India

ന്യൂഡൽഹി:മധ്യപ്രദേശിൽ മുഖ്യമന്ത്രി കമൽനാഥുമായുള്ള ഭിന്നതയ്‌ക്കൊടുവിൽ യുവനേതാവ് ജ്യോതിരാദിത്യ സിന്ധ്യ കോൺഗ്രസിൽ നിന്നും രാജിവെച്ച് ബിജെപിയിലേക്ക്.പ്രധാനമന്ത്രി നരേന്ദ്രമോദിയെയും ആഭ്യന്തരമന്ത്രി അമിത്ഷായെയും ഇന്നലെ രാവിലെ സന്ദർശിച്ച് ചർച്ച നടത്തിയശേഷം കോൺഗ്രസിൽ നിന്നുള്ള രാജിക്കത്ത് സിന്ധ്യ തന്നെ ട്വീറ്റ് ചെയ്തു.രാജ്യസഭാസീറ്റും ക്യാബിനറ്റ് പദവിയോട് കൂടി കേന്ദ്രമന്ത്രി സ്ഥാനവും നല്‍കുമെന്ന ബിജെപിയുടെ ഉറപ്പിൻമേലാണ് രാജി എന്നാണ് സൂചന. സിന്ധ്യക്കൊപ്പം നിൽക്കുന്ന 19 എംഎൽഎമാർ രാജി വെച്ചു. ഇനിയും രാജികൾ ഉണ്ടാകുമെന്നാണ് സൂചന.ജ്യോതിരാദിത്യ സിന്ധ്യ പക്ഷത്തുള്ള 19 എംഎൽഎമാർ രാജി വെച്ചതോടെ സംസ്ഥാനം രാഷ്ട്രപതി ഭരണത്തിലേക്ക് നീങ്ങിയേക്കും.രാജിക്ക് പിന്നാലെ ബംഗളുരുവിലെ റിസോര്‍ട്ടിലേക്ക് മാറ്റിയിട്ടുള്ള സിന്ധ്യപക്ഷക്കാരായ 17 പേര്‍ ഉള്‍പ്പെടെ 19 എം.എല്‍.എമാരും ഗവര്‍ണര്‍ക്ക് രാജിക്കത്തയച്ചു. ഇവരില്‍ ആറ് മന്ത്രിമാരെ പുറത്താക്കാന്‍ മുഖ്യമന്ത്രി കമല്‍നാഥ് ഗവര്‍ണര്‍ക്ക് ശുപാര്‍ശ നല്‍കി.വിമതരുടെ രാജിയോടെ 114 എം. എല്‍. എമാരുണ്ടായിരുന്ന കോണ്‍ഗ്രസിന്റെ അംഗബലം 95 ആയി കുറഞ്ഞു.ഇന്നലെ വൈകിട്ട് കൂടിയ കോണ്‍ഗ്രസ് നിയമസഭാ കക്ഷി യോഗത്തില്‍ 92 എം. എല്‍. എമാരേ പങ്കെടുത്തുള്ളൂ.മൂന്ന് പേര്‍ കൂടി രാജിവച്ചേക്കുമെന്നതിന്റെ സൂചനയാണിത്.എം.എല്‍.എമാരെ മാറ്റിയതു മുതല്‍ അനുരഞ്ജനത്തിനായി കോണ്‍ഗ്രസ് നേതൃത്വം ശ്രമിച്ചെങ്കിലും സിന്ധ്യ ചര്‍ച്ചയ്‌ക്ക് തയ്യാറായില്ല. പി.സി.സി അദ്ധ്യക്ഷ സ്ഥാനം നല്‍കാന്‍ കമല്‍നാഥ് സമ്മതിച്ചെങ്കിലും സിന്ധ്യ അതിനും വഴങ്ങിയില്ല. രാജസ്ഥാന്‍ ഉപമുഖ്യമന്ത്രി സച്ചിന്‍ പൈലറ്റടക്കമുള്ള നേതാക്കളും സിന്ധ്യയുമായി ബന്ധപ്പെട്ടിരുന്നു. അതും ഫലം കണ്ടില്ല.അതേസമയം പ്രതിസന്ധി മാറിക്കടക്കുമെന്ന ആത്മവിശ്വസം എംഎൽഎമാരുടെ യോഗത്തിൽ കമൽനാഥ് പ്രകടിപ്പിച്ചു. ഉപതെരഞ്ഞെടുപ്പിന് ഒരുങ്ങാൻ അദ്ദേഹം പാർട്ടി പ്രവർത്തകർക്ക് നിർദേശം നൽകി.പടിഞ്ഞാറന്‍ ഉത്തര്‍പ്രദേശിന്റെ ചുമതലയുള്ള കോണ്‍ഗ്രസ് ജനറല്‍ സെക്രട്ടറിയായിരുന്ന ജ്യോതിരാദിത്യ സിന്ധ്യ രാജീവ് ഗാന്ധിയുടെ വിശ്വസ്തനായിരുന്ന മാധവറാവു സിന്ധ്യയുടെ മകനാണ്. 2012 മുതല്‍ 2014 വരെ മന്‍മോഹന്‍ സിംഗ് സര്‍ക്കാരില്‍ ഊര്‍ജ്ജ മന്ത്രി ആയിരുന്നിട്ടുണ്ട്.

മുംബൈ: യെസ് ബാങ്ക് സ്ഥാപകന്‍ റാണാ കപൂറിനെതിരെ നടപടി കര്‍ശനമാക്കി കേന്ദ്രം. റാണ കപൂറിനും ഭാര്യയ്ക്കുമെതിരെ എന്‍ഫോഴ്‌സ്‌മെന്റ് ഡയറക്ടറേറ്റ് ലുക്ക് ഔട്ട് നോട്ടിസ് പുറപ്പെടുവിച്ചു. കള്ളപ്പണ ഇടപാടുമായി ബന്ധപ്പെട്ടാണ് നടപടി.റാണാ കപൂറിന്റെ മുംബൈയിലെ വസതിയില്‍ എന്‍ഫോഴ്സ്മെന്റ് റെയ്ഡ് നടത്തി. കള്ളപ്പണ ഇടപാടുമായി ബന്ധപ്പെട്ടാണ് മുംബൈ സമുദ്രമഹലിലെ വസതിയില്‍ പരിശോധന നടത്തിയത്. കള്ളപ്പണം വെളുപ്പിക്കല്‍ നിരോധന നിയമം പ്രകാരം റാണാ കപൂറിനെതിരെ കേസ് രജിസ്റ്റര്‍ ചെയ്തു.ഡി എച്ച്‌ എഫ് എല്ലിന് ക്രമംവിട്ട് വായ്പ നല്‍കിയതിന് പിന്നാലെ റാണ ഇരുവരുടെയും അക്കൗണ്ടുകളിലേക്ക് കോടികള്‍ എത്തിയതായി ആരോപണമുയര്‍ന്നിരുന്നു.ഇത് ശരിയാണെന്ന് അന്വേഷണത്തില്‍ ഇ ഡി കണ്ടെത്തി.സാമ്പത്തിക പ്രതിസന്ധിയെ തുടര്‍ന്ന് വ്യാഴാഴ്ചയാണ് യെസ് ബാങ്കിന്റെ നിയന്ത്രണം റിസര്‍വ് ബാങ്ക് ഓഫ് ഇന്ത്യ (ആര്‍ ബി ഐ) ഏറ്റെടുത്തത്. 50,000 രൂപ 30 ദിവസത്തേക്ക് മൊറട്ടോറിയം പ്രഖ്യാപിച്ചിട്ടുണ്ട്. ഇതോടെ നിക്ഷേപകര്‍ക്ക് അൻപതിനായിരം രൂപ മാത്രമേ പിന്‍വലിക്കാന്‍ കഴിയൂ.  ബാങ്ക് മേധാവികളുടെ കെടുകാര്യസ്ഥതയാണ് ഒരു സ്ഥാപനം ഇത്തരത്തില്‍ പ്രതിസന്ധിയിലേക്ക് നീങ്ങുന്നതെന്ന് ധനകാര്യമന്ത്രി നിര്‍മല സീതാരാമന്‍ ഇന്നലെ പ്രതികരിച്ചിരുന്നു. പിന്നാലെയാണ് വെളളിയാഴ്ച രാത്രിയോടെ റാണ കപൂറിന്റെ വസതിയില്‍ ഇ.ഡി പരിശോധന നടത്തിയത്.പ്രതിസന്ധി സംബന്ധിച്ച വാര്‍ത്ത പുറത്ത് വന്നതോടെ ബാങ്കിന്‍റെ ഓഹരിമൂല്യം വിപണിയില്‍ കുത്തനെ ഇടിയുകയും ചെയ്തിരുന്നു.

ന്യൂഡൽഹി:ഡല്‍ഹി കലാപത്തിൽ മരിച്ചവരിൽ തിരിച്ചറിയാത്ത മൃതദേഹങ്ങള്‍ മാര്‍ച്ച്‌ 11 വരെ സംസ്കരിക്കരുതെന്ന് ഡൽഹി ഹൈക്കോടതി നിര്‍ദേശം.പോസ്റ്റുമോര്‍ട്ടം ചെയ്യുന്നത്തിന്റെ വീഡിയോ ദൃശ്യങ്ങള്‍ പകര്‍ത്തണമെന്നും ഡി.എന്‍.എ സാമ്പിളുകൾ ശേഖരിച്ച്‌ സൂക്ഷിക്കണമെന്നും ആശുപത്രികള്‍ക്ക് ഹൈകോടതി നിര്‍ദേശം നല്‍കി.വടക്കുകിഴക്കന്‍ ഡല്‍ഹിയില്‍ വംശീയാതിക്രമത്തില്‍ 53 പേര്‍ കൊല്ലപ്പെട്ടിരുന്നു. ജി.ടി.ബി ആശുപത്രിയില്‍ 44ഉം ആര്‍.എം.എല്‍ ആശുപത്രിയില്‍ അഞ്ചും എല്‍.എന്‍.ജെ.പിയില്‍ മൂന്നും ജഗ് പ്രവേശ് ചന്ദ ആശുപത്രിയില്‍ ഒരാളുമടക്കം 53 പേര്‍ മരിച്ചുവെന്നാണ് കണക്കുകള്‍.എന്നാൽ യഥാര്‍ഥ മരണ സംഖ്യ പുറത്തുവിടാന്‍ ഡല്‍ഹി പൊലീസ് തയാറായിട്ടില്ല. കാണാതായവരുടേയും മോര്‍ച്ചറിയില്‍ സൂക്ഷിച്ചിരിക്കുന്ന അജ്ഞാത മൃതദേഹങ്ങളുടേയും വിശദാംശങ്ങള്‍ പുറത്തുവിടണമെന്ന് വ്യാഴാഴ്ച പൊലീസിന് ഡല്‍ഹി ൈഹകോടതി നിര്‍ദേശം നല്‍കിയിരുന്നു.