ഒഡീഷ: പാക്കിസ്ഥാനു വേണ്ടി ഒഡീഷയിലെ ബാലസോറിലുള്ള ഇന്റഗ്രേറ്റഡ് ടെസ്റ്റ് റേഞ്ചില്‍ (ഐടിആര്‍) ചാരപ്പണി നടത്തിയ ഫോട്ടോഗ്രാഫര്‍ക്ക് ആജീവനാന്ത തടവ് ശിക്ഷയും പിഴയും. ഐടിആറിലെ ഡിആര്‍ഡിഒ ലബോറട്ടറിയിലെ കരാര്‍ ജീവനക്കാരനായ ഫോട്ടോഗ്രാഫര്‍ ഈശ്വര്‍ ചന്ദ്ര ബെഹെറയാണ് കുറ്റവാളി.ഇയാള്‍ പാക്കിസ്ഥാന്റെ ഐഎസ്‌ഐ ഏജന്‍സിക്കും മറ്റു രഹസ്യാന്വേഷണ ഏജന്‍സികള്‍ക്കും സുപ്രധാന വിവരങ്ങള്‍ കൈമാറിയെന്ന് കണ്ടെത്തിയതിനെ തുടര്‍ന്നാണ് നടപടി. ജഡ്ജി ഗിരിജ പ്രസാദ് മോഹന്‍പത്രയാണ് ശിക്ഷ പ്രഖ്യാപിച്ചത്.പ്രതിക്ക് 10,000 രൂപ പിഴയും കോടതി വിധിച്ചു. ഐപിസി 121 എ രാജ്യദ്രോഹം, 120 ബി ക്രിമിനല്‍ ഗൂഢാലോചന എന്നീ വകുപ്പുകളടക്കം ചുമത്തിയാണ് ശിക്ഷ വിധിച്ചത്.സുപ്രധാന വിവരങ്ങള്‍ ചോര്‍ത്തിയതിന് രഹസ്യാന്വേഷണ ഏജന്‍സിയാണ് ഈശ്വറിനെ അറസ്റ്റ് ചെയ്തത്. ഇയാള്‍ക്കെതിരെ പൊലീസ് കേസ് രജിസ്റ്റര്‍ ചെയ്യുകയും പിന്നീട് അന്വേഷണം ക്രൈംബ്രാഞ്ച് ഏറ്റെടുക്കുകയുമായിരുന്നു.വിവിധ രാജ്യങ്ങളില്‍ നിന്ന് ഇയാളുടെ ബാങ്ക് അക്കൗണ്ടിലേക്ക് പണം എത്തിയിട്ടുണ്ടെന്ന് പൊലീസ് സ്ഥിരീകരിച്ചു. അറസ്റ്റിലാകുന്നതിന് 10 മാസം മുൻപ് മുതല്‍ ഈശ്വര്‍ പാകിസ്ഥാന്റെ ഇന്റര്‍ സര്‍വീസസ് ഇന്റലിജന്‍സിനായി ചാരപ്പണി നടത്തുകയായിരുന്നുവെന്നാണ് പ്രോസിക്യൂഷന്‍ കോടതിയെ അറിയിച്ചത്.മയൂര്‍ഭഞ്ച് ജില്ലയിലെ കാന്തിപൂര്‍ സ്വദേശിയാണ് ഈശ്വര്‍. 2007 മുതലാണ് ഇയാള്‍ കരാര്‍ അടിസ്ഥാനത്തില്‍ ഐടിആറിലെ കണ്‍ട്രോള്‍ ടവറിന്റെ സിസിടിവി വിഭാഗത്തിൽ ഫോട്ടോഗ്രാഫറായി ജോലിയില്‍ പ്രവേശിച്ചത്.
