകര്‍ന്നിട്ടുണ്ട്. ഇയാളുടെ കൂടെയുണ്ടായിരുന്ന ധീരജ് എന്നയാളുടെ കണ്ണുകള്‍ക്കാണ് പരുക്ക്. മൂന്നാമത്തെയാളുടെ പരുക്ക് ഗുരുതരമല്ല. പുഴയില്‍ ചാടി നീന്തി രക്ഷപ്പെട്ടവരുടെ പരുക്ക് അത്ര ഗുരുതരമല്ലെന്നാണ് സൂചന. ഇവര്‍ക്കായി പൊലീസ് തെരച്ചില്‍ നടത്തിവരികയാണ്.

ബെംഗളൂരു:ബംഗളൂരു മയക്കുമരുന്ന് കേസില്‍ ലഹരി പാര്‍ട്ടി സംഘാടകന്‍ വിരന്‍ ഖന്ന പിടിയില്‍.ഇയാളെ അന്വേഷണ സംഘം കസ്റ്റഡിയില്‍ വാങ്ങിയിട്ടുണ്ട്. വിരേന്‍ ഖന്ന അന്യനാട്ടില്‍ താമസിക്കുന്ന ബംഗളൂരുകാര്‍ക്കായി ക്ലബ് രൂപീകരിച്ച്‌ അതിന്റെ മറവിലാണ് ലഹരി പാര്‍ട്ടികള്‍ സംഘടിപ്പിച്ചിരുന്നത്. നിര്‍ണായകമായ പല രഹസ്യങ്ങളും ഇയാളില്‍ നിന്ന് ലഭിച്ചതയാണ് സൂചന.ഇതോടെ കേസില്‍ സെന്‍ട്രല്‍ ക്രൈം ബ്രാഞ്ച് അറസ്റ്റ് ചെയ്തവരുടെ എണ്ണം നാലായതായി ജോയിന്റ് കമ്മിഷണര്‍ സന്ദീപ് പാട്ടീല്‍ പറഞ്ഞു.നടി രാഗിണിക്കും വിരേന്‍ ഖന്നയ്ക്കും പുറമെ നടിയുടെ അടുത്ത സുഹൃത്തും ജയനഗര്‍ ആര്‍.ടി ഓഫിസ് ക്ലര്‍ക്കുമായ കെ.രവിശങ്കര്‍, നടി സഞ്ജന ഗല്‍റാണിയുടെ അടുത്ത സുഹൃത്ത് രാഹുല്‍ ഷെട്ടി എന്നിവരെയുമാണ് അറസ്‌റ്റ് ചെയ്തത്. സഞ്ജന ഗല്‍റാണിയെ വൈകാതെ ചോദ്യം ചെയ്യും.അറസ്റ്റിലായ രാഹുല്‍, രവിശങ്കര്‍ എന്നിവരാണ് പാര്‍ട്ടികളിലേക്ക് മയക്കുമരുന്ന് എത്തിച്ചിരുന്നത്. വിരന്‍ ഖന്ന പ്രൊഡക്ഷന്‍സിന്‍റെ ബാനറിലാണ് പാര്‍ട്ടികള്‍ സംഘടിപ്പിച്ചിരുന്നത്. അതോടൊപ്പം ബാംഗ്ലൂര്‍ എക്സ്പാറ്റ്സ് ക്ലബ്ബും തുടങ്ങി. വിദേശികള്‍ വഴിയാണ് മയക്കുമരുന്ന് എത്തിച്ചിരുന്നതെന്നും അന്വേഷണത്തില്‍ കണ്ടെത്തിയിട്ടുണ്ടെന്ന് സന്ദീപ് പാട്ടീല്‍ പറഞ്ഞു.മലയാളികൾ ഉൾപ്പെട്ട ബംഗളുരു മയക്കു മരുന്ന് കേസിന്‍റെ അന്വേഷണം സിനിമാ മേഖലയിലെ കൂടുതല്‍ ആളുകളിലേക്ക് എത്തുമെന്നാണ് സൂചന.

തിരുവനന്തപുരം:സംസ്ഥാനത്ത് ഇന്ന് 2479 പേര്‍ക്ക് കോവിഡ്-19 സ്ഥിരീകരിച്ചതായി ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്‍ അറിയിച്ചു. തിരുവനന്തപുരം ജില്ലയില്‍ 477 പേര്‍ക്കും, എറണാകുളം ജില്ലയില്‍ 274 പേര്‍ക്കും, കൊല്ലം ജില്ലയില്‍ 248 പേര്‍ക്കും, കാസര്‍ഗോഡ് ജില്ലയില്‍ 236 പേര്‍ക്കും, തൃശൂര്‍ ജില്ലയില്‍ 204 പേര്‍ക്കും, കോട്ടയം, മലപ്പുറം ജില്ലകളില്‍ നിന്നുള്ള 178 പേര്‍ക്ക് വീതവും, കോഴിക്കോട് ജില്ലയില്‍ 167 പേര്‍ക്കും, പത്തനംതിട്ട ജില്ലയില്‍ 141 പേര്‍ക്കും, കണ്ണൂര്‍ ജില്ലയില്‍ 115 പേര്‍ക്കും, ആലപ്പുഴ ജില്ലയില്‍ 106 പേര്‍ക്കും, വയനാട് ജില്ലയില്‍ 84 പേര്‍ക്കും, പാലക്കാട് ജില്ലയില്‍ 42 പേര്‍ക്കും, ഇടുക്കി ജില്ലയില്‍ 29 പേര്‍ക്കുമാണ് ഇന്ന് രോഗ ബാധ സ്ഥിരീകരിച്ചത്.ഇന്ന് രോഗം സ്ഥിരീകരിച്ചവരില്‍ 59 പേര്‍ വിദേശ രാജ്യങ്ങളില്‍ നിന്നും 71 പേര്‍ മറ്റ് സംസ്ഥാനങ്ങളില്‍ നിന്നും വന്നതാണ്. 2255 പേര്‍ക്ക് സമ്പര്‍ക്കത്തിലൂടെയാണ് രോഗം ബാധിച്ചത്. അതില്‍ 149 പേരുടെ സമ്പര്‍ക്ക ഉറവിടം വ്യക്തമല്ല. തിരുവനന്തപുരം ജില്ലയില്‍ നിന്നുള്ള 463 പേര്‍ക്കും, എറണാകുളം ജില്ലയില്‍ നിന്നുള്ള 267 പേര്‍ക്കും, കൊല്ലം ജില്ലയില്‍ നിന്നുള്ള 241 പേര്‍ക്കും, കാസര്‍ഗോഡ് ജില്ലയില്‍ നിന്നുള്ള 225 പേര്‍ക്കും, കോട്ടയം ജില്ലയില്‍ നിന്നുള്ള 177 പേര്‍ക്കും, മലപ്പുറം ജില്ലയില്‍ നിന്നുള്ള 169 പേര്‍ക്കും, കോഴിക്കോട് ജില്ലയില്‍ നിന്നുള്ള 155 പേര്‍ക്കും, തൃശൂര്‍ ജില്ലയില്‍ നിന്നുള്ള 140 പേര്‍ക്കും, കണ്ണൂര്‍ ജില്ലയില്‍ നിന്നുള്ള 102 പേര്‍ക്കും, പത്തനംതിട്ട ജില്ലയില്‍ നിന്നുള്ള 99 പേര്‍ക്കും, ആലപ്പുഴ ജില്ലയില്‍ നിന്നുള്ള 91 പേര്‍ക്കും, വയനാട് ജില്ലയില്‍ നിന്നുള്ള 68 പേര്‍ക്കും, പാലക്കാട് ജില്ലയില്‍ നിന്നുള്ള 36 പേര്‍ക്കും, ഇടുക്കി ജില്ലയില്‍ നിന്നുള്ള 22 പേര്‍ക്കുമാണ് ഇന്ന് സമ്പര്‍ക്കത്തിലൂടെ രോഗം ബാധിച്ചത്.
34 ആരോഗ്യ പ്രവര്‍ത്തകര്‍ക്കാണ് ഇന്ന് രോഗം ബാധിച്ചത്. തിരുവനന്തപുരം ജില്ലയിലെ 10, കണ്ണൂര്‍ ജില്ലയിലെ 8, പത്തനംതിട്ട, ആലപ്പുഴ ജില്ലകളിലെ 5 വീതവും, എറണാകുളം ജില്ലയിലെ 4, കൊല്ലം, തൃശൂര്‍ ജില്ലകളിലെ ഒന്നും വീതം ആരോഗ്യ പ്രവര്‍ത്തകര്‍ക്കാണ് രോഗം ബാധിച്ചത്.തൃശൂര്‍ ജില്ലയില്‍ എ.ആര്‍. ക്യാമ്പിലെ 60 പേര്‍ക്കും രോഗം ബാധിച്ചു.

അതേസമയം രോഗം സ്ഥിരീകരിച്ച് ചികിത്സയിലായിരുന്ന 2716 പേരുടെ പരിശോധനാഫലം നെഗറ്റീവ് ആയി. തിരുവനന്തപുരം ജില്ലയില്‍ നിന്നുള്ള 426 പേരുടെയും, കൊല്ലം ജില്ലയില്‍ നിന്നുള്ള 114 പേരുടെയും, പത്തനംതിട്ട ജില്ലയില്‍ നിന്നുള്ള 105 പേരുടെയും, ആലപ്പുഴ ജില്ലയില്‍ നിന്നുള്ള 438 പേരുടെയും, കോട്ടയം ജില്ലയില്‍ നിന്നുള്ള 117 പേരുടെയും, ഇടുക്കി ജില്ലയില്‍ നിന്നുള്ള 26 പേരുടെയും, എറണാകുളം ജില്ലയില്‍ നിന്നുള്ള 185 പേരുടെയും, തൃശൂര്‍ ജില്ലയില്‍ നിന്നുള്ള 140 പേരുടെയും, പാലക്കാട് ജില്ലയില്‍ നിന്നുള്ള 93 പേരുടെയും, മലപ്പുറം ജില്ലയില്‍ നിന്നുള്ള 627 പേരുടെയും, കോഴിക്കോട് ജില്ലയില്‍ നിന്നുള്ള 272 പേരുടെയും, വയനാട് ജില്ലയില്‍ നിന്നുള്ള 28 പേരുടെയും, കണ്ണൂര്‍ ജില്ലയില്‍ നിന്നുള്ള 73 പേരുടെയും, കാസര്‍ഗോഡ് ജില്ലയില്‍ നിന്നുള്ള 72 പേരുടെയും പരിശോധനാ ഫലമാണ് ഇന്ന് നെഗറ്റീവായത്.11 മരണങ്ങളാണ് ഇന്ന് കോവിഡ്-19 മൂലമാണെന്ന് സ്ഥിരീകരിച്ചത്. ആഗസ്റ്റ് 31ന് മരണമടഞ്ഞ തൃശൂര്‍ വടക്കാഞ്ചേരി സ്വദേശി റാഫേല്‍ (78), മലപ്പുറം ഒളവറ്റൂര്‍ സ്വദേശിനി ആമിന (95), മലപ്പുറം കടമ്പാട് സ്വദേശി മുഹമ്മദ് (73), കാസര്‍ഗോഡ് മഞ്ചേശ്വരം സ്വദേശി അബ്ദുള്‍ റഹ്മാന്‍ (60), കണ്ണൂര്‍ വളപട്ടണം സ്വദേശി വാസുദേവന്‍ (83), ആഗസ്റ്റ് 30ന് മരണമടഞ്ഞ കണ്ണൂര്‍ ആലക്കോട് സ്വദേശി സന്തോഷ്‌കുമാര്‍ (45), തിരുവനന്തപുരം അമരവിള സ്വദേശി രവിദാസ് (69), കൊല്ലം കല്ലംതാഴം സ്വദേശി ബുഷ്‌റ ബീവി (61), തിരുവനന്തപുരം വിഴിഞ്ഞം സ്വദേശി ശബരിയാര്‍ (65), തിരുവനന്തപുരം വെഞ്ഞാറമൂട് സ്വദേശി സുലജ (56), തൃശൂര്‍ പോങ്ങനംകാട് സ്വദേശി ഷിബിന്‍ (39), എന്നിവരാണ് മരണമടഞ്ഞത്. ഇതോടെ ആകെ മരണം 326 ആയി.

കാസര്‍കോട്: കാസര്‍കോട് നഗരസഭാ കാര്യാലയത്തിലെ ഉദ്യോഗസ്ഥര്‍ക്കും ക്ലീനിംഗ് ജീവനക്കാര്‍ക്കുമായി നടത്തിയ കൊവിഡ് പരിശോധനയില്‍ 32 പേര്‍ക്ക് പോസിറ്റീവ് ആയതിനെ തുടർന്ന് നഗരസഭാ കാര്യാലയം പത്ത് ദിവസത്തേക്ക് അടച്ചിട്ടു. ഒന്നാം തീയതി നടത്തിയ പരിശോധനയില്‍ മാത്രം 15 പേര്‍ക്കാണ് കോവിഡ് പോസിറ്റീവ് കണ്ടെത്തിയത്. ഇതില്‍ 8 പേര്‍ നഗരസഭാ ജീവനക്കാരും ഏഴ് പേര്‍ ക്ലീനിംഗ് സ്റ്റാഫുമാണ്. ആരോഗ്യ വിഭാഗത്തിലെ ഒരു ഉദ്യോഗസ്ഥനും കോവിഡ് സ്ഥിരീകരിച്ചിട്ടുണ്ട്. ഉദ്യോഗസ്ഥര്‍ക്ക് കൂട്ടത്തോടെ കോവിഡ് ബാധ കണ്ടെത്തിയതോടെയാണ് നഗരസഭാ കാര്യലയം അടച്ചിടാന്‍ തീരുമാനിച്ചത്. ഓണാവധി കഴിഞ്ഞ് നഗരസഭാ കാര്യാലയം ഇന്നലെ തുറക്കേണ്ടതായിരുന്നു. ഇതിനിടയിലാണ് ഉദ്യോഗസ്ഥര്‍ക്കും ശുചീകരണം ജീവനക്കാര്‍ക്കും അടക്കം കൂട്ടത്തോടെ കോവിഡ് സ്ഥിരീകരിച്ചത്. ഇന്നലെ നടന്ന പരിശോധനയിലും പലര്‍ക്കും രോഗബാധ കണ്ടെത്തിയിട്ടുണ്ടെന്നാണ് അറിയുന്നത്. ഉദ്യോഗസ്ഥര്‍ ക്വാറന്റൈനില്‍ പ്രവേശിച്ചതിനാല്‍ സെപ്തംബര്‍ 14 വരെ കാര്യാലയം അടച്ചിടാനാണ് ഇപ്പോള്‍ തീരുമാനിച്ചിട്ടുള്ളതെന്നും വിശദമായ വിവരം പൊതുജനങ്ങളെ പിന്നീട് അറിയിക്കുമെന്നും നഗരസഭയുമായി ബന്ധപ്പെട്ടവര്‍ പറഞ്ഞു.

ന്യൂഡൽഹി:പാലാരിവട്ടം പാലം പുതുക്കി പണിയുന്നതിന് അനുമതി തേടി സര്‍ക്കാര്‍ നല്‍കിയ അപ്പീല്‍ സുപ്രീം കോടതി രണ്ടാഴ്ചക്ക് ശേഷം പരിഗണിക്കും. ആവശ്യമായ രേഖകള്‍ സമര്‍പ്പിക്കാന്‍ കരാറുകാര്‍ക്ക് സുപ്രീം കോടതി സമയം നല്‍കി. ജസ്റ്റിസ് ആര്‍ എഫ് നരിമാൻ അധ്യക്ഷനായ ബഞ്ചാണ് ഹരജി പരിഗണിക്കുന്നത്. പാലത്തിന്‍റെ ഭാരപരിശോധന നടത്തി അറ്റകുറ്റപ്പണി നടത്തണമെന്ന ഹൈകോടതി വിധി ചോദ്യം ചെയ്താണ് കേരളം ഹരജി നൽകിയിരിക്കുന്നത്. തല്‍സ്ഥിതി തുടരണമെന്ന മുൻ ഉത്തരവ് ഭേദഗതി ചെയ്യണമെന്നും തകര്‍ന്ന പാലം പൊളിച്ച് പുതിയത് പണിയാൻ അടിയന്തിരമായി അനുമതി നൽകണമെന്നും ആവശ്യപ്പെട്ട് കേരളം സമര്‍പ്പിച്ച പ്രത്യേക അപേക്ഷയും കോടതി പരിഗണിച്ചിരുന്നു.2016ൽ നിര്‍മിച്ച പാലാരിവട്ടം പാലത്തിൽ 2018 ആകുമ്പോഴേക്ക് വിള്ളൽ പ്രത്യക്ഷപ്പെടുകയായിരുന്നു. പാലത്തിന്‍റെ ഭാരപരിശോധന നടത്തി അറ്റകുറ്റപ്പണിയുടെ സാധ്യത തേടണമെന്നായിരുന്നു ഇതുമായി ബന്ധപ്പെട്ട ഹരജിയിൽ കേരള ഹൈകോടതി ഇടക്കാല ഉത്തരവിട്ടിരുന്നത്. ഇത് ചോദ്യം ചെയ്താണ് കേരളം സുപ്രീംകോടതിയിൽ അപ്പീൽ ഹരജി നൽകിയിരുന്നത്. ഹരജി പരിഗണിച്ച ജസ്റ്റിസ് ആര്‍ എഫ് നരിമാൻ അധ്യക്ഷനായ ബഞ്ച് തല്‍സ്ഥിതി തുടരണമെന്ന് ഉത്തരവിട്ടിരുന്നു. എന്നാൽ കുണ്ടന്നൂർ, വൈറ്റില പാലങ്ങൾ ഈ വർഷം കമ്മീഷൻ ചെയ്യുന്നതോടെ പാലാരിവട്ടത്ത് വലിയ ഗതാഗത സ്തംഭനമുണ്ടാകുമെന്ന് ചൂണ്ടിക്കാട്ടി നൽകിയ പ്രത്യേക അപേക്ഷയിൽ അടിയന്തിരമായി പാലം പണിയാൻ അനുമതി നൽകണമെന്ന് സര്‍ക്കാര്‍ ആവശ്യപ്പെട്ടിരുന്നു.ഹരജി പരിഗണിക്കുന്നത് നീട്ടിവെക്കണമെന്ന് കരാറുകാരും ഇതിനെ എതിര്‍ത്ത് കേരളവും ഇന്നലെ വീണ്ടും കോടതിയെ സമീപിച്ചിരുന്നു.