India

ശ്രീനഗർ: ബോളിവുഡിൽ ചരിത്രം കുറിച്ച അമീർഖാൻ ചിത്രം ദംഗലിലൂടെ പ്രേക്ഷക മനസ്സിൽ ഇടം നേടിയ സൈറ വസീമിന്റെ കാർ ദാൽ തടാകത്തിലേക്ക് മറിഞ്ഞു.സൈറയും കുടുംബാംഗങ്ങളും ആയിരുന്നു കാറിൽ സഞ്ചരിച്ചിരുന്നത്. ഡ്രൈവർക്കു നിയന്ത്രണം നഷ്ടപ്പെട്ട് കാർ തടാകത്തിലേക്ക് മറിയുകയായിരുന്നു.സൈറക്ക് പരിക്കുകളില്ല. എന്നാൽ കുടുംബാംഗങ്ങളിൽ ചിലർക്ക് പരിക്കേറ്റതായി റിപ്പോർട്ട് ഉണ്ട്.

അഹമ്മദാബാദ്: ഗുജറാത്തിലെ ഒമ്പതാം ക്ലാസ്സിലെ ഹിന്ദി പാഠപുസ്തകം വിവാദത്തിൽ.ഇതിൽ യേശുക്രിസ്തുവിനെ പിശാച് എന്ന് അഭിസംബോധന ചെയ്തതിനെതിരെ ക്രിസ്തുമത വിശ്വാസികൾ രംഗത്ത് വന്നു കഴിഞ്ഞു. ‘പിശാചായ യേശുവുമായി ബന്ധപ്പെട്ടുള്ള ഒരു സംഭവം ഇപ്പോഴും ഓര്മിക്കപ്പെടുന്നതാണ്’ എന്നാണ് പാഠപുസ്തകത്തിലെ വിവാദ പരാമർശം.സംഭവിച്ചത് അച്ചടിപ്പിശക് മാത്രമാണ് എന്നാണ് വിദ്യാഭ്യാസ വകുപ്പ് നൽകുന്ന വിശദീകരണം. എന്നാൽ ഈ പരാമർശം ഒരു മാസം മുൻപേ ചൂണ്ടികാട്ടിയതാണെന്നാണ് ക്രിസ്ത്യൻ സംഘടനകളുടെ ആരോപണം.

ന്യൂഡൽഹി: കുൽഭൂഷൺ ജാദവിനു നീതി  തേടി രാജ്യാന്തര കോടതിയിൽ ഇന്ത്യയ്ക്കായി    ഹർജി നല്‍കി വാദം തുടരുന്ന അഭിഭാഷകൻ ഹരീഷ് സാൽവെയുടെ പ്രതിഫലം ഒരു രൂപ.  വിദേശകാര്യമന്ത്രി സുഷമ സ്വരാജാണ് ഈ വിവരം വെളിപ്പെടുത്തിയത്. ട്വിറ്ററിലൂടെയാണ് സുഷമ ഇക്കാര്യം വ്യക്തമാക്കിയത്. ഹരീഷ് സാൽവെയെ അഭിഭാഷകനായി ചുമതലപ്പെടുത്തിയതിനു പിന്നാലെയുയർന്ന വിമർശനങ്ങൾക്കുള്ള മറുപടിയായിട്ടാണ് ട്വീറ്റ്.