Kerala

തിരുവനന്തപുരം: തെരുവുനായശല്യം പരിഹരിക്കാന്‍ അടിയന്തര നടപടികളുമായി സംസ്ഥാന സര്‍ക്കാര്‍. നടപടിയുടെ ഭാഗമായി മാസ് വാക്‌സിനേഷന്‍ ഡ്രൈവുകള്‍ ആരംഭിക്കുമെന്ന് തദ്ദേശ വകുപ്പുമന്ത്രി എം.ബി. രാജേഷ് പറഞ്ഞു.ഒരു മാസം നീളുന്ന വാക്‌സിനേഷന്‍ യജ്ഞമാണ് നടത്തുക. ഈ മാസം 20 മുതല്‍ ഒക്ടോബര്‍ 20 വരെയാണ് വാക്‌സിനേഷന്‍ യജ്ഞം. പേവിഷബാധ ഒഴിവാക്കലിനാണ് മുന്‍ഗണനയെന്നും മന്ത്രി വാർത്താ സമ്മേളനത്തിൽ അറിയിച്ചു. തെരുവുനായ ശല്യത്തെ നേരിടേണ്ടത് രണ്ടുതരത്തിലാണ്. അടിയന്തരമായ ചില നടപടികള്‍ ഉണ്ടാവേണ്ടതുണ്ട്. ജനങ്ങളുടെ ഭീതി സ്വാഭാവികമാണ്. എന്നാല്‍ അതുകൊണ്ട് മാത്രം മാത്രം പ്രശ്‌നത്തിന് പരിഹാരമാകുന്നില്ല. അതിന് ദീര്‍ഘകാല നടപടികള്‍ കൂടി സ്വീകരിക്കേണ്ടതുണ്ട്. തെരുവുനായകളുടെ കടിയേല്‍ക്കുന്ന പലര്‍ക്കും പേവിഷബാധയുണ്ടാവുന്നതാണ് മരണകാരണമാകുന്നതെന്ന് മന്ത്രി പറഞ്ഞു.അടിയന്തരമായി സ്വീകരിക്കേണ്ട നടപടികളെ കുറിച്ചാണ് ഇന്നത്തെ യോഗം ചര്‍ച്ച ചെയ്തത്. മറ്റുകാര്യങ്ങളെ കുറിച്ച് പിന്നീട് ചര്‍ച്ച ചെയ്ത് തീരുമാനിക്കുമെന്നും മന്ത്രി പറഞ്ഞു.

തിരുവനന്തപുരം: സംസ്ഥാനത്ത് തെരുവുനായ ആക്രമണം വർധിക്കുന്നു.കാട്ടാക്കടയിൽ ഇന്ന് നാല് പേർക്ക് തെരുവ് നായയുടെ കടിയേറ്റു. ആമച്ചൽ , പ്ലാവൂർ എന്നീ സ്ഥലങ്ങളിലാണ് നായയുടെ ആക്രമണം ഉണ്ടായത്. കടിയേറ്റവരിൽ കുട്ടികളും ഉൾപ്പെടുന്നു. ബസ് കാത്തുനിന്ന രണ്ട് കുട്ടികൾക്കും ബസിൽ നിന്ന് ഇറങ്ങിയ ഒരു കുട്ടിക്കുമാണ് കടിയേറ്റത്. കുടാതെ ഒരു യുവതിയെയും നായ ആക്രമിച്ചു.തൃശൂരിലും തെരുവ് നായയുടെ ആക്രമണം ഉണ്ടായി. അഞ്ചേരി സ്‌കൂളിന് സമീപത്ത് വച്ച് ഓട്ടോ ഡ്രൈവറായ സന്തോഷിനെയും മറ്റൊരു ബംഗാൾ സ്വദേശിയെയുമാണ് നായ ആക്രമിച്ചത്. സന്തോഷിന്റെ കണങ്കാലിലാണ് കടിയേറ്റത്/ഇയാളെ ജില്ലാ ആശുപത്രിയിൽ പ്രവേശിപ്പിച്ചു.ഇതിനിടെ ആലുവയിൽ രണ്ട് പേരെ കടിച്ച നായ ചത്തു.നെടുവന്നൂർ സ്വദേശികളായ ഹനീഫ, ജോർജ് എന്നിവർക്കാണ് തെരുവ് നായയടെ കടിയേറ്റത്. റോഡരികിൽ കാറിന്റെ തകരാർ പരിഹരിക്കുന്നതിനിടെയാണ് ഫനീഫയ്‌ക്ക് കടിയേറ്റത്. കാലിൽ കടിച്ച് തൂങ്ങിയ നായയെ ഏറെ പണിപ്പെട്ടാണ് ഓടിച്ചത്. തൈക്കാവിൽ വച്ച് തന്നെയാണ് ജോർജിനും കടിയേറ്റത്.

പത്തനംതിട്ട:റാന്നിയിൽ തെരുവുനായയുടെ കടിയേറ്റ് മരിച്ച പെൺകുട്ടിക്ക് പേ വിഷബാധ സ്ഥിരീകരിച്ചു.പൂനെയിലെ ലാബിൽ നടത്തിയ പരിശോധനയിലാണ് പേ വിഷബാധയേറ്റതായി സ്ഥിരീകരിച്ചത്. ചികിത്സയിലിരിക്കേ ഇന്ന് ഉച്ചയോടെയാണ് അഭിരാമി മരിച്ചത്. ചികിത്സയിലിരിക്കെ അഭിരാമിയ്‌ക്ക് പേ വിഷബാധയുടെ ലക്ഷണങ്ങൾ പ്രകടമായിരുന്നു. ഇതോടെയാണ് മരണ ശേഷം സാമ്പിളുകൾ പൂനെ വൈറോളജി ഇൻസ്റ്റിറ്റ്യൂട്ടിലേക്ക് അയച്ചത്. തെരുവ് നായയുടെ കടിയേറ്റ ശേഷം പേ വിഷ പ്രതിരോധ കുത്തിവയ്പ്പ് ഉൾപ്പെടെ അഭിരാമി എടുത്തിരുന്നു. കോട്ടയം മെഡിക്കൽ കോളേജ് ആശുപത്രിയിലായിരുന്നു അഭിരാമി ചികിത്സയിൽ കഴിഞ്ഞിരുന്നത്.അതേസമയം ആശുപത്രി അധികൃതർ മതിയായ കരുതൽ നൽകിയിരുന്നില്ലെന്ന് പെൺകുട്ടിയുടെ ബന്ധുക്കൾ ആരോപിച്ചു. രാവിലെ കുട്ടിയ്‌ക്ക് ശക്തമായ പനി അനുഭവപ്പെട്ടിരുന്നു. ഇക്കാര്യം ഡോക്ടർമാരുടെ ശ്രദ്ധയിൽപ്പെടുത്തിയെങ്കിലും അവഗണിക്കുകയായിരുന്നു. തെരുവ് നായയുടെ കടിയേറ്റതിന് ശേഷം അഭിരാമിക്ക് പ്രാഥമിക ചികിത്സ നൽകിയതിൽ വീഴ്ചയുണ്ടായെന്നും പെൺകുട്ടിയുടെ അമ്മ പറഞ്ഞു.

തിരുവനന്തപുരം: പാലോട് മങ്കയത്ത് മലവെള്ളപ്പാച്ചിലിൽ ഒഴുക്കില്‍പ്പെട്ട് കുട്ടി മരിച്ചു. ആറു വയസുകാരി അയിറയാണ് മരിച്ചത്.വൈകീട്ടോടെയായിരുന്നു മലവെള്ളപ്പാച്ചിൽ ഉണ്ടായത്.കുട്ടിയുടെ അമ്മയെ കാണാതായി. നേരത്തെ അമ്മയേയും കുട്ടിയേയും കാണാതായെങ്കിലും കുട്ടിയെ പിന്നീട് കണ്ടെത്തുകയായിരുന്നു.കാണാതായ സ്ഥലത്തുനിന്ന് അര കിലോമീറ്റര്‍ അകലെ നിന്നാണ് അയിറയെ കണ്ടെത്തിയത്. ഉടനെ പ്രാഥമിക ശ്രൂശകള്‍ നല്‍കി ആശുപത്രിയിലേക്ക് മാറ്റിയെങ്കിലും വൈകാതെ മരിക്കുകയായിരുന്നു. മങ്കയം ആറിൽ വിനോദ സഞ്ചാരത്തിനായി എത്തിയവരുടെ സംഘത്തിൽപ്പെട്ടവരാണ് അമ്മയും മകനും. നെടുമങ്ങാട് സ്വദേശികളാണ് ഇവരെന്നാണ് പ്രാഥമിക വിവരം. മൂന്ന്  കുടുംബത്തിൽ നിന്നുള്ള 10 അംഗ സംഘമായിരുന്നു എത്തിയത്.ആറിൽ കുളിക്കുന്നതിനിടെ പെട്ടെന്ന് മലവെള്ളം ഒഴുകിയെത്തുകയായിരുന്നു. 10 പേരിൽ ആറ് പേരാണ് ഒഴുക്കിൽപ്പെട്ടത്. ഇതിൽ അമ്മയും കുഞ്ഞും ഒഴികെ ബാക്കി നാല് പേരെയും രക്ഷപ്പെടുത്തിയിരുന്നു. നാട്ടുകാരും ഫയര്‍ഫോഴ്സും പോലീസും ചേര്‍ന്നാണ് രക്ഷാപ്രവര്‍ത്തനം നടത്തിയത്. കാണാതായ അമ്മയ്ക്കായുള്ള തിരച്ചില്‍ ഊര്‍ജിതമായി നടക്കുകയാണ്.

മലപ്പുറം: ആനക്കയം പന്തല്ലൂർ മലയിൽ ഉരുൾപൊട്ടൽ. ഒരേക്കറിലേറെ റബ്ബർ തോട്ടം ഒലിച്ചു പോയി. ഇന്ന് പുലർച്ചെയാണ് അപകടമുണ്ടായത്. ഉരുൾപൊട്ടിയത് ജനവാസമേഖലയിൽ അല്ല എന്നതിനാൽ വലിയ അപകടം ഒഴിവായി.കഴിഞ്ഞ ദിവസങ്ങളിലെല്ലാം പ്രദേശത്ത് വലിയ മഴയാണ് അനുഭവപ്പെട്ടത്. ഉരുൾപൊട്ടലിൽ ഒഴുകി എത്തിയ കല്ലുകളും മണ്ണും മരങ്ങളും കാരണം ഗതാഗതം തടസ്സപ്പെട്ടിരിക്കുകയാണ്. ഉരുൾപൊട്ടിയതിന് പിന്നാലെ പ്രദേശത്തെ താമസക്കാരെ മാറ്റി താമസിപ്പിച്ചിട്ടുണ്ട്. മഴയ്‌ക്കിടെയാണ് ഉരുൾ പൊട്ടലുണ്ടായത്.