Kerala

കണ്ണൂര്‍: ജില്ലാ എംപ്ലോയ്‌മെന്റ് എക്‌സ്‌ചേഞ്ചിനോടനുബന്ധിച്ചുള്ള എംപ്ലോയബിലിറ്റി സെന്ററും മെഡിസിറ്റി ഇന്റര്‍നാഷണല്‍ അക്കാദമിയും ചേര്‍ന്ന് മിനി ജോബ് ഡ്രൈവ് നടത്തുന്നു. കണ്ണൂര്‍ മെഡിസിറ്റി ഇന്റര്‍നാഷണല്‍ അക്കാദമിയില്‍ 11-ന് രാവിലെ 10 മുതല്‍ 1.30 വരെയാണ് പരിപാടി. 35 വയസ്സില്‍ കുറവുള്ള ഉദ്യോഗാര്‍ഥികള്‍ 250 രൂപയും തിരിച്ചറിയല്‍ കാര്‍ഡിന്റെ പകര്‍പ്പുമായി മെഡിസിറ്റി ഇന്റര്‍നാഷണല്‍ അക്കാദമിയില്‍ നേരിട്ട് ഹാജരായി എംപ്ലോയബിലിറ്റി സെന്ററിന്റെ രജിസ്‌ട്രേഷന്‍ ചെയ്യണം. ആജീവനാന്ത രജിസ്‌ട്രേഷനാണ്. നിലവില്‍ രജിസ്റ്റര്‍ ചെയ്ത ഉദ്യോഗാര്‍ഥികള്‍ക്കും പങ്കെടുക്കാം. ഫോണ്‍: 04972 707610, 8156955083.

കോഴിക്കോട് : നിരാഹാര സമരവുമായി മുന്നോട്ട് പോകുമെന്ന് ജിഷ്ണു പ്രണോയിയുടെ സഹോദരി അവിഷ്ണ. ചേട്ടന് വേണ്ടി മരിക്കാനും തയ്യാറാണ്. ആരോഗ്യ പ്രശ്‌നങ്ങള്‍ ഉള്ളതായി തോന്നിയിട്ടില്ല. പ്രതികളെ പിടികൂടുന്നതുവരെ സമരം തുടരുമെന്നും അവിഷ്ണ അറിയിച്ചു.അമ്മ മഹിജയ്ക്കും കുടുംബാംഗങ്ങള്‍ക്കുമെതിരായ പൊലീസ് അതിക്രമത്തില്‍ പ്രതിഷേധിച്ചാണ് അവിഷ്ണയും 10 ബന്ധുക്കളും നാട്ടുകാരും കോഴിക്കോട് വളയത്തെ വീട്ടില്‍ വെള്ളിയാഴ്ച രാവിലെ നിരാഹാരസമരം ആരംഭിച്ചത്. ശനിയാഴ്ചയും സമരം തുടരാനാണ് അവിഷ്ണയുടെയും ബന്ധുക്കളുടെയും നാട്ടുകാരുടെയും തീരുമാനം. ജിഷ്ണുവിന്റെ അമ്മ മഹിജയും അച്ഛന്‍ അശോകനും ബന്ധുക്കളും തിരുവനന്തപുരത്ത് നിരാഹാരസമരം തുടരുകയാണ്. ഇവര്‍ക്ക് ഐക്യദാര്‍ഢ്യം പ്രഖ്യാപിച്ചാണ് വീട്ടില്‍ അവിഷ്ണയും ബന്ധുക്കളും നാട്ടുകാരും സമരം നടത്തുന്നത്.

ആലപ്പുഴ: ചേര്‍ത്തലയില്‍ പ്ലസ് ടു വിദ്യാര്‍ത്ഥി അനന്തുവിനെ കൊലപ്പെടുത്തിയ മുഴുവന്‍ പ്രതികളും പൊലീസ് പിടിയില്‍. പതിനാറ് പ്രതികളാണ് കേസിലുള്ളത്. ഇതില്‍ ഏഴു പേര്‍ പ്രായ പൂര്‍ത്തിയാകാത്തവരാണ്. ഇവരെ ജുവനൈല്‍ ബോര്‍ഡില്‍ ഹാജരാക്കുകയും മറ്റ് പ്രതികളെ റിമാന്‍ഡ് ചെയ്യുകയും ചെയ്തു.

പ്രതികളെല്ലാവരും ആര്‍എസ്എസ് പ്രവര്‍ത്തകരാണ്. ചേര്‍ത്തലയില്‍ ഉത്സവപ്പറമ്പില്‍ നടന്ന സംഘര്‍ഷത്തിനിടെ കഴിഞ്ഞ ദിവസമാണ് അനന്തു കൊല്ലപ്പെട്ടത്. നെഞ്ചിലും വയറിനും മാരകമായ മര്‍ദ്ദനമേറ്റ അനന്തു സംഭവസ്ഥലത്ത് വെച്ച് തന്നെ മരണപ്പെടുകയായിരുന്നു. അനന്തുവും ആര്‍എസ്എസ് പ്രവര്‍ത്തകനാണ്. വയലാര്‍ രാമവര്‍മ്മ സ്‌കൂളിലെ പ്ലസ്ടു വിദ്യാര്‍ത്ഥിയായിരുന്നു അനന്തു. ക്ഷേത്രത്തില്‍ ഉത്സവത്തിനായി എത്തിയ അനന്തുവിനെ ഓടിച്ചിട്ട് തല്ലിവീഴ്ത്തിയ ശേഷം നിലത്തിട്ട് ചവിട്ടുകയായിരുന്നു.