India

ന്യൂഡൽഹി:മെഡിക്കൽ പ്രവേശനത്തിനുള്ള ദേശീയ യോഗ്യത പരീക്ഷയുടെ ഫലം പ്രസിദ്ധീകരിച്ചു.രാജ്യത്താകെ പതിനൊന്നു ലക്ഷം പേരാണ് പരീക്ഷ എഴുതിയത്.സുപ്രീം കോടതി നിർദ്ദേശം പാലിച്ചാണ് ഫലം പ്രസിദ്ധീകരിച്ചതെന്ന് സി.ബി.എസ്.ഇ ഉദ്യോഗസ്ഥൻ അറിയിച്ചു.ഫലം പുറത്തു വിടുന്നത് മദ്രാസ് ഹൈക്കോടതി മെയ് 24 നു സ്റ്റേ ചെയ്തിരുന്നു.ജൂൺ 12 നു സുപ്രീം കോടതി സി.ബി.എസ്.ഇ ക്കു ഫലം പ്രസിദ്ധീകരിക്കാൻ അനുമതി നൽകുകയായിരുന്നു.

ബംഗളൂരു: വിദേശ രാജ്യങ്ങളുടെ ഉൾപ്പെടെ 31 ഉപഗ്രഹങ്ങളുമായി പി.എസ്.എൽ.വി സി-38 വിക്ഷേപിച്ചു.ശ്രീഹരിക്കോട്ടയിലെ സതീഷ് ധവാൻ സ്പേസ് കേന്ദ്രത്തിൽ നിന്നും ഇന്ന് രാവിലെ 9.20 നായിരുന്നു വിക്ഷേപണം.ഭൗമ നിരീക്ഷണത്തിനുള്ള കാർട്ടോസാറ്റ് -രണ്ടും 30 നാനോ ഉപഗ്രഹങ്ങളുമാണ് ഐ.എസ്.ആർ.ഓ ഒറ്റ വിക്ഷേപണത്തിൽ ഭ്രമണപഥത്തിൽ എത്തിക്കുന്നത്. ഓസ്ട്രിയ,ബെൽജിയം, ചിലി, ചെക്ക് റിപ്പബ്ലിക്, ഫിൻലൻഡ്‌, ഫ്രാൻസ്, ജർമനി, ഇറ്റലി, ജപ്പാൻ, ലാത്വിയ, ലിത്വനിയ, സ്ലോവാക്യ, യു.കെ, യു.എസ്  എന്നീ  രാജ്യങ്ങളുടെ 29 നാനോ ഉപഗ്രഹങ്ങളും കന്യാകുമാരിയിലെ തക്കല നൂറുൽ ഇസ്ലാം യൂണിവേഴ്‌സിറ്റി നിർമിച്ച 15 k.ജി ഭാരമുള്ള നിയുസാറ്റുമാണ് വിക്ഷേപിച്ച മറ്റു ഉപഗ്രഹങ്ങൾ.

ന്യൂഡൽഹി: പ്രതിപക്ഷത്തിന്റെ രാഷ്ട്രപതി സ്ഥാനര്‍ഥിയായി മുന്‍ ലോക്‌സഭാ സ്പീക്കറും കോണ്‍ഗ്രസ്സ് നേതാവുമായ മീരാകുമാറിനെ നിശ്ചയിച്ചു . കോണ്‍ഗ്രസ്സ് പ്രസിഡന്റ് സോണിയ ഗാന്ധിയുടെ അധ്യക്ഷതയില്‍ വ്യാഴാഴ്ച്ച വൈകുന്നേരം ഡല്‍ഹിയില്‍ ചേര്‍ന്ന പ്രതിപക്ഷ കക്ഷികളുടെ യോഗത്തിലാണ് തീരുമാനം.ബിജെപിയുടെ ദളിത് മുഖമായ രാംനാഥ് കോവിന്ദിനെ എന്‍ഡിഎ രാഷ്ട്രപതി സ്ഥാനാര്‍ഥിയാക്കിയപ്പോള്‍ ഒരു ദളിത് സ്ഥാനാര്‍ഥിക്ക് വേണ്ടിയുള്ള പ്രതിപക്ഷത്തിന്റെ അന്വേഷണമാണ് മീരാകുമാര്‍ എന്ന പേരിലേക്ക് എത്തിയത്. മുന്‍ ലോക്‌സഭാ സ്പീക്കറായ മീരാകുമാര്‍ കോണ്‍ഗ്രസിലെ ദളിത് നേതാക്കളില്‍ പ്രധാനിയാണ്.നിലവില്‍ ജെഡിയു, എഐഎഡിഎംകെ, ശിവസേന, ടി.ആര്‍.എസ്‌ എന്നിവരാണ് രാംനാഥ് കോവിന്ദിന്റെ സ്ഥാനാര്‍ഥിത്വത്തിന് എന്‍ഡിഎക്ക് പിന്തുണ പ്രഖ്യാപിച്ചത്.ബിഎസ്പി നേതാവ് മായാവതി മീരാകുമാറിന് പിന്തുണ പ്രഖ്യാപിച്ചു. ആർജെഡി നേതാവ് ലാലു പ്രസാദ് യാദവ് മീരാകുമാറിന് പിന്തുണ അറിയിച്ചതിനൊപ്പം ജനതാദൾ നേതാവും ബീഹാർ മുഖ്യമന്ത്രിയുമായ നിതീഷ് കുമാറിന്റെ പിന്തുണ തേടിയിട്ടുമുണ്ട്.