Kerala

കല്യാശ്ശേരി:കണ്ണൂർ സർവകലാശാല മാങ്ങാട്ടുപറമ്പ് ക്യാമ്പസ്സിൽ ഒരുക്കിയ പെണ്ണിടം ആരോഗ്യമന്ത്രി കെ.കെ.ശൈലജ ഉൽഘാടനം ചെയ്തു.സ്ത്രീകൾക്ക് വിശ്രമിക്കാനും ഉന്മേഷം വീണ്ടെടുക്കാനുമുള്ള സൗകര്യങ്ങളോടെ ഒരുക്കിയ സ്ത്രീസൗഹൃത മുറിയാണ് പെണ്ണിടം.കല്യാശ്ശേരി നിയോജക മണ്ഡലങ്ങളിലെ തിരഞ്ഞെടുക്കപ്പെട്ട കലാലയങ്ങളിലാണ് പെണ്ണിടം ഒരുക്കുന്നത്.ടി.വി രാജേഷ് എം.എൽ.എ യുടെ ആസ്തിവികസന ഫണ്ട് ഉപയോഗിച്ചാണ് സംവിധാനം നടപ്പിലാക്കുന്നത്.എട്ടു കലാലയങ്ങളിലാണ് ഈ സംവിധാനം ഒരുക്കുന്നത്.മങ്ങാട്ടുപറമ്പ ക്യാമ്പസ്,പയ്യന്നൂർ,മാടായി കോളേജുകൾ,പയ്യന്നൂർ സംസ്‌കൃത സർവകലാശാല ക്യാമ്പസ്,നെരുവംബ്രം,പട്ടുവം ഐ.എച്.ആർ.ഡി കോളേജുകൾ,കല്യാശ്ശേരി മോഡൽ പൊളി ടെക്‌നിക്,പരിയാരം ഗവ.ആയുർവേദ കോളേജ് എന്നിവിടങ്ങളിലാണ് ഇവ ഒരുക്കുന്നത്.ഈ വിശ്രമ കേന്ദ്രത്തിൽ കസേര,കിടക്ക,ഫാൻ,ശുദ്ധജലം,രക്തസമ്മർദ്ദം പരിശോധിക്കാനുള്ള ഉപകരണങ്ങൾ,വീൽ ചെയർ,ഡ്രസിങ് റൂം,നാപ്കിൻ വെൻഡിങ് മെഷീൻ,ഇൻസിനറേറ്ററോടുകൂടിയ ശുചിമുറി എന്നിവ ഒരുക്കിയിട്ടുണ്ട്.സംസ്ഥാനത്ത് ആദ്യമായാണ് ഇത്തരത്തിൽ പെൺകുട്ടികൾക്കായി പ്രത്യേക വിശ്രമ സ്ഥലം ഒരുക്കുന്നത്.

കൊച്ചി:പെട്രോൾ ഡീലേഴ്‌സ് കോ-ഓർഡിനേഷൻ കമ്മിറ്റി ഈ മാസം പതിനൊന്നിന് സംസ്ഥാനവ്യാപകമായി 24 മണിക്കൂർ പമ്പുകൾ അടച്ചിട്ടു സമരം ചെയ്യും.10 നു അർധരാത്രി മുതൽ 11 നു അർധരാത്രി വരെയാണ് സമരം.ദേശീയതലത്തിൽ 12 ന് പണിമുടക്കുമെന്ന് വ്യാപാര സംഘടനകൾ അറിയിച്ചിരുന്നു.എന്നാൽ സംസ്ഥാനത്ത് തലേദിവസം സമരം നടത്താനാണ് തീരുമാനം.പെട്രോളിന്റെയും ഡീസലിന്റെയും വില ദിവസേന മാറ്റുന്ന രീതിയിൽ സുതാര്യത വരുത്തണമെന്ന് ആവശ്യപ്പെട്ടാണ് സമരം.പ്രതിഷേധത്തിന്റെ ഭാഗമായി കമ്പനികളിൽ നിന്നുമുള്ള പ്രീമിയം സ്റ്റോക്കുകൾ എടുക്കുന്നത് പമ്പുകൾ നിർത്തിയിട്ടുണ്ട്.കൂടാതെ എട്ടു മുതൽ പത്തുവരെയുള്ള തീയതികളിൽ സ്റ്റോക്കുകൾ എടുക്കാതെ പതിനൊന്നിന് സമരം ചെയ്യാനാണ് കമ്മിറ്റിയുടെ തീരുമാനമെന്ന് ഭാരവാഹികൾ പറഞ്ഞു.കമ്പനികൾ നേരിട്ട് നടത്തുന്നതും സ്വകാര്യ പമ്പുകളും ഒഴിച്ചുള്ള എല്ലാ പമ്പുകളും സമരത്തിൽ പങ്കെടുക്കണമെന്നും ഭാരവാഹികൾ പറഞ്ഞു.

കൊച്ചി:ആക്രമിക്കപ്പെട്ട നടിയുടെ പേര് ഫേസ്ബുക്ക് പോസ്റ്റിലൂടെ പരാമർശിച്ചതിന് അജു വർഗീസിനെതിരെ പോലീസ് കേസെടുത്തു.എറണാകുളം സ്വദേശി ഗിരീഷ് ബാബുവിന്റെ പരാതിയിലാണ് കേസെടുത്തിരിക്കുന്നത്.