കണ്ണൂർ : മികച്ച ഫുട്‍ബോൾ കളിക്കാരെ കണ്ടെത്താനായി മുൻ ഇന്ത്യൻ താരം കെ ടി രഞ്ജിത്ത് ഫുട്‍ബോൾ അക്കാദമി ആരംഭിക്കുന്നു. അക്കാഡമിയിലേക്കുള്ള തിരഞ്ഞെടുപ്പ് 1, 2 തീയതികളിൽ ചെറുകുന്ന് ബോയ്സ് സ്കൂൾ ഗ്രൗണ്ടിൽ രാവിലെ ആറു മണി മുതൽ നടക്കും. 150 പേർക്കാണ് പരിശീലനം. 10 വയസ്സ് മുതൽ 18 വയസ്സ് വരെയുള്ള ആൺകുട്ടികൾക്ക് പങ്കെടുക്കാം. ഫോൺ:7736672827, 9061939190, 9562680202.
കേളകം: കഴിഞ്ഞ യു ഡി എഫ് സർക്കാരിന്റെ കാലത്തു പിൻവലിച്ച കേളകം ബിവറേജസ് ഔട്ട്ലെറ്റ് തിരിച്ചു കൊണ്ടുവന്ന എൽ ഡി എഫ് സർക്കാരിന്റെ തീരുമാനം പിൻവലിക്കണമെന്ന് യൂത്ത് കോൺഗ്രസ് കേളകം മണ്ഡലം കമ്മിറ്റി ആവശ്യപ്പെട്ടു. ഇതിനെതിരെ സമരപരിപാടികളുമായി മുന്നോട്ടു പോകുമെന്ന് മണ്ഡലം പ്രസിഡന്റ് ജോബി പാണ്ടഞ്ചേരിയിൽ പറഞ്ഞു
തിരുവനന്തപുരം: ” ജനങ്ങള്‍ സത്യം തിരിച്ചറിഞ്ഞു. പൊതുസമൂഹത്തിന്റെ പിന്തുണ തനിക്ക് ലഭിച്ചു. അതിന് മാധ്യമങ്ങളാണ് തന്നെ സഹായിച്ചത്. ഇനി മണ്ഡലത്തില്‍ സജീവമായിരിക്കും. എനിക്കും നിങ്ങള്‍ക്കിടയില്‍ ജീവിക്കേണ്ടതല്ലേ”, ഫോണ്‍വിളി വിവാദത്തില്‍ പെട്ട് മന്ത്രിസ്ഥാനം രാജിവെച്ച എ.കെ ശശീന്ദ്രന്‍ മാധ്യമങ്ങളോട് ചോദിച്ചു.
മന്ത്രിസ്ഥാനത്തേക്ക് തിരിച്ചെത്തുന്നതിനേക്കാൾ പ്രധാനം തന്റെ സത്യസന്ധത ജനങ്ങളെ ബോധ്യ പെടുത്തുന്നതിനാണെന്നും അദ്ദേഹം പറഞ്ഞു. ഗതാഗതമന്ത്രി പദവി ഒഴിഞ്ഞ ശേഷം തലസ്ഥാനത്ത് നിന്ന് നാട്ടിലേക്കുള്ള യാത്രയ്ക്ക് അദ്ദേഹം തിരഞ്ഞെടുത്തത് കെഎസ്ആര്‍ടിസി ബസ്സായിരുന്നു. ഭാര്യ അനിത ടീച്ചറും കൂടെ ഉണ്ടായിരുന്നു. എന്‍സിപിക്ക് മന്ത്രിയുണ്ടാകുമോ എന്ന ചോദ്യത്തിന് മന്ത്രിയുണ്ടാകും അത് തോമസ് ചാണ്ടി തന്നെയായിരിക്കുമെന്നും അദ്ദേഹം പറഞ്ഞു
കൊച്ചി ∙ രാജ്യാന്തര ഭീകരസംഘടനയായ ഐഎസ് ബന്ധമുള്ളവർ കനകമല കേന്ദ്രമാക്കി ആക്രമണത്തിന് ഗൂഢാലോചന നടത്തിയെന്ന കേസിൽ എൻഐഎ കുറ്റപത്രം സമർപ്പിച്ചു. എട്ടു പേർക്കെതിരെയാണ് കുറ്റപത്രം.കണ്ണൂർ കനകമലയിൽ ഒത്തുചേർന്ന് വിവിധ ആക്രമണങ്ങൾ നടത്താൻ പദ്ധതിയിട്ട ഐഎസ് അനുഭാവമുള്ളവരെ കഴിഞ്ഞ ഒക്ടോബറിലാണ് എൻഐഎ പിടികൂടിയത്. രണ്ട് ഹൈക്കോടതി ജഡ്ജിമാരെയും ഒരു പൊലീസ് ഉദ്യോഗസ്ഥനെയും വധിക്കാൻ ഇവർ ഗൂഢാലോചന നടത്തിയെന്ന് എൻഐഐ കണ്ടെത്തിയിരുന്നു. കേസിൽ അറസ്റ്റുണ്ടായി 180 ദിവസം പിന്നിടുന്ന സാഹചര്യത്തിൽ പ്രതികളുടെ ജാമ്യം ഒഴിവാക്കാനാണ് കുറ്റപത്രം സമർപ്പിച്ചത്.
കൊച്ചി: വിദ്യാര്‍ഥിയെ ജാതിപ്പേര് വിളിച്ച് ആക്ഷേപിച്ചെന്ന പരാതിയില്‍ തിരുവനന്തപുരം ലോ അക്കാദമി മുന്‍ പ്രിന്‍സിപ്പല്‍ ലക്ഷ്മി നായര്‍ക്കെതിരായ അന്വേഷണം പുരോഗമിക്കുകയാണെന്ന് സര്‍ക്കാര്‍ ഹൈക്കോടതിയെ അറിയിച്ചു. തനിക്കെതിരേ അനാവശ്യമായി അടിച്ചേല്‍പ്പിച്ച കേസ് റദ്ദാക്കണമെന്നാവശ്യപ്പെട്ട് ലക്ഷ്മി നായര്‍ നല്‍കിയ ഹരജിയാണു കോടതി പരിഗണിച്ചത്.
കൊച്ചി: ജിഷാ വധക്കേസ് പുനരന്വേഷണം നടത്താന്‍ സര്‍ക്കാര്‍ തയ്യാറാവണമെന്ന് ആദിവാസി ഗോത്രമഹാസഭാ നേതാവ് എം ഗീതാനന്ദന്‍ വാര്‍ത്താസമ്മേളനത്തില്‍ പറഞ്ഞു. ദലിത്-സ്ത്രീ ലൈംഗികാതിക്രമ കേസുകള്‍ സംസ്ഥാനത്ത് ഏറിവരുകയാണ്. അതിനാല്‍ വിഷയത്തില്‍ സര്‍ക്കാരിന്റെ അടിയന്തര ശ്രദ്ധവേണം. ഇക്കാര്യം ആവശ്യപ്പെട്ട്“ചലോ തിരുവനന്തപുരം’പദയാത്ര സംഘടിപ്പിക്കും. ഏപ്രില്‍ 29ന് കാസര്‍കോട് ജില്ലയില്‍ ജിഗ്‌നേഷ് മേവാനി ഉദ്ഘാടനം ചെയ്യും
പത്തനംതിട്ട: ശബരിമല ക്ഷേത്ര നട നാളെ തുറക്കും .വൈകിട്ട് 5ന് തന്ത്രി കണ്ഠര് രാജീവരുടെ സാന്നിദ്ധ്യത്തില്‍ മേല്‍ശാന്തി ഉണ്ണികൃഷ്ണന്‍ നമ്പൂതിരി നട തുറക്കും.കൊടിമരം ഇല്ലാത്തതിനാല്‍ ശബരിമലയില്‍ ഇത്തവണ പത്ത് ദിവസത്തെ ഉല്‍സവം ഇല്ല .എന്നാല്‍ ഇതിന് പകരം മാര്‍ച്ച് 30 മുതല്‍ ഏപ്രില്‍ ഒന്‍പത് വരെ നട തുറക്കും. വിഷു ഉല്‍സവത്തിനായി ഏപ്രില്‍ 10ന് വൈകിട്ട് 5ന് വീണ്ടും നട തുറക്കും .14 ന് വിഷുക്കണി ദര്‍ശനം. അയ്യപ്പ ഭക്തന്‍മാര്‍ക്ക് തന്ത്രിയും മേല്‍ശാന്തിയും വിഷുക്കൈനീട്ടം നല്‍കും .വിഷ ഉല്‍സവത്തിന് ശേഷം ഏപ്രില്‍ 18ന് നട അടയ്ക്കും. നട തുറക്കുന്നതുമായി ബന്ധപ്പെട്ട് എ ല്ലാ ഒരുക്കങ്ങളും പൂര്‍ത്തീകരിച്ചതായി ബന്ധപ്പെട്ട അധികൃതര്‍ അറിയിച്ചു. ദേവസ്വം ബോഡിന്റെ നേതൃത്വത്തില്‍ ഭക്തര്‍ക്ക് ബുദ്ധിമുട്ടുണ്ടാവാത്ത വിധത്തിലുള്ള സംവിധാനങ്ങള്‍ നടത്തിവരികയാണ്. തിരക്ക് ഒഴിവാക്കാനുള്ള മാര്‍ഗങ്ങ ളും ആലോചിച്ചുവരുന്നു.
കണ്ണൂര്‍: കുട്ടികള്‍ക്കെതിരായ ലൈംഗികാതിക്രമങ്ങള്‍ തടയുകയെന്ന ലക്ഷ്യത്തോടെ കൊണ്ടുവന്ന പോക്‌സോ നിയമങ്ങള്‍ പ്രതികാരം ചെയ്യാന്‍ ദുരുപയോഗം ചെയ്യുന്ന പ്രവണത കൂടിവരുന്നതായി സംസ്ഥാന വനിതാ കമ്മീഷനംഗം അഡ്വ. നൂര്‍ബിന റഷീദ് .പീഡനവിവരം പുറത്തുവിടാതിരിക്കുന്ന രക്ഷിതാക്കളും പോക്‌സോ നിയമപ്രകാരം കുറ്റക്കാരാണ്. റസിഡന്റ് അസോസിയേഷനുകളെ കുറിച്ചും പരാതികള്‍ വ്യാപകമാണ്. അണുകുടുംബങ്ങളില്‍ കുടുംബാന്തരീക്ഷം തകര്‍ന്നുകൊണ്ടിരിക്കുന്നു. ഇന്റര്‍നെറ്റിലെ അശ്ലീലസൈറ്റുകള്‍ നിരോധിക്കാന്‍ നടപടി വേണം.കലാലയങ്ങളിലും വീടുകളിലുമെല്ലാം പീഡനം വര്‍ധിക്കാന്‍ കാരണം വിരല്‍തുമ്പില്‍ തന്നെ അശ്ലീലത ലഭിക്കുന്നതാണ്. കുറ്റകൃത്യങ്ങളുണ്ടായാല്‍ പോലിസന്വേഷണം കുറ്റമറ്റതാവണം. പി റോസക്കുട്ടി ചെയര്‍പേഴ്‌സനായ സംസ്ഥാന വനിതാ കമ്മീഷന്റെ അവസാനത്തെ സിറ്റിങാണിത്. ഏപ്രില്‍ മൂന്നിനു സ്ഥാനമൊഴിയും. ഇതുവരെ ലഭിച്ച പിന്തുണയ്ക്കും പ്രോല്‍സാഹനത്തിനും കൃതജ്ഞത രേഖപ്പെടുത്തുന്നതായി അഡ്വ. നൂര്‍ബിന റഷീദ് പറഞ്ഞു
തിരുവനന്തപുരം : ആഭ്യന്തര വകുപ്പ് അഡീഷണല്‍ ചീഫ് സെക്രട്ടറി നളിനി നെറ്റോയെ ചീഫ് സെക്രട്ടറിയായി നിയമിക്കാന്‍ മന്ത്രിസഭായോഗം തീരുമാനിച്ചു. എസ്.എം. വിജയാനന്ദ് വിരമിക്കുന്ന ഒഴിവിലാണ് നിയമനം. പ്ലാനിംഗ് വകുപ്പ് അഡീഷണല്‍ ചീഫ് സെക്രട്ടറിയായ വി.എസ്. സെന്തിലിന് മുഖ്യമന്ത്രിയുടെ സെക്രട്ടറിയുടെ ചുമതല കൂടി നല്‍കും. ആശ തോമസാണ് പുതിയ പി.ഡബ്ല്യൂ.ഡി. പ്രിന്‍സിപ്പല്‍ സെക്രട്ടറി.ഫിഷറീസ് പ്രിന്‍സിപ്പല്‍ സെക്രട്ടറി ജെയിംസ് വര്‍ഗീസിന് പരിസ്ഥിതി വകുപ്പിന്റെ അധിക ചുമതല കൂടി നല്‍കി.കൊച്ചി കോര്‍പ്പറേഷന്‍ സെക്രട്ടറി ഹരിത വി കുമാറിനെ പഞ്ചായത്ത് ഡയറക്ടറായി നിയമിക്കും. ഇപ്പോള്‍ പഞ്ചായത്ത് ഡയറക്ടറായ ബാലകിരണിനെ ടൂറിസം ഡയറക്ടറായി നിയമിക്കാന്‍ തീരുമാനിച്ചു.വര്‍ദ്ധിച്ചുവരുന്ന തീവ്രവാദ ഭീഷണി കണക്കിലെടുത്ത് ഇന്ത്യാ റിസര്‍വ് ബറ്റാലിയന്റെ കമാന്റോ വിഭാഗത്തില്‍ 210 കമാന്റോ തസ്തികകള്‍ സൃഷ്ടിക്കാന്‍ തീരുമാനിച്ചു.ടൂറിസം വകുപ്പില്‍ 35 കാറുകള്‍ വാങ്ങുന്നതിന് മന്തിസഭ അനുമതി നല്‍കി.ഖാദിഗ്രാമവ്യവസായ ബോര്‍ഡ് ജീവനക്കാരുടെ പെന്‍ഷന്‍ പരിഷ്‌കരിക്കാന്‍ തീരുമാനിച്ചു