കണ്ണൂർ: ചൊവ്വ ബൈപ്പാസില്‍ ബൈക്കുകള്‍ കൂട്ടിയിടിച്ച് രണ്ട് യുവാക്കൾക്ക് ദാരുണാന്ത്യം.ഇരിട്ടി കീഴ്പ്പള്ളി വിയറ്റ്നാമിലെ ഇല്ലിക്കല്‍ ഹൗസില്‍ ഹാരിസ്(46) കണ്ണൂര്‍ കിഴുത്തള്ളിയിലെ അദ്വൈത്(19) എന്നിവരാണ് മരിച്ചത്. ഞായറാഴ്ച്ച വൈകുന്നേരം നാലുമണിയോടെ ചാലക്കുന്ന് ബൈപ്പാസിലാണ് അപകടം നടന്നത്.ചാലഭാഗത്തു നിന്നും വരികയായിരുന്ന ഹാരിസിന്റെ ബൈക്കും താഴെചൊവ്വഭാഗത്തുനിന്നും വന്ന അദ്വൈതിന്റെ ബൈക്കും തമ്മില്‍ കൂട്ടിയിടിക്കുകയായിരുന്നു.ഗുരുതരമായി പരുക്കേറ്റ ഇരുവരെയും ചാലയിലെ സ്വകാര്യ ആശുപത്രിയില്‍ പ്രവേശിപ്പിച്ചുവെങ്കിലും ജീവന്‍ രക്ഷിക്കാനായില്ല. ഇരിട്ടിക്കടുത്തെ മാടത്തിലെ തട്ടുകടയിലെ തൊഴിലാളിയാണ് ഹാരിസ്. കണ്ണൂരിലെ സ്വകാര്യ ആശുപത്രിയില്‍ ചികിത്സാ ആവശ്യാര്‍ത്ഥം ഡോക്ടറെ കണ്ടു മടങ്ങവെയാണ് ഹാരിസ് അപകടത്തില്‍പ്പെട്ടത്. കീഴ്പ്പള്ളി വിയറ്റ്നാമിലെ പരേതനായ ഇല്ലിക്കല്‍ അലിയുടെയും ആസിയയുടെയും മകനാണ്. ഭാര്യ: ആരിഫ. മക്കള്‍: അയൂബ്, ആശിദ.മൃതദേഹം ജില്ലാ ആശുപത്രിയില്‍ പോസ്റ്റു മോര്‍ട്ടത്തിന് ശേഷം കീഴ്പ്പള്ളി പുതിയങ്ങാടിജുമാസ്ജിദ് കബര്‍സ്ഥാനില്‍ ഖബറടക്കി. കോയമ്പത്തൂരിലെ സ്വകാര്യ കോളേജില്‍ ബി.ടെക് പഠിക്കുകയായിരുന്ന അദ്വൈത് ഞായറാഴ്ച്ച വൈകുന്നേരത്തോടെ തിരിച്ചു പോകാനിരിക്കെയാണ് അപകടമുണ്ടായത്.കോളേജിലേക്ക് പോകാന്‍ വേണ്ടുന്ന സാധനങ്ങള്‍ വാങ്ങി തിരിച്ചു പോകുംവഴിയാണ് അപകടം നടന്നത്. ന്യൂമാഹി സ്റ്റേഷനിലെ എസ്. ഐ അനിലിന്റെയും കാഞ്ഞിരോട് വില്ലേജ് ഓഫീസര്‍ സേനയുടെയും മകനാണ് അദ്വൈത്. ജില്ലാ ആശുപത്രിയിലെ പോസ്റ്റുമോര്‍ട്ടത്തിന് ശേഷം അദ്വൈതിന്റെ മൃതദേഹം ബന്ധുക്കള്‍ ഇന്ന് ഉച്ചയോടെ ഏറ്റുവാങ്ങി.
