പരിയാരം:കണ്ണൂർ ഗവ.മെഡിക്കൽ കോളേജ് ആശുപത്രിയിൽ ഇതുവരെ ചികിത്സ തേടിയ കോവിഡ് പോസിറ്റീവ് രോഗികളുടെ എണ്ണം 1000 കടന്നു.24 മണിക്കൂറിനിടെ 17 പുതിയ പോസിറ്റീവ് രോഗികൾ കൂടി ചികിത്സ തേടിയെത്തിയതോടെ 1006 ആയാണ് അകെ ചികിത്സ തേടിയ രോഗികളുടെ എണ്ണം മാറിയത്.ഇതിൽ രോഗമുക്തി നേടി ഡിസ്ചാർജ് ആയ വ്യവസായ വകുപ്പ് മന്ത്രി ഇ.പി ജയരാജൻ,നിലവിൽ ചികിത്സയിലുള്ള സണ്ണി ജോസഫ് എംഎൽഎ എന്നിവരുൾപ്പെടെയുണ്ട്.
സംസ്ഥാനത്താദ്യമായി കോവിഡ് പോസിറ്റീവ് ഗർഭിണി സിസേറിയൻ വഴി കുഞ്ഞിന് ജന്മം നൽകിയത് പരിയാരത്തായിരുന്നു.അതീവ ഗുരുതരാവസ്ഥയിലെത്തിയ കോവിഡ് പോസിറ്റീവായ ഗർഭിണിയായ യുവതിക്ക് ഒരേസമയം കോവിഡിനും ഗർഭാവസ്ഥയിലുള്ള ചികിത്സയ്ക്കും അടിയന്തിര ചികിത്സ ലഭ്യമാക്കിയാണ് അന്ന് അമ്മയെയും കുഞ്ഞിനേയും രക്ഷപ്പെടുത്തിയത്.സംസ്ഥാനത്തു തന്നെ കൂടുതൽ കോവിഡ് പോസിറ്റീവായ ഗർഭിണികൾ ചികിത്സതേടിയ ആശുപത്രി കൂടിയാണ് പരിയാരത്തേത്.കോവിഡ് ബാധിച്ച 80 പിന്നിട്ടവരും പിഞ്ചുകുഞ്ഞുങ്ങളും വരെ ഇതിനോടകം കോവിഡ് രോഗമുക്തി നേടുകയുണ്ടായി.പ്ലാസ്മ തെറാപ്പി പോലുള്ള അത്യാധുനികവും സങ്കീർണവുമായ ചികിത്സയും Remdesivir,Tocilizumab തുടങ്ങിയ വിലകൂടിയ മരുന്നുകളും ചികിത്സയ്ക്കായി പരിയാരത്ത് ഉപയോഗിക്കുന്നു.കോവിഡ് രോഗികൾക്കും സസ്‌പെക്റ്റിനും ചികിത്സയ്‌ക്കൊപ്പം കമ്യുണിറ്റി കിച്ചൻ വഴി സൗജന്യ ഭക്ഷണവും ലഭ്യമാക്കിവരുന്നു.കണ്ണൂർ ജില്ലയ്ക്ക് പുറമെ കാസർകോഡ്,വയനാട് ജില്ലയുടെ ഒരുഭാഗം എന്നിവിടങ്ങളിൽ നിന്നുള്ള ഗുരുതരാവസ്ഥയിലുള്ള സി കാറ്റഗറിയിൽ വരുന്ന കോവിഡ് രോഗികളെയാണ് ചികിത്സയ്ക്കായി പരിയാരത്ത് എത്തിക്കുന്നത്.
കണ്ണൂർ ജില്ലയിൽ നിന്നും 700 കോവിഡ് പോസിറ്റീവ് രോഗികളാണ് ഇതുവരെ പരിയാരത്ത് ചികില്സിച്ചത്.കാസർകോഡ് 286,കോഴിക്കോട് 6,വയനാട് 4,മലപ്പുറം 3,പാലക്കാട് 1 എറണാകുളം 1 എന്നിങ്ങനെയും കേന്ദ്രഭരണ പ്രദേശമായ പോണ്ടിച്ചേരിയിൽ നിന്നും 3 പേരും(ഇതിൽ രണ്ടുപേർ മാഹിയിൽ നിന്നും) കർണാടകം,പഞ്ചാബ് സംസ്ഥാനങ്ങളിൽ നിന്നും ഓരോരുത്തരും കോവിഡ് പോസിറ്റീവായി കണ്ണൂർ മെഡിക്കൽ കോളേജിൽ ചികിത്സതേടുകയുണ്ടായി.കണ്ണൂർ, കാസർകോഡ് ജില്ലകളിലെ മറ്റ് അസുഖങ്ങൾക്കൊപ്പം കോവിഡും ബാധിച്ച് അതീവ ഗുരുതരാവസ്ഥയിലുള്ള സി കാറ്റഗറിയിൽ പെട്ട രോഗികളെയാണ് പരിയാരത്ത് പൊതുവിൽ പ്രവേശിപ്പിക്കുന്നത്.
സി.എഫ്.എൽ.ടി.സി യിലെ 23 പേരുൾപ്പെടെ 212 കോവിഡ് പോസിറ്റീവ് രോഗികളാണ് ഇപ്പോൾ പരിയാരത്ത് ചികിത്സയിലുള്ളത്.ഇതിൽ 38 പേർ ഐ.സി.യു വിലാണ്‌.20 പേർ ഗുരുതരാവസ്ഥയിലാണ്.അതിൽ തന്നെ 15 പേർ വെന്റിലേറ്ററിന്റെ സഹായത്തോടെയാണ് ചികിത്സ തുടരുന്നത്.ഇതിനു പുറമെ കോവിഡ് സംശയിക്കുന്ന 36 പേർ കോവിഡ് സസ്‌പെക്ട് വാർഡിലും ചികിത്സയിലുണ്ട്.
കോവിഡ് അതിവ്യാപന പ്രതിരോധ പ്രവർത്തനങ്ങൾ കൂടുതൽ ശക്തമാക്കേണ്ടുന്ന സാഹചര്യമാണ് മുന്നിലുള്ളത് എന്നതിനാൽ പൂർണ്ണമായും മാസ്ക് ധരിക്കുന്നതും സോപ്പ്, സാനിറ്റൈസർ എന്നിവ ഉപയോഗിച്ച് കൈകൾ അണുവിമുക്തമാക്കേണ്ടതും സാമൂഹിക അകലം ഉൾപ്പെടെ പാലിക്കേണ്ടതും ഓരോരുത്തരും പാലിക്കേണ്ട ജാഗ്രതയും ഉത്തരവാദിത്തവും ആണെന്നും മെഡിക്കൽ സൂപ്രണ്ട് ഡോ.കെ.സുദീപ് അറിയിച്ചു.
