കൊച്ചി: നഗരത്തിലെ ഷോപ്പിംഗ് മാളില്‍വെച്ച്‌ രണ്ട് യുവാക്കള്‍ അപമാനിക്കാന്‍ ശ്രമിച്ചതായി മലയളാത്തിലെ യുവനടിയുടെ പരാതി. ഇന്നലെ രാത്രിയാണ് സംഭവം. കുടുംബവുമൊത്ത് ഷോപ്പിംഗിന് എത്തിയപ്പോള്‍ രണ്ട് പേര്‍ മാളിനുള്ളില്‍വെച്ച്‌ ശരീരത്തില്‍ സ്പര്‍ശിച്ചതായാണ് ആരോപണം. ഇവര്‍ പിന്നെ മാളില്‍ തന്നെ പിന്തുടര്‍ന്നതായും ഇന്‍സ്റ്റഗ്രാമില്‍ നടി വെളിപ്പെടുത്തി. നടി പൊലീസില്‍ പരാതി നല്‍കിയിട്ടില്ല. ആരാണ് ആക്രമിച്ചതെന്നും അപമാനിച്ചതെന്നും നടിക്ക് അറിയില്ല.ഇതിന് പിന്നാലെ സിസിടിവി പരിശോധിക്കുമെന്ന് മാള്‍ അധികൃതരും അറിയിച്ചു. ചെറുപ്പക്കാര്‍ അപമാനിച്ചുവെന്ന പരാതിയെ ഗൗരവത്തോടെയാണ് മാള്‍ അധികൃതര്‍ കാണുന്നത്. പിന്തുടര്‍ന്ന് ശല്യപ്പെടുത്തിയെന്ന പരാതി ആയതു കൊണ്ടു തന്നെ കുറ്റവാളികളെ കണ്ടെത്താന്‍ കഴിയുമെന്നാണ് വിലയിരുത്തല്‍. ഇതിന്റെ അടിസ്ഥാനത്തിലാണ് മാളും നടപടിക്കൊരുങ്ങുന്നത്. സിസിടിവി പരിശോധിച്ച്‌ അപമാനിച്ചവരെ കണ്ടെത്താനാണ് നീക്കം.മലയാളത്തില്‍ ഏറ്റവും ശ്രദ്ധേയയായ യുവ നടിയാണ് അപമാനിക്കപ്പെട്ടത്. ദേശീയ തലത്തില്‍ പോലും ചര്‍ച്ചയായ നടിക്കുണ്ടായ അനുഭവത്തെ സിനിമാ ലോകവും ഞെട്ടലോടെയാണ് കാണുന്നത്. ഏവര്‍ക്കും തിരിച്ചറിയാവുന്നവര്‍ക്ക് ഇതാണ് ഗതിയെങ്കില്‍ സ്ത്രീ സുരക്ഷ ആശങ്കയിലാണെന്നും ആരോപണം ഉയരുന്നു. നടി പരാതി കൊടുത്തില്ലെങ്കിലും മാള്‍ അധികാരികള്‍ നടപടി എടുക്കാനാണ് സാധ്യത. പൊലീസ് അന്വേഷണം നടത്തുമെന്ന് അറിയിച്ചിട്ടുണ്ട്. നടിയുടെ പോസ്റ്റ് പരാതിയായി കണക്കിലെടുക്കും.
