Kerala

പഴയങ്ങാടി: മാടായിയുടെ വിദ്യാഭ്യാസ, സാംസ്കാരിക, ജീവകാരുണ്യ രംഗത്തു നിറസാന്നിധ്യമായ ജവാഹർ മാ‍‍ടായി ഒരുക്കിയ അവാർഡ് നൈറ്റ് അനുഭൂതികളുടെ കലാസന്ധ്യയായി. സാഹിത്യ അക്കാദമി അവാർഡ് ജേതാവ് ഇബ്രാഹിം വെങ്ങര അവാർഡ് നൈറ്റിന്  തിരിതെളിയിച്ചു. വിവിധ മേഖലകളിൽ പ്രശസ്തരായവരെ ആദരിച്ചു. കലാപരിപാടികളും നടന്നു.

തളിപ്പറമ്പ് ∙ കണ്ണൂർ സോൺ കത്തോലിക്ക കരിസ്മാറ്റിക് മുന്നേറ്റം, ജീസസ് യൂത്ത് കണ്ണൂർ സബ് സോൺ, ഹോളിഫയർ മിനിസ്ട്രി എന്നിവയുടെ നേതൃത്വത്തിൽ സഹന കുരിശിന്റെ പദയാത്ര നടത്തി. തീവ്രവാദികളുടെ മാനസാന്തരത്തിനായും മദ്യവിമുക്ത സമൂഹത്തിനായും നല്ല കാലാവസ്ഥയ്ക്കായും ഉൾപ്പെടെ പ്രാർഥനകളോടെയാണു നോമ്പുകാല കുരിശിന്റെ വഴിയെ അനുസ്മരിച്ചു പദയാത്ര നടത്തിയത്.

കണ്ണൂർ: നിയന്ത്രണം നീക്കിയതിനു ശേഷവും നോട്ട് പ്രതിസന്ധി തുടരുന്നു. എടിഎമ്മുകളിൽ പണമില്ലാത്തതും ചെറിയ നോട്ടുകൾ ആവശ്യത്തിനു ലഭ്യമല്ലാത്തതുമാണു സാധാരണക്കാരെ ഏറെ വലയ്ക്കുന്നത്. ബാങ്കിലെത്തുന്ന ഇടപാടുകാർക്കു മാത്രമാണു പണം നൽകുന്നത്. എടിഎമ്മുകളിൽ നോട്ട് നിറച്ചാൽ മറ്റു ബാങ്കുകളുടെ ഇടപാടുകാരും പണം പിൻവലിക്കുമെന്നതിനാൽ ഇതു തൽക്കാലത്തേക്ക് അവസാനിപ്പിച്ചിരിക്കുകയാണ്. ട്രക്ക് സമരം മൂലം റിസർവ് ബാങ്ക് തിരുവനന്തപുരം ശാഖയിൽ നോട്ട് എത്താത്തതാണു പ്രശ്നമെന്നാണു അധികാരികളുടെ വിശദീകരണം. ജില്ലയിലെ നാനൂറിലേറെ എടിഎമ്മുകളിൽ ഭൂരിഭാഗവും അടഞ്ഞുകിടക്കുകയാണ്.

കണ്ണൂർ:  ജില്ലയിലെ പൊലീസ് രഹസ്യാന്വേഷണ വിഭാഗം കാര്യക്ഷമമായി പ്രവർത്തിക്കുന്നില്ലെന്നു വിലയിരുത്തൽ. രാഷ്ട്രീയ അക്രമം, ഉപരോധം മുതലായവ മുൻകൂട്ടി അറിയാൻ കഴിയുന്നില്ലെന്നാണു വിമർശനം. കലക്ടറേറ്റ് കേന്ദ്രമായി നടക്കുന്ന സമരങ്ങളെ മനസ്സിലാക്കാൻ കഴിയുന്നില്ലെന്നും പരാതിയുണ്ട്. അടുത്ത ദിവസം തന്നെ സ്പെഷൽബ്രാഞ്ചിലെ പലരെയും മാറ്റുമെന്നും സൂചനയുണ്ട്. ജില്ലയിൽ ഐജിയോ എസ്പിയോ മിക്കവാറും ഇതരസംസ്ഥാനക്കാരാണ്. ഇവർ ജില്ലയിലെ കാര്യങ്ങൾ പഠിക്കാൻ രഹസ്യാന്വേഷണ വിഭാഗത്തിന്റെ റിപ്പോർട്ടുകളാണ് ഉപയോഗപ്പെടുത്തുന്നത്. എസ്ഐ അടക്കം 37 പേരാണു ജില്ലാ രഹസ്യാന്വേഷണ വിഭാഗത്തിലുള്ളത്. സർക്കാരിനെതിരായ നീക്കങ്ങൾ കണ്ടെത്താൻ ‍കഴിയുന്നില്ലെന്നാണു വിലയിരുത്തൽ.