ബക്കളം : ഓട്ടോ ടാക്‌സിയില്‍ ലോറിയിടിച്ച് നാല് പേര്‍ക്ക് ഗുരുതര പരിക്ക്. ഓട്ടോയിലുണ്ടായിരുന്ന കൂത്തുപറമ്പ് സ്വദേശികള്‍ക്കാണ് പരിക്കേറ്റത്. ദേശീയപാതയില്‍ കുറ്റിക്കോലിനു സമീപം ബക്കളത്ത് ഇന്നലെ രാത്രി 8.30 ഓടെയായിരുന്നു അപകടം. തളിപ്പറമ്പ് ഭാഗത്തേക്ക് പോകുകയായിരുന്ന ഓട്ടോയില്‍ അമിതവേഗതയില്‍ വന്ന നാഷണല്‍ പെര്‍മിറ്റ് ലോറിയിടിക്കുകയായിരുന്നു. ഇടിയുടെ ആഘാതത്തില്‍ ഓട്ടോയുടെ വലതുഭാഗം പൂര്‍ണമായും തകര്‍ന്നു.
ഇരിട്ടി : നാടോടി യുവതി ശോഭ കൊല്ലപ്പെട്ട സംഭവവുമായി ബന്ധപ്പെട്ട് യുവതിയുടെ കാണാതായ കുട്ടികളെ തേടി പോലീസ് ബെംഗളുരുവിലേക്ക്. ആറും അഞ്ചും വയസ്സുള്ള കുട്ടികളെയാണ് കാണാതായിരുക്കുന്നത്. ശോഭയെ കൊലപ്പെടുത്തിയ ശേഷം കുട്ടികളെയും കൊണ്ട് കർണാടകയിലേക്ക് പോയി എന്നും ബംഗളുരുവിൽ വെച്ചു ട്രെയിനിൽ മുംബൈക്ക് കയറ്റിവിട്ടെന്നുമാണ് പ്രതി മഞ്ചുനാഥ്‌ പോലീസിനോട് പറഞ്ഞത്. റെയിൽവേ സ്റ്റേഷനിലെ CCTV ദൃശ്യങ്ങളും മറ്റും പരിശോധിക്കാനാണ് പോലീസ് ബെംഗളുരുവിലേക്ക് തിരിയ്ക്കുന്നത്. കൂടാതെ രാജ്യവ്യാപകമായി കുട്ടികളുടെ സംരക്ഷണത്തിനായി പ്രവർത്തിക്കുന്ന വിവിധ ഏജൻസികളുടെ സഹായവും അഭ്യർത്ഥിച്ചിട്ടുണ്ട്. ശോഭയുടെയും ഭർത്താവിന്റെയും കൊലപാതകവും കുട്ടികളുടെ തിരോധാനവും അന്വേഷിക്കുന്നത് പേരാവൂർ സി ഐ സുനിൽ കുമാറിന്റെ നേതൃത്വത്തിലുള്ള സംഘമാണ്.
കൊച്ചി: മലയാള സിനിമയിൽ മോഹൻലാലിൻറെ നായികയായി അഭിനയിച്ചിട്ടുള്ള മുതിർന്ന നടി അടക്കം അഞ്ചു നടി മാരുടെ നഗ്നദൃശ്യങ്ങളും വീഡിയോയും ബ്ലാക്‌മെയിലിംഗിലൂടെ സിനിമ മാഫിയ സംഘം തട്ടി എടുത്തതായി സൂചന. അഞ്ചു പേരിൽ നിന്നുമായി രണ്ടര കോടി രൂപയോളം തട്ടി എടുത്തതായും പോലീസിന് സൂചന കിട്ടിയിട്ടുണ്ട്.
പൾസർ സുനിയുടെ നേതൃത്വത്തിലുള്ള സംഘം കഴിഞ്ഞ ഒരു വർഷമായി സിനിമ മേഖല കേന്ദ്രീകരിച്ചാണ് പ്രവർത്തിച്ചു വരുന്നത്. സിനിമ നടന്മാർക്കും നടിമാർക്കും കഞ്ചാവും ലഹരി മരുന്നുകളും എത്തിച്ചു കൊടുക്കുക എന്നുള്ളതായിരുന്നു ഈ സംഘത്തിന്റെ ആദ്യ ദൗത്യം. ഇതോടെ സുനി സിനിമാലോകത്തെ പലരുടെയും വിശ്വസ്തനും ഡ്രൈവറും ആയി മാറി. പിന്നീട് 2008 മുതൽ തന്നെ സുനിയും സംഘവും ഇത്തരത്തിൽ നടിമാരെ ഭീഷണിപ്പെടുത്തി പണം ഉണ്ടാക്കാൻ തുടങ്ങിയിരുന്നു.
ആദ്യകാലങ്ങളിൽ തട്ടിക്കൊണ്ടു പോവുകയോ നഗ്നചിത്രം പകർത്തുകയോ ചെയ്യാതെ വെറും ഭീഷണി മാത്രമായിരുന്നു. എന്നാൽ ഈ തന്ത്രം പരാജയപ്പെട്ടതോടെയാണ് കളം മാറ്റി ചവിട്ടാൻ സുനിയും സംഘവും തീരുമാനിക്കുന്നത്.
.
കണ്ണൂർ: കണ്ണൂർ ജില്ലയിലെ കുടിവെള്ള പദ്ധതികൾ യുദ്ധകാലാടിസ്ഥാനത്തിൽ ഉടൻ പൂർത്തിയാക്കാൻ നിർദേശം. വരൾച്ച നേരിടാനായി നടത്തിയ മുന്നൊരുക്കം വിലയിരുത്താൻ ചേർന്ന വകുപ്പ് മേധാവികളുടെ യോഗത്തിൽ ആരോഗ്യ മന്ത്രി കെ കെ ശൈലജ ടീച്ചർ ആണ് നിർദേശം മുന്നോട്ട് വെച്ചത്.
കുടിവെള്ള വിതരണത്തിന് 355 ജല കിയോസ്കുകൾ നിലവിലുണ്ട്. 400 ലേറെയുള്ള സ്ഥലങ്ങളിൽ ഇവ സ്ഥാപിക്കുന്നതിനുള്ള സ്റ്റാൻഡ് നിർമിക്കുന്നതിന് ഭരണാനുമതി നൽകിയതായി യോഗം വിലയിരുത്തി. ജലവിതരണത്തിനായി ഉപയോഗിക്കുന്ന കിണറുകളിൽ നിന്നുള്ള ജലത്തിന്റെ ഗുണ നിലവാരം ഉറപ്പാക്കാൻ ഇതിനോടകം പരിശോധന പൂർത്തിയാക്കി.
താലൂക്ക് അടിസ്ഥാനത്തിൽ വരൾച്ച നേരിടുന്നതിനുള്ള പ്രവർത്തനങ്ങൾ ഏകോപിപ്പിക്കുന്നതിനും ഡെപ്യൂട്ടി കളക്ടർമാർക്ക് ചുമതല നൽകിയതായി ജില്ലാ കളക്ടർ മിർ മുഹമ്മദലി പ്രഖ്യാപിച്ചു.
ശുദ്ധജല വിതരണവുമായി ബന്ധപ്പെട്ട വാട്ടർ കിയോസ്കുകൾ, ടാങ്കർ ലോറികൾ വഴിയുള്ള ജലവിതരണം തുടങ്ങിയവയെ കുറിച്ചുള്ള വിവരങ്ങൾ അറിയാൻ സഹായിക്കുന്ന പ്രതേക മൊബൈൽ ആപ്പ് ഒരാഴ്ചയ്ക്കകം തയ്യാറാകുമെന്നും കളക്ടർ പറഞ്ഞു. ജലസംരക്ഷണത്തിന്റെ ഭാഗമായി മഴവെള്ള സംഭരണം, കിണർ റീചാർജിങ് തുടങ്ങിയ രീതികൾ പ്രവർത്തികമാക്കും. ഒരു മാസത്തിനകം പുതിയ കുഴല്കിണറുകൾ കുഴിയ്ക്കരുതെന്നു സംസ്ഥാന സർക്കാർ ഉത്തരവിറക്കിയിട്ടുണ്ട്. ജപ്പാൻ കുടിവെള്ളമെത്താത്ത ഭാഗങ്ങളിൽ താത്കാലികമായി ലോറികളിൽ വെള്ളം എത്തിക്കാനുള്ള സംവിധാനം ഒരുക്കുമെന്നും തന്റെ മണ്ഡലത്തിൽ സ്വീകരിച്ച വരൾച്ച നിവാരണ പദ്ദതികളെ കുറിച്ച്‌ സണ്ണി ജോസഫ് എം എൽ എ വിശദീകരിച്ചു.
മട്ടന്നൂർ: ക്യാന്സറിനെ അറിയൂ ക്യാൻസറിനെ അകറ്റു എന്ന മുദ്രാവാക്യവുമായി ചിത്രകാരൻ എ ബി എൻ ജോസഫ് നയിക്കുന്ന ചിത്ര യാത്രയ്ക് 23 നു മട്ടന്നൂരിൽ സ്വീകരണം നൽകും. സ്വീകരണത്തിന് മുന്നോടിയായി 20 നു വൈകുനേരം മട്ടന്നൂർ നഗരത്തിൽ വിളംബര ഘോഷയാത്ര നടത്തും. 23 നു രാവിലെ ഒൻപതിന് കണ്ണൂർ റോഡിൽ വായനത്തോട് വെച്ച വാദ്യമേളത്തിന്റെ അകമ്പടിയോടെ ചിത്രയാത്രയെ സ്വീകരിക്കുമെന്ന് സംഘാടകർ പറഞ്ഞു. തുടർന്ന് കൈലാസ് ഓഡിറ്റോറിയത്തിൽ ചിത്രപ്രദർശനം, വീഡിയോപ്രദര്ശനം, ആദരവ്, സാന്ത്വന സംഗീതസന്ധ്യ തുടങ്ങിയവ നടക്കും.
കൊച്ചി∙ പ്രമുഖ ചലച്ചിത്ര നടിയെ തട്ടിക്കൊണ്ടുപോയി ആക്രമിച്ച കേസിലെ മുഖ്യപ്രതി പൾസർ സുനി മുൻകൂർ ജാമ്യാപേക്ഷയുമായി ഹൈക്കോടതിയിൽ. സുനിയെ കൂടാതെ മറ്റു രണ്ടു പ്രതികൾ കൂടി അഭിഭാഷകര്‍ മുഖേനെ കോടതിയില്‍ ജാമ്യാപേക്ഷ സമർപ്പിച്ചിട്ടുണ്ട്. കേസില്‍ കുടുക്കിയതാണെന്നും നിരപരാധിത്വം തെളിയിക്കാന്‍ അവസരം തരണമെന്നും ജാമ്യാപേക്ഷയില്‍ പറഞ്ഞിട്ടുണ്ട് ഇവരുടെ ജാമ്യാപേക്ഷ കോടതി ചൊവ്വാഴ്ച പരിഗണിക്കും.
