Kerala

കൊച്ചി:കൊച്ചിയിൽ ട്രാന്സ്ജെന്ഡേഴ്സിന് നേരെ നടന്ന പോലീസ് അതിക്രമത്തിൽ പ്രതിഷേധിച്ചു ട്രാന്സ്ജെന്ഡേഴ്സ് കൊച്ചി സിറ്റി പോലീസ് കമ്മീഷണർ ഓഫീസിലേക്ക് മാർച്ച് നടത്തുന്നു.ആക്രമണം നടത്തിയ സെൻട്രൽ സി.ഐ അനന്തലാൽ ഉൾപ്പെടെയുള്ള പോലീസുകാർക്കെതിരെ നടപടി ആവശ്യപ്പെട്ടാണ് മാർച്ച്.നടപടിയുണ്ടാകും വരെ പ്രതിഷേധം വിവിധ രീതികളിൽ തുടരുമെന്ന് ട്രാന്സ്ജെന്ഡേഴ്സ് വ്യക്തമാക്കിയിട്ടുണ്ട്.വരും ദിവസങ്ങളിൽ സെക്രട്ടറിയേറ്റിനു മുൻപിലേക്കും സമരം   വ്യാപിപ്പിക്കും.കഴിഞ്ഞ ബുധനാഴ്ച രാത്രി പത്തുമണിയോടെ എറണാകുളം കെ.എസ്.ആർ.ടി.സി ബസ്സ്റ്റാൻഡ് പരിസരത്തു വെച്ച് ഇവരിൽ ഒരാളുടെ പേഴ്സ് തട്ടിപ്പറിച്ചു ബൈക്കിൽ രക്ഷപ്പെടുകയായിരുന്ന യുവാക്കളെ  തടഞ്ഞു വെച്ച്  പോലീസിൽ ഏല്പിച്ചപ്പോൾ പരാതിക്കാരായ ട്രാന്സ്ജെന്ഡേഴ്സിനെ സി.ഐ അനന്തലാലിന്റെ നേതൃത്വത്തിൽ കസ്റ്റഡിയിലെടുക്കുകയായിരുന്നു .വിവരം ചോദിച്ചറിയുക പോലും ചെയ്യാതെ പോലീസ് ഇവരുടെ നേരെ കയ്യേറ്റത്തിന് മുതിരുകയായിരുന്നു.ഇതിനെതിരെയാണ് പ്രതിഷേധം.

പാലക്കാട്:സി.പി.ഐ നേതാവ് പന്ന്യൻ രവീന്ദ്രനെ ദേഹാസ്വാസ്ഥ്യം ഉണ്ടായതിനെ തുടർന്ന് ആശുപത്രിയിൽ പ്രവേശിപ്പിച്ചു.ആന്ജിയോപ്ലാസ്റ്റിക്കു വിധേയനായതിനെ തുടർന്ന് ഇദ്ദേഹത്തിന് ഡോക്ടർമാർ ഒരാഴ്‍ചത്തെ വിശ്രമം നിർദേശിച്ചു.ഇതോടെ പന്ന്യൻ രവീന്ദ്രന്റെ ഒരാഴ്ചത്തെ പരിപാടികളും റദ്ദാക്കി.പാലക്കാട് ജില്ലാ കമ്മിറ്റി ഓഫീസിൽ വെച്ചാണ് രാവിലെ ഇദ്ദേഹത്തിന് ദേഹാസ്വാസ്ഥ്യം ഉണ്ടായത്.കുഴഞ്ഞു വീണ ഇദ്ദേഹത്തിനെ ഉടൻ തന്നെ പാലക്കാട് ജില്ലാ ആശുപത്രിയിൽ പ്രവേശിപ്പിച്ചു.ഓൾ ഇന്ത്യ ബാങ്ക് എംപ്ലോയീസ് ഫെഡറേഷൻ സംസ്ഥാന സമ്മേളനത്തിൽ പങ്കെടുക്കാനാണ് ഇദ്ദേഹം പാലക്കാട് എത്തിയത്.റെവന്യൂ മന്ത്രിയോടും പാലക്കാട് ജില്ലാ സെക്രട്ടറിയോടും സംസാരിച്ചിരിക്കവെയാണ് അദ്ദേഹം കുഴഞ്ഞു വീണത്.

തിരുവനന്തപുരം:കോഴിവില കുറയ്ക്കാനുള്ള സംസ്ഥാന സർക്കാർ തീരുമാനത്തിനെതിരെ സിപിഎം അനുകൂല സംഘടനയായ പൗൾട്രി ഫാമേഴ്സ് ആന്‍റ് ട്രേഡേഴ്സ് സമിതി. ധനമന്ത്രി തോമസ് ഐസകിന്‍റെ വാദം അംഗീകരിക്കാനാവില്ലെന്നും കൂടിയ വിലയ്ക്ക് വിൽക്കുന്നതിനെതിരെ നടപടിയെടുത്താൽ കടകളടച്ച് സമരം നടത്തുമെന്ന മുന്നറിയിപ്പുമായി സംഘടന രംഗത്തെത്തി.ജിഎസ്ടിയിൽ പതിനാലര ശതമാനം നികുതി കുറഞ്ഞിട്ടും സംസ്ഥാനത്തെ കോഴിവില കൂടുകയാണ്. ഈ സാഹചര്യത്തിലാണ് തിങ്കളാഴ്ച മുതൽ 87 രൂപയ്ക്ക് കോഴി വിൽക്കണമെന്ന‍് ധനമന്ത്രി തോമസ് ഐസക് കർശന നിർദേശം നൽകിയത്. എന്നാൽ കോഴി ലഭ്യത കുറഞ്ഞതിനാലാണ് വില കൂടിയതെന്നും വില കുറച്ച് വിൽക്കില്ലെന്നുമാണ് വ്യാപാരി സംഘടനയായ പൗൾട്രി ഫാമേഴ്സ് ആന്‍റ് ട്രേഡേഴ്സ് സമിതിയുടെ നിലപാട്.ഞായറാഴ്ച തൃശൂരിൽ ചേരുന്ന യോഗത്തിൽ സർക്കാർ തീരുമാനത്തിനെതിരെ സമരമടക്കമുള്ള കാര്യങ്ങൾ ചർച്ച ചെയ്യും. തമിഴ്നാട്ടിൽ നിന്ന് കോഴി എത്തിക്കുന്നത് നിർത്തിവച്ച് കടകളടച്ച് സമരം ചെയ്യാനാണ് ആലോചന.

തിരുവനന്തപുരം:തിരുവനന്തപുരം, വേളിയില്‍ റെയില്‍വേ ട്രാക്കില്‍ സഹോദരങ്ങളുടെ മൃതദേഹങ്ങള്‍ കണ്ടെത്തി.  തിരുവനന്തപുരം ചെന്നിലോട് സ്നേഹ ഭവനില്‍ ഷിബിയുടെ മക്കളായ ഫെബിന്‍ ( 6), ഫെബ ( 9 ) എന്നിവരുടെ മൃതദേഹങ്ങളാണ് കണ്ടെത്തിയത്. കുട്ടികളെ കൊലപ്പെടുത്തിയ ശേഷം പിതാവ് ആത്മഹത്യ ചെയ്തെന്ന് സംശയമുണ്ട്.