Kerala

മയ്യിൽ:ആഡംബര കാറിൽ കഞ്ചാവ് കടത്തിയ രണ്ടു വിദ്യാർത്ഥികളെ പോലീസ് അറസ്റ്റ് ചെയ്തു.50 ഗ്രാം കഞ്ചാവ് ഇവരിൽ നിന്നും പിടിച്ചെടുത്തു.കയരളം മൊട്ടയിലെ തമീം(21),പെരുമാച്ചേരിയിലെ നബീൽ(18) എന്നിവരെയാണ്  ശ്രീകണ്ഠപുരം എക്‌സൈസ് ഇൻസ്പെക്റ്റർ പി.പി ജനാർദനനും സംഘവും അറസ്റ്റ് ചെയ്തത്.വിദ്യാർഥികൾ ഓടിച്ചുപോകുന്ന ആഡംബര കാർ  പിന്തുടർന്ന് ചോദ്യം ചെയ്തപ്പോഴാണ് കഞ്ചാവ് കടത്തുന്ന വിവരം ലഭിച്ചത്.സ്ഥിരമായി കഞ്ചാവ് ഉപയോഗിക്കുന്ന ഇവർ മറ്റു കുട്ടികൾക്ക് എത്തിച്ചു കൊടുത്ത് ആഡംബര ജീവിതം നയിക്കുന്നവരാണ്.തിരുവനന്തപുരം രെജിസ്ട്രേഷനിലുള്ള കാറിന്റെ വിവിധ അറകളിൽ പല പൊതികളിലായി സൂക്ഷിച്ച നിലയിലായിരുന്നു കഞ്ചാവ് കണ്ടെത്തിയത്.

തലശ്ശേരി:ധർമടം കോളാട് പാലത്തിനു സമീപം ചെമ്മീൻ ഷെഡിൽ നിന്നും അരലക്ഷം രൂപയുടെ കള്ളനോട്ടുകൾ പിടികൂടി.രണ്ടായിരത്തിൻറെ 25 കള്ളനോട്ടുകളാണ് പിടികൂടിയത്. ചെമ്മീൻകെട്ടിലെ തൊഴിലാളി ആസാം സ്വദേശി ജിയറുൽ ഹക്ക് ആണ് നോട്ടുകൾ ഒളിപ്പിച്ചുവെച്ചത്. എൻ.ഐ എ  നൽകിയ വിവരത്തിന്റെ അടിസ്ഥാനത്തിൽ പെരുമ്പാവൂർ പോലീസ് ഒരാളെ അറസ്റ്റ് ചെയ്തിരുന്നു.ഇയാളിൽ നിന്നും 16,000 രൂപയുടെ കള്ളനോട്ട് പോലീസ് പിടിച്ചെടുത്തു.ഇയാളെ ചോദ്യം ചെയ്തപ്പോൾ കിട്ടിയ വിവരത്തിന്റെ അടിസ്ഥാനത്തിലാണ് ജിയാരുൾ  ഹക്കിനെ പോലീസ് അറസ്റ്റ് ചെയ്തത്.ധർമ്മടത്തെ ചെമ്മീൻകെട്ടിൽ തൊഴിലാളികൾ താമസിക്കുന്ന ഷെഡിൽ 50,000 രൂപയുടെ കള്ളനോട്ടുകൾ ഒളിപ്പിച്ചിട്ടുണ്ടെന്ന ഇയാളുടെ മൊഴിയെ തുടർന്നാണ് പെരുമ്പാവൂർ പോലീസ് ഇയാളെയും കൂട്ടി ധർമ്മടത്തെത്തിയത്.ധർമടം എസ്.ഐ വി.വി ശ്രീജേഷിന്റെ നേതൃത്വത്തിൽ പെരുമ്പാവൂർ പോലീസും ചേർന്ന് നടത്തിയ അന്വേഷണത്തിലാണ് ചെമ്മീൻകെട്ടിൽ നിന്നും തുണിയിൽ പൊതിഞ്ഞ നിലയിൽ നോട്ടുകൾ കണ്ടെത്തിയത്..എട്ട് വർഷമായി സംസ്ഥാനത്തുള്ള ഇയാൾ നിരവധി സ്ഥലങ്ങളിൽ കള്ളനോട്ട് വിതരണം ചെയ്തിട്ടുണ്ടെന്നാണ് പോലീസ് പറയുന്നത്.അസമിൽ നിന്നാണ് ഇയാൾക്ക് കള്ളനോട്ടു ലഭിക്കുന്നതെന്ന്‌ ഇയാൾ പോലീസിനോട് പറഞ്ഞു.ഒരുലക്ഷം രൂപയുടെ കള്ളനോട്ടിന് അൻപതിനായിരം രൂപയാണ് നൽകേണ്ടതെന്നും ഇയാൾ പറഞ്ഞു.

തിരുവനന്തപുരം: ആരോഗ്യമന്ത്രി കെ.കെ. ശൈലജ രാജിവയ്ക്കണമെന്നാവശ്യപ്പെട്ട് നിയമസഭാ കവാടത്തിൽ പ്രതിപക്ഷ എംഎൽഎമാർ നടത്തിവന്ന സത്യഗ്രഹ സമരം അവസാനിപ്പിച്ചു. ബാലാവകാശ കമ്മീഷൻ നിയമനത്തിൽ മന്ത്രിക്കെതിരെയുള്ള പരാമർശങ്ങൾ ഹൈക്കോടതി ഡിവിഷൻ ബെഞ്ച് നീക്കിയതിന് പിന്നാലെയാണ് പ്രതിപക്ഷ എംഎൽഎമാർ സത്യഗ്രഹ സമരം അവസാനിപ്പിച്ചത്.ആരോഗ്യമന്ത്രിക്കെതിരായ പ്രതിഷേധം പൊതു സമൂഹത്തിന്‍റെ പിന്തുണയോടെ തുടരുമെന്നും പ്രതിപക്ഷ നേതാവ് രമേശ് ചെന്നിത്തല പറഞ്ഞു.

കൊച്ചി: ബാലാവകാശ കമ്മീഷൻ നിയമനത്തിൽ ആരോഗ്യമന്ത്രി കെ.കെ. ശൈലജയ്ക്കെതിരായ പരാമർശം ഹൈക്കോടതി നീക്കി. കമ്മീഷൻ നിയമനത്തിൽ രാഷ്ട്രീയക്കാരെ തിരുകി കയറ്റാൻ മന്ത്രി ശ്രമിച്ചെന്ന പരാമർശമാണ് നീക്കം ചെയ്തത്. മന്ത്രിയെ കേൾക്കാതെയാണ് പരാമർശങ്ങൾ നടത്തിയതെന്നും കോടതി നിരീക്ഷിച്ചു. സിംഗിൾ ബെഞ്ചിന്‍റെ പരാമർശങ്ങൾ ചീഫ് ജസ്റ്റീസ് അധ്യക്ഷനായ ഡിവിഷൻ ബെഞ്ചാണ് നീക്കിയത്.ബാലാവകാശ  കമ്മീഷനിലേക്കുള്ള നിയമനം റദ്ദാക്കിയ സിംഗിൽ ബെഞ്ച് നടപടി നിലനിൽക്കുമെന്നും ഡിവിഷൻ ബെഞ്ച് അറിയിച്ചു. ശൈലജയ്ക്കെതിരായ പരാമർശങ്ങൾ നീക്കം ചെയ്യണമെന്ന് ആവശ്യപ്പെട്ട് ബുധനാഴ്ചയാണ് സർക്കാർ ഡിവിഷൻ ബെഞ്ചിനെ സമീപിച്ചത്.