Kerala

ഇരിട്ടി:ആറളം ഫാം സ്കൂളിൽ ശീതികരിച്ച സ്മാർട്ട് ക്ലാസ്സ്‌റൂം വരുന്നു.അന്താരാഷ്ട്ര നിലവാരമുള്ള ക്ലാസ്റൂമിന്റെ നിർമാണം അവസാന ഘട്ടത്തിലെത്തി.ജില്ലാ കളക്ടറുടെ മേൽനോട്ടത്തിൽ ആദിവാസി പുനരധിവാസമിഷനും ജില്ലാപഞ്ചായത്തും ചേർന്നാണ് എം പി ഫണ്ട് ഉപയോഗിച്ച് 10 ലക്ഷത്തോളം രൂപ ചിലവഴിച്ചു ശീതികരിച്ച സ്മാർട്ക്ലാസ്സ്റൂം നിർമിക്കുന്നത്.കെൽട്രോണും നിർമ്മിതികേന്ദ്രയും ചേർന്നാണ് ഇത് ഒരുക്കുന്നത്.അന്താരാഷ്ട്രനിലവാരമുള്ള  സ്മാർട്ട് ബോർഡ്,ശബ്ദസംവിധാനം തുടങ്ങിയവ ക്ലാസ്റൂമിന്റെ പ്രത്യേകതയാണ്.അമ്പതു പേർക്ക് ഇരിക്കാനുള്ള കസേരയും മറ്റു സംവിധാനങ്ങളും പൂർത്തിയായി.50 പേർക്ക് ഒരു മണിക്കൂർ ഐ ടി പഠനം എന്ന രീതിയിലാണ് സൗകര്യം ലഭിക്കുക.

കണ്ണൂര്‍: കണ്ണൂര്‍ സ്‌പോര്‍ട്‌സ് ഡിവിഷനിലെ കുട്ടികള്‍ക്കായുള്ള നവീകരിച്ച സ്‌പോര്‍ട്‌സ് ഹോസ്റ്റല്‍ കെട്ടിടം തിങ്കളാഴ്ച തുറന്നുകൊടുത്തു. ഹോസ്റ്റലിലെ അസൗകര്യത്തെത്തുടര്‍ന്ന് നിരവധി കുട്ടികളെ യാത്രിനിവാസിലേക്ക് മാറ്റിപ്പാര്‍പ്പിച്ചിരുന്നു. ഇവര്‍ക്കും എട്ടാംതരത്തില്‍ പുതുതായി പ്രവേശനം നേടിയ വിദ്യാര്‍ഥികള്‍ക്കുമായാണ് ഹോസ്റ്റല്‍ തുറന്നുകൊടുത്തത്. 161 ഹോസ്റ്റല്‍ വിദ്യാര്‍ഥികളാണ് ഇപ്പോള്‍ ഇവിടെയുള്ളത്.60 ലക്ഷം ചെലവഴിച്ചാണ് കെട്ടിടം നവീകരിച്ചത്. എട്ട് കുളിമുറികളും എട്ട് കക്കൂസുകളും പുതുതായി നിര്‍മിച്ചു. പഴയബ്ലോക്കിലെ രണ്ട് കുളിമുറികള്‍ നവീകരിക്കുകയും ചെയ്തു. നിലം ഇന്റര്‍ലോക്ക് ചെയ്തിട്ടുണ്ട്.അറ്റകുറ്റപ്പണികള്‍ ഇനിയും ബാക്കിയുണ്ട്. കുട്ടികള്‍ക്ക് തുണിയലക്കിയിടാനായി കെട്ടിടത്തിന് പുറകില്‍ സൗകര്യമൊരുക്കും. ഡൈനിങ് ഹാളും സ്റ്റഡിറൂമും ഒന്നരമാസത്തിനകം പൂര്‍ത്തിയാക്കും. കെട്ടിടത്തിന് ഒരുനിലകൂടി നിര്‍മിക്കും. ഇതിനുള്ള എസ്റ്റിമേറ്റ് തയ്യാറായി. ഹോസ്റ്റല്‍ കെട്ടിടത്തിന്റെ ഔദ്യോഗിക ഉദ്ഘാടനം ഈമാസം അവസാനം നടത്താനാണ് ആലോചിക്കുന്നത്. ഇതിനകം ബാക്കിയുള്ള അറ്റകുറ്റപ്പണികൂടി പൂര്‍ത്തിയാക്കും.

ഇരിട്ടി:കൊട്ടിയൂർ തീർത്ഥാടകാർ സഞ്ചരിച്ച  വാഹനം അപകടത്തിൽ പെട്ട്19 പേർക്ക് പരിക്ക്.എതിരെവന്ന ലോറിയുമായി കൂട്ടിയിടിച്ചാണ് അപകടം.ഇന്നലെ വൈകിട്ട് വിളക്കോടിനടുത്തുവെച്ചാണ് അപകടം. കൊയിലാണ്ടി കുറുവങ്ങാട് സ്വദേശികൾ സഞ്ചരിച്ച ട്രാവലറാണ് അപകടത്തിൽ പെട്ടത്,ട്രാവലറിൽ സ്ത്രീകളും കുട്ടികളും ഉൾപ്പെടെ 22 പേരാണ് ഉണ്ടായിരുന്നത്.പരിക്കേറ്റവരെ ആദ്യം ഇരിട്ടിയിലെ സ്വകാര്യ ആശുപത്രിയിലും തുടർന്നു തലശ്ശേരി ഇന്ദിരാഗാന്ധി സഹകരണ ആശുപത്രിയിലും പ്രവേശിപ്പിച്ചു.