Kerala

തിരുവനന്തപുരം: എണ്ണച്ചോര്‍ച്ച അറിയിക്കാന്‍ വൈകിയതിന് ട്രാവന്‍കൂര്‍ ടൈറ്റാനിയത്തിന് മലിനീകരണ നിയന്ത്രണബോര്‍ഡിന്റ നോട്ടിസ്. ചോര്‍ച്ചയുണ്ടായി മണിക്കൂറുകള്‍ കഴിഞ്ഞ് പ്രദേശവാസികള്‍ പറഞ്ഞാണ് ബോര്‍ഡ് ഉദ്യോഗസ്ഥര്‍ ഇക്കാര്യം അറിയുന്നത്. ഫാക്ടറീസ് ആന്‍ഡ് ബോയിലേഴ്സ് വകുപ്പും ചോര്‍ച്ചയില്‍ വിശദമായ അന്വേഷണത്തിന് ഉത്തരവിട്ടു.എന്നാല്‍ ബുധനാഴ്ച പുലര്‍ച്ചെ ഒരു മണി മുതലാണ് ചോര്‍ച്ച തുടങ്ങിയതെന്ന് മല്‍സ്യത്തൊഴിലാളികള്‍ പറയുന്നു. രണ്ടായാലും ഇക്കാര്യം മലീനീകരണ നിയന്ത്രണബോര്‍ഡിനെ സമയത്ത് അറിയിക്കുന്നതില്‍ കമ്പനിക്ക് വീഴ്ചയുണ്ടായി. രാവിലെ ഒന്‍പതരയോടെ പ്രദേശവാസികള്‍ പറഞ്ഞാണ് ബോര്‍ഡിലെ ഉദ്യോഗസ്ഥര്‍ വിവരം അറിയുന്നത്.മാലിന്യം പൂര്‍ണമായും നീക്കുന്നതുവരെ കമ്പനി പ്രവര്‍ത്തിപ്പിക്കരുതെന്ന് ബോര്‍‍ഡ് കഴിഞ്ഞ ദിവസം നിര്‍ദേശം നല്‍കിയിരുന്നു. ഇതിന്റ അടിസ്ഥാനത്തില്‍ ഫാക്ടറിയുടെ പ്രവര്‍ത്തനം തല്‍ക്കാലം നിര്‍ത്തിവച്ചിരിക്കുകയാണ്. അതേസമയം കടലിനുള്ളില്‍ എണ്ണ പടര്‍ന്നിട്ടുണ്ടോയെന്ന് പരിശോധിച്ച്‌ വരുകയാണെന്നും രണ്ട് ദിവസം കൂടി നിരീക്ഷണം തുടരുമെന്നും മലിനീകരണ നിയന്ത്രണ ബോര്‍ഡ് കളക്ടര്‍ക്ക് നൽകിയ റിപ്പോര്‍ട്ടില്‍ പറയുന്നു.

തിരുവനന്തപുരം:ടൈറ്റാനിയം ഫാക്ടറിയിലെ ഗ്ലാസ് ഫര്‍ണസ് പൈപ്പ് പൊട്ടി ഫര്‍ണസ് ഓയില്‍ ഓട വഴി കടലിലേക്കൊഴുകി. വേളി മുതല്‍ പുതുക്കുറുച്ചി വരെ കടലില്‍ വ്യാപിച്ചതായാണ് റിപ്പോര്‍ട്ട്. ഓയിൽ കടലിലും തീരത്തും ചേർന്നതിന് പിന്നാലെ പൊതുജനങ്ങൾക്ക് ബീച്ചിലേക്ക് പ്രവേശിക്കുന്നതിന് ജില്ലാ ഭരണകൂടം വിലക്ക് ഏർപ്പെടുത്തി.ചോർച്ച അടച്ചതായി കമ്പനി അധികൃതർ അറിയിച്ചു. എണ്ണ പടർന്ന മണൽ യുദ്ധകാലാടിസ്ഥാനത്തിൽ നീക്കും. ഇതിനായുള്ള നടപടികൾ തുടങ്ങി. കടലിലേക്ക് എത്രമാത്രം എണ്ണ പടർന്നെന്നറിയാൻ കോസ്റ്റ്ഗാർഡ് നിരീക്ഷണം നടത്തും. ഇന്ന് പുലർച്ചെയോടെയാണ് ചോർച്ച കണ്ടെത്തിയത്. മലിനീകരണ നിയന്ത്രണ ബോർഡ് ഉദ്യോഗസ്ഥരും സ്ഥലത്തെത്തി പരിശോധന നടത്തി. ഫർണസ് ഓയിൽ 2 കിലോമീറ്റർ വരെ കടലിൽ വ്യാപിച്ചു. ഗ്ലാസ് പൗഡർ നിർമാണത്തിനു ഉപയോഗിക്കുന്ന പൊടി തയാറാക്കുന്നതിന് ഇന്ധനമായാണ് ഓയിൽ ഉപയോഗിക്കുന്നത്.സംഭവത്തില്‍ സ്ഥിതി നിയന്ത്രണ വിധേയമാണെന്നു ജില്ലാ കളക്ടര്‍ ഡോ. നവ്‌ജ്യോത് ഖോസ അറിയിച്ചു.പൊതുജനങ്ങള്‍ ഭയക്കേണ്ട സാഹചര്യമില്ലെന്നും, മുന്‍കരുതലിന്റെ ഭാഗമായി രണ്ടു ദിവസത്തേക്ക് വേളി, വെട്ടുകാട്, ശംഖുമുഖം തീരങ്ങളില്‍ വിനോദസഞ്ചാരവും, ഇവിടങ്ങളില്‍നിന്നു മത്സ്യബന്ധനത്തിനു കടലില്‍ പോകുന്നതും നിരോധിച്ചതായും ജില്ലാ കളക്ടര്‍ അറിയിച്ചു. കളക്ടറുടെ നേതൃത്വത്തില്‍ ഉദ്യോഗസ്ഥ സംഘം എണ്ണച്ചോര്‍ച്ചയുണ്ടായ മേഖലകള്‍ സന്ദര്‍ശിച്ചു.വാതകച്ചോര്‍ച്ചയുടെ ഉത്ഭവസ്ഥാനം അതിവേഗം കണ്ടെത്തി അടയ്ക്കാന്‍ കഴിഞ്ഞതിനാല്‍ വളരെ വലിയ തോതില്‍ കടലിലേക്ക് എണ്ണ വ്യാപിക്കുന്നതു തടയാന്‍ കഴിഞ്ഞതായി കളക്ടര്‍ പറഞ്ഞു.വേലിയേറ്റ സമയമല്ലാത്തതിനാല്‍ വലിയ തോതില്‍ കടലില്‍ പരന്നിട്ടില്ലെന്നാണു കോസ്റ്റ് ഗാര്‍ഡ് നൽകുന്ന പ്രാഥമിക റിപ്പോര്‍ട്ട്.എന്നാല്‍, തീരക്കടലില്‍ എണ്ണ വ്യാപിച്ചിട്ടുണ്ട്. ഇതിനു പുറമേ തീരത്തെ മണ്ണിലും ഇതു കലര്‍ന്നിട്ടുണ്ട്. തിരമാലകള്‍ക്കൊപ്പം എണ്ണ സമീപ പ്രദേശങ്ങളിലെ മണ്ണിലേക്കു കലരുന്നതിനാലാണിത്. എണ്ണകലര്‍ന്ന മേല്‍മണ്ണ് പ്രദേശത്തുനിന്ന് ഉടന്‍ നീക്കംചെയ്യുമെന്നു കളക്ടര്‍ പറഞ്ഞു.ഈ മണല്‍ കമ്പനിയുടെതന്നെ സ്ഥലത്തേക്ക് ജെസിബി ഉപയോഗിച്ചു നീക്കംചെയ്ത് ഓയില്‍ ന്യൂട്രിലൈസര്‍ ഉപയോഗിച്ച്‌ എണ്ണ നിര്‍വീര്യമാക്കും. അതിവേഗത്തില്‍ ഇതു പൂര്‍ത്തിയാക്കാന്‍ കമ്പനിക്ക് കര്‍ശന നിര്‍ദേശം നല്‍കിയിട്ടുണ്ട്. ജനസാന്ദ്രത കൂടിയ മേഖലകളില്‍ ആദ്യമെന്ന നിലയ്ക്കാകും മണ്ണു നീക്കംചെയ്യുക. തീരക്കടലില്‍ വ്യാപിച്ചിരിക്കുന്ന ഓയില്‍ നീക്കം ചെയ്യുന്നതു സംബന്ധിച്ചു മലിനീകരണ നിയന്ത്രണ ബോര്‍ഡ് വിദഗ്ധരുമായി ചര്‍ച്ചകള്‍ നടത്തുന്നുണ്ടെന്നും കളക്ടര്‍ പറഞ്ഞു.

കോട്ടയം:കേരളത്തിൽ ഇപ്പോൾ ലഭിക്കുന്നത് എത്തനോൾ ചേർത്ത പെട്രോളാണ്.കേന്ദ്ര സർക്കാരിന്റെ പ്രകൃതി സൗഹൃദ ഇന്ധന സംരംഭത്തിന്റെ ഭാഗമായാണ് 10 ശതമാനം എത്തനോൾ ചേർത്ത പെട്രോൾ കേരളത്തിൽ ലഭ്യമാക്കിയിരിക്കുന്നത്.എന്നാൽ ഇത്തരത്തിൽ എത്തനോൾചേർത്ത ഇന്ധനം ഉപയോഗിക്കുന്നതിനെ തുടർന്നുണ്ടായിരിക്കുന്ന ചില പ്രശ്നങ്ങൾ പൊതുജനത്തിന്റെ ശ്രദ്ധയിൽപ്പെടുത്തുകയാണ് കേരളത്തിലെ പെട്രോൾ പമ്പ് ഉടമകൾ. ഇന്ത്യയിലെ പഞ്ചസാര നിർമാണത്തിന്റെ ഏറ്റവും വലിയ ഉപോല്പന്നമാണ് ജൈവഇന്ധനം എന്നറിയപ്പെടുന്ന എത്തനോൾ.ഇവ ഇന്ധനത്തിൽ ചേർക്കാനായാൽ ക്രൂഡോയിൽ ഇറക്കുമതി ഉൾപ്പെടെ കുറയ്ക്കാനാകും.എന്നാൽ എത്തനോൾ ചേർത്ത പെട്രോൾ ഉപയോഗിക്കുമ്പോൾ വെള്ളം വില്ലനാവുകയാണ്. വെള്ളത്തിന്റെ ചെറിയ അംശം പോലും എത്തനോളുമായി കലരും.അതായത് അന്തരീക്ഷത്തിലെ ഈർപ്പത്തിൽ നിന്ന് പോലും പമ്പിലെ ടാങ്കിലുള്ള ഇന്ധനത്തിൽ ജലാംശം എത്തിച്ചേരാം. പെട്രോളിൽ ജലാംശം കലർന്നാൽ പ്രത്യേക പാളിയായി ടാങ്കിന്റെ അടിയിൽ അടിയും.അതുകൊണ്ടുതന്നെ എൻജിനിൽ വെള്ളം എത്തില്ല.എന്നാൽ എത്തനോൾ കലർത്തുന്നതോടെ പെട്രോളിന്റെ ജലത്തെ ലയിപ്പിക്കാനുള്ള ശേഷി കൂടുകയും വെള്ളം പെട്രോളിനൊപ്പം കലർന്ന് എൻജിനിൽ എത്തുകയും ഇതുമൂലം വാഹങ്ങൾക്ക് കേടുപാടുകൾ സംഭവിക്കുന്നു.

പമ്പ് ഉടമകൾ വിചാരിച്ചാൽ മാറ്റാവുന്ന പ്രശ്നമല്ല ഇത്.ഇതൊഴിവാക്കാൻ പെട്രോളിയം കമ്പനികൾ ടാങ്കുകളിലെ ജലാംശം പരിശോധിച്ച് വേണ്ട നടപടികൾ സ്വീകരിക്കണം.പമ്പിലെ ടാങ്കുകളോ മറ്റു സംവിധാനങ്ങളോ നന്നാക്കാനോ പരിശോധിക്കാനോ ഉള്ള അനുവാദം പമ്പ് ഉടമകൾക്കില്ല.ടാങ്ക് അടക്കം എല്ലാം പെട്രോളിയം കമ്പനിയുടേതാണ്.ഓരോ ലോഡ് ഇന്ധനവും വരുമ്പോൾ അതിന്റെ വിലയുടെ കൂടെ ടാങ്ക് ശുചിയാക്കാനുള്ള മെയ്ന്റനൻസ് ചാർജ് കൂടി കമ്പനികൾ ഈടാക്കുന്നുണ്ട്.അതിനാൽ പെട്രോൾ ടാങ്കിൽ ഒരംശം പോലും ജലാംശം ഇല്ല എന്ന് കമ്പനികളാണ് ഉറപ്പാക്കേണ്ടത്.പക്ഷെ കേരളത്തിൽ ഇതുവരെ ഇതിനുള്ള ഒരു സജ്ജീകരണവും ഏർപ്പെടുത്തിയിട്ടില്ല.വർഷത്തിൽ ആറുമാസത്തോളം മഴ ലഭിക്കുന്ന സംസ്ഥാനത്ത് പെട്രോൾ പമ്പുകളിലെ ഭൂഗർഭ ടാങ്കുകളിൽ പോലും വെള്ളം കയറാനുള്ള സാധ്യത തള്ളിക്കളയാനാകില്ല എന്നും പമ്പുടമകൾ പറയുന്നു.

കേരളത്തിലെ കാലാവസ്ഥയിൽ നിലവിലെ സംവിധാനത്തിൽ ഇത്തരത്തിൽ എത്തനോൾ ചേർന്ന ഇന്ധനം എത്തുന്നത് വാഹന ഉടമകൾക്ക് വലിയ നഷ്ട്ടം ഉണ്ടാക്കും.പമ്പുകളിലെ ഭൂഗർഭ ടാങ്കുകളിൽ നിലവിലുള്ള ജലാംശം ഇല്ലാതാക്കുന്ന നടപടികൾ പൂർത്തിയാക്കുന്നതിനു മുൻപ് ഓയിൽ കമ്പനികൾ എത്തനോൾ ബ്ലെൻഡഡ്‌ ഇന്ധനത്തിന്റെ വിതരണം ആരംഭിച്ചതാണ് നിലവിൽ ഗുരുതര പ്രശ്നങ്ങൾക്ക് വഴിവെച്ചിരിക്കുന്നത്.ഓയിൽ കമ്പനികൾ പമ്പുകളിൽ കൃത്യമായ പരിശോധന നടത്തി ടാങ്കുകൾ പൂർണ്ണമായും ജലമുക്തമാക്കാനുള്ള നടപടികൾ എടുക്കുകയും ഇത്തരത്തിൽ ജലമുക്തമാണെന്നുള്ള സർട്ടിഫിക്കറ്റ് പുറപ്പെടുവിക്കുകയും ചെയ്യണം.അതുപോലെ മറ്റൊരു പ്രധാന കാര്യമാണ് പമ്പുകളിലേക്ക് ഇന്ധനമെത്തിക്കുന്ന ടാങ്കർ ലോറികളുടെ കാര്യവും.ഇത്തരം ലോറികൾ കാലിബ്രേറ്റ് ചെയ്യുന്നത് വെള്ളം നിറച്ചാണ്.ഈ ടാങ്കറുകളിൽ ജലസാന്നിധ്യം ഒഴിവാക്കാനുള്ള സംവിധാനവും ഓയിൽ കമ്പനികൾ ഒരുക്കിയിട്ടില്ല.മഴക്കാലത്ത് ഇത്തരം ടാങ്കറുകളിൽ ഇന്ധനമെത്തിക്കുമ്പോൾ വെള്ളം കേറാനുള്ള സാധ്യതയുമുണ്ട്.ടാങ്കറുകളിൽ ജലാംശം ഉണ്ടാവാതിരിക്കാനുള്ള സാധ്യത പൂർണ്ണമായും ഒഴിവാക്കിയിട്ട് വേണം കമ്പനികൾ എത്തനോൾ അടങ്ങിയ പെട്രോൾ പമ്പുകളിലേക്ക് എത്തിക്കേണ്ടത്.

ഇക്കാര്യങ്ങളെ കുറിച്ച് പൊതുജനങ്ങൾക്ക് അറിവുനൽകാനായി ഓയിൽ കമ്പനികൾ ബോധവൽക്കരണ പരിപാടികൾ ആസൂത്രണം ചെയ്യണം.ലഭ്യമായ എല്ലാ മാധ്യമങ്ങളും അതിനായി കമ്പനികൾ സ്വീകരിക്കണം.പൊതുസമൂഹത്തിന്റെ പ്രതിനിധികൾ,പമ്പുടമകൾ എന്നിവരുടെ പങ്കാളിത്തം ഇതിൽ ഉറപ്പുവരുത്തുകയും വേണമെന്നും പമ്പുടമകൾ ആവശ്യപ്പെടുന്നു.അസംസ്‌കൃത എണ്ണയുടെ ഇറക്കുമതിയും മലിനീകരണവും കുറയ്ക്കാൻ 2025 ഓടെ പെട്രോളിൽ 25 ശതമാനം എത്തനോൾ ചേർത്ത് വിതരണം ചെയ്യാനുള്ള നടപടികൾ ഊർജമന്ത്രാലയം തുടങ്ങിക്കഴിഞ്ഞു.എഥനോൾ കലർത്തിയ പെട്രോൾ വ്യാപകമാക്കുന്നതിന്റെ ഭാഗമായി രാജ്യത്തെ ആദ്യത്തെ എത്തനോൾ ബയോ റിഫൈനറി ഹിന്ദുസ്ഥാൻ പെട്രോളിയം കോർപറേഷൻ പഞ്ചാബിലെ ഭട്ടിണ്ടയിൽ സ്ഥാപിക്കുകയാണ്.എച്ച് പി സി എൽ ഉൾപ്പെടെ മറ്റ് പൊതുമേഖലാ എണ്ണക്കമ്പനികൾ 11 സംസ്ഥാനങ്ങളിൽ 12 എത്തനോൾ ബയോ റിഫൈനറികൾ സ്ഥാപിക്കാൻ പദ്ധതികൾ തയ്യാറാക്കിയിട്ടുണ്ട്.10000 കോടി രൂപയാണ് ഇതിന്റെ മുതൽമുടക്ക്.പെട്രോളിയം കമ്പനികൾ ഇത്തരത്തിൽ ലാഭമുണ്ടാക്കുമ്പോൾ വാഹന ഉടമകൾക്ക് മെയിന്റനൻസ് കോസ്റ്റ് അടക്കം കൂടുകയാണ്.

ഇക്കാര്യത്തിൽ കേന്ദ്രസംസ്ഥാന സർക്കാരുകൾ വേണ്ട നടപടികൾ സ്വീകരിക്കണമെന്നാണ് പമ്പുടമകളുടെ ആവശ്യം.ക്രൂഡോയിലുമായി താരതമ്യം ചെയ്യുമ്പോൾ എത്തനോളിന്റെ വില തുച്ഛമായതിനാൽ 10 ശതമാനം എഥനോൾ ചേർക്കുമ്പോൾ പോലും കമ്പനികൾക്ക് വലിയ ലാഭമാണുണ്ടാകുന്നത്.എന്നാൽ റീറ്റെയ്ൽ സെല്ലിങ് പ്രൈസിൽ ഇത് പ്രതിഫലിക്കുന്നില്ല. എത്തനോൾ ബ്ലെൻഡഡ്‌ ഫ്യൂവലിന്റെ ദോഷഫലങ്ങൾ മാത്രം ഉപഭോക്താവിന് ലഭിക്കുന്നു എന്നത് മാത്രമാണ് ഈ പരിഷ്‌ക്കാരം കൊണ്ടുണ്ടാകുന്ന ഏക ഫലമെന്നും പമ്പുടമകൾ പറയുന്നു.

തിരുവനന്തപുരം:പ്രശസ്ത ഗായകന്‍ എം എസ് നസീം അന്തരിച്ചു.പക്ഷാഘാതത്തെ തുടര്‍ന്ന് ദീര്‍ഘകാലമായി ചികില്‍സയിലായിരുന്ന നസീം തിരുവനന്തപുരത്തെ സ്വകാര്യ ആശുപത്രിയിലാണ് മരണപ്പെട്ടത്. ഗായകൻ, മ്യൂസിക് കണ്ടക്റ്റർ, മലയാള സംഗീതത്തിന്റെ ചരിത്ര സൂക്ഷിപ്പുകാരൻ, സ്റ്റേജ്-ടെലിവിഷൻ ഷോകളുടെ സംഘാടകൻ,ഡോക്യുമെന്ററി സംവിധായകൻ അങ്ങനെ നിരവധി മേഖലകളിൽ പ്രശസ്തനാണ് നസീം.വളരെ ചെറുപ്പത്തിൽ തന്നെ അദ്ദേഹം സംഗീതലോകത്ത് എത്തി.സ്കൂൾ വിദ്യാർത്ഥിയായിരിക്കുമ്പോൾ ജൂനിയർ എ എം രാജ എന്നും കോളേജിലെത്തിയപ്പോൾ ജൂനിയർ റാഫിയെന്നും വിളിപ്പേര് വീണു. മൂവായിരത്തിലേറെ ഗാനമേളകളാണ് ഇന്ത്യയിലും പുറത്തുമായി അദ്ദേഹം നയിച്ചത്. ആകാശവാണിയിലെയും ദൂരദർശനിലെയും സജീവ സാന്നിധ്യമായിരുന്നു.1990 ൽ ഇറങ്ങിയ അനന്തവൃത്താന്തം എന്ന സിനിമയിൽ ചിത്രയോടൊപ്പം ഒരു ഗാനം മാത്രമേ എം  എസ് നസീം സിനിമയിൽ ആലപിച്ചിട്ടുള്ളൂ.ഗായകനായി മാത്രം ഒതുങ്ങാതെ സിനിമ, നാടക, ലളിത, ഗസല്‍ സംഗീതചരിത്രത്തെ കുറിച്ച്‌ പഠിക്കുവാനും അത് ഭാവി തലമുറയ്ക്കായി രേഖപ്പെടുത്തുവാനും അദ്ദേഹം നല്ല രീതിയില്‍ ശ്രമിച്ചിരുന്നു. അതിന്റെ ഭാഗമായി അദ്ദേഹം കഴക്കൂട്ടത്തെ തന്റെ മേടയില്‍ വീട് ഒരു സംഗീത മ്യൂസിയമാക്കി മാറ്റുകയും ചെയ്തിരുന്നു.ദൂരദര്‍ശന്‍ തുടര്‍ച്ചയായി സംപ്രേഷണം ചെയ്ത ആദ്യ സംഗീത പരമ്ബരയായ ‘ആയിരം ഗാനങ്ങള്‍തന്‍ ആനന്ദലഹരി’ എന്ന ഡോക്യുമെന്ററിയുടെ അമരക്കാരനായിരുന്നു അദ്ദേഹം. നിരവധി ഡോക്യുമെന്ററികള്‍ സംവിധാനം ചെയ്ത നസീമിന്റെ ‘മിഴാവ്’ എന്ന ചിത്രത്തിന് ദേശീയ പുരസ്‌കാരം ലഭിച്ചിരുന്നു. 1997ല്‍ മികച്ച ഗായകനുള്ള സംഗീത നാടക അക്കാദമി പുരസ്‌കാരം, നാലുതവണ സംസ്ഥാന സര്‍ക്കാരിന്റെ ടിവി അവാര്‍ഡ്, 2001ല്‍ കുവൈത്തിലെ സ്മൃതി എ എം രാജ പുരസ്‌കാരം, 2001ല്‍ സോളാര്‍ ഫിലിം സൊസൈറ്റി പുരസ്‌കാരം തുടങ്ങി നിരവധി പുരസ്‌കാരങ്ങളും അംഗീകാരങ്ങളും നേടിയിട്ടുള്ള അതുല്യ പ്രതിഭയായിരുന്നു എംഎസ് നസീം.എം.എ, ബി.എഡ്കാരനായ നസീം 27 വര്‍ഷം കെഎസ്‌ഇബിയില്‍ (KSEB) പ്രവര്‍ത്തിച്ചിരുന്നു. ശേഷം 2003ല്‍ സൂപ്രണ്ടായിരിക്കെ സ്വയം വിരമിച്ച്‌ മുഴുസമയ സംഗീത പ്രവര്‍ത്തകനായി മാറുകയായിരുന്നു. മുഹമ്മദ് റാഫിയെയും മലയാളി സംഗീതജ്ഞൻ എ ടി ഉമ്മറിനെയും കുറിച്ച് അദ്ദേഹം ഡോക്യൂമെന്ററികൾ ചെയ്തിരുന്നു.ഭാര്യ: ഷാഹിദ ഭാര്യ, മക്കള്‍: നാദിയ, ഗീത്.