India

ന്യൂഡല്‍ഹി: വിദേശ രാജ്യങ്ങള്‍ക്ക് നല്‍കുന്ന വിലയെക്കാള്‍ കൂടിയ നിരക്കില്‍ ഇന്ത്യയില്‍ വില്‍പന നടത്താനുള്ള വാക്സിന്‍ കമ്പനികളുടെ തീരുമാനത്തിനെതിരെ കടുത്ത വിമര്‍ശനമുയര്‍ന്ന സാഹചര്യത്തില്‍ ഇടപെട്ട് കേന്ദ്രം.വാക്സിന് വില കുറക്കാന്‍ ഉല്‍പാദകരായ സെറം ഇന്‍സ്റ്റിറ്റ്യൂട്ട് ഓഫ് ഇന്ത്യ, ഭാരത് ബയോടെക് എന്നിവയ്ക്ക് കേന്ദ്രം നിര്‍ദേശം നല്‍കി.കേന്ദ്രം നിര്‍ദേശം നല്‍കിയ സാഹചര്യത്തില്‍ ഇരു കമ്പനികളും പുതിയ വില ഉടന്‍ പ്രഖ്യാപിക്കുമെന്നാണ് സൂചന.സെറം ഇന്‍സ്റ്റിറ്റ്യുട്ട് ഉല്‍പാദിപ്പിക്കുന്ന കോവിഷീല്‍ഡിന് സംസ്ഥാന സര്‍ക്കാറുകള്‍ക്ക് 400 രൂപയും സ്വകാര്യ ആശുപത്രികള്‍ക്ക് 600 രൂപയുമാണ് ഒരു വാക്സിന് വിലയിട്ടിരുന്നത്. ഹൈദരാബാദ് ആസ്ഥാനമായ ഭാരത് ബയോടെക് വാക്സിനായ കൊവാക്സിന് യഥാക്രമം 600ഉം 1,200ഉം ആണ് വില. ഇരു കമ്പനികളും കേന്ദ്ര സര്‍ക്കാറിന് 150 രൂപക്കാണ് വാക്സിന്‍ നല്‍കുക.ലോകത്തെ ഏറ്റവും വലിയ വാക്സിന്‍ നിര്‍മാതാക്കളാണ് സെറം ഇന്‍സ്റ്റിറ്റ്യൂട്ട്.കേന്ദ്ര സര്‍ക്കാര്‍ പുതുക്കിയ വാക്സിന്‍ നിയമപ്രകാരം മേയ് ഒന്നിനു ശേഷം മരുന്നുകമ്പനികള്‍ പകുതി വാക്സിനുകള്‍ കേന്ദ്ര സര്‍ക്കാറിന് നല്‍കണം. അവശേഷിച്ച 50 ശതമാനം സംസ്ഥാന സര്‍ക്കാറുകള്‍ക്കോ സ്വകാര്യ വിപണിയിലോ വില്‍ക്കാം.ഇതോടെ വില കുത്തനെ കൂട്ടി വില്‍ക്കാന്‍ കളമൊരുക്കിയാണ് പുതിയ വാക്സിന്‍ നയം കേന്ദ്ര സര്‍ക്കാര്‍ പ്രഖ്യാപിച്ചതെന്ന് ആക്ഷേപമുയർന്നു.കേന്ദ്രത്തിന് നല്‍കുന്ന വിലക്ക് എന്തുകൊണ്ട് സംസ്ഥാന സര്‍ക്കാറുകള്‍ക്ക് നല്‍കുന്നില്ലെന്ന ചോദ്യവും ഉയർന്നു.മരുന്ന് വില്‍പനവഴി കൊള്ളലാഭം ഉണ്ടാക്കാനുള്ള സമയമല്ലിതെന്നും കേന്ദ്രത്തിന് നല്‍കുന്ന 150 രൂപക്ക് സംസ്ഥാനങ്ങള്‍ക്കും നല്‍കണമെന്നും ഡല്‍ഹി മുഖ്യമന്ത്രി അരവിന്ദ് കെജ്രിവാള്‍ അഭിപ്രായപ്പെട്ടു. കടുത്ത വിവേചനപരമായ തീരുമാനം വഴി വാക്സിന്‍ നിര്‍മാതാക്കള്‍ക്ക് 1.11 ലക്ഷം കോടി കൊള്ളലാഭമുണ്ടാക്കാനാണ് കേന്ദ്ര സര്‍ക്കാര്‍ അവസരമൊരുക്കിയതെന്ന് കോൺഗ്രസ്സും  കുറ്റപ്പെടുത്തി.ആദ്യം നല്‍കിയ വില പിന്നീട് പുതുക്കിയ സെറം ഇന്‍സ്റ്റിറ്റ്യൂട്ട് രണ്ടു വിലയെയും ന്യായീകരിച്ചിരുന്നു. ആദ്യം സര്‍ക്കാര്‍ സഹായത്തോടെ ആയതിനാലാണ് ആ വിലക്ക് നല്‍കിയതെന്നും കൂടുതല്‍ ഉല്‍പാദനത്തിന് കൂടുതല്‍ നിഷേപം ആവശ്യമായതിനാലാണ് വില കൂട്ടിയതെന്നുമായിരുന്നു വിശദീകരണം.

കൊൽക്കത്ത: പശ്ചിമബംഗാളിൽ ഏഴാം ഘട്ട വോട്ടെടുപ്പ് ഇന്ന്. 34 മണ്ഡലങ്ങളിലേക്കുള്ള തെരഞ്ഞെടുപ്പാണ് ഇന്ന് നടക്കുന്നത്.മുൻഘട്ടങ്ങളിൽ വോട്ടെടുപ്പിനിടെ വ്യാപക അക്രമം അരങ്ങേറിയതിനാൽ അതീവ ജാഗ്രതയിലാണ് തെരഞ്ഞെടുപ്പ് കേന്ദ്രങ്ങൾ. 796 കമ്പനി കേന്ദ്ര സേനയെ ആണ് ഇവിടങ്ങളിൽ തെരഞ്ഞെടുപ്പ് കമ്മീഷൻ നിയോഗിച്ചിട്ടുള്ളത്.കൊറോണ വ്യാപനം രൂക്ഷമായ സാഹചര്യത്തിൽ റോഡ് ഷോയ്ക്കും റാലികൾക്കും കർശന നിയന്ത്രണങ്ങൾ ഏർപ്പെടുത്തിയിട്ടുണ്ട്.268 സ്ഥാനാര്‍ഥികളാണ് ഈ ഘട്ടത്തില്‍ മത്സരരംഗത്തുള്ളത്. ഇതില്‍ 37 പേര്‍ വനിതകളാണ്. 86 ലക്ഷം ജനങ്ങള്‍ വേട്ടെടുപ്പില്‍ പങ്കാളികളാകും. സ്ഥാനാർത്ഥികൾ മരിച്ച സംസേർഗഞ്ച്, ജംഗിപൂർ എന്നിവിടങ്ങളിൽ വോട്ടെടുപ്പ് മെയ് 16ലേക്ക് മാറ്റിയിട്ടുണ്ട്.സംസ്ഥാനത്ത് അടുത്ത ഘട്ട വോട്ടെടുപ്പ് ഏപ്രിൽ 29നാണ് നടക്കുന്നത്. ഇതോടെ ബംഗാളിലെ തെരഞ്ഞെടുപ്പ് അവസാനിക്കും. മെയ് രണ്ടിനാണ് വോട്ടെണ്ണൽ. കൊറോണ വ്യാപനത്തിന്റെ പശ്ചാത്തലത്തിൽ ഏർപ്പെടുത്തിയിരിക്കുന്ന മാനദണ്ഡങ്ങൾ കർശനമായി പാലിക്കണമെന്ന് പ്രധാനമന്ത്രി നരേന്ദ്രമോദിയും ജനങ്ങളോട് ആവശ്യപ്പെട്ടിട്ടുണ്ട്.

ന്യൂഡൽഹി: മെഡിക്കല്‍ ഓക്സിജനും അനുബന്ധ മെഡിക്കൽ ഉപകരണങ്ങൾക്കുമുള്ള കസ്റ്റംസ് തീരുവ  ഒഴിവാക്കി കേന്ദ്രസർക്കാർ.തീരുമാനം ഉടനടി പ്രാബല്യത്തില്‍ വരും.രാജ്യത്ത് മെഡിക്കല്‍ ഓക്സിജന്‍ ലഭ്യത വര്‍ധിപ്പിക്കാന്‍ സ്വീകരിച്ച നടപടികള്‍ അവലോകനം ചെയ്യാന്‍ പ്രധാനമന്ത്രി നരേന്ദ്ര മോദിയുടെ അധ്യക്ഷതയില്‍ ശനിയാഴ്ച ഉന്നതതല യോഗം ചേര്‍ന്നിരുന്നു. ഈ യോഗത്തിലാണ് നിര്‍ണായക തീരുമാനം കൈക്കൊണ്ടത്.രാജ്യത്ത് മെഡിക്കല്‍ ഓക്സിജന്റെയും വീടുകളിലെയും ആശുപത്രികളിലെയും രോഗീപരിചരണത്തിന് ആവശ്യമായ സാമഗ്രികകളുടെയും വിതരണം വര്‍ധിപ്പിക്കേണ്ടത് അത്യാവശ്യമാണെന്ന് പ്രധാനമന്ത്രി യോഗത്തില്‍ പറഞ്ഞു.ഓക്സിജന്റെയും ചികിത്സാ സാമഗ്രികളുടെയും ലഭ്യത ഉറപ്പാക്കാന്‍ എല്ലാ മന്ത്രാലയങ്ങളും വകുപ്പുകളും യോജിച്ച്‌ പ്രവര്‍ത്തിക്കണമെന്നും അദ്ദേഹം കൂട്ടിച്ചേര്‍ത്തു. ജനറേറ്ററുകള്‍, സ്റ്റോറേജ് ടാങ്കുകള്‍, ഫില്ലിങ് സംവിധാനങ്ങള്‍, കോണ്‍സെന്‍ട്രേറ്ററുകള്‍ തുടങ്ങി ആരോഗ്യ രംഗത്ത് ആവശ്യമായ ഉപകരണങ്ങളുടെ ഇറക്കുമതിക്കും ഈ ഇളവുണ്ടാകും. കസ്റ്റംസ് ക്ലിയറന്‍സ് വിഷയങ്ങള്‍ പരിഹരിക്കാന്‍ ഒരു നോഡല്‍ ഓഫിസറെയും നിയമിച്ചു.ഇറക്കുമതി ചെയ്യുന്ന കൊറോണ പ്രതിരോധ വാക്‌സിനുകൾക്കും കസ്റ്റംസ് തീരുവ ഒഴിവാക്കാൻ തീരുമാനമായിട്ടുണ്ട്.മൂന്നുമാസത്തേക്കാണ് ഇവയ്ക്കും തീരുവ ഒഴിവാക്കുക.പ്രധാനമന്ത്രിയുടെ നേതൃത്വത്തിൽ ചേർന്ന അടിയന്തിര യോഗത്തിൽ കേന്ദ്രമന്ത്രിമാരായ നിർമ്മല സീതാരാമൻ, പിയുഷ് ഗോയൽ എന്നിവരടക്കം പങ്കെടുത്ത് സ്ഥിതിഗതികൾ വിശദീകരിച്ചു. കൂടാതെ പ്രധാനമന്ത്രിയുടെ തീരുമാനം സ്വാഗതാർഹമാണെന്നും നിലവിലെ സ്ഥിതി ഉടൻ മെച്ചപ്പെടുമെന്നും യോഗത്തിന് ശേഷം പിയുഷ് ഗോയൽ പ്രതികരിച്ചു.

ന്യൂഡല്‍ഹി:രാജ്യത്ത് കൊവിഡ് വ്യാപനം രൂക്ഷമായിരിക്കെ നിലവിലെ സാഹചര്യം വിലയിരുത്താനായി പ്രധാനമന്ത്രി നരേന്ദ്രമോദി വിളിച്ച മുഖ്യമന്ത്രിമാരുടെ യോഗം തുടങ്ങി. കേരളത്തെ പ്രതിനിധീകരിച്ച്‌ മുഖ്യമന്ത്രി പിണറായി വിജയനും യോഗത്തില്‍ പങ്കെടുക്കുന്നുണ്ട്. വാക്‌സിന്‍ ക്ഷാമം പരിഹരിക്കുന്നതിനുളള നടപടികള്‍ക്കൊപ്പം തുടര്‍ വിതരണവും യോഗത്തില്‍ ചര്‍ച്ചയാകും.സംസ്ഥാനങ്ങളില്‍ ഏര്‍പ്പെടുത്തുന്ന നിയന്ത്രണങ്ങള്‍, ലോക്ക്ഡൗണിലേക്ക് പോകേണ്ട സാഹചര്യമുണ്ടോ തുടങ്ങി കാര്യങ്ങളെല്ലാം യോഗത്തില്‍ ചര്‍ച്ച ആയേക്കുമെന്നാണ് വിവരം. മുഖ്യമന്ത്രിമാരുമായുളള യോഗം കഴിഞ്ഞശേഷം പന്ത്രണ്ട് മണിയ്‌ക്ക് ഓക്‌സിജന്‍ നിര്‍മ്മാണ കമ്പനി മേധാവികളുമായും പ്രധാനമന്ത്രി കൂടിക്കാഴ്ച നടത്തും. ബംഗാളിലെ തിരഞ്ഞെടുപ്പ് പ്രചാരണം റദ്ദാക്കിയാണ് പ്രധാനമന്ത്രി ഡല്‍ഹിയില്‍ നിന്ന് ഉന്നതതല യോഗങ്ങളില്‍ പങ്കെടുക്കുന്നത്. ഇന്നോ നാളെയോ പ്രധാനമന്ത്രി രാജ്യത്തെ അഭിസംബോധന ചെയ്‌തേക്കുമെന്നും സൂചനയുണ്ട്.